Lir. 11
11
Ekorofa eya Babeli
1Nono babaandu be khu sibala sioosi baba ne lulomo lulala ne lilomaloma lifwaanane. 2Nga bauyauuya khukhwama ebukwe banyoola sibala sie kumweyeeywe sia Sinari mala bamenyayo. 3Baboolana bali, “Yiicha khuupe kamatifari mala khu koosie bulayi.” Nio mu bweyaangu bwe kamabaale baba ne kamatifari, ne mu bweyaangu bwe simendi baaba ne laamu. 4Nio, baloma bali, “Yiicha khwiyombakhile lukoba nende endeleelwa yole mwikulu nio khwikholele lisina khukhakhola khurio khwasalanisibwa khu sibala sioosi tawe.” 5Nio Wele Omunyali Owa Bioosi ekha asi khubona lukoba ne endeleelwa niyo babaandu baba ne bombaakhe. 6Mala Wele Omunyali Owa Bioosi aloma ali, “Lola babaandu bano bali ekholo ndala, lundi balomaloma lulomo lulala, ne kano kali busa khurakikha khwe kamakali niko banyala bakhola, mala se siliio silabakhiingilila khukhola nisio benya khukhola tawe. 7Yiicha khwikhe khuche khukoyaanie lulomo lwabwe nio balekhe khuuliilisiana mu khuloma.” 8Wele Omunyali Owa Bioosi abasalanisia khukhwama abwenao balekha khukhwombakha lukoba basalanikha mu sibala sioosi. 9Khwako batiuukha lukoba olwo bali Babeli,#11.9 Babeli: lisina lino lilolekhana nga lie Lueburania liliekesia, “khukoyaana.” sikila abwenao niio Wele Omunyali Owa Bioosi akoyanisilia babaandu ne chinomo che sibala sioosi mala khukhwama abwenao Wele Omunyali Owa Bioosi abasalanisia bacha khu sibala sioosi.
Lisaaye lia Shemu
(1 Ke Ch. 1.24-27)
10Lisaaye lia Shemu nilio lino: Enyuma we kimiiko kibili, khukhwichula khwe kameechi ne khuwele, Shemu aaba ali ne kimiiko emia ndala, mala asaala Arifakisati. 11Enyuma we lisaalwa lia Arifakisati, Shemu amenya kimiiko chimia chiraano mala asaala babaana babaandi basoleeli ne bakhaana.
12Nga Arifakisati amenya ola bukhulu bwe kimiiko kamakhumi kataru na kiraano asaala Sela, 13ne enyuma we lisaalwa lia Sela, Arifakisati amenya kimiiko chimia chine na kitaru, mala asaala babaana babaandi basoleeli ne bakhaana.
14Nga Sela amenya ola bukhulu bwe kimiiko kamakhumi kataru, asaala Eberi, 15ne enyuma we lisaalwa lia Eberi, Sela amenya kimiiko chimia chine na kitaru mala asaala babaana babaandi basoleeli ne bakhaana.
16Oli Eberi ali ne bukhulu bwe kimiiko kamakhumi kataru na kine asaala Peleki, 17ne enyuma we lisaalwa lia Peleki, Eberi amenya kimiiko chimia chine ne kamakhumi kataru mala asaala babaana babaandi basoleeli ne bakhaana.
18Nga Peleki amenya ola bukhulu bwe kimiiko kamakhumi kataru asaala Reu, 19ne enyuma we lisaalwa lia Reu, Peleki amenya kimiiko chimia chibili na tisa mala asaala babaana babaandi basoleeli ne bakhaana.
20Oli Reu ali ne bukhulu bwe kimiiko kamakhumi kataru na kibili asaala Seruki, 21ne enyuma we lisaalwa lia Seruki, Reu amenya kimiiko chimia chibili na saba mala asaala babaana babaandi basoleeli ne bakhaana.
22Nga Seruki amenya ola bukhulu bwe kimiiko kamakhumi kataru asaala Naori, 23ne enyuma we lisaalwa lia Naori, Seruki amenya kimiiko chimia chibili, mala asaala babaana babaandi basoleeli ne bakhaana.
24Oli Naori ali ne bukhulu bwe kimiiko kamakhumi kabili na tisa asaala Tera, 25ne enyuma we lisaalwa lia Tera, Naori amenya kimiiko emia ndala ne likhumi lilala na tisa, mala asaala babaana babaandi basoleeli ne bakhaana.
26Oli Tera ali ne bukhulu bwe kimiiko kamakhumi saba asaala Aburamu, Naori ne Harani.
Lisaaye lia Tera
27Lisaaye lia Tera nilio lino: Tera aaba raraawe owa Aburamu, Naori ne Harani. Harani aaba raraawe owa Luti. 28Harani anyoa afwa, Tera raraawe ne asiili. Afwila mu sibala nisio asaalilwamo sia Uri sie Bakalitayo. 29Mala Aburamu ne Naori bareera bakhasi, mukha Aburamu aaba Sarai ne mukha Naori aaba Milika, omukooko owa Harani. Harani aaba raraawe owa Milika ne Isika. 30Mala Sarai aaba omukuumba, se aaba no mwana tawe.
31Tera abukula Aburamu omwana wewe, ne Luti omwana owa Harani, omwichukhulu wewe, ne Sarai omukhaana wewe, mala auuya nabo barura mu sibala sia Uri sie Bakalitayo bacha mu sibala sia Kanaani, ne nga boola Harani bamenyayo. 32Tera amenya kimiiko chimia chibili ne kiraano mala afwila mu Harani.
موجودہ انتخاب:
Lir. 11: LUBUKUSU
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Bible Society of Kenya, 2019