Luk 19

Jesus ghene Zakaeus

1Jesus ndu è lii ɛ Jeliko è se diaŋsene. 2Wel əblee nè lu fo nɛ ɛ́ toŋte ge Zakaeus, nɛ̀ lu ketuu se ghel ɛyfii shile, gese lu wel əbghaken. 3Əb nè kɛŋe se yɛne wel wɛ luun Jesus, dî ke se taa bek ngose wel yɛ ɛy nè luun fo nɛ̀ əb gese lu wel əbtəm. 4Əb me nyiŋ è ndu se mbiy è kok se fekake sikamole ka əb yɛn, bek ka Jesus nè chian ɛ jii fo. 5Jesus nɛy chin fo, è lose ɛshiɛ è kiy Zakaeus, è suuy se wen ge: Zakaeus, yaŋse səəke è gwiy, bek ge mɛ lu se chii ɛ wɛ̀ ndaa lan. 6Əb me səəke chikiy chikiy è fiisen Jesus nɛ̀ ɛysaŋlee. 7Ghel ɛjime yɛn kenəə ten è se vəke ge: Əb se nduu se chii ghene wele mbeese. 8Ɛ́ ndu è lii. Zakaeus nɛy teem è suuy se Jesus ge: Yɛn-a Báàba, mɛ nɛ̂y gianen əbfua ə wom ɛ feteten, è fo ɛybee ɛylee se ghɛ ketane. Naa ndɛ wɛ mɛ nè boonmen lu nɛ mɛ seese əblik əbkɛɛk. 9Jesus me suuy se wen ge: Ghele ghɛ ndaa fɛne boymen lan bek ge wel vin lu sɛy wán ə Ablaham. 10Bek ge Wanwel nè gwiy se kɛŋ, se gese se boyse ghii dii ghɛ ɛ́ lɛyenmen.

Ngan kum əbkaa

(Mat 25.14-30)

11Se lu ka ghele yioten əbnəə wɛ Jesus nè suuyen, əb se lu se maa ngan bek ge əb nè se baksene se Jolesalem, nɛ ghele kwaate ge ɛysak ə Feyine shi se gwiy kɛn se əbliy. 12Əb me maa ngan ge: Wan ə ntok əblee nè lô lòò è ndu se ketum kelee naa ɛ əbtəm, ge ɛ́ yiose wen se əbfon é əb kase fiile è yɛ sake ketum ə wen. 13Əb loo lòò è jaŋ ghel ɛyfɛl nə wen ɛyvəm, è giate əbkaa se ghene ɛyshiɛ kaba, ɛyshiɛ kaba; è suuy se ghene ge: Ghɛn yese, è yɛ bɛ́ɛ́lé əbwɛy so se chin se ka mɛ kase gwiy. 14Nè lu dî nɛ ghel ɛlee bane wen, əb lòò ghene me chokte ghel è tum ge ɛ́ ndu è suuy ge: Ghɛse báà se koŋe ge wel vin yɛ lu əbfon ə wɛs.

15Ɛ́ nɛy yiose wen se əbfon, əb kase fiile ɛ leghɛ, è jaŋ ghel ɛyfɛl ghi ghɛ əb nè foon əbkaa se ghene ge ghene gwiy é əb keele ge ghene sɛ nè yese è kiile lɛɛy sɛk-a? 16Wele wɛ̂ mbiy gwiy, è suuy ge: Báàba, mɛ ne yese sɛk ne lii ɛ ketuu əbkaa fɛy kaba ɛyvəm. 17Əb suuy se wen ge: Yibɛy, wɛ̀ nɛɛy fo, wɛ̀ lu wel ɛyfɛl əbjuŋ. Ka wɛ̀ nè foon ɛytem se toknen nɛ̀ əbfua əbtɛlɛ, lu nɛ mɛ fo əbtaawe, é wɛ̀ yɛ toknen nɛ̀ ntɛkse ɛyvəm. 18Kenkumtene wele gwiy, è suuy ge: Mɛ ne yese, sɛk ne lii ɛ ketuu əbkaa fɛy kaba setan. 19Əb suuy se wen ge: Wɛ̀ lu nɛ wɛ̀ nɛɛy sɛy kejuŋ. Mɛ liɛ wɛ̀ é wɛ̀ yɛ toknen nɛ̀ ntɛk setan.

20Əblee me gwiy, è suuy ge: Báàba, kaba ə yiɛ yi yine ka mɛ nè kulen ɛ kensake ndəyse è lete. 21Mɛ ne fane wɛ̀ bek ka wɛ̀ luun wel ɛyshiɛ ɛytaa, liɛ kɛ wɛ báà lɛm, kaa kɛ wɛ̀ nè báà vii. 22Ba ɛyfɛl nə wen fise ge: Wɛ̀ lu wel ɛyfɛl əbbee, nɛ̀ mɛ sak wɛ̀ nɛ̀ giɛ sɛ se fəyen ɛ wɛ̀ əbchio. Wɛ̀ ne ke ge mɛ lu wel ɛyshiɛ ɛytaa, liɛ kɛ mɛ báà lɛm gese kaa kɛ mɛ báà vii. 23Wɛ̀ nè ke di, nɛɛy ghɛ fɛ wɛ̀ lɛm əbkaa wom ɛ ɛychia əbkaa, bene fɛ mɛ nɛ̂y kase gwiy è liɛ nɛ̀ sɛk ɛ ketuu ten.

