Lukasə 10
10
Yeso a Tú Ngaŋə́zoŋə́ndzəm əjí Məghə́mə Asaambɛ̂ nə́ Pɨ pɛ́n Pɛ̌
1Ndzaŋ pó po kə məgtə̂ nə́ lə́, Mmaʼmbîə a tíʼ ńtsɔ́ʼ pətsə́ pɨ məghə́mə asaambɛ̂ nə́ pɨ pɛ́n pɛ̌ #10.1 Pətsə́ əŋwaʼlə ə́ sóŋ ńgə́ məghə́mə asaambɛ̂. Ḿbá nkaŋ 17. ńtúmə ághɔ́b pə́ pɛ̌ pə́ pɛ̌ ńgə́ pó kwá mbi ńgɛn nə́ əláʼ ətsəm pópə aliʼə́ atsəm páʼə a chî nə́ á mə́ ghɛn nə́ ə́wə́. 2Yeso a sóŋə á mbô pó ńgə́, “Məjî mə́ nə́ənə, lə́ pɨ pə́ foʼ nə́ pə́ pə́ ńkə́gə. Póʼ mbô á mbô ngaŋ məjî ńjî ńgə́ a tú ngaŋə́faʼə á afɔ pə́ ghɛn ə́foʼə̂ mə́ələ́. 3Ghɛn nə́, mäŋ túmə áwɨ́ lə́ ándó məmbéŋ mə́ ndzɛlə á mə́m əfunə́. 4Kɔ nə́ lɔg nkéebə, kəənə apeemə, kɨ ngwub məkoolə, kɔ nə́ kə́ ńchaʼtə̂ ŋwu tsə̌ alaŋə́. 5Ndɛ̂ ntsəm nə́ kwú nə́ ə́wɨ́ nə́ peg ə́sóŋ ńgə́, mbwɔ́dnə ə́ chîə á ndɛ̂ nə́ 6Mbɔʼ ŋwu mbwɔ́dnə a chîə á ndɛ̂ yi wɨ́, mbwɔ́dnə əjǐ ə́ ghɛnə̂ á mbô yə́, ńchî ə́wɨ́ chî, mbwɔ́dnə əzɨ ə́ pɨ ḿbəənə̂ á mbô pəənə́. 7Chî nə́ á ndɛ̂ yi wɨ́ ńjîə ńkə́ ńnô ajúmə atsəm pə̈ fɛ̂ nə́ á mbô pəənə́, ńté ńgə́ ngaŋəfaʼ ntsəmə a chîə á mə́ kwá nə́ ntsɔ́ʼəfaʼ əjǐə. Kɔ nə́ tə́ ə́fɛ́lə nə́ táʼ ndɛ̂ ńkwúnə nə́ yitsə̌.
8Aláʼə atsəm nə́ kwú nə́ ə́wɨ́ pə́ lɔgə̂ áwɨ́ ə́wɨ́ əshîʼnə, nə́ jîə ajúmə atsəm pə́ tə́g nə́ á mbi pəənə́. 9Tsóʼ nə́ pəghɔ pə́ chî nə́ ə́wɨ́ ńkə́ ə́fiʼtə̂ ngaŋə́láʼ yi wɨ́ ńgə́, Anuə Nəfoonə Əsê á yǐ tə ḿbáatə áwə́ənə́. 10Lə́ mbɔʼ nə́ ghɛnə̂ aláʼ yitsə̌ pə́ chîə áwɨ́ pí, nə́ ghɛn nə́ əlaŋə́ əpɔ́b ə́sóŋ ńgə́, 11Tsɔʼə akəpóglə́ aláʼə azɨ́ páʼə á chî nə́ á məko pəg, pəg kɔdtə̂ zɨ́d ńkwɛlə̂, á mə́ nɨd nə́ ńgə́ anu nə ghɛd nə́ á kě koʼnə̂ pô. Lə́, nə́ pə́ ńjî ńgə́ Anuə Nəfoonə Əsê á yǐ tə ḿbáatə áwə́ənə́. 12Mäŋ fiʼtə̂ áwɨ́ ńgə́ á yǒ pɔŋə̂ á mbô pɨ pə́ Sodomə Alě asáʼə́məsáʼ ńtsɛ pɨ pə́ aláʼ pɨ́d pə̂.”
