Luka 8
8
Bamato bakambyaki Yesu
1Ndʼafeka bʼaoyiʼako aotuwana benanga la biʼenene la bia tosisi, aolongoza joi ko ayosange nsango eʼolotsi ea likulaka ja Nzakomba. Ko ba-jom lʼafe baki lʼende, 2ko la bamatʼamo, iyʼaikyamaki lima belimo biʼobe la nkangi; wete Malia, otangema Mangandala, oki ba demona nsambo olaka, 3ko la Yoana, waji owa Kuza, wesanyi onjesanyaki baumba ba Elode, ko la Susana, ko la bamo bankina bauke. Bane baolokambya la toma tokiyo.
Esonganva ea bosanzeli owa biofo
(Mt 13.1-9; Mk 4.1-9)
4Aki etukuluku eʼonene otakane, ko lʼanto bayaki elʼende lima benanga lʼenanga, aotefeelʼiyo lʼesonganya, aokela, 5Bosanzeli aocwa osanzela biofo bekae. Ko asanzelʼende biofo, bemo bekweki ndʼompempe wa mboka, ko beomatelama lʼakaka, ko tofulu tʼaliko tokoma beko. 6Ko bemo bekweki nda bikenje, beomela, lolo nkakoyoko beonyeela la bosamba wʼasi. 7Ko bemo beokwa ndʼetei ea baeke, ko baeke baomela lʼeko bolongo, ko baofitʼeko la nkaka. 8Ko bemo beokwa ndʼamoci ba lobwo, beomela, becwekʼamuka bonkamʼonkama. Akiʼndʼotefelaka baoyiʼane, aosangya lolaka, aokela, Ole lʼatoi bandoka, kelʼende okoza.
Yesu acingola ncina elakʼende la bisonganya
(Mt 13.10-17; Mk 4.10-12)
9Ko bakimi baolouola ncingo eʼesonganyʼene. 10Ko aolakela, Ekaemʼelʼinyo wae lea biisisa bia likulaka ja Nzakomba, lolo ele baciki o la bisonganya, ndʼewela wae alendʼiyo bafaena, ko andokʼiyo bafaokotola.
Ncingo ea bosanzeli owa biofo
(Mt 13.18-23; Mk 4.13-20)
11Esonganyʼeko ele ngone; Biofo bele Joi ja Nzakomba. 12Beko bele ndʼompempe wa mboka bele banto bandoka, nkako Satana aya ko afonolʼiyo Joi limʼetemʼekiyo nyango bafimeza ko bafoika. 13Ko beko nda bikenje bele banto bandoka, ko bamba Joi lʼosalangano, lolo bafa la wili; iyo bimeza fele, lolo endiela lomeko batelengana. 14Ko beko bekweki ndʼaeke bele banto bandoka, lolo acwʼivo mboka ekiyo, bekakaano la liaci la bisengo bia loiko lone baolakoma, ko bafokitsʼamuka ndʼetundelo. 15Ko beko ndʼamoci ba lobwo wete banto bandoka Joi, ko bakatemela liko ndʼotema wa nsosolo lʼolotsi, ko baocwʼamuka la loncinji.
Lilako limʼitswa
(Mk 4.21-25)
16Nkʼonto, ngʼaambolʼitswa, okukʼiko la mpoke. Nkina ilʼiko ndʼase ba ntange, lolo ilʼiko ndʼafyelo, wae banto bandotswa bene fole. 17Ele nko wisisa bolʼeko bofaokita nda fole, ko nko joi likuki lifaeana ko lifoya nda fole. 18Loalaka elenge endokʼinyo, ele ifokongʼokaema elʼende oata, lolo ele osʼofoate, o lʼako batangʼende wae aate, bifokolama limʼelʼende.
Booci wa nsosolo wa Yesu
(Mt 12.46-50; Mk 3.31-35)
19Nkako nyango ekae lʼakuneʼakae baoyʼelʼende, lolo ntabakiteya elʼende la ncina ea jenge jʼanto. 20Ko baolosangela wete, Nyango eke la bakunʼake bemi ndʼanza, balanga bakene. 21Lolo aolaamba, Nyango ekami lʼakuneʼakami bale wete iyʼandoka Joi ja Nzakomba ko bakela liko.
Yesu aosasa bompompo
(Mt 8.23-27; Mk 4.35-41)
22Mbilʼemo ende lʼakimiʼakae baokondelʼa wato, ko aolakela, Kela tofende wijʼa lieke. Ko baosemwa. 23Ko akendʼiyo nda wato, ende etamaki baisilo. Ko bompompo mongo bokumba nda lieke, ko wato boangʼoyola, ko baki ndʼoima wʼiwa. 24Ko baoya elʼende, baoloetola, baokela, Nkolo! Nkolo! towa oyei! Ende aetswa, aosisa bompompo ko la mpombe yʼasi, baosilama sila, ko lieke joyala o wai. 25Ko aolakela, Imeezo ekinyo ele nko? Baolokʼooma, baokamwa, ko baotefelana wete, Bontʼone ale na? Kamba atoma bompompo lʼasi lotomo, ko boimeza.
