LUKAS 9
9
Isa geu-utus dua blaih droe murit Gobnyan
(Mat. 10:5-15; Mrk. 6:7-13)
1Isa laju geuhôi bandua blaih droe murit Gobnyan, laju geubri kuasa bak awaknyan keu jeuet jiuse roh jeuhet dan jipeupuléh peunyakét. 2Óh lheuehnyan geuyue bak awaknyan jijak peupuléh ureuëng sakét dan geuyue peusampoe haba pakriban Po teu Allah geumat peurintah sibagoe Raja. 3#Luk. 10:4-11 “Bék gataba sapeue watée gata jak,” kheun Isa ubak awaknyan. “Bék gata ba tungkat, atawa baluem teumpat seudeukah, atawa peunajoh, atawa péng, atawa dua ôn peukayan. 4Dipat mantong gata jiteurimong, tinggai kheueh disinan sampoe bak watée jih gata tinggai banda nyan. 5#Kis. 13:51 Dan bak teumpat gata hana jiteurimong, watée gata tinggai banda nyan, seuteuk kheueh abée nyang na bak tapak gaki gata, sibagoe peuingat keu awaknyan.”
6Murit-murit Isa laju geujak u gampông-gampông keu jijak peusampoe Haba Gét nyan dan jipeupuléh ureuëng sakét di jeueb-jeueb teumpat.
Herodes bingong
(Mat. 14:1-12; Mrk. 6:14-29)
7 #
Mat. 16:14; Mrk. 8:28; Luk. 9:19 Watée raja Herodes nyang mat keurajeuen di Galilea, jideungoe peue-peue mantong nyang teujadi nyan, jihnyan jiteuka bingong. Sabab na nyang peugah Nabi Yahya Pumanö ka udeb keula-i. 8Na teuma nyang peugah Nabi Ilyas ka teuka lom. Ureuëng laén jipeugah sidroe nabi nibak nabi-nabi yoh jamén ilée ka udeb lom teuma. 9Herodes jipeugah lagée nyoe, “Ka Ulôn peurintah bak ureuëng laén mangat jijak kôh takue Nabi Yahya Pumanö. Teuma di ureuëng nyoe, soe nyang seubeuna jih? Jai that-that nyang ka ulôn deungoe keuhai jihnyoe.” Dan Herodes jiuseuha beu meuteumé jingieng Isa.
Isa geubri makheun manusia limong ribée droe
(Mat. 14:13-21; Mrk. 6:30-44; Yah. 6:1-14)
10Óh ka seuleusoe nibak tugaih rasui-rasui Isa laju jigisa dan jicalitra banmandum ubak gobnyan peue-peue nyang ka awaknyan peubuet. Isa laju geupakat awaknyan meusajan-sajan ngon gobnyan jak peuaséng droe u banda Betsaida. 11Teuma watée jiteupeu lé ureuëng ramé keuhai nyan, awaknyan laju jiseutôt Isa. Gobnyan geuteurimong awaknyan, laju geumariet ngon awaknyan keuhai pakriban meunyoe Allah ka geumat peurintah sibagoe Raja. Dan meunan cit geupeu puléh ureuëng sakét nyang na lamkawan awaknyan.
12Watée mata uroe karab jilhob, mandua blaih droe murit Isa laju jijak meuhadab ubak Gobnyan sira jipeugah lagée nyoe, “Bapak, teumpat nyoe seungue dan jiôh that nibak ureuëng ramé. Leubeh gét neuyue jak ureuëng ramé nyoe banmandum, mangat jihnyan jeuet jijak mita peunajoh dan teumpat éh nyang na di gampông-gampông nyang na nibak silingka nyoe.”
13Teuma geujaweueb lé Isa, “Gata mantong nyang bri bak awaknyan mangat jeuet jimakheun.”
Jiseuôt lé murit-murit Isa nyan, “Bak kamoe nyang na limong boh ruti dan dua boh eungkot. Peu kheueh harôh kamoe jakbloe peunajoh keu ureuëng ramé nyoe?” 14(Na kira-kira limong ribée droe ureuëng agam nibak teumpat nyan)
Isa geupeugah ubak murit-murit Gobnyan, “Neuyue duek kheueh awaknyan banmandum meutumpôk-tumpôk, kira-kira limong ploh droe saboh tumpôk.”
