Iruuku 19
19
Ijeesu ọnịrị Ịzakịyọsị
1Ijeesu ọ na ngụ Ijeriko, dị aa parahu nị. 2Â nyị ọza ịnya aanị ịzọọ ana aā hị́ Ịzakịyọsị. Ọnị ọ vị ohinọyị ọdẹkẹhirehi nịnị nị, ọzọbanyị ọ rẹ vị nị. 3Ee sì ka oni ò re ẹngụ ọza oni Ijeesu vị, ama o yi zụ re e, agụvị ka aza ọ sị rụrụ baaba. Ịzakịyọsị ọnị vị ọza oweyi. 4Di o zwe tụ́ ọvịdị ọkọnị aza ẹnẹẹ, dị ọ na hịrẹ ọchị ụnẹ ọnya ka oni ò re Ijeesu, agụvị ka ịzọọ aa zịị parahu nị. 5Ịjị Ijeesu tù ịzọọ, dị ọ và eyi hịrẹ, di o re Ịzakịyọsị nị. Dị ọ kà a yọ ka, “Ịzakịyọsị, wụsẹ chí vẹ, agụvị ka ẹ yị zụ nyị ka ẹ yị vị ịdị awụ m maa yà ajịnị.” 6Dị Ịzakịyọsị wụsẹ chí vẹ, dị ọ sị ịrajẹ dọ Ijeesu ọzọga tụ́ ini eehi nị.
7Ịjị aza maanị ree, dị ẹyaa rị ihuhu nị, ka, “Ho! Ijeesu o ne ree chí ini irehi ọza odivi o!” 8Dị Ịzakịyọsị kwẹẹtẹ jẹẹ, dị ọ kà a yị Ananyị yị ka, “Re, Ananyị yị! Mị vaa sị achẹva avaba ịsa ọnị mị nyịị mẹ ọpịsarị nịnị ẹyịza; aza ọnị mị vịdị mẹ rị, mi vee sí ọọ yọ oze ẹẹna.” 9Dị Ijeesu kà a yọ ka, “Ẹdọha o si tù aneehi ọnọnị ajịnị; agụvị ka ọza ọnọnị ọnị rẹ vị ozi Abụrahamị. 10#Imt 18.11Agụvị ka ẹmị Ozi ọza onigirima vị ana vẹ ka me sì aza ene vú, dị ma dọ wa há.”
Ụhịrẹyị aza ana a sị ẹkẹhị yị
(Imt 25.14-30)
11Aza màa wụ́ ịrẹyị ẹnẹnị, dị Ijeesu re che ụhịrẹyị ọnya tụ́ ọọ yị wa nị. Ijeesu aa gụrị Ijerusarẹmị, dị aza ee ro o ka obobooro ọnọọ Ohomorihi aa vaa sịị zụ̀ ọ mẹmẹ aa mẹ ịjọva nị. 12Agụvị avọọ, dị Ijeesu kà a yị wa ka, “Â nyị ọzọbanyị ọnya aanị, ana hụrẹ eehi nọ ẹkụra onoze ọnya ka ọnị ọ̀ na rị ohinọyị ịzọọ, dị ọnị ọ̀ vavẹ. 13Dị ọ hị́ ẹẹwụ ini ezi ahụ anị, dị ọ sị achuchu ọnya-ọnya yị wa, dị ọ ka: ‘Waa sịị sẹ̀ ohu nịnị pooro dị ma vẹ!’