Əláʼ páʼ ə́ kě nə́ Əsê pí pô
(Mat 11.20-24)
13“Pɨ pə́ kolazin, ndɔ ə́ chîə atû pəənə́, pɨ pə́ Bɛdsada, ndɔ ə́ kə́ ńchîə atû pəənə́. Ńté ńgə́ pətə́kɔʼ pə́ mənu pə́ kə ghɛd nə́ pə́ələ́ á mbô pɨ lə́ mbɔʼ pə́ kə ghɛlə̂ pɨd lə́ á Tayile kəənə á Sidɔn tə ḿbə́ pó kə kɔ́g ńkwúblə ńgwê pəshíshí pə́ ətsəʼ ə́fuʼə̂ apû ńtíʼ ńnáanə nə́ afɨnə. 14A yǒ pə́ Alěsáʼə́məsáʼ, á pɔŋə̂ á mbô Tayile pó Sidɔn ńtsɛɛlə̂ áwə́ənə́. 15Pɨ ngaŋ Kapanawum, pɨ loonə̂ lə́ á mə́ ŋáŋkə nə́ mbɨ əzɨ ə́ kɔ́ʼə á nəpó? Ngá, pə́ yǒ tsóokə áwɨ́ ḿmaʼə̂ á ntɛ́n əsê.”
16Yeso a sóŋə á mbô ngaŋə́zoŋə́ndzəm əjí ńgə́, “Ŋwu ntsəm páʼə a jwə́ʼtə nə́ á mbô pəənə́ a jwə́ʼtə lə́ á mbô maŋə, ŋwu ntsəm páʼ a kǐ nə́ áwə́ənə́ a kǐ lə́ mə. Lə́ ŋwu ntsəm páʼ a kǐ nə́ mə a kǐ lə́ ŋwu páʼ a tú nə́ mə.” 17Pɨ pə́ məghə́mə asaambɛ̂ nə́ pɨ pɛ́n pɛ̌ kə pɨ nə́ akɔŋtə á ntɨ́ pó ńtíʼə ə́sóŋə ńgə́, “Mmaʼmbî, tə pɛ̌sê ə́ kə̈ ńdzóʼnə áwə́g ńdaŋə̂ nə́ əlɛ́n əghô.” 18Yeso a kwěe ághɔ́b ńgə́, “Maŋ kə zə́ənə satanə a lǒo á nəpó ńgwǔəə ándó nəfaŋ yi nə́ ŋwaŋkə̂ nə́. 19Jɨ́ nə́, maŋ fɛ̂ mətəənə á mbô pɨ mbɔʼ nə́ nyinə̂ á ndu mənó pópə pəmə́ŋgâsê pə́ təpɔŋə anu yitsə̌ á kě áwɨ́ ghɛd pô, mətɨ mɨ́ mə́ kə́ ńtsɛ mimə́ ngaŋkə́peenə́. 20Lə́ kɔ nə́ pə́ ńkɔŋtə̂ ńgə́ əjwi təpɔŋ ə́ zóʼnə áwə́ənə́, kɔŋtə̂ nə́ pə́ ńgə́ pə́ ŋwaʼlə̂ məlɛ́n mə́ənə́ á nəpóolə.”
Yeso a Kɔŋtə̂
(Mat 11.25-27; 13.16, 17)
21Nə́ ndɛd yi wɨ́, Ajwǐəsê a ghɛd akɔŋnə á lwɛ́nkə á ntɨ́ Yeso, a sóŋ ńgə́, “Mäŋ ghóʼkə gho Tǎ, Mmaʼmbî pə nəpó pó ndəsê ńté ńgə́ gho lyáŋ mənu məənə́ á mbô pɨ pó yáŋ nə́ ńkə́ ńjî ənuə, ḿbə́ ńnəələ̂ mə́ələ́ á mbô kə́yé ŋwunə. Tǎ, lə́ ndə̌ŋdəŋ ńgə́ gho kə faʼə̂ anuə ntsəm lə́ ndzaŋ páʼ a koʼnə̂ nə́ gho.”
