Mateo 3
3
Lusapwilo lwa kwa Yoano Mubatishi
(Mako 1:1-18; Luka 3:1-18; Yoano 1:19-28)
1Kabiji mu oa moba kwaishile Yoano Mubatishi, kasa asapwila mungye mu ntanda ya Yudea amba, 2#Mat 4:17; Mako 1:15“Lapilai mambo bufumu bwa mwiulu bwafwenya ke pepi!” 3#Isa 40:3Yoano i ye ye a ambile Isaya ngauzhi amba,
“Jiwi ja umo ubijika mungye amba,
nengezhezhai jimo jishinda ja Nkambo,
ololai mashinda anji.”
4 #
2 Mfu 1:8
Kabiji aye Yoano wavwajilenga kivwalo kyalengwa na boya bwa ngamela, ne mukwandala wa kiseba mukifuka kyanji, ne kajo kanji kajinga nzhiye ne buki bwa mungye. 5Ponkapo bamupwijilenga bamu Yelusalema, ne bamu Yudea bonse, ne bonse bamu musezho wa Yodano. 6Kabiji ba batizhilwe kwi aye mu mukola wa Yodano, kasa besolola mambo abo.
7 #
Mat 12:34; 23:33 Kabiji pa kwibamona Bafaliseo bavula ne Basadusea ke beye ku lubatizhilo lwanji, wibambijile amba, “Anweba kisaka kya milolo! Ing'anyi wimujimuna amba munyeme bukaji bubena kwiya? 8Byonkabyo pangai bipangwa byafwainwa lulapilo. 9#Yoa 8:33Kechi mulanguluke mu michima yenu amba, muji na shenu Abulahama ne. Pakuba amiwa nemwambila namba, Lesa wakonsha kwalula ano mabwe ke baana ba Abulahama! 10#Mat 7:19Kabiji kapasa bekakungika kala ku mizhazhi ya bichi. Onkao mambo bichi byonse bibula kupanga bipangwa byawama, bebitema ne kwibitaya mu mujilo. 11Amiwa nemubatizha mu mema, lubatizhilo lwa lulapilo, pakuba ao undondela panyuma yami wankila bulume, amiwa kechi nafwainwa nangwatu kumusendela makwabilo anji ne. Aye ukemubatizha na Mupashi Wazhila ne na mujilo. 12Aye uji na kya kululwilako mu kuboko kwanji, kabiji ukatokesha bulongo pa kipujilo kyanji, ne kubungizha kajo mu butala bwanji, pakuba makunzhi ukeasoka na mujilo ubula kuzhima.”
Kubatizwa kwa Yesu
(Mako 1:9-11; Luka 3:21-22)
13Pa kyokya kimye Yesu wafumine mu Ngalilea, waishile kwi Yoano ku mukola wa Yodano na kubatizhiwa kwi aye. 14Pakuba Yoano wamukainye amba, “Amiwa yami nafwainwa kubatizhiwa kwi anweba, bino kabiji anweba mwaiya byepi kwi amiwa?”
15Bino Yesu wamukumbwile amba, “Byonkabyo pano swai, pakuba momo kitufwainwa tufikizhe bololoke bonse.” Ponkapo Yoano waswile.
16Ne Yesu byo abatizhilwe, ponkapotu watuntukile mu mema, kabiji talai, mwiulu mwashinkukile ne aye wamwene ne Mupashi wa Lesa kasa ekila pamo nobe nkunda, ne kumwikijila. 17#Nte 22:2; Sala 2:7; Isa 42:1; Mat 12:18; 17:5; Mako 1:11; Lu 9:35Kepo jiwi jafumine mwiulu amba, “Uno ye mwanami ye natemwa, mo namwena lusekelo.”
موجودہ انتخاب:
Mateo 3: KNTP
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The Kaonde New Testament © The Bible Society of Zambia, 2019.