GÉNESIS 1
1
Taita Diosca tucuitami rurashca
1Callaripica, Taita Diosmi jahua pachatapash, cai pachatapash rurarca. 2Cai pachaca, imamambash na rijchaj, imapash illajmi carca. Yana yana tutaca, manllanayai ucu ucu yacucunamandaca jahuamanmi carca. Taita Diospaj Espirituca, yacu junda jahuacunamanmi cuyurijurca.
3Shina cajpimi Taita Diosca: “Punchalla tucuchun” nirca. Shina nijpica, punchalla tucurcallami. 4Taita Diosca chai punchallataca, aligu cajtami ricujurca. Shinamandami Taita Diosca chai punchallataca, yana yana tutamanda shicanyachirca. 5Shina shicanyachishpami Taita Diosca, chai punchallataca: “Punlla” nishpa shutichirca. Yana yana tutataca: “Tuta” nishpami shutichirca. Chashnami chishindi tutamandandi, shuj punlla tucurca.
6Chai jipami Taita Diosca, cashna nirca: “Yacu chaupicunapica, shinllipacha shicanyachijuj tiachun. Chai shicanyachijujca, yacucunamanda yacucunata shicanyachijuchun” nircami. 7Taita Diosca, shinllipacha shicanyachijujtami rurarca. Shinallata shinllipacha shicanyachijuj ucuman tiaj yacucunatapashmi, shinllipacha shicanyachijuj jahuaman tiaj yacucunamanda shicanyachirca. Chaica chashnami tucurca. 8Shinllipacha shicanyachijujtaca, Taita Diosca: “Jahua Pacha” nishpami shutichirca. Chashnami chishindi tutamandandi, ishcai punlla tucurca.
9Taita Diosca, cashnatapashmi nirca: “Jahua pachamanda ucuman tiaj yacucunaca shujllapi tandanajuchun, chaquishca pushtupash ricurichun” nircami. Shina nijpica, chashnami tucurca. 10Taita Diosca chaquishcataca: “Alpa” nishpami shutichirca, yacucuna tandanajushcataca: “Mama Cuchacuna” nishpami shutichirca. Chaicunataca, aligu cajtami Taita Diosca ricujurca.
11Chai jipami Taita Diosca, cashna nirca: “Alpapica verde jihuacunapash, muyuta fucuj jihuacunapash mirachun. Ima micunacunata fucuj yura cashpapash, chai puralla mirachun. Chai granopillata muyu tiashpa, alpa jahuapi cachun” nircami. Shina nijpica, chashnami tucurca. 12Alpapica verde jihuapash, muyuta fucuj jihuapash, jihuacuna imashna viñana cashcashnallatami viñarca. Shinallata ima micunacunata fucuj yuracunapashmi viñarca. Chai fucushca granopaj muyuca, chai granopillata cashpami, chai puralla mirarca. Chashna rurashpaca, aligu cajtami Taita Diosca ricujurca. 13Chashnami chishindi tutamandandi, quimsa punlla tucurca.
14Chai jipami, Taita Diosca cashna nirca: “Jahua pachata shinllipacha shicanyachijuj pushtupica tutata, punllata shicanyachingapaj punchayachijuj michacuna tiachun. Chaicunaca, jatun punllacuna, caishuj punllacuna, huatacuna imashna cajta ricuchingapajmi canga. 15Punchayachijuj chai michacunaca, jahua pachata shinllipacha shicanyachijuj pushtumanda, cai pachata punchayachinajuchun” nircami. Shina nijpica, chashnami tucurca.
16Taita Diosca, punchayachijuj ishcai jatun michacunatami rurarca: Jatundaca, punllata punchayachishpa mandachun, uchillataca tutata punchayachishpa mandachunmi rurarca. Shinallata luzerocunatapashmi rurarca. 17Taita Diosca, chaicunataca jahua pachata shinllipacha shicanyachijuj pushtupimi, cai pachata punchayachinajuchun churarca. 18Shinallata punllata, tutata mandanajuchumbashmi churarca. Punllata, yana yana tutamanda shicanyachishpa tianajuchumbashmi churarca. Shina rurashpaca, aligu cajtami Taita Diosca ricujurca. 19Chashnami chishindi tutamandandi, chuscu punlla tucurca.