22“Tǎ mə a fɛ̂ ajúmə atsəmə á mbô maŋə. Ŋwu tsə̌ a kě jîə ŋwu páʼ móonə a pə́ nə́ wɨ́d pô tə ńdéʼtə Tǎ. Ŋwu tsə̌ a kě kə́ ńjîə ŋwu páʼ Tǎ a pə́ nə́ wɨ́d pô tə ńdéʼtə Móonə, ḿbɨ ḿbə́ nə́ pɨ páʼ Móonə a tsɔʼ nə́ á mə́ nɨd nə́ yə́ á mbô pó.” 23Yeso a sɛdnə̂ ə́sóŋ nə́ ngaŋə́zoŋə́ndzəm əjíə á ndzəmə ndzəm ńgə́, “Mbɔŋə́ azɨ́ nə́ zɨ́ mənu páʼ nə́ zɨ́ nə́ lɛ̌. 24Mäŋ fiʼtə̂ áwɨ́ ńgə́ məntúmə́sê mimə nɨ́ nə́ pópə pəfo pi nɨ́ nə́ pó kə loonə̂ á mə́ zɨ́ nə́ mənu páʼ nə́ zɨ́ nə́, ḿbə́ ńkě zɨ́ pô, ńdoonə̂ á mə́ zóʼ nə́ mənu páʼ nə́ zóʼ nə́ ḿbə́ ńkě zóʼ pô.”
Atséebə́nə́múʼ ńté Ngɛd Əshîʼnə Samalitan yitsə̌
25A nə ńdáʼ ḿbə́ alě tsə́ táʼ ŋwu tsə̌ á mə́m ngaŋə́zéʼkə pənoŋkə a yǐəə á mə́ mɔ nə́ Yeso. Ḿbítə ńgə́, “Ndzéʼkə, mbɔʼ maŋ ghɛd ə́lɛ́ ḿbɔŋə́ jî nchîntɨ páʼ ə́ mɛdnə̂ nə́ ngǎ mɔʼə́?”
26Yeso á kwěe yí ńgə́, “Aŋwaʼlə Əsê á sóŋ ńgə́ akə̂, pɨ̈ zóʼə azə́ənə́ pə́ ə́lɛ́?”
27Ŋwu wə̂ a kwěe ńgə́, “Kɔŋə̂ Mmaʼmbî páʼ a pə́ nə́ Əsê əzo nə́ ntɨ́ əghô ətsəmə, nə́ ajwiə azô atsəmə, nə́ mətɨ mô mətsəmə nə́ akwaŋə azô atsəmə; ńkə́ ńkɔŋə̂ ngaŋ nəpad əgho ándó mbɨ əzo.”
28Yeso a kwěe yi ńgə́, “Gho koʼnə̂, Faʼ ə́lə́ələ́, gho yǐ chîə á mbîə.”
29Lə́, ndzéʼkə pənoŋkə wə̂ a pə́ ńtə́ ńdoonə̂ á mə́ nɨd nə́ ńgə́ yə́ a koʼnə̂, ńtíʼ ḿbítə Yeso ńgə́, “Ngaŋ nəpeelə mə lə́ əwə?”
