Génesis 5
5
Adánpita miraq runakuna
1 Crónicas 1.1-4
1Kaychömi qelqaraykan Adánpa tsurinkunapita y paykunapita miraqkunapitapis.
Runata kamarmi kikin niraqta Tayta Dios kamarqan.#Mat. 19.4; Mar. 10.6. 2Olqutapis warmitapis paymi kamarqan. Kamashqan junaqmi Tayta Dios nirqan paykuna runa kashqanta. Nirkurmi kay patsacho ali kawananpaq bendicionninta qorqan.#Gén. 1.27-28.
3Pachak kimsa chunka (130) watayuq Adán kaykaptinmi tsurin Set yurirqan. Tsay tsurinqa taytan niraqlami karqan. 4Tsurin Set yurishqanpita pusaq pachak (800) wata masraqmi Adán kawarqan. Paypaqa tsurinkuna olqupis y warmipis karqanraqmi. 5Isqun pachak kimsa chunka (930) watayuq kaykarmi Adán wanurqan.
6Pachak pitsqa (105) watayuq Set kaykaptinmi tsurin Enós yurirqan. 7Tsaypita Set kawarqan pusaq pachak qanchis (807) wata masraqmi. Setpa tsurinkuna olqupis y warmipis karqanraqmi. 8Setqa isqun pachak chunka ishkay (912) watayuq kaykarmi wanurqan.
9Enós isqun chunka (90) watayuq kaykaptinmi tsurin Cainán yurirqan. 10Tsurin Cainán yurishqanpita Enós kawarqan pusaq pachak chunka pitsqa (815) wata masraqmi. Enóspapis tsurinkuna olqupis y warmipis karqanraqmi. 11Enósqa isqun pachak pitsqa (905) watayuq kaykarmi wanurqan.
12Cainán qanchis chunka watayuq (70) kaykaptinmi tsurin Mahalaleel yurirqan. 13Tsurin Mahalaleel yurishqanpita Cainán kawarqan pusaq pachak chusku chunka (840) wata masraqmi. Paypapis tsurinkuna olqupis y warmipis karqanraqmi. 14Cainán isqun pachak chunka (910) watayuq kaykarmi wanurqan.
15Mahalaleel soqta chunka pitsqa (65) watayuq kaykaptinmi tsurin Jared yurirqan. 16Tsurin Jared yurishqanpita Mahalaleel kawarqan pusaq pachak kimsa chunka (830) wata masraqmi. Paypapis tsurinkuna olqupis y warmipis karqanraqmi. 17Mahalaleel pusaq pachak isqun chunka pitsqa (895) watayuq kaykarmi wanurqan.
18Jared pachak soqta chunka ishkay (162) watayuq kaykaptinmi tsurin Enoc yurirqan. 19Tsurin Enoc yurishqanpita Jared pusaq pachak (800) wata masraqmi kawarqan. Paypapis tsurinkuna olqupis y warmipis karqanraqmi. 20Jaredpis isqun pachak soqta chunka ishkay (962) watayuq kaykarmi wanurqan.
21Enoc soqta chunka pitsqa (65) watayuq kaykaptinmi tsurin Matusalén yurirqan. 22Enocqa Tayta Dios munashqannömi kawarqan. Tsurin Matusalén yurishqanpita kimsa pachak (300) wata masraqmi kawarqan. Enocpa tsurinkuna olqupis y warmipis karqanraqmi. 23Enoc kawarqan kimsa pachak soqta chunka pitsqa (365) watami. 24Tayta Dios munashqanno kawashqanpitami Enocta Tayta Dios kawaykaqta pushakurqan.#Heb. 11.5; Jud. 14.
25Matusalén pachak pusaq chunka qanchis (187) watayuq kaykaptinmi tsurin Lamec yurirqan. 26Lamec yurishqanpita Matusalén kawarqan qanchis pachak pusaq chunka ishkay (782) wata masraqmi. Matusalénpa tsurinkuna olqupis y warmipis karqanraqmi. 27Matusalénpis isqun pachak soqta chunka isqun (969) watayuq kaykarmi wanurqan.
28Lamec pachak pusaq chunka ishkay (182) watayuq kaykaptinmi tsurin yurirqan. 29Tsurin yuriykuptinmi Lamec kayno nirqan: <<Kay patsata Tayta Dios maldicionashqa kaptinpis kay tsurïmi ali yanapamäshun arurpis aläpa mana nakanantsipaq>>.
Tsayno nirmi jutinta churaparqan Noé jutin kananpaq.#5.29 Noé ninanqa yanapakuq ninanmi. 30Noé yurishqanpita Lamec kawarqan pitsqa pachak isqun chunka pitsqa (595) wata masraqmi. Lamecpa tsurinkuna olqupis y warmipis karqanraqmi. 31Lamecqa qanchis pachak qanchis chunka qanchis (777) watayuq kaykarmi wanurqan.
32Noé pitsqa pachak (500) watayuq kaykaptinmi tsurinkuna yurirqan. Tsay tsurinkunapa jutinkuna karqan Sem, Cam y Jafet.
موجودہ انتخاب:
Génesis 5: qvmB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2003, Wycliffe Bible Translators, Inc. All rights reserved.