YOHANES 2
2
Passua'-suarrang pa'buntingang ri kota Kana
1Ruangallo ribokoanganna, nia' passua'-suarrang pa'buntingang ri kota Kana, ri pa'rasangang Galilea. Na nia' tongi amma'Na Isa anjoreng. 2Niundang tongi Isa siagang ana'-ana' gurunNa mange anjoreng ri pa'buntinganga. 3Ri wattunna la'busu'mo anggoro' lanipattoananga, nakanamo amma'Na Isa ri Isa, “Kala'busangi anggoro' ke'nanga.”
4Appialimi Isa Nakana, “Teaki' suroiA' amma'. Tenapa narapiki wattunna laKupakabateang KalengKu.”
5Mingka nakanamo amma'Na Isa ri pala'-palayanga, “Gaukang mami apa Napassuroanga ri kau ngaseng.”
6Anjoreng ri tampaka, nia' annang gumbang lompo, nipasadia untu' lanapake taua a'bissa bangkeng situru' ada'na tu Yahudia. Anjo gumbang lompoa akkullei massing nibonei kira-kira sibilangngang litere' jaina. 7Nakanamo Isa ri anjo pala'-palayanga, “Bonei ngasengi je'ne' anjo gumbanga.” Naboneimi ke'nanga anjo gumbanga, sa'genna rassi ngaseng. 8Nampa Nakana Isa ri ke'nanga, “Kamma-kamma anne allemi sike'de' anjo je'neka, nampa nuerang mange ri pamimpinna anne passua'-suarrang pa'buntinganga.” Naerammi ke'nanga anjo je'neka mae ri pamimpinna anjo passua'-suarranga. 9Naso'rimi pamimpinga anjo je'ne' le'baka tappinra a'jari anggoro'. (Tanaassengai angkana battu kemaei anjo anggoroka. Iaji anjo pala'-palayang appatirika je'ne' bawang angngassengi.) Nakio'mi pamimpinga bunting bura'nea, 10na nakana ri ia, “Biasaya, anggoro' kaminang bajika rolong napattoanang taua, nampa punna sukku'mo nasa'ring toanaya, nampami nipassareang anggoro' biasaya. Mingka ikau nuboliki rolong anggoro' kaminang bajika sa'genna ri kamma-kammaya anne!”
11Iaminjo uru-uru gau' appakalannasaka Nagaukang Isa. Anjoreng ri kota Kana, ri pa'rasangang Galilea nigaukang anjo gauka. Lanri iaminjo pammateia naNapappicinikammo kalompoanNa. Tappa' ngasemmi ana'-ana' gurunNa ri Ia.
12 #
Mat. 4:13
Le'baki anjo, a'lampami Isa mange ri Kapernaum. Sipa'rurungang ngasengi a'lampa amma'Na, sikamma sari'battanNa, kammayatompa ana'-ana' gurunNa. Ammantammi ke'nanga anjoreng siapa are allonna.
Antamaki Isa ri Balla'Na Batara
(Mat. 21:12-13; Mrk. 11:15-17; Luk. 19:45-46)
13 #
Kal. 12:1-27
Ri wattunna a'birimmo Allo Lompo Paskana tu Yahudia, a'lampami Isa mange ri kota Yerusalem. 14Nia'mo Narapikang siapa are pabalu' sapi, gimbala' siagang jangang-jangang bodobangkeng anjoreng ri Balla'Na Batara ri Yerusalem; nia' todong siapa are pasambe doe' ca'di ammempo anjoreng. 15Appare'mi cambo' otere' Isa, nampa Nabongka ngaseng anjo olo'-oloka, kammaya gimbalaka, sapia, na maraengannaya. Nabongka ngasengi assulu' anjo olo'-oloka battu ri Balla'Na Batara. Nampa Nabulintakkang ngaseng mejang-mejanna anjo pasambe doeka sa'genna tassia'-siara' ngaseng doe' ca'dina ke'nanga. 16Nampa Nakana ri anjo pabalu' jangang-jangang bodobangkenga, “Angka' ngasengi a'lampa anne. Teako pareki tampa' pa'danggangang Balla'Na BapakKu!” 17#Pam. 69:10 Nau'rangimi ana'-ana' gurunNa apa niaka tattulisi' lalang ri Kittaka angkanaya, “O Allata'ala, ia pangngaiKu ri BallatTa, sanrapangi pepe' akkanrea ri atingKu.”
18Battumi tau anna'galaka koasa ri tu Yahudia andallekangi Isa. Nakanamo ke'nanga, “Coba sai gaukang gau' appakalannasaka, akkullea a'jari pammatei ri ma'nassaNu siratang anggaukang ngasengi anne sikammaya.”
19 #
Mat. 26:61, 27:40; Mrk. 14:58, 15:29 Appialimi Isa Nakana, “Allemi runtung anne Ballaka, na nampa Kupabangung poleang lalanna tallungalloa.”
20Nakanamo ke'nanga, “Patampuloi angngannang taung sallona nipake untu' ambangungi anne Ballaka. Nampa erokKo iKau ambangung poleangi lalanna tallungalloa?”
21Mingka Balla' natabaya kananNa Isa, iamintu batangkalenNa. 22Jari ri boko sallang, ri wattunna attallasa' poleang Isa battu ri kamateanga, nau'rangimi ana'-ana' gurunNa Isa, angkanaya anjo passalaka le'ba' memammi Napau. Jari tappa'mi ke'nanga ri apa niaka tattulisi' lalang ri Kittaka, siagang ri apa le'baka Napau Isa.
Naasseng ngasengi Isa sikontu ma'rupataua
23Lalang ri nia'na Isa ri Yerusalem, ri wattunna allo Passua'-suarranna Paskaya, jaimi tau tappa' ri Ia lanri sikamma gau' appakalannasa' le'baka Nagaukang. 24Mingka tena nipatappaki ri Isa ke'nanga, lanri Naassenna ngaseng ma'rupataua. 25Tena naparallu nipauang ri passala'na massing rupataua, lanri Naassenna ngaseng apa niaka lalang ri atinna rupataua.
موجودہ انتخاب:
YOHANES 2: MAK
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in