30Yeso a kwěe yí ńgə́, “Ŋwu tsə̌ a kə láʼ ə́fɛ́lə á Jɛlusalɛm ńtə́ ńtsóolə ńgɛnə̂ á Jɛliko, pəzə̌ pə́ waamə̂ yí ńtsɔ́ʼtə ətsəʼ pí, ḿbóʼə yí tə a tíʼə ńdoonə̂ á mə́ kwû nə́, pó mɛdtə̂ yí ńgɛnə̂ ághóobə́. 31Mbêsê yitsə̌ a kə tə́ ńdaŋə̂ alaŋə́ yi wɨ́ ńdzə́ənə yí páʼə a noŋnə̂ nə́, ńdə́ʼ ńdaŋə̂ yə́ á əlá alaŋə́ yi ndaʼə. 32Ŋwu Lebi yitsə̌ a kə ńtə́ ńdaŋə̂ ají ńdzə́ənə yi páʼə a noŋnə̂ nə́ ńdə́ʼ ńdaŋə̂ yə́ á əlá alaŋə́ yi ndaʼə. 33Lə́ Samalitan yitsə̌ a pə́ ńtə́ ńdaŋə̂ ńdzə́ənə yí páʼə a noŋnə̂ nə́ ńkó mələ́ŋ míə. 34Ńgɛn ḿbáatə yí ńdzɔ́ʼ məghɔ́d pó afǔ nə́ məfəŋ mí ńkwúlə mə́ələ́, ńnáakə yə́ á ndu njakasə əjǐ ńdɔgə̂ yi ńgɛnə̂ á ndɛ̂ pəghɨ ńdɔʼkə̂ yí ə́wɨ́ ńtə́ ḿbyádnə yə́. 35Mbî ə́ fógə a tə́ ńgɛnə̂ yí ə́fɛ̂ nkéebə atəənə́ ntáʼ pɛ̌ á mbô ngaŋ ndɛ̂ ə́sóŋ nə́ yí ńgə́, ‘Tíʼ ńtə́ ńnáŋə yə́, maŋ yǐ tə́ pəənə̂ ə́ tûə ajúmə atsəm páʼ gho pɨ nə́ ńtsəŋə̂.’ ”
36“Gho kwaŋ ńgə́ á mə́m pɨ pɨ pɛ́n pə́ teelə́, ngaŋ nəpad ŋwunə ándó pəzə̌ pə́ nə ńgwam nə́ yí lə́ nə ḿbə́ əwə?”
37Ndzéʼkə pənoŋkə wə̂ a kwěe ńgə́, “Yə ándó a kə kó nə́ mələ́ŋ mí lə̂.” Yeso a sóŋə á mbô yí ńgə́, “Ghɛn ńkə́ ə́faʼə̂ azô ə́lə́ələ́.”
Yeso a Ghéenə Mɛɛlə pó Mata
38Ndzaŋ Yeso pópə ngaŋə́zoŋə́ndzəm əjí ə́ kə tə́ nə̈ ńnyinə̂ lə́, ńgyǐ ńkwúnə aláʼ yitsə̌, məngyě yitsə̌ pə́ fóŋ nə́ yi nə́ Mata a lɔgə̂ yí əshîʼnə á ndɛ̂ yə́. 39A kə túgə mɔ́mɛ́ əyǐ yitsə̌ pə́ fóŋə nə́ Mɛɛlə. Mɛɛlə a kə náanə á məko Mmaʼmbî ńtə́ ńjwə́ʼtə anu páʼə ä kə sóŋ nə́. 40Lə́ Mata a pə́ ə́fɛ̂ ntɨ́ əyí nə́ mənu páʼ pə́ nə ńchî nə́ á mə́ ghɛd nə́ ə́ pyáabə yí ə́wə́, ńtíʼ ńgyǐ ə́sóŋə á mbô Yeso ńgə́, “Gho zə́ənə azô lə́ á pɔŋ ndzaŋ Mɔ́mɛ́ mə a mɛdtə̂ nə́ məfaʼ mətsəmə á mbô maŋ lɛ? Sóŋ nə́ yí ńgə́ a yǐ ńkwáalə mə.”
41Mmaʼmbîə a kwěe yí ńgə́, “Mata, Mata, gho jwaʼ mbɨ əzo nə́ mənu mimə nɨ́ nə́ lə́ kətaŋə 42Chigə ntəənə anuə á pə́ ḿbə́ lə́ tsɔʼə táʼə. Mɛɛlə a lɔg lə́ zə́ələ́, mbɔʼ pə kě á mbô yí kə́ ńkwá pô.”
