Iruuku 24
24
Ijeesu ộ ha hụụnị isu
(Imt 28.1-10; Ịmk 16.1-8; Ịjọ 20.1-10)
1Ịnị ẹnẹnẹ viri-viri ịnị ẹkụhị ọsẹ, anyẹnẹẹ ẹnẹẹ ệ nọ ịnị ụsị ọnọọ, dị ẹ sị ịsa oyisisi oku ene e vịdị si tenyi tịtẹ nị. 2Di e re ka ịrẹta ene gu ụsị ọnọọ irenu, o si zina kwooze nị. 3Dị ẹ ngụ ịnị ụsị ọnọọ nị, ama e yi re oku Ijeesu Ananyị yị. 4O si hí wa irenu, di e vene re aza ẹnị ẹẹva aanị, ene chire awuru ọvụ sẹnẹ-sẹnẹ ka ệ jẹẹ pe wa ịzọọ nị. 5Dị anyẹnẹẹ ẹnẹẹ ê hí angwa, dị ẹ kà eyi ngụ ẹtẹ nị. Dị aza ẹnị ẹyịva ẹnẹẹ ka, “Sị ẹ vẹ di u wee sì ọza ireyi-ireyi ịnị akakana oku nịnị? 6#Imt 16.21; 17.22,23; 20.18,19; Ịmk 8.31; 9.31; 10.33,34; Irk 9.22; 18.31-33Ọ yị kụkụ yà ịzẹnị, ọ sị ha hụụnị isu. Tamayị ịrẹyị ọnị ọ kà wụ nịnị, ọ mẹ̀ yị yà Igariri! 7Ộ kà a ka a vaa sị ọnị Ozi ọza onigirimaa chire ọnịvị nịnị ụvọ, dị ẹ kanyị ọnị za ọchị; ama ịhyẹgwẹta anị, ọnị rẹ vaa haa hụụnị isu.”
8Dị ẹnịnị sị tamayị ịrẹyị anị nị. 9Dị ẹ và hụụnị ụsị ọnọọ aa nọ eehi, dị ẹ na kà a yị ezirẹma ẹwụrọnya beri avaba aza ana vọ nị. 10Anyẹnẹẹ ẹnẹẹ yị: Imeri Anịmagịdara ọnịrị Ijowana beri Imeri ọnyị Ijemiisi, ne beri anyẹnẹẹ ana vọ ana yà pe wa. Dị ẹ kà ịrẹyị ọnọnị zụ̀ odeyi nịnị nị. 11Dị odeyi nịnị kụ́ ịrẹyị anẹẹ ẹnẹnị hi ịyẹyẹ, dị ẹ̀ yị dọ wa wụ́ nị. 12Ama dị Ipita kwẹẹtẹ, di o zwe echi nọ ịnị ụsị ọnọọ nị. Di o nyima, di o re ịta ọvụ ene e vịdị si chire oku Ijeesu ikuma kẹnẹ nị. O si hí Ipita irenu, dị ọ varẹma aa na, di ee roo ịnị ayị anị ka sẹ mẹ kẹ.
Ijeesu ộ sị ẹngụ zụ̀ aza óze Emawusi
(Ịmk 16.12-13)
13Ịnị ịhị ọnọọ gẹdẹ-gẹdẹ, â nyị aza ẹnị ẹẹva ana aa nọ ẹkụra ọnya aanị ana aā hị́ Emawusi. Ẹkụra ọnọọ vị ịmẹẹrị ịhịmba rịrị Ijerusarẹmị. 14Dị ẹnịnị aa kà ịrẹyị avaba ịsa ana mẹ nị. 15Ẹ màa kụ́ ịrẹka dị ẹyaa kà ịrẹyị, dị Ijeesu ọnị ụvọta tere pe wa, dị ọnịrị wa aa zị ụsẹẹ na nị. 16Ama eyi ẹnịnị ẹ yị há tù ọọ ka Ijeesu yọ nị. 17Dị Ijeesu họ̀ wa ka, “Sị ụ maanị aa kà ịrẹyị anị nịnị, ụ màa zị ụsẹ nịnị?” Dị ẹ jẹẹ, dị ayị ẹnịnị si du nị. 18Dị ọza ịnyara ẹnịnị ana aā hị́ Ikiriyopasị ka, “Ho! Ọzọga ụ wáá vị tụ́ ịnị ẹkụra Ijerusarẹmị nị? Wẹ yị yẹ ịsị ẹ mẹ ịzọọ hụrẹ ịhyọọọ?” 