15Murit-murit Isa laju jipeubuet peue-peue nyang ka geuyue lé Isa ubak awaknyan. 16Dan óh lheuehnyan lé Isa laju geucok ruti nyang limong boh nyan meunan cit deungon eungkot nyang na dua boh nyan, óh lheuehnyan laju geutangáh u langét sira geulakée teurimong gaséh ubak Po teu Allah. Óh lheueh nyan ruti ngon eungkot nyan laju geupriek-priek ngon jaroe gobnyan dan geujok laju ubak murit-murit geuh keu jibagi-bagi keu ureuëng ramé nyan. 17Dan awaknyan banmandum jiteumé makheun sampoe troe. Dan murit-murit Isa laju geupeusapat séueh-séueh nyang jipajoh lé ureuëng ramé nyan nyang le jih na dua blaih boh raga.
Petrus jimeungaku keuhai Isa
(Mat. 16:13-19; Mrk. 8:27-29)
18Bak saboh watée, Isa teungoh geumeudoá sidroe geuh mantong, murit-murit Gobnyan laju jijak ubak Gobnyan. Isa laju geutanyong ubak awaknyan lagée nyoe, “Meunurot lagée jipeugah lé gob, Ulôn nyoe soe?”
19 #
Mat. 14:1-2; Mrk. 6:14-15; Luk. 9:7-8 Awaknyan laju jijaweueb, “Na nyang peugah Nabi Yahya Pumanö. Na teuma nyang peugah gobnyan Nabi Ilyas, nyang laén jipeugah teuma sidroe nabi yoh jamén ilée nyang watéenyoe ka udeb keula-i.”
20 #
Yah. 6:68-69
“Dan meunurot gata keudroe pakriban, Ulôn nyoe soe?” geutanyong lé Isa lom.
Jijaweueb lé Petrus lagée nyoe, “Bapak na kheueh Raja Nyang ba Seulamat nyang ka geupeu janji lé Po teu Allah.”
Isa geumeututoe keuhai seungsara ngon keuhai maté
(Mat. 16:21-28; Mrk. 8:31–9:1)
21Dan Isa laju geupeugah ubak murit-murit Gobnyan, “Bék sagai-sagai gata peugah hainyan ubak soe mantong.” 22Geupeugah lom lé Isa, “Aneuëk Manusia keubiet jai that harôh jiteurimong deurita dan jiteuntang lé peumimpén-peumimpén ngon imeum-imeum ulée, meunan cit lé gurée-gurée agama. Gobnyan teuma jipoh maté, teuma bak uroe nyang keu lhée geubeudôh lom teuma.”
23 #
Mat. 10:38; Luk. 14:27 Óh lheuehnyan Isa geupeugah teuma ubak bandum ureuëng nyang na nibak teumpat nyan, “Ureuëng nyang jitem seutôt Ulôn, harôh jipeutuwoe ubak keupeuntengan jih keudroe, jitem gulam saleb gobnyan tieb-tieb uroe, dan hana jipiôh jiseutôt Ulôn. 24#Mat. 10:39; Luk. 17:33; Yah. 12:25 Sabab ureuëng nyang keuneuk peuteun keuhai udeb jih, ureuëng nyan teuma gadôh udeb. Nyang keubiet jih, ureuëng nyang jikeureubeuen udeb jih deumi keu Ulôn, ureuëng nyan teuma seulamat. 25Peue laba jih sidroe ureuëng meunyoe bansigom donya nyoe jeuet keu milék jih, teuma jihnyan jipeurusak ngon jipeugadôh udeb jih? 26Meunyoe ureuëng malée jiangkée Ulôn dan peue-peue nyang Ulôn peurunoe, meunan cit Aneuëk Manusia teuma malée jiangkée ureuëng nyan bak watée geuhnyan teuka singoh ngon kuasa Gobnyan, dan deungon kuasa Bapak dan malaikat-malaikat nyang suci! 27Beutateupeue kheueh: na ureuëng lamkawan gata nyoe nyang hana lom maté sigohlom jihnyan jikalon Po teu Allah geumat peurintah.”
Isa jipeumulia
(Mat. 17:1-8; Mrk. 9:2-8)
28 #
2Ptr. 1:17-18
Na kira-kira sigoe aleuhat óh ka lheueh Isa geupurunoe hai-hai nyan, laju geuba Petrus, Yahya dan Yakobus u ateueh puncak saboh gunong guna jih keuneuk meudoá. 29Teungoh Isa geumeudoá bak teumpat nyan, ruman Gobnyan laju meu-ubah dan peukayan Gobnyan ka jeuet keuputéh meuble-ble cahya. 30-31Ngon hana teusangka-sangka, teuka kheueh keunan dua droe ureuëng, Nabi Musa ngon Nabi Ilyas geujak peuleumah droe deungon cahya nibak syeuruga. Awaknyan geumeututoe ngon Isa keuhai Gobnyan maté nyang hana treb le teuma geurasa di Yerusalem. 32Bak watée nyan Petrus dan rakan-rakan Gobnyan ka teungét, dan deungon hana jisangka-sangka Gobnyan teujaga laju jibeudôh, dan laju jigieng Isa muble-ble cahya dan na dua droe ureuëng ka teudong ngon Gobnyan. 33Watée bandua droe ureuëng nyan keuneuk tinggai Isa, Petrus laju jipeugah ubak Gobnyan, “Bapak Gurée, mangat that tanyoe bak teumpat nyoe. Bah kheueh kamoe jak peudong lhée boh khimah: saboh keu Bapak, saboh keu Nabi Musa, dan saboh teuk keu Nabi Ilyas.” (Petrus jipeugah meunan deungon hana jituôh peuphom peu nyang ka jipeugah nyan.)
