Luka 22
22
1Wia bread kiaupatuti tato horiomoo kowea tariwai, nou painari Kiohodio horiomoo. 2Wia auwo‐kohena oubira titi‐oubira taibao nou epiamoi nei naibaha omohowaumo, nouri neiio oubi tore iatiwaumo.
3Ina Satanaro, Iuda paina Isakariota, naibaha odoro. Nouvia 12 mere na’uri. 4Ina nou himia naveito nou naibaha o’uro wia auwo‐kohena oubira pai‐oubira nou neimu naiba oromododiaiwaumo, Iesu rioido piroha taiba naimaai. 5Wia nei geii imahebidiowaumo wia nei wade owateaumo moni nouido emaatimoi. 6Ina nouro nei naibaha imowaiwai wia nou nave omohowa Iesu neido taiba waimaai, ata ta’uwa oubi gema noumu emidioumo tatowa.
7Ina bread iaupatuti tato horiomoo naibaha o’u, kiohodio mamoe kiwoto ta’ui nouowa, 8Wia Pitara Ioanera nouro itiodoimama, naiba iaowa: Rieiti ta’utoi ina kiohodio horiomoo rieitio imoido meaha idodiaitoi, imoo ihomoi. 9Wia neiti nouido naibaha iaowaudo: Ro niro toubatiwa nidodiaidaidudo. 10Wia nou neitido naibaha iaowa: Taauritoi ina oopoito rieiti idotoiwa, na’u dubu, obo ooro ramu, rieitio oweatoiwa, nou dooudo tarobodotoi moto’i noito nou odorowa. 11Ina moto abeaido tarotoi, Kitomudio dubu roido naiba raroro, Hobo aibo koa moto turi touowai, kiohodio horiomoo mo himia kitomudio meremu ihomo bati? 12Nouro rieiti ohuwa moto turi tutu airimapoiwadaimama, kemi bati na’i wia dodoo ramu, meaha tau idodiaumo. Rieitio nouowa imoido tadodiaitoi. 13Wia neiti naibaha o’udo naiba oweaudo Iesu karo aibo, wia kiohodio horiomoo neiti naibaha idiamowaudo.
14Ina ta’u naibaha o’uwa nouro naibaha emi, 12 kitioduti oubii neimu. 15Wia nou neido naiba iaowa: Nouri kiohodio horiomoo riomu ihoi mo opuito auwo niroi, dooudo mo temeteme ainaveai. 16Nouri mo rioido ainaro, ta’u ata nouri horiomoo mo iho raihe, ata ta’ui nouowa Iehova bububatiwa nou naiheha idodiaiwa. 17Wia koimo nou naibaha emidaiwa nou ina emabitiwa naiba iaowa: Taimemo, nouri rio na’u na’uha taremaatimo. 18Nouri mo rioido ainaro, Vine iopu obo moro idio raihe, ta’ui nouowa Iehova bububati aiwauro’ui. 19Wia nou bread naibaha emidaiwa naiba emabitiwa naiba ekekutiwa naiba imaatiwa neido. Nou naiba iaowa: Nouri mo gohori rioido nimaati. Taidodiaiwaumo nouri rioo mo araromomoi. 20Nou aibo, ina nei idaihoumo, nouro koimo naibaha emidaiwa, nou naiba iaowa: Koimo nouri orio bubu mo savito naibaha nododiairo. Nouvia rioido ainimahauoduti. 21Wia taaurimo, mo piroha kowahuo dubu nou tu momuri dodoo ohuwa. 22Nouri naihehari, Oubiha‐mere airo’udai, wia ere nouri dubu Oubiha‐mere piroha owahuo. 23Ina nou ta’uwa nei himia himia naibaha aratorowaumo: Boti merero remidio imomu nana nouri nouro waidodiai?