19Dị Ijeesu họ̀ ọ ka, “Sẹ mẹ?” Dị ẹnịnị kà a yọ ka, “Ịrẹyị Ijeesu Anịnazarẹtị ana vị ọnịsẹ. Ohomorihi ọnịrị avaba aza ệ yẹ ka ịrẹyị anị ọnịrị ụkọrọ anị ộ banyị. 20Ohirẹsụ ẹbanyị irehi Ohomorihi ọnịrị ọdọvịdị ayị ệ sị ọọ chire aza ụvọ ka à mẹ̀ ọkarẹyị isu yọ, dị à kanyị ọọ za apavahị. 21Ẹya raà sị eyi tụra a ka ọnị ọ vaa hị́ Anisirẹrị varẹma nị. Ajịnị ọ hyakụ vị ẹkụhị ẹẹta ọnị ịrẹyị ọnọnị maanị mẹ avọọ nị. 22Anyẹnẹẹ ayị ẹnyị ẹnị ẹ rẹ va kà ịrẹyị ene hị́ yi irenu. Ệ nọ ịnị ikuta anị ẹnẹnẹ viri-viri, 23ama ẹnịnị e yi kuku re oku anị. Dị ẹ vẹ, dị ẹ ka ẹnị ê re anggẹẹrị ana kà a yị ẹnị ka ọ sị ha hụụnị isu, ọ yàra nị. 24Anda ayị ẹnyị ẹ va nọ ịnị ikuta ọnọọ, dị ahịka ịsị anyẹnẹẹ ẹnẹẹ kà gẹdẹ-gẹdẹ, eni re re nị; ama ẹnịnị e yi re Ijeesu.”
25Dị Ijeesu va aa kà a yị wa ka, “Ho! Wâ vị ọnụra nịnị, oo! Wa mā hụra dọ avaba ịrẹyị ọnị ọnịsẹ nịnị kà wụ́ụ? 26Ẹ yị vọrọ ka Ikirisiti ọ̀ maanị rị ụya, dị ọ̀ va ngụ ịnị igirima anịị?” 27Dị Ijeesu ve nyima aa kà a yị wa ịrẹyị ana a kà ini oze anị tụ́ Iwe Ohomorihi nị. Ô nyima hụụnị ịsa oni Imosiisi kà huuu va ngụ ịsa ọnị ọnịsẹ nịnị kà.
28Aza ẹnẹẹ aa vaa ngụ ẹkụra ẹnẹ ẹ ka ẹnị aa nọ. Dị Ijeesu aa mẹ anka òo rere ee sì ka ọnị ọ̀ para ịzọọ hu nị. 29Dị aza ẹnẹẹ aa dá ịpẹẹ yọ ẹtẹẹtẹrẹ nị, dị ẹ ka, “Ọyị ộ ta, ẹtẹ ee hozi, kụkụ jẹẹ pe yi ịzẹnị!” Ịzẹyịza, dị Ijeesu ngụ eehi, dị ọnịrị wa yà ịzọọ nị. 30Dị Ijeesu yaayịtẹ pe wa ka ẹnị ẹ̀ rị ịsa nị. Dị ọ sị Ịbụrẹẹdị, dị ọ mẹ̀ aduwa tụ́ ọọ, dị ọ dà a, dị ọ sị yị wa nị. 31Di eyi ẹnịnị sị há, dị ẹ sị yẹ ka Ijeesu yọ nị. Ama dị Ijeesu re vú wa eyi nị. 32Dị ẹ kụkụ aa kà a yị ẹngụ ka, “Wee re, áyị ayị màa jị pee-pee, o mèe beri eyii kà ịrẹyịị vẹ óze, dị aa sị ịrẹyị Iwe Ohomorihi zụ̀ yị?”
33Dị ẹ wụsẹ kwẹẹtẹ obobooro, dị ẹ varẹma aa nọ Ijerusarẹmị nị. Di e ne tù ka ezirẹma ẹwụrọnya beri aza ana yà pe wa ka ệ kụ́ gụ nị. 34Dị ẹ kà a yị ẹnị ẹyịva ẹnẹẹ ka, “Ịzẹyịza, Ananyị yị ọ sị ha hụụnị isu, ọ raà sị ẹngụ zụ̀ Ịsayịmọnị!” 35Dị ẹnị ẹyịva ẹnẹẹ ẹnị rẹ kà a yị wa ịsa ana mẹ óze, ọnịrị éyi ẹnịnị mẹmẹ há tù Ananyị yị, ọ mẹ̀ dà Ịbụrẹẹdị yị wa.