موجودہ انتخاب:
Lukasə 10: azo
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Lukasə 10
10
Yeso a Tú Ngaŋə́zoŋə́ndzəm əjí Məghə́mə Asaambɛ̂ nə́ Pɨ pɛ́n Pɛ̌
1Ndzaŋ pó po kə məgtə̂ nə́ lə́, Mmaʼmbîə a tíʼ ńtsɔ́ʼ pətsə́ pɨ məghə́mə asaambɛ̂ nə́ pɨ pɛ́n pɛ̌ #10.1 Pətsə́ əŋwaʼlə ə́ sóŋ ńgə́ məghə́mə asaambɛ̂. Ḿbá nkaŋ 17. ńtúmə ághɔ́b pə́ pɛ̌ pə́ pɛ̌ ńgə́ pó kwá mbi ńgɛn nə́ əláʼ ətsəm pópə aliʼə́ atsəm páʼə a chî nə́ á mə́ ghɛn nə́ ə́wə́. 2Yeso a sóŋə á mbô pó ńgə́, “Məjî mə́ nə́ənə, lə́ pɨ pə́ foʼ nə́ pə́ pə́ ńkə́gə. Póʼ mbô á mbô ngaŋ məjî ńjî ńgə́ a tú ngaŋə́faʼə á afɔ pə́ ghɛn ə́foʼə̂ mə́ələ́. 3Ghɛn nə́, mäŋ túmə áwɨ́ lə́ ándó məmbéŋ mə́ ndzɛlə á mə́m əfunə́. 4Kɔ nə́ lɔg nkéebə, kəənə apeemə, kɨ ngwub məkoolə, kɔ nə́ kə́ ńchaʼtə̂ ŋwu tsə̌ alaŋə́. 5Ndɛ̂ ntsəm nə́ kwú nə́ ə́wɨ́ nə́ peg ə́sóŋ ńgə́, mbwɔ́dnə ə́ chîə á ndɛ̂ nə́ 6Mbɔʼ ŋwu mbwɔ́dnə a chîə á ndɛ̂ yi wɨ́, mbwɔ́dnə əjǐ ə́ ghɛnə̂ á mbô yə́, ńchî ə́wɨ́ chî, mbwɔ́dnə əzɨ ə́ pɨ ḿbəənə̂ á mbô pəənə́. 7Chî nə́ á ndɛ̂ yi wɨ́ ńjîə ńkə́ ńnô ajúmə atsəm pə̈ fɛ̂ nə́ á mbô pəənə́, ńté ńgə́ ngaŋəfaʼ ntsəmə a chîə á mə́ kwá nə́ ntsɔ́ʼəfaʼ əjǐə. Kɔ nə́ tə́ ə́fɛ́lə nə́ táʼ ndɛ̂ ńkwúnə nə́ yitsə̌.
8Aláʼə atsəm nə́ kwú nə́ ə́wɨ́ pə́ lɔgə̂ áwɨ́ ə́wɨ́ əshîʼnə, nə́ jîə ajúmə atsəm pə́ tə́g nə́ á mbi pəənə́. 9Tsóʼ nə́ pəghɔ pə́ chî nə́ ə́wɨ́ ńkə́ ə́fiʼtə̂ ngaŋə́láʼ yi wɨ́ ńgə́, Anuə Nəfoonə Əsê á yǐ tə ḿbáatə áwə́ənə́. 10Lə́ mbɔʼ nə́ ghɛnə̂ aláʼ yitsə̌ pə́ chîə áwɨ́ pí, nə́ ghɛn nə́ əlaŋə́ əpɔ́b ə́sóŋ ńgə́, 11Tsɔʼə akəpóglə́ aláʼə azɨ́ páʼə á chî nə́ á məko pəg, pəg kɔdtə̂ zɨ́d ńkwɛlə̂, á mə́ nɨd nə́ ńgə́ anu nə ghɛd nə́ á kě koʼnə̂ pô. Lə́, nə́ pə́ ńjî ńgə́ Anuə Nəfoonə Əsê á yǐ tə ḿbáatə áwə́ənə́. 12Mäŋ fiʼtə̂ áwɨ́ ńgə́ á yǒ pɔŋə̂ á mbô pɨ pə́ Sodomə Alě asáʼə́məsáʼ ńtsɛ pɨ pə́ aláʼ pɨ́d pə̂.”
Əláʼ páʼ ə́ kě nə́ Əsê pí pô
(Mat 11.20-24)
13“Pɨ pə́ kolazin, ndɔ ə́ chîə atû pəənə́, pɨ pə́ Bɛdsada, ndɔ ə́ kə́ ńchîə atû pəənə́. Ńté ńgə́ pətə́kɔʼ pə́ mənu pə́ kə ghɛd nə́ pə́ələ́ á mbô pɨ lə́ mbɔʼ pə́ kə ghɛlə̂ pɨd lə́ á Tayile kəənə á Sidɔn tə ḿbə́ pó kə kɔ́g ńkwúblə ńgwê pəshíshí pə́ ətsəʼ ə́fuʼə̂ apû ńtíʼ ńnáanə nə́ afɨnə. 14A yǒ pə́ Alěsáʼə́məsáʼ, á pɔŋə̂ á mbô Tayile pó Sidɔn ńtsɛɛlə̂ áwə́ənə́. 15Pɨ ngaŋ Kapanawum, pɨ loonə̂ lə́ á mə́ ŋáŋkə nə́ mbɨ əzɨ ə́ kɔ́ʼə á nəpó? Ngá, pə́ yǒ tsóokə áwɨ́ ḿmaʼə̂ á ntɛ́n əsê.”
16Yeso a sóŋə á mbô ngaŋə́zoŋə́ndzəm əjí ńgə́, “Ŋwu ntsəm páʼə a jwə́ʼtə nə́ á mbô pəənə́ a jwə́ʼtə lə́ á mbô maŋə, ŋwu ntsəm páʼ a kǐ nə́ áwə́ənə́ a kǐ lə́ mə. Lə́ ŋwu ntsəm páʼ a kǐ nə́ mə a kǐ lə́ ŋwu páʼ a tú nə́ mə.” 17Pɨ pə́ məghə́mə asaambɛ̂ nə́ pɨ pɛ́n pɛ̌ kə pɨ nə́ akɔŋtə á ntɨ́ pó ńtíʼə ə́sóŋə ńgə́, “Mmaʼmbî, tə pɛ̌sê ə́ kə̈ ńdzóʼnə áwə́g ńdaŋə̂ nə́ əlɛ́n əghô.” 18Yeso a kwěe ághɔ́b ńgə́, “Maŋ kə zə́ənə satanə a lǒo á nəpó ńgwǔəə ándó nəfaŋ yi nə́ ŋwaŋkə̂ nə́. 19Jɨ́ nə́, maŋ fɛ̂ mətəənə á mbô pɨ mbɔʼ nə́ nyinə̂ á ndu mənó pópə pəmə́ŋgâsê pə́ təpɔŋə anu yitsə̌ á kě áwɨ́ ghɛd pô, mətɨ mɨ́ mə́ kə́ ńtsɛ mimə́ ngaŋkə́peenə́. 20Lə́ kɔ nə́ pə́ ńkɔŋtə̂ ńgə́ əjwi təpɔŋ ə́ zóʼnə áwə́ənə́, kɔŋtə̂ nə́ pə́ ńgə́ pə́ ŋwaʼlə̂ məlɛ́n mə́ənə́ á nəpóolə.”
Yeso a Kɔŋtə̂
(Mat 11.25-27; 13.16, 17)
21Nə́ ndɛd yi wɨ́, Ajwǐəsê a ghɛd akɔŋnə á lwɛ́nkə á ntɨ́ Yeso, a sóŋ ńgə́, “Mäŋ ghóʼkə gho Tǎ, Mmaʼmbî pə nəpó pó ndəsê ńté ńgə́ gho lyáŋ mənu məənə́ á mbô pɨ pó yáŋ nə́ ńkə́ ńjî ənuə, ḿbə́ ńnəələ̂ mə́ələ́ á mbô kə́yé ŋwunə. Tǎ, lə́ ndə̌ŋdəŋ ńgə́ gho kə faʼə̂ anuə ntsəm lə́ ndzaŋ páʼ a koʼnə̂ nə́ gho.”