14“Anẹkụra anị ệ nyị ịhyẹrẹ anị, dị ẹ tụ́ aza saasa a ka ẹ̀ kà a ka eni e yi sì ka ọ̀ vị ohinọyị ẹnịnị nị. 15Ịjị ọ na sị ohinọyị anị rị, dị ọ vavẹ, dị ọ ka à hị́ ezi ahụ anị ọnị ọ sị ẹkẹhị yị vẹ, di oni ò re ọgụ ọnị ọzọza rị, ẹ mẹ̀ sị sẹ̀ ohu nị. 16Dị ọnịpaapa vẹ nị, dị ọ ka: ‘Ọga, achuchu ọnya awụ ộ rị ọgụ achuchu ẹẹwụ.’ 17Dị ọga anị kà a yọ ka: ‘Akọrọ, ozi ahụ obooro! Agụvị ka wâ nyị ịzẹyịza tụ́ ịnị ịsa oweyi, mị vaa sị wụụ mẹ ohinọyị tụ́ ịrẹsụ ẹkụra ẹẹwụ.’ 18Dị ọnọhụva vẹ nị, dị ọnị rẹ ka: ‘Achuchu ọnya awụ ộ rị ọgụ achuchu ẹẹhị.’ 19Dị ọga anị rẹ kà a yị ọnị ka ọ vaa rị ohinọyị tụ́ ịrẹsụ ẹkụra ẹẹhị nị. 20Dị ọnya vẹ nị, dị ọ ka, ‘Ọga, achuchu ọnya awụ yị. Mị sị ankasihu gụ ọọ ịrẹgụ tẹ nị. 21Agụvị ka angwa awụ vị eneē hí mi, agụvị ka ọza ọkatẹngụ ụ vị nị. Ịsị ụ wẹ̀ yị sị tịtẹ, ụụ̄ sị nị; ịsị u wè yi chire, ụụ̄ há nị.’ 22Dị ọga anị kà a yọ ka: ‘Ẹwụ ozi ahụ odivi ọnọnị! Ịrẹyị irenu awụ m maa sịị mẹ̀ ọkarẹyị awụ nị. Wâ yẹ ka ọza ọkatẹngụ mị vị nị; dị maa sị ịsa ọnị mẹ̀ yị sị tịtẹ, dị mị raa há ịsa oni mè yi chire nị. 23Sị ẹ vẹ dị ụ wẹ̀ yị sị ẹkẹhị amị na tụ́ ịnị ịbankị. M mẹ̀ yaanị vẹ aanị, dị mị na sị ọọ beri ẹtụra anị.’ 24Dị ọga anị kà a yị aza ana jẹẹ pe e ka: ‘Dọ ọ achuchu ọnyara ọnọọ nịnị, dị ụ wa sị yị ọza ana nyị achuchu ẹẹwụ!’ 25Dị ẹ kà a yọ ka: ‘Ọga, achuchu ẹẹwụ ọ nyị nọ!’ 26#Imt 13.12; Ịmk 4.25; Irk 8.18Dị ọga ọnọọ ka: ‘Dị ma kà a wụ nịnị ka ọza ana àa nyị ịsa, á vaa sị ịsaa tụ́ ọọ yị nị. Ọza ẹnẹ ẹ̀ yị nyị ịsa, ọnị ọ̀ọ hyakụ nyị, vị ana aa dọ ọ. 27#Imt 25.14-30Ama ọnịvị amị ẹnẹnị ana ka eni e yi sì ka ma vị ohinọyị ẹnịnị aanị, kụ́ wa vẹ ọ́vịdị amị ịzẹnị, dị ụ wa wụ̀ wa nịnị!’ ”
Aza ệ sị ụbanyị yị Ijeesu, ọ màa vaa ngụ Ijerusarẹmị
(Imt 21.1-11; Ịmk 11.1-11; Ịjọ 12.12-19)
28Ịjị Ijeesu maanị sị ịrẹyị ọnọnị kà, dị ọ tụ́ ọvịdị ẹnịnị aa hịrẹẹ nọ Ijerusarẹmị nị. 29Ọ màa vaa ngụ Ịbẹtị-Ihwegi ọnịrị Ịbẹtanị, ọgụrị ataba ana aā hị́ Ataba Orivi, dị ọ tụ́ ezirẹma anị ẹẹva nị, 30dị ọ ka, “Nọ ịnị ẹkụra ana và eyi ká wụ nịnị avọọ. Wàa maanị yị sị ngụ ịzọọ nịnị kẹnẹ, u vee re ozi ịkẹrịkẹtẹ ọnya ana a za zù, ọza ọọ̀ yị tụra a da. Ngwa a dị ụ wa sị ọọ vẹ nịnị! 31Àa nyị ọza ana kà a ka: ‘Sị ẹ vẹ dị ụ waa ngwa a nịnị?’ Dị ụ kà a yọ nịnị ka agụvị ka Ananyị yị ee sì ọọ yọ nị.” 32Dị ẹnị ana a tụ́ si hu aa na; di e ne tù ọ, anka ọ mẹ̀ rẹ yị kà a yị wa gẹdẹ-gẹdẹ nị. 33Ẹ màa ngwa ozi ịkẹrịkẹtẹ ọnọọ, dị ọza ana nyị họ̀ wa ka, “Sị ẹ vẹ dị ụ waa ngwa ozi ịkẹrịkẹtẹ ọnọọ nịnị?” 34Dị ẹ kà a yọ ka, “Ananyị yị ee sì ọọ nị.” 35Dị ẹnịnị sị ozi ịkẹrịkẹtẹ ọnọọ ve tù Ijeesu nị. Ẹnịnị ệ tụ́ awuru ẹnịnị tụ́ ịrẹma ịkẹrịkẹtẹ ọnọọ, dị ẹ sị Ijeesu yaayịtẹ ị́rẹsụ anị nị. 36Ọ màa na, dị aza aa tụ́ achị ẹnịnịị hi oze nị.