34Teungoh Petrus mantong jipeugah haba, teuka kheueh saboh gunulong awan, di awan nyan laju jipeupayong ateueh awaknyan, sampoe awaknyan teumakot that. 35#Yes. 42:1; Mat. 3:17, 12:18; Mrk. 1:11; Luk. 3:22 Óh lheueh nyan nibak lam awan nyan teudeungoe kheueh su nyang teupeugah lagée nyoe, “Nyoe kheueh Aneuëk Ulôn nyang Ulôn piléh. Deungoe kheueh peue nyang jipeugah!”
36Óh ka lheueh su nyan hana teudeungoe le, laju jingieng lé awaknyan Isa sidroe kông teudong nibak teumpat nyan. Murit-murit Isa seungab mantong keuhai banmandum nyan, dan hana jipeugah baksoe mantong keuhai peue nyang ka lheueh jikalon.
Isa geupeu puléh aneuëk miet nyang ka jitamong roh jeuhet
(Mat. 17:14-18; Mrk. 9:14-27)
37Óh singoh beungoh Isa ngon ban lhée droe murit geuh nyan laju geutron nibak gunong nyan, dan di ureuëng ramé laju jijak ubak Gobnyan. 38Na sidroe ureuëng agam lamkawan ureuëng ramé nyan jiteumawök ubak Isa, “Bapak Gurée, neutulông jak kalon aneuëk ulôn – jih nyan kheueh sidroe kong aneuëk ulôn, neutulông ulôn Bapak Gurée! 39Meunyoe roh jeuhet jiteuka dan jitamong lam tuboh jihnyan, badan jih laju teubot-bot ngon teuleunteuk-leunteuk sira jiklik-klik dan babah jih mukuboh-kuboh. Roh nyan hana jipiôh jiseksa aneuëk nyan dan hana jitem teubiet lam tuboh jihnyan! 40Ka lheueh ulôn lakée ubak murit-murit Bapak mangat jitem peuteubiet roh jeuhet nyan lam tuboh aneuëk ulôn, teuma awaknyan hana hase jipeuteubiet.”
41Geujaweueb lé Isa, “Hana wayang gata nyoe! Biet-biet gata nyoe ureuëng nyang meunyeuleweng dan hana tapeucaya! Sampoe án pajan harôh lôn tinggai meusajan ngon gata dan ulôn saba ateueh gata? Ba laju aneuëk nyan keunoe!”
42Teungoh aneuëk nyan jijak ubak Isa, roh jeuhet nyang na lam tuboh aneuëk nyan laju jiseumpom aneuëk nyan sampoe-sampoe badan aneuëk nyan teubot-bot ngon teuleunteuk-leunteuk. Teuma Isa laju geupeurintah roh jeuhet nyan mangat jiteubiet dan bak watée nyan cit aneuëk nyan ka puléh. Dan aneuëk nyan pih laju geujok lom ubak ayah jih. 43Banmandum ureuëng hireuen watée jingieng kuasa Po teu Allah nyang rayeuk nyan.
Isa geupeugah lom keuhai Gobnyan maté
(Mat. 17:22-23; Mrk. 9:30-32)
Watée ureuëng ramé mantong teuhireuen-hireuen jikalon peu nyang ka geupeubuet nyan, Isa laju geupeugah ubak murit-murit geuh, 44“Simak kheueh beugét-gét dan bék tuwoe peue nyang Ulôn peugah nyoe: Aneuëk Manusia teuma jijok ubak kuasa manusia.” 45Teuma lé murit-murit Isa nyan hana muphom peue nyang geupeugah lé Gobnyan. Hainyan geusöm nibak awaknyan mangat awaknyan hana muphom. Teuma awaknyan teumakot jitanyong hai nyan ubak Gobnyan.
Soe nyang paleng rayeuk?
