LUKA 18
18
Gba we ngɔ mbe wuko wi fio wili
1'Do nɛ, nɛ Yezu tɔ̃ 'bɔ gba we gɛ hã Owi yambala mɛnɔ 'da a, we be hã wa na, wa wia tɛ sambala Gale fai, nɛ dɔ wa mbɔ́kɔ́ gɔ. 2A tɔ́a na: “Mbe wi 'bili we zi kɔ le kpo, a dɛ́ kili Gale gɔ, nɛ a ĩ́ ti wele gɔ. 3Nɛ mbe wuko wi fio wili zi tɛ mɛ 'bɔ kɔ le ni. Nɛ a da we mɔ́ a ti wi 'bili we ni. Nɛ wuke ni tɛ nɛ 'da wi 'bili we fai tɛ tɔ̃ hã a na: ‘Mɔ 'bílí we 'da lɛ, kɔ mɔ gbɛ́ gbãlã we hã mi!’ 4Nɛ ma la ni gbaa, nɛ nde wi 'bili we kɔ̃̀ we dɛ mɔ kpo gɔ. Nɛ 'do nɛ, nɛ a tɔ̃ do kɔ sila a na: ‘Gɛnɛ kɔ mi dɛ́ kili Gale gɔ, nɛ mi ĩ́ ti wele gɔ, 5kɔ nɛ́ kɛ wuke gɛ yɛkɛ mi fai gɛ, mi kɔ̃a we gbɛ gbãlã we hã a, dɔ a gbá zu mi fai gɔ.’ ”
6Nɛ Nwa Yezu tɔ̃ 'bɔ na: “Nɛ zélé kɛ 'dã wi 'bili we ni tɔ̃a ni! 7Ní nɛ nde Gale wè tɛ gala winɔ kɛ a saka wa, kɔ wa he dɛ 'da a tũ do gba wese ni gɔ nde? A wia tɛ zĩ tɛ̃ a zĩ, sɛ nɛ a gala wa de nde? 8Mi tɔ̃ hã nɛ na, a gala sɛ wa da dɔ̃ iko. Kɔ 'da fala tɛa 'da mi Be 'da Wele, nɛ mi kpa sɛ owinɔ kɛ wa do kɔ̃a we dɛ 'da Gale ni ngɔ nù gɛ nde?”
Gba we ngɔ Fariziɛ̃ do mbe wi futa tako
9Nɛ Yezu tɔ̃a 'bɔ gba we gɛ hã owinɔ kɛ wa lengge na, lo a bɔlɔ zu wele li Gale, nɛ wa zɔ ongba wa yala iko ni. 10A na: “Owele bɔa wa nɛa kɔ Tɛmpɛlo we sambala Gale. Mbe kpo a Fariziɛ̃, nɛ mbe a wi futa tako. 11Nɛ Fariziɛ̃ ni kulu ngɔ, nɛ a sambala na: ‘Aa Gale, mi hã iɔ̃nae hã mɔ, we kɛ mi ɔ̀ nɛ mbe winɔ kɛ wa a wi zũ, tabi o'dã wele, tabi wa ɔ do kɛnɛ ngba wa ni gɔ. Mi hã 'bɔ iɔ̃nae hã mɔ, we kɛ mi ɔ̀ nɛ wi futa takoe gɛ gɔ. 12Kɔ pɔsɔ kpo, nɛ mi bɛ̃ nyɔngɔmɔ tũ bɔa we dɔnggɔ mɔ, nɛ mi hã kpo mbee 'bu ngɔ kpamɛnɔ 'da mi vɛ̃ hã mɔ.’ 13Nɛ wi futa takoe 'bana dɛ 'do i, nɛ a bà mbamba li a ngɔ gɔ. Nɛ a a kɔ̃ a ngu'du a do 'bako vɛ̃, nɛ a tɔ̃ na: ‘Aa Gale, mɔ ĩ́ 'bako hã mi! Mi a wi dɛ 'dã mɔ!’ ”
14Nɛ Yezu tɔ̃ hã winɔ na: “Wi futa takoe ni si dɛ nu tɔa 'da a i, nɛ a hɔa wi bɔlɔ zu li Gale, nɛ nde Fariziɛ̃ ni gɔ. We kɛ wi kɛ a ba tɛ̃ a dɛ ngɔ, nɛ Gale a fí sɛ a nù. Nɛ wi kɛ a ba tɛ̃ a de nù, nɛ Gale a ba sɛ a dɛ ngɔ.”