37Ọ màa vaa ngụ Ijerusarẹmị, di o tù ịzị oze zị chí hụụnị Ataba Orivi nị. Dị ọkọnị aza ịrẹma anị aa jẹ, di eyee nowuu ga Ohomorihi nị agụvị avaba ụkọrọ ẹbanyị ene e re. 38#Ahẹ 118.26Dị ẹ ka, “Ohomorihi ọ̀ dà tụ́ ịnị ụbanyị yị ohinọyị ana aa vẹ ịnị ịrẹha Ananyị yị! Ẹngwọọrọ ọ̀ yà ini ihinẹba, di igirima ọ̀ rẹ yà ẹbẹẹba!” 39Dị Anihwarisi ẹnyị ana yà ịnị ọkọnị aza ẹnẹẹ kà a yị Ijeesu ka, “Nda, kà a ka ezirẹma awụ ẹ̀ sị irenu ẹnịnị kú oku!” 40Dị Ijeesu tụ́ ohi, dị ọ kà a yị wa ka, “Ẹma kà a wụ nịnị nị, aza ẹnẹnị èe kú irenu ẹnịnị, vị ịrẹta nịnị ee nowuu tụ́ ẹba nị.”
Ijeesu ộ jị òrèrè agụvị Ijerusarẹmị
41Íjeesu màa vaa ngụ ịnị Ijerusarẹmị, di o re e, ộ jị òrèrè agụvị anị. 42Dị ọ ka, “Àa yẹ wa hyakụ yẹ ajịnị ịsa ana zụ sị ẹngwọọrọ yị wụ! Ama we yi zụ re e nịnị booro aanị. 43Ẹkụhị aa vẹ ọnị ọnịvị vaa kụ́ ezii pe ugene ana kara wụ, dị ẹ rẹ kara wụ okiri-okiri ka asị u re oze zị. 44Dị ẹ vara wụ eteesu saka-saka beri ezi ewu. Ẹnịnị ẹ yị vaa navọ ịrẹta ẹnyịị tụra ọsa, agụvị ka wẹ yị yẹ ụmẹ oni Ohomorihi sị vẹ ka ọnị ọ̀ va dọ wụ há.”
Ijeesu ộ ngụ ini irehi Ohomorihi
(Imt 21.12-17; Ịmk 11.15-19; Ịjọ 2.13-22)
45Dị Ijeesu ngụ ini irehi Ohomorihi, dị aa dụ aza ana aa sẹ̀ ohu ịzọọ jịnẹ nị. 46#Ayị 56.7; Ijer 7.11Dị ọ kà a yị wa ka, “Â chẹrẹ ẹ tụ́ ini Iwe Ohomorihi ka: ‘Irehi amị vaa vị irehi aduwa,’ ama ẹwụ nịnị ọ sị ọọ vara ịzị ịjagụda nịnịị̄ tẹ̀.” 47#Irk 21.37Dị aa zụ̀ aza ịsa eyinị-eyinị ini irehi Ohomorihi ọnọọ nị. Dị ohirẹsụ ẹbanyị irehi Ohomorihi ọnịrị ọzwọzọda nịnị ne beri ọdọvịdị ẹkụra nịnị ee sì oze ka ẹnị ẹ̀ wụ ọọ nị. 48Ama ẹnịnị e yi re oze vavọọ mẹ̀ ẹ, agụvị ka avaba aza vị ana nyayịnẹ sị ụtọ pe ịrẹyị anị.
موجودہ انتخاب:
Iruuku 19: EBTP
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ebira First Bible © Bible Society of Nigeria, 2014.