22“Tǎ mə a fɛ̂ ajúmə atsəmə á mbô maŋə. Ŋwu tsə̌ a kě jîə ŋwu páʼ móonə a pə́ nə́ wɨ́d pô tə ńdéʼtə Tǎ. Ŋwu tsə̌ a kě kə́ ńjîə ŋwu páʼ Tǎ a pə́ nə́ wɨ́d pô tə ńdéʼtə Móonə, ḿbɨ ḿbə́ nə́ pɨ páʼ Móonə a tsɔʼ nə́ á mə́ nɨd nə́ yə́ á mbô pó.” 23Yeso a sɛdnə̂ ə́sóŋ nə́ ngaŋə́zoŋə́ndzəm əjíə á ndzəmə ndzəm ńgə́, “Mbɔŋə́ azɨ́ nə́ zɨ́ mənu páʼ nə́ zɨ́ nə́ lɛ̌. 24Mäŋ fiʼtə̂ áwɨ́ ńgə́ məntúmə́sê mimə nɨ́ nə́ pópə pəfo pi nɨ́ nə́ pó kə loonə̂ á mə́ zɨ́ nə́ mənu páʼ nə́ zɨ́ nə́, ḿbə́ ńkě zɨ́ pô, ńdoonə̂ á mə́ zóʼ nə́ mənu páʼ nə́ zóʼ nə́ ḿbə́ ńkě zóʼ pô.”
Atséebə́nə́múʼ ńté Ngɛd Əshîʼnə Samalitan yitsə̌
25A nə ńdáʼ ḿbə́ alě tsə́ táʼ ŋwu tsə̌ á mə́m ngaŋə́zéʼkə pənoŋkə a yǐəə á mə́ mɔ nə́ Yeso. Ḿbítə ńgə́, “Ndzéʼkə, mbɔʼ maŋ ghɛd ə́lɛ́ ḿbɔŋə́ jî nchîntɨ páʼ ə́ mɛdnə̂ nə́ ngǎ mɔʼə́?”
26Yeso á kwěe yí ńgə́, “Aŋwaʼlə Əsê á sóŋ ńgə́ akə̂, pɨ̈ zóʼə azə́ənə́ pə́ ə́lɛ́?”
27Ŋwu wə̂ a kwěe ńgə́, “Kɔŋə̂ Mmaʼmbî páʼ a pə́ nə́ Əsê əzo nə́ ntɨ́ əghô ətsəmə, nə́ ajwiə azô atsəmə, nə́ mətɨ mô mətsəmə nə́ akwaŋə azô atsəmə; ńkə́ ńkɔŋə̂ ngaŋ nəpad əgho ándó mbɨ əzo.”
28Yeso a kwěe yi ńgə́, “Gho koʼnə̂, Faʼ ə́lə́ələ́, gho yǐ chîə á mbîə.”
29Lə́, ndzéʼkə pənoŋkə wə̂ a pə́ ńtə́ ńdoonə̂ á mə́ nɨd nə́ ńgə́ yə́ a koʼnə̂, ńtíʼ ḿbítə Yeso ńgə́, “Ngaŋ nəpeelə mə lə́ əwə?”