20Taita Diosca, cashnami nirca: “Yacupi causana animalcunapash tiachun. Alpa jahua huairata rij alasyu animalcunapash tiachun. Chai alasyu animalcunaca, jahua pachata shinllipacha shicanyachijuj chushaj pushututami rinajunga” nircami. 21Taita Diosca, mama cuchapi causaj jatun manllanayai animalcunatami rurarca. Yacucunapi cuyurinajuj tucui animalcunapashmi, ima animalcuna cashpapash yacucunapica, chai puralla miranajurca. Shinallata alasyu tucui animalcunatapash, chai animal puralla miranajuchunmi rurarca. Shina rurashpaca, aligu cajtami Taita Diosca ricujurca.
22Taita Diosca, cashna nishpami paicunataca bendiciarca: “Huacharishpa ninanda mirashpa, mama cucha yacucunapi jundaichi. Shinallata cai pachapi causana alasyu animalcunapash, ninanda miraichi” nircami.
23Chashnami chishindi tutamandandi, picha punlla tucurca.
24Chai jipami Taita Diosca, cashna nirca: “Alpapi causana animalcunaca, ima animalcuna cashpapash, chai puralla tiachun. Tucui animalcunapash, alpata llucashpa purij animalcunapash, sachacunapi causana animalcunapash, cai alpapi animalcunaca chai puralla miranajuchun” nircami. Shina nijpica, chashnami tucurca.
25Chaipaj jipami Taita Diosca, alpapi causana animalcunataca, ima animalcunata cashpapash, chai puratalla, huasipi charina animalcunatapash ima animalcunata cashpapash, chai puratalla rurarca. Shinallata llucashpa purij animalcunatapash, chai animal puratallami rurarca. Shina rurashpaca, aligu cajtami Taita Diosca ricujurca.
26Chaipaj jipami Taita Diosca, cashna nirca: “Ñucanchishnalla rijchajta, ñucanchishnallapacha ricurichun genteta rurashun. Paica, mama cuchapi pijicunata, jahuata rij alasyu animalcunata, sachapi causaj animalcunata, alpapi causaj tucui animalcunata, shinallata alpata llucashpa purij tucui animalcunatapash mandachun” nircami.
27Taita Diosca, gentetaca paishnalla rijchajtami rurarca. Taita Diosman rijchajtapachami rurarca. Paicunataca jaritapash, huarmitapashmi rurarca. 28Taita Diosca, cashna nishpami paicunataca bendiciarca: “Huacharishpa ninanda mirashpa, ashtacacunapacha tucushpa, cai pachapi jundanguichi. Cai pachapi imalla tiajcunata cazuchinguichi. Shinallata mama cuchapi causaj pijicunata, jahuata rij alasyu animalcunata, alpapi causaj tucuilla animalcunatapash mandanguichi” nircami.
29Taita Diosca, cashnami nirca: “Ricuichi, tucui cai pachapi muyucunata fucuj tucui yuracunata, shinallata muyucunata charij granocunata fucuj tucui quirucunatapashmi cangunaman curcani. Chaicunami, cangunapaj micuna canga. 30Ashtahuangarin cai pachapi causaj tucui animalcuna, jahuata rij alasyu animalcuna, alpata llucashpa purij, causaj tucui animalcunaca, tucui verde jihuacunatami micushpa causanga” nircami. Shina nijpica, chashnami tucurca.
31Taita Diosca, tucuita pai rurashcatami ricujurca. Chai rurashcacunaca, aligupacha cajtami ricujurca. Chashnami chishindi tutamandandi, sucta punlla tucurca.
موجودہ انتخاب:
GÉNESIS 1: QUII
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Quichua Imbabura Bible © United Bible Societies, 1994.