24Wia nei himia himia naibaha eremautiwaumo, Boti dubu’i neimu oubio aiwaimo‐araromoi nou opuitori. 25Wia nou neido naibaha iaowa: Pai‐oubi, douboi oubi mabuwa, neivia pai aibori, wia kimaduduo oubi nei mabuwa, oubio nei paina idodoumo oubi niro mereri. 26Ata rioo nei aibo iaimo aue, wia dubu riomu auwori nou meaha nouvia orio mere aibori, wia dubu nou opuitori nou meaha nou kiwabai mere aibori. 27Boti auwori, dubu nou kiho batiwa remidio e komotoi dubura? Dubunu kiho batiwa remidio nouvia auwo tatora? Ata movia riomu nou nemidiotuti kimotoi‐mere aibo. 28Riovia momu kemidio oubiri, mo kematuhe hiwio’i auwoha. 29Moro rioido bububati nou nimaai, nou aibo mo Abearo bububati moido tau nemaairo. 30Nouri kemi batiwa mo dodoowa rioido moro ainaimapoiwai, ina mo bububatiwa rioo aiwaimo‐ihoi wia aiwaimo‐idioi wia moari kemi bati ohuwa rioo aiwaimo‐emidioi, Isaraela oubi gui 12 iwotoi. 31Ina Pai‐duburo naiba iaowa: Simona, taauri! Satanaro auwo niro ro. Nou niro ro koni aibo emeibomai. 32Ina ata, mo wade kirodumeaito tau naro, nouri ro kiraromodio na’i oropoiio raihe; ina nou ta’uwa ro imini imowaiwa, roro ro niamamio imini pupuo taiwai. 33Wia Simona nouido naiba iaowa: Pai‐dubu e, durii daimoito wia koihiai batito, mo niro romu ainaui. 34Ina nou naiba iaowa: Pita e, Mo roido ainaro, Kokora wade otua tatowa, hiwio nouowa, ina opuito roro mainamatioi ro mo umo biahai.
35Wia nou neido naiba iaowa: Nou ta’uwa moro rio nou nitiodoi, moni ha’o tato wia kosopu tato wia douboi kono tato, na ata rioo aiohidioumo? Nei naiba iaowaumo, O’o. 36Ina nou naiba iaowa: Doihabuo dubu nou moni hao iawa, tamidairo wia kosopu naiba iawa, tamidairo, wia dubu nou korowoto garaara tatowa, nou himia uduuduo taiwoha wia na’u korowoto garaara tamidai. 37Mabu nouri mo rioido ainaro, nouri wade titi taiiati nou moido, nou kidodiaiha idodiaimoi Nou ubauba oubinu tau edea; bowia moido kemapoi wade auwoha, doo nei auwoha oboiri. 38Wia nei naiba iaowaumo: Pai‐dubu e, taauri korowoto garaara neewa airia. Nou neido naiba iaowa, Nou modobori.
39Wia nou naibaha ohuo wia Oliveta akabuito naibaha o’uro nou kidia aibori, wia nou himia kitomudio mere nouido ina orobodowaumo. 40Ina nou ta’uwa nouro batito nou naibaha eredea nou nouowa naibaha emidio wia neido naiba iaowa: Kirodumeaito wade taroumo, ematuhe odoro tore. 41Nou kekeha naibaha iariiai wia popoito naibaha imohorai wia kirodumeaito wade naiba iaowa; 42nou naiba iaowa, Aba e, ina ro nirowa, tamidai koimo nouri mo aueudo; ata mo nirowa biahai, ro himia nirori. 43Ina na’u gururu‐mere toboroudo o’uro, nou pupuo owai. 44Wia nou imini godogodoha iraromodiowa wia kirodumeaito wade auwo pupuoito nou naiba iaowa wia nou buraea auwo niimo, sawi aibo, ihupo waumo hopuwa naibaha oromooutiwaumo. 45Ina nou ta’uwa kirodumea batiudo nou naibaha otoa, nou kitomudio mereido naibaha o’uro, wia nei uwo kirowa, giopu mibo ramu, nouro nei naibaha ivia. 46Wia nou neido naiba iaowa: Touna uwo rirou? Tairo’ibuamo, kirodumeaito wade taroumo, ematuhe odoro tore.