30Yeso a kwěe yí ńgə́, “Ŋwu tsə̌ a kə láʼ ə́fɛ́lə á Jɛlusalɛm ńtə́ ńtsóolə ńgɛnə̂ á Jɛliko, pəzə̌ pə́ waamə̂ yí ńtsɔ́ʼtə ətsəʼ pí, ḿbóʼə yí tə a tíʼə ńdoonə̂ á mə́ kwû nə́, pó mɛdtə̂ yí ńgɛnə̂ ághóobə́. 31Mbêsê yitsə̌ a kə tə́ ńdaŋə̂ alaŋə́ yi wɨ́ ńdzə́ənə yí páʼə a noŋnə̂ nə́, ńdə́ʼ ńdaŋə̂ yə́ á əlá alaŋə́ yi ndaʼə. 32Ŋwu Lebi yitsə̌ a kə ńtə́ ńdaŋə̂ ají ńdzə́ənə yi páʼə a noŋnə̂ nə́ ńdə́ʼ ńdaŋə̂ yə́ á əlá alaŋə́ yi ndaʼə. 33Lə́ Samalitan yitsə̌ a pə́ ńtə́ ńdaŋə̂ ńdzə́ənə yí páʼə a noŋnə̂ nə́ ńkó mələ́ŋ míə. 34Ńgɛn ḿbáatə yí ńdzɔ́ʼ məghɔ́d pó afǔ nə́ məfəŋ mí ńkwúlə mə́ələ́, ńnáakə yə́ á ndu njakasə əjǐ ńdɔgə̂ yi ńgɛnə̂ á ndɛ̂ pəghɨ ńdɔʼkə̂ yí ə́wɨ́ ńtə́ ḿbyádnə yə́. 35Mbî ə́ fógə a tə́ ńgɛnə̂ yí ə́fɛ̂ nkéebə atəənə́ ntáʼ pɛ̌ á mbô ngaŋ ndɛ̂ ə́sóŋ nə́ yí ńgə́, ‘Tíʼ ńtə́ ńnáŋə yə́, maŋ yǐ tə́ pəənə̂ ə́ tûə ajúmə atsəm páʼ gho pɨ nə́ ńtsəŋə̂.’ ”
36“Gho kwaŋ ńgə́ á mə́m pɨ pɨ pɛ́n pə́ teelə́, ngaŋ nəpad ŋwunə ándó pəzə̌ pə́ nə ńgwam nə́ yí lə́ nə ḿbə́ əwə?”
37Ndzéʼkə pənoŋkə wə̂ a kwěe ńgə́, “Yə ándó a kə kó nə́ mələ́ŋ mí lə̂.” Yeso a sóŋə á mbô yí ńgə́, “Ghɛn ńkə́ ə́faʼə̂ azô ə́lə́ələ́.”
Yeso a Ghéenə Mɛɛlə pó Mata
38Ndzaŋ Yeso pópə ngaŋə́zoŋə́ndzəm əjí ə́ kə tə́ nə̈ ńnyinə̂ lə́, ńgyǐ ńkwúnə aláʼ yitsə̌, məngyě yitsə̌ pə́ fóŋ nə́ yi nə́ Mata a lɔgə̂ yí əshîʼnə á ndɛ̂ yə́. 39A kə túgə mɔ́mɛ́ əyǐ yitsə̌ pə́ fóŋə nə́ Mɛɛlə. Mɛɛlə a kə náanə á məko Mmaʼmbî ńtə́ ńjwə́ʼtə anu páʼə ä kə sóŋ nə́. 40Lə́ Mata a pə́ ə́fɛ̂ ntɨ́ əyí nə́ mənu páʼ pə́ nə ńchî nə́ á mə́ ghɛd nə́ ə́ pyáabə yí ə́wə́, ńtíʼ ńgyǐ ə́sóŋə á mbô Yeso ńgə́, “Gho zə́ənə azô lə́ á pɔŋ ndzaŋ Mɔ́mɛ́ mə a mɛdtə̂ nə́ məfaʼ mətsəmə á mbô maŋ lɛ? Sóŋ nə́ yí ńgə́ a yǐ ńkwáalə mə.”
41Mmaʼmbîə a kwěe yí ńgə́, “Mata, Mata, gho jwaʼ mbɨ əzo nə́ mənu mimə nɨ́ nə́ lə́ kətaŋə 42Chigə ntəənə anuə á pə́ ḿbə́ lə́ tsɔʼə táʼə. Mɛɛlə a lɔg lə́ zə́ələ́, mbɔʼ pə kě á mbô yí kə́ ńkwá pô.”
موجودہ انتخاب:
:
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in