Yesu aikya oki iʼademona bouke nda Ngelasa
(Mt 8.28-34; Mk 5.1-20)
26Ko baosema ndʼokili wa Bangelasa, bolongi la Ngalilaya nda lieke. 27Asafwʼende ndʼokili bontʼomo limʼonangʼoko oki lʼademona aokumana lʼende. Elingi mongo ntalotaki benkoto, ko ntakitase ndʼilombe, lolo nda bikundelo biʼanto. 28Andenʼende Yesu aobeleza, aokwa nda joso likae, ko aolotefeela la lofoso ja bolo, Joi lile ndatsʼemi la we na, Yesu, Bonʼowa Nzakomba oleki ka? Nkoonda, tonsisozake! 29La ncinʼeki Yesu osangelaka bolimo wa li-nyamo wae ole limʼelʼende. Ele boko okandaki bekanda lʼekanda, ko banto baoloesanya, ko aotungama lʼenyolo ko la bifoke, lolo aobola bitungyelo, ko aocinzama la demona nda bitekeleke. 30Yesu aolouola, Lina like na? Ende aolamba, Etukuluku; ele bademona bauke baolotswa elʼende. 31Ko baoloonda wae afatome wae bacwe ndʼofoku. 32Botonga wʼonene wa ngulu boleyamaki toma nda ngongo. Baoloonda wae botswele ngulu iko. Ko aolakaya ekendelo. 33Nkako bademona baolola limʼelʼonto, baolotswʼele ngulu, ko botonga bokitela ngongo lʼikao, bokwela lieke cubu, ko ngulu yowa ndʼasi.
34Akiʼyo ene joi likelamaki, baesanyi ba ngulu baolota, baocwʼosanga joi liko ndʼonanga la nda bisanga. 35Nkako banto baolola wae bene joi likelamaki, baoyʼele Yesu, ko baotana bontʼoki bademona ozamaka alotʼeto, ko bolimo o ko, akitase ndʼakaka ba Yesu. Ko iyobaoloka booma. 36Ko bandenaki baolasangela elenge eki bontʼoki lʼademona oikaka. 37Nkako linyenga liuma jʼanto limʼokili bouma bokotutsi la Ngelasa baoloonda wae imane limʼelʼiyo; eki booma mongo bokwelʼiyo. Ko aokondelʼa wato, aoluta. 38Lolo bontʼoki bademona ozamaka aoloonda wae ayale lʼende. Lolo aolouteya, aolokela; 39Utaka ndʼolaʼoke, ko sangaka elenge ea baoyi baki Nzakomba okokeelaka. Ko aokenda, aolanza baoyiʼako baki Yesu okeelakʼende ndʼonanga bouma.
Eikyelo ea bonʼowa Yailo lʼea bomoto oki la nkangi eʼalongo
(Mt 9.18-26; Mk 5.21-43)
40Aki Yesu utaka, etukuluku osambelakʼende lʼesaza, ekiʼyʼauma olendezakʼende. 41Ko bala bonto oki la lina Yailo, ko oki bokonji owa sunangonga, aoyʼokwa ndʼakaka ba Yesu, ko aoloonda wae acwe ndʼilombʼikae, 42ekiʼnde lʼonʼowʼomoto owa likinda owa mbula jom lʼife, ko aokita ndʼiwa. Aki Yesu oangʼokenda lʼende, linyenga jʼanto baokamʼelʼende.
43Ko bomoto oki lʼelekelo eʼalongo mbula jom lʼife, ntaikyameya lʼontʼomo. 44Ende aoya ndʼafeka, ko aofomwa bompempe wʼonkotʼokae, ko nkakoyoko elekelo eʼalongo bakae eotena. 45Ko Yesu aokela, Bontʼompomwaki na? Akiʼyʼauma anganaka, Petelo aolokela, Nkolo, linyenga jʼanto bakengama ko bakokama. 46Lolo Yesu aokela, Bontʼomo aompomwa, elʼemi nkotola wae mpamba eolola limʼelʼemi. 47Ko aki bomoto enaka wae afisameya, aoya la lolengi, aokwa nda joso likae, ko aosanga ndʼaiso bantʼauma ncinʼekiʼndʼofomwaka, ko elenge ekiʼndʼoikyamaka limpo. 48Ko Yesu aolokela, Bona, imeezo eke eokoikya. Wambʼokende la kuci.
49Nkʼatefelʼende bontʼomo aoya limʼilombe yʼokonji owa sunangonga, aolosangela, Bonʼoke owʼomoto aosilʼowa. Tutake otungya bolaki. 50Yesu okaki ko aoloamba, Tokake booma; imeza kika ko ifoika. 51Akiʼndʼokitaka ndʼilombe, ntimeza wae bontʼomo otswa lʼende imola nko Petelo la Yoane la Yakobo, lʼise la nyango eʼona. 52Ko bantʼauma baki eko baolela ko baoloulela nkimo. Lolo Yesu aokela, Talolelake, atafowa, lolo eci baisilo. 53Ko baoloseka kye, ekiʼyʼeaka wae aowa ci. 54Lolo aolokita la likata, aoloeta, aolokela, Bonoju, betswaka. 55Ko bolimoʼokae boluta, ko aolemala limpo. Ko Yesu aotoma wae bokaya toma ta ndala. 56Ko bandootaki baokamwa, lolo aolaaka o mbaaka mongo wae bafosangelʼontʼomo joi likelamaki.
موجودہ انتخاب:
Luka 8: LOL87
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
La Bible en Lomongo © Societe Biblique de la R.D. Congo 1987