47Ina nou wade karowa, oubi gema naibaha o’uwaumo wia dubu, paina Iuda, 12 mere na’uri, nei opu imowouwa wia Iesu tarito naibaha o’uro, nou ohomeai. 48Wia Iesu nouido naiba iaowa, Iuda, Oubiha‐mere kohomeaiwa, roro piroha arimaaidai? 49Ina nou himia kowaheedio mereo, nouri oubi kidodiai na’i naibaha imeauriwaumo nei naiba iaowaumo: Pai‐dubu e, imoo nei iwotomaira korowoto garaaraito? 50Wia dubu na’uro auwo‐kohena hiwaa‐mere naibaha atetai, nou tuiha hepato naibaha udea. 51Wia Iesu naibaha omowameai, naiba iaowa: Tabeedei nou, moro inododiaidai. Wia nouro nou hepato naibaha owateai wia nou meaha naibaha oiti. 52Ina nou ta’uwa auwo‐kohena oubi wia Tana‐moto pai‐oubi wia mamusi‐mamusi naibaha o’uwaumo nou ohiaimoi, Iesu neido naiba iaowa: Rio piro‐dubuido aro’umo, korowoto garaara ramu wia bugu ramu? 53Hiwio amida mo riomu Tana‐motowa nou nemidiodiotuti, ina rioo mo tuito nouowa ohitimo biahai; ina hiwionu nou rio himia hiwiori wia durii pupuori.
54Ina neiio nou naibaha ohiaumo, naiba owaboiiowaumo, wia auwo‐kohena motoito naibaha ovioumo; wia Pita dooihaudo naibaha orobodowaro. 55Ina nou ta’uwa neiio kupo naibaha adorowaumo, tutu moto turiwa, ina nei auwoha kupo’i nou eme‐midiowaumo. Pita neimu naibaha emi. 56Wia behe na’uro nou naibaha eauri, kupo pidawa emidiowa, wia nou pupuito eauri, naiba iaowa: Ina dubu nouri noumu emidiotuti. 57Wia nou naiba aratiutiwa, naiba iaowa: Behe mo nou umo biahai. 58Ina tutu ta’u biahai dubu ataro nou naibaha eauri naiba iaowa: Rovia nei mere na’uri; wia Pita naiba iaowa, Abo, mo biahai. 59Ina ata ta’u tutu aibo oa, dubu ataro wade pupuito naiba iaowa: Naiheha nouri dubu noumu emidiotuti, mabu nouri nou Galilaia duburi. 60Wia Pita naiba iaowa: Abo, ro karo wadei mo umo biahai aidio, ina nou ta’uwa hagohagoha kokora naibaha otuaro. 61Wia Pai‐duburo naibaha eme‐teai ina Pitaido naibaha eauriwa wia Pita naibaha iraromodiowa Iesuro kiao wadei, nouri wade nouido nou aro, Kokora wade otua tatowa ina roro mo ainamatioi neewa na’uito. 62Wia Pita naibaha ohuowa, ina nou auwo idebi naibaha orotowa.
63Wia Iesu kohidio oubi, neiio nou naibaha omoboumo naiba epiawaumo. 64Ina neiio nou idomai hipuraito naibaha omopaumo, dooudo nou hohowa neiio naibaha atowaumo naiba iaowaumo: Peroveta wade taro, botiro repia. 65Wia godogodo ubauba wade ata neiio nouido naibaha iaowaumo.
66Ina hiwio iheheaiwa mamusi‐mamusi wia auwo‐kohena oubi wia titi‐oubi naibaha idabuaiwaumo wia neiio nou naibaha owaboiiawaumo nei himia wade kiao batii noito. Nei naiba iaowaumo: 67Ina rovia Kerisori, taro imoido. Wia nou neido naiba iaowa: Ina moro rioido arowa, rioo mo irovidioumo raihe. 68Ina moro rioido ainai‐atodoi, rioo moido omowameai raihe. 69Ina doo Oubiha‐mere aiwamidioi, Iehova tuiha tu mabuwa, nou himia pupuo batiwa. 70Wia nei auwoha naibaha iaowaumo: Ina rovia Iehova Merera? Nou neido naiba iaowa, Bowia mo nouri. 71Wia nei naibaha iaowaumo: Teiri niahoowadumo kiauri oubi ata? Imo niro biahai, mabu nouri imo himiao tau nirovidioumo nou himia maataito kiao wadei.
موجودہ انتخاب:
Luka 22: KXW1941
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the British and Foreign Bible Society in 1941.