Yezu wila nu ɛ tɛ obe
(Mat. 19.13-15; Mar. 10.13-16)
15Nɛ Owele wa tɛa do bi benɔ 'da wa hã Yezu na, a é kɔ̃ a ngɔ wa, takɔ a wele nu a tɛ wa. Kɔ owi yambala mɛnɔ wa nɛa we zɔ owele benɔ ni, nɛ wa ma ngɔ o dã zu wa na, gulu kɛ wa tɛ do benɔ we ge nde? 16Nɛ Yezu sa mɔ hã obenɔ dɛ kɛ zã a, nɛ a tɔ̃ na: “Nɛ tɛ gà benɔ we tɛ 'da mi nga gɔ. Nɛ lá wa kɔ wa tɛ, we duzu kɛ le nwa 'da Gale ma we winɔ kɛ sila wa ɔ nɛ sila benɔ gɛ ni. 17Mi tɔ̃ hã nɛ do gbãlã we na, ma wia na, wele kɔ̃ gɛnɛ dɛa to nwa 'da Gale, ɔ nɛ kɛ benɔ wa kɔ̃a do ma ni. Kɔ wele dɛ̀ na mɛ ni gɔ, nɛ nde a wé sɛ tɛ le kɔ le nwa 'da Gale gɔ.”
Wi kpamɔ kpo aka Yezu
(Mat. 19.16-30; Mar. 10.17-31)
18Nɛ mbe gã wi kpo aka Yezu na: “Aa wi be mɔ, mɔ a dia wi, mɔ tɔ̃ hã mi sɛ! Mɛ mi wia tɛ dɛ nɛ, takɔ mi kpa kpasi kɛ ma é sɛ gɔ ni a ge nde?”
19Nɛ Yezu aka a na: “Gulu kɛ mɔ sa li mi na dia wi ni we ge nde? Dia wi bina, dia wi tati a Gale zu a kpo. 20Mɔ ĩ̀ ti mbulanɔ kɛ ma tɔ̃a na: ‘Mɔ tɛ ɔ̃ do wili tabi wuko mɔ́ ngba mɔ gɔ, mɔ tɛ gbɛ̀ wi gɔ, mɔ tɛ zṹ mɔ gɔ, mɔ tɛ 'bìlì bɛlɛ do zu li ngba mɔ gɔ, mɔ dɔ́nggɔ́ baa mɔ do naa mɔ’ ni gɔ nde?”
21Nɛ wi ni gese na: “Ndo do nyanga gã 'da mi, mi dɛ mbulanɔ ni vɛ̃ dɛa.”
22Kɔ Yezu nɛa we zele ní, nɛ a tɔ̃ hã a na: “Mɔ zɔla mɔ kpo! Mɔ sí, kɔ mɔ bé gole kpamɛnɔ 'da mɔ vɛ̃, nɛ mɔ kɛ mbili nɛ hã Owi sãnɔ. Nɛ mɔ kpa sɛ mbé kpamɔ tɛ li nza i. Nɛ mɔ kpóló tɛ mɔ, nɛ mɔ tɛ 'dɔkɔlɔ mi.” 23Kɔ wi ni nɛa we zele ni, nɛ a dɛ zɔlɛɛ, we kɛ a zi do kpamɔ wena.
24Nɛ Yezu zɔa kɛ a si do 'bako wena ni, nɛ a tɔ̃ na: “We le kɔ le nwa 'da Gale ma nganda sɛ do wi kpamɛnɔ wena! 25Mba gɔ, nɛ zɔ́ gã sa'de ɔ nɛ samo, takɔ a le li holo tonga ma nganda wena. Nɛ nde takɔ wi kpamɔ le kɔ le nwa 'da Gale, ma nganda nɛa ngɔ ki ni.”
26Owinɔ wa nɛa we zele ni, nɛ wa ma ngɔ tɔ̃ na: “Na mɛ ni, wi wia sɛ we kpasa nɛ a wio nde?”
27Nɛ Yezu gese na: “Mɔ kɛ Owele wa wè tɛ dɛ nɛ gɔ ni, Gale wia tɛ dɛ ma.”
28Nɛ Petro tɔ̃ hã a na: “Mɔ zɔ́, kɛ lɛ la tɔa 'da lɛ, kɔ lɛ yɛnggɛ do mɔ gɛ!”
29Nɛ Yezu gese hã wa na: “Mi tɔ̃ hã nɛ do gbãlã we na, fala kɛ wele la tɔa 'dɛ ɛ, do wuke 'dɛ ɛ, do onya ɛ, do Owele ɛ, do obenɔ 'dɛ ɛ we duzu dɛa to nwa 'da Gale nde, 30nɛ do li wese sɔɛ gɛ, wi ni a kpa sɛ mbé mɔ wena. Nɛ do 'do, nɛ a kpa sɛ kpasi kɛ ma é sɛ gɔ ni.”
Yezu tɔ̃a 'bɔ mbé we fie do za'da nza kɔ fie 'da a
(Mat. 20.17-19; Mar. 10.32-34)
31Nɛ Yezu kala 'bɔ Owi yambala mɛnɔ 'da a 'bu ngɔ wa bɔa ni dɛ tɛ̃ a, nɛ wa la, nɛ a tɔ̃ hã wa na: “Nɛ ĩ́ na, lɛ tɛ kũ dɛ Yeruzalɛmɛ i. Nɛ wenɔ kɛ owi gba olo nu Gale wa tɔ̃a zɛ́ ma ngɔ mi Be 'da Wele ni, ma dɛ sɛ tɛ̃ ɛ. 32Wa 'dɔlɔ sɛ mi hã owinɔ kɛ wa a Oyuda gɔ ni. Nɛ wa yɔndɔ sɛ mi, nɛ wa hã sape hã mi, nɛ wa tufu sã nu wa tɛ mi. 33Wa zɛ sɛ mi do zufa ndala, nɛ wa gbɛ mi. Nɛ do talɛ tũi, nɛ mi za'da sɛ nza kɔ fio.” 34Nɛ nde owi yambala mɛnɔ wa ĩ̀ gulu we ni kpo gɔ. We kɛ gulu nɛ usu tɛ̃ ɛ do wa do'do, nɛ wa ĩ̀ gulu wenɔ kɛ Yezu tɔ̃a ni gɔ.
Yezu kpasa wi tandu
(Mat. 20.29-34; Mar. 10.46-52)
35Yezu nɛa we kɔlɔ do le Yeriko, nɛ nde mbe wi tandu kpo, a dungu dɛ kɛ zã wala tɛ gɔ mɔ. 36Nɛ a zele giti gba gili winɔ tɛ la nɛ, nɛ a aka, 37nɛ wa tɔ̃ hã a na, wi a Yezu, wi Nazarɛtɛ a la gɛ. 38Nɛ a ma ngɔ he mɔ na: “Yezu, Be 'da Davidi, mɔ ĩ́ 'bako hã mi!”
39Nɛ winɔ kɛ wa la do dati a ni, wa ma ngɔ o dã zu a na: “Mɔ kpé nu mɔ!”
Nɛ a hia 'bɔ mɔ dɛ ngɔ nganda wena na: “Be 'da Davidi, mɔ ĩ́ 'bako hã mi gɔ nde?”
40Nɛ Yezu yula nù, nɛ a tɔ̃ hã winɔ na, wa tɛ do a hã ɛ. Kɔ a nɛa we kɔlɔ do Yezu, nɛ Yezu aka a na: 41“Mɛ mɔ kɔ̃a na mi dɛ hã mɔ ni a ge nde?”
Nɛ a na: “Nwa, mi kɔ̃a na mi zɔ 'bɔ mbé mɔ.”
42Nɛ Yezu tɔ̃ hã a na: “Mɔ zɔ́ mɔ! Mɔ kpasa, we kɛ mɔ do kɔ̃a we dɛ 'da mi.”
43Nɛ do ti, nɛ wi tandui ni zɔa mɔ, nɛ a ma ngɔ la 'dɔkɔlɔ Yezu tɛ dɔnggɔ Gale. Kɔ gba gili winɔ wa nɛa we zɔ ni, nɛ wa dɔnggɔ tɛ mɛ 'bɔ Gale.
موجودہ انتخاب:
LUKA 18: NGB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.