(Mat. 18:1-5; Mrk. 9:33-37)
46 #
Luk. 22:24
Murit-murit Isa keudroe ka jimeudakwa sabe keudroe-droe keuhai soe nyang paleng rayeuk lamkawan awaknyan. 47Isa geuteupeue peue nyang jipike lé awaknyan, sabab nyan kheueh laju geucok sidroe aneuëk ubit dan laju geupeudong aneuëk nyan bak binéh Gobnyan. 48#Mat. 10:40; Luk. 10:16; Yah. 13:20 Dan laju geupeugah ubak murit-murit Gobnyan, “Ureuëng nyang jiteurimong aneuëk nyoe ngon sabab lé Ulôn, saban cit jihnyan ka jiteurimong ulôn. Dan ureuëng nyang teurimong ulôn, saban cit ka jiteurimong Gobnyan nyang utus Ulôn. Sabab ureuëng nyang paleng ubit lamkawan gata nyoe, nyan kheueh nyang paleng rayeuk!”
Ureuëng nyang hana jilawan gata, ureuëng nyan jidong blaih gata
(Mrk. 9:38-40)
49Yahya jipeugah, “Po, na kamoe ngieng ureuëng laén ji use iblih ateueh nan Po, kamoe tam ureuëng nyan, sabab jihnyan bukon ureuëng geutanyoe.”
50“Bék gata tam jihnyan,” kheun Isa ubak Yahya dan murit-murit Gobnyan nyang laén, “sabab ureuëng nyang hana jilawan gata, saban cit jihnyan jidong blaih gata.”
Na saboh gampông di Samaria hana jitem teurimong Isa
51Watée ka tô that saát jih Isa teubeuôt lam syeuruga, laju geucok peunutôh keu geujak u Yerusalem. 52Dan geuyue laju ureuëng laén leubeh awak nibak Gobnyan. Ureuëng-ureuëng nyang geuyue nyan laju jijak, dan jitamong laju lam saboh gampông nyang na di Samaria keu jipeusiab sigala sisuatu guna keu teusambot Isa. 53Teuma di ureuëng-ureuëng nyang na lam gampông nyan hana jiteurimong Isa geujak keunan, sabab ka jeulaih that gobnyan teungoh geujak u Yerusalem. 54#2Raj. 1:9-16 Dan watée murit-murit Isa, Yakobus ngon Yahya jiteupeu keuhai nyan, laju jipeugah lé awaknyan, “Tuhan, peu kheueh Tuhan neutem, kamoe lakée apui mangat jitron nibak langét keu teupeubinasa banmandum ureuëng nyoe?”#Lam padub-padubboh naseukah kuno na tutoe haba lagée nyoe: lagée nyang geupeubuet lé Nabi Elia.
55Isa laju geupaleng bak murit-murit Geuh nyan sira geubeungéh bak awaknyan.#Lam padub-padubboh naseukah kuno na tutoe haba lagée nyoe: dan jipeugah, “Gata hana tateupeue Roh nyang toh nyang kuasa gata; sabab Aneuëk Manusia kon teuka keugeujak peubinasa nyawöng gob, teuma keugeujak peuseulamat.” 56Óh lheuehnyan awaknyan laju geujak u gampông laén.
Ureuëng-ureuëng nyang jitem jeuet keu murit-murit Isa
(Mat. 8:19-22)
57Teungoh geujak Isa ngon murit-murit Gobnyan, na ureuëng jipeugah ubak Gobnyan, “Bapak, ulôn kutem seutôt Bapak ho mantong nyang Bapak jak!”
58Geujaweueb lé Isa, “Asée srigala na uruek, dan cicém na eumpung, meunyoe Aneuëk Manusia hana teumpat éh.” 59Dan geupeugah laju lé Isa ubak ureuëng laén, “Seutôt kheueh Ulôn.”
Teuma ureuëng nyan jipeugah, “Bapak, neupeu idhin kheueh Ulôn woe leubeh ilée Lôn jak kubu ayah Ulôn nyang ka maté.”
60Geujaweueb lé Isa, “Bah kheueh ureuëng maté jipeukubu ureuëng maté keudroe. Teuma digata, jak laju dan gata peusampoe bahwa Allah ka geupeu phon mat peurintah.”
61 #
1Raj. 19:20
Na teuma ureuëng laén jipeugah lagée nyoe, “Bapak, ulôn kutem seutôt Bapak, teuma neupeu idhin kheueh ulôn ilée keu lôn jak peugah u rumoh.”
62Isa geupeugah ubak ureuëng nyan, “Ureuëng nyang ka jipeuphon meu-uéue, laju jingieng u likot, ureuëng nyang lagée nyan hana patot jeuet keu umat Po teu Allah.”
موجودہ انتخاب:
LUKAS 9: LAIACE
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Old and New Testament in Today's Aceh Language @ LAI, 1997.