24Əb me suuy se ghel ghɛ ɛ́ nè tiyen fo ge: Ghɛn fii kaba ten se wen è fo se wel ɛyfɛl wɛ əb kiin kabase ɛyvəm. 25Ghene suuy se wen ge: Báàba, əb se ki kaba ɛyvəm. 26Əb me fise ge: Mɛ suuye se ghɛn ge wel əbjim wɛ əb kiin, lu nɛ Feyine nɛ̂y fo əbdione se wen, dî nɛ wel wɛ əb kiin wiy lu nɛ naa kɛ ɛylaye kɛ əb kiin lu nɛ Feyine nɛ̂y fii se wen. 27Ghɛn gwiy nɛ̀ mbanen ə some sɛ se ne báà se koŋe ge mɛ yɛ lu əbfon è yuyté ɛ mɛ ɛyshiɛ.

Jesus lii se Jolesalem ka Əbfon

(Mat 21.1-11; Mak 11.1-11; Jn 12.12-19)

28Nɛ̂y se lu ka Jesus maanmen ngan yi di, è chia è se koke se Jolesalem. 29Əb ndu è loo bɛɛte ntɛke sɛ Betfej ghene Betani ɛ kfən yɛ toŋten ge yɛ̂ koo Olif, è tum ghon-ɛyfɛl nə wen ɛbaa, è suuy ge: 30Ghɛn ndu ɛ ntɛk yɛ ɛy luun ɛ ghɛne mbiy yii. Ghɛne loo lii, è yɛn nɛ ɛ́ chəŋ wán ə kembɛɛybiy, nɛ wel ne bɛɛy ghàà kok, è yas è gwiy so. 31Yɛ lu ge wel bif se ghɛn ge ghɛn sɛ yásè bek ghɛ-a? Ghɛn suuy ge: Báàba shii keghene. 32Ghene ndu è yɛn əbnəə əbjim nɛ əb lu ghɛɛ-ghɛɛ ka əb kè suuyen. 33Ghene loo yase kembɛɛybiy ki ɛbaa tene yɛn è bif ge: Ghɛne yásè bek ghɛ? 34Ghene fise ge: Báàba shii keghene, 35è me liɛ è ndu so se Jesus, è yiysen nɛ ndəyse kenton nə ghene, è kokse Jesus se ten. 36Əb loo ndu, ghele se chokte ndəyse kenton nə ghen saŋte se jii. 37Əb ndu è beken se yɛ chio ɛ kfəne koo Olif, feliɛ ghon-ɛyfɛl nə wene kɛɛte se yɛ fo ɛykokse se Feyine nɛ̀ ɛysaŋlee ɛ giɛ ɛytaa bek əbnəə əbchio əbyúméné wɛ ghene nè yɛnen. 38Suuye ge: Ɛybose lu se əbfon wɛ əb gwiyen ɛ əbtaawe nə Bay. Nyiaŋ lu ɛyyio, nɛ̀ ɛykokse lu se Feyin fe ngaŋtene. 39Ghele kenone Falisee ɛlee ghɛ ɛ́ nè luun ɛ məme feliɛ ghel fɛy me suuy se Jesus ge: Ndinte, wam ghon-ɛyfɛl nə wɛ̀. 40Əb fise ge: Mɛ suuye se ghɛn ge: Ghene gok ɛ chichi, é ɛtiye yɛ lək.

Jesus diy bek Jolesalem

41Jesus loo baksen, è mak ɛshiɛ è yɛn Jolesalem, ketuu diile wen, əb səkse əmnshiɛ, è kɛ̀sèn nɛ̀ ɛydiye, 42Suuye ge: Wel liɛ ge ghɛn ke kenəə kɛ lòó ke nɛɛy é ghɛne ghe Feyine yɛ lu kejuŋ lan. Dî nɛ lòó ghɛn jia bo keele ɛ leenen. 43Əbliye gwiye wɛ mbanen ə sɛne nɛ̂y bom kengɛy è gim ghɛn so, è chite ghɛn. 44Ghene nɛ̂y lii è yuyte ghɛne ghon ə ghɛne ɛjim, è bvəyte əblik é ɛytiy ɛylee jia yɛ nyiŋ ɛ ɛylee ketuu. Ke náà kooy dî bek ka ghɛn maan əbliy wɛ Feyine nè gwiyen ɛ ten se boyse ghɛn.

Jesus jum ghɛ əbwɛye se ndaa-ɛykokse

(Mat 21.12-17; Mak 11.15-19; Jn 2.13-22)

45Jesus me ndu è lii se ndaa-ɛykokse, è me se jume ghel ghɛ ɛ́ nè bɛ́ɛ́len əbwɛy fo. 46Suuye se ghene ge: Ɛ́ nyak ɛ ŋwaale-Feyin ge: Ndaa ə yom lu ndaa ɛyjem, ghɛne sɛy me bense se mbvək ɛchoŋ. 47Əb se dinte əbnəə se ghele ɛ ndaa-ɛykokse əbchii əbjim. Ghele mbiy se ghɛ́ ntaŋlee, nɛ̀ ghɛ́ ɛydinte tesake, gese nɛ̀ ghele mbiy ɛlee se momse ge ɛ́ yúyté wen. 48Dî è jia yɛn jii yɛ chia ɛ ten bek ge ghel ɛjime nè ki shii se yiote kenəə kɛ əb nè suuyen.

موجودہ انتخاب:

Luk 19: oku

سرخی

شئیر

کاپی

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

©CABTAL, 2012

Ŋwaale Feyin; Kelek Kefɛɛ کے بارے میں مزید معلومات حاصل کریں

Luk 19

Luk 19
سے مشہور بائبلی آیات

سنیں Luk 19

بائبل:

Oku

ترجمہ: Ŋwaale Feyin; Kelek Kefɛɛ - oku

Luk 19

Luk 19

Luk 19 سے مشہور بائبلی آیات

سنیں Luk 19

بائبل:

Oku

ترجمہ: Ŋwaale Feyin; Kelek Kefɛɛ - oku

Luk 19

Luk 19
سے مشہور بائبلی آیات