Ijeesu ộ sị ẹngụ zụ̀ ezirẹma anị
(Imt 28.16-20; Ịmk 16.14-18; Ịjọ 20.19-23; Ụkọ 1.6-8)
36Ẹ mẹ̀ maanị aa kà ịrẹyị ẹnẹnị kẹnẹ, di Ijeesu ọnị ụvọta vana jẹẹ ịnị akakana ẹnịnị, dị ọ kụ́ wa ka, “Ẹngwọọrọ ọ̀ vị áawụ nịnị!” 37Ama angwa ô hí wa ẹtẹẹtẹrẹ, di e ro o ka arịjẹnụ éni ee re nị. 38Dị Ijeesu họ̀ wa ka, “Sị ẹ vẹ dị ayị awụ nịnị sị vazi? Sị ẹ vẹ dị ụ waa jị mị ịrẹka nịnị? 39Re ụvọ amị ọnịrị ahụ amị, di u we re nịnị ka ẹmị ụvọtaa yọ nị. Sị ụvọ kanyị mị nịnị, di u we re; agụvị ka arịjẹnụ ọ mā nyị ọchẹngụ ọnịrị ẹchụkụ, anka m mẹ̀ nyị aanị.” 40Ịjị ọ maanị sị kà, dị ọ sị ụvọ anị ọnịrị ahụ anị zụ̀ wa nị. 41Ẹnịnị ẹ̀ yị zụ dọ ọ wụ́, agụvị ka ayị ẹnịnị o si hine baaba, ọnịrị ka o re si hí wa irenu. Dị Ijeesu va họ̀ wa ka, “Wáá nyị ịsọyịrị tụ́ ịzẹnị nịnị?” 42Dị ẹnịnị sị ivovo ana a waraa yọ, 43dị ọ sị ọọ, dị ọ rị ọọ éyi ẹnịnị nị.
44Dị Ijeesu kà a yị wa ka, “Ịsị mị vịdị sị kà a wụ nịnị, m mẹ̀ yà pe wu nịnị, yị, ka: Avaba ịrẹyị amị ana a chẹrẹ tụ́ Iwe Imosiisi ọnịrị iwe ọnịsẹ nịnị beri iwe ahẹ ụga, ẹ yị zụ nyị ka ẹ yị vaa sẹ”. 45Dị Ijeesu mẹ ayị ẹnịnị ka ẹnịnị ẹ̀ zụ yẹ Iwe Ohomorihi nị. 46Dị ọ kà a yị wa ka, “Â vavọọ chẹrẹ ẹ tụ́ ini Iwe Ohomorihi. Agụvị avọọ â nyị ka Ikirisiti ọ̀ rị ụya, dị ọ ha hụụnị isu ịhyẹgwẹta anị. 47Ịnị ịrẹha anị a vaa yàa kà enube ọyịzaa yị aza ka è ro ịnẹ varẹma hụụnị ebira odivi ẹnịnị, dị Ohomorihi ọ̀ vagu wa ịnị ịvị ẹnịnị nị. E vee nyimaa hụrẹ Ijerusarẹmị, dị ẹ vavọọ kà a pooro na ngụ avaba ẹhẹ. 48Ẹwụ nịnị ọ vị onivenu ịrẹyị ọnọnị nị. 49#Ụkọ 1.4Re, mị vaa sị ịsa ana Ada amị kà a ka ẹ yị zụ nyị ka ọnị ọ yị sị wụ nịnị, tụ́ hi wu nịnị. Ama jẹẹ Ijerusarẹmị nịnị pooro di Ohomorihi ọ̀ sị ụkata hụrẹ ẹbẹẹba va wụ nịnị!”
Ijeesu ộ nọ ịdị Ohomorihi
(Imt 16.19-20; Ụkọ 1.9-11)
50 #
Ụkọ 1.9-11
Dị Ijeesu sị wa jịnẹ hụụnị ẹkụra huuu na ngụ oze Ịbẹtanị nị; dị ọ sị ụvọ tụ́ ẹba, dị ọ mẹ̀ aduwa yị wa nị. 51Ọ màa mẹ̀ aduwaa yị wa, dị ọ hụrẹ wa ẹngụ, dị a sị ọọ nọ ẹbẹẹba nị. 52Dị ezirẹma ẹnẹẹ tana tụra ẹtẹ kụ́ ọọ, dị ẹ sị ịrajẹ ọyịjẹ ọbanyị varẹma aa nọ Ijerusarẹmị nị. 53Dị ẹnịnị ne hi ini irehi Ohomorihi pooro, dị ẹyaa sị ụgaa yị Ohomorihi nị.
موجودہ انتخاب:
Iruuku 24: EBTP
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ebira First Bible © Bible Society of Nigeria, 2014.