Lukasə 9
9
Yeso a Tú Ngaŋə́zoŋə́ndzəm Əjí zə̂ Ntsɔb Pɛ̌
(Mat 10.5-15; Mag 6.7-13)
1Yeso a fóŋ ngaŋə́zoŋə́ndzəm əjí zə̂ ntsɔb pɛ̌ ə́fɛ̂ mətɨ mətsəmə á mbô pó á mə́ fɨ́dkə nə́ pəpɛ̌sê pətsəm ə́ kə́ tsóʼ məghoonə́. 2A tíʼ ńtúmə ághɔ́b ńgə́ pó ghɛn ə́sóŋə anuə nəfoonə Əsê ńkə́ ńtsóʼ pəghoonə́. 3A sóŋə á mbô pó ńgə́, “Kɔ nə́ lɔgə̂ ajûtsə́ ńgɛn nə́ zə́ələ́; kɨ mbaŋ, kəənə apa, kɨ məjî, kɨ nkáb, kɨ yətsə́ atsəʼə́. 4Ndɛ̂ ntsəm páʼ nə́ yǐ nə́ ńkwú ə́wɨ́, pə́ pímə áwɨ́, nə kə̈ ńchîə tsɔʼə ə́wɨ́ tə ńdáʼ fɛ́lə aláʼ yi wə̂. 5Aliʼə́ atsəm pə́ kě nə́ áwɨ́ ə́wɨ́ pí pô, nə́ kɔdtə̂ akəpóglə́ á məko pəənə, ə́fɛ́lə áwə́ənə́ aláʼ yi wə́, zəənə́ á yǐ chîə ándó akwantə anuə á mbô pó.”
6Pó tíʼ ə́fɛ́d ńgɛn, ńdǒo nə́ táʼə aláʼ ńkwúnə nə́ yətsə́, ńnáŋkə nkɨ yi əshîʼnə ńkə́ ńtsóʼə pəənə aliʼə́ atsəmə.
Ɛlɔdə a Jwaʼlə̂
(Mat 14.1-12; Mag 6.14-29)
7Ɛlɔd páʼə a nə́ ḿbə́ nə́ nətû nə́ Galiliə a zóʼə anuə atsəm páʼə á nə́ ńdaŋ nə́ ńtíʼ ńjwaʼlə̂ yí ńté ńgə́ pɨ pətsə́ pə́ nə ńtə́ ə́sóŋə ńgə́, “Jɔn páʼə ä fɛ̂ nə́ nkǐ lə́ a júmnə á nəwûə.” 8Pətsə́ pə̈ pəənə ə́sóŋə ńgə́, “Elayija a pɨ ḿbəənə̂.” Pətsə́ pə̈ pəənə̂ ə́sóŋə ńgə́, Táʼ ńtú Əsê ngoʼ pəchə́ yitsə̌ a pɨ ńjúmnə á nəwûə. 9Lə́ Ɛlɔdə a pə́ ə́sóŋ ńgə́, “Maŋ kə ghɛd pə́ lə́gə atûə Jɔnə, pə́ pɛn ḿbɨ ńtíʼə ə́sóŋə ghɛn ndɛn mənu ńté lə́ ə́wə́?” A tíʼə ńdɔ ndú ətsəmə á mə́ jɨ́ nə́ Yeso.
Yeso a Zə́g pɨ Tɔsə Tênə
(Mat 14.13-21; Mag 6.30-44; Jɔn 6.1-14)
10Məntú mə̂ mə́ kwə̂ ə́fiʼtə̂ Yeso nə́ anuə atsəm pó ghɛd nə́, á lɔgə̂ ághɔ́b pó po ghɛn tsɔʼə ngǎ pó á aláʼ yitsə̌ pə́ fóŋə nə́ Bɛdsada. 11Lə́, mboŋ pɨ pə́ ńdzóʼ ńtíʼ ńdzoŋə̂ yə́. A lɔgə̂ ághɔ́b əshîʼnə ńtíʼ ə́sóŋə anu ńté anuə nəfoonə Əsê á mbô pó ńkə́ ńtsóʼ pəghoonə́.
12Mə́numə á kə tíʼ ḿmɛ́lə, ngaŋə́zoŋə́ndzəm əjí zə̂ ntsɔb pɛ̌ ə́ yǐ ə́sóŋ nə́ yí ńgə́, “Ghɛd ŋwu məsɔŋə́ nə́ a ghɛn ńjî ńgə́ pó ghɛnə̂ á mə́m əláʼ pópə əfɔ páʼ ə́ chî nə́ ḿbáatə ńchwaalə̂ ajú ńjî ńkə́ ńnáŋə aliʼ ńdê wɨ́ ńté ńgə́ lə́ aliʼə́ tə ŋwunə.”
13Lə́ Yeso a pə́ ńkwěe ághɔ́b ńgə́, “Fɛ̂ nə́ ajú pó jîə.” Pó sóŋ ńgə́, “Pəg túg lə́ tsɔʼə apéenə məkálə́ ntáʼ tâ nə́ əshû ńtáʼ pɛ̌. Gho loonə̂ lə́ ńgə́ pəg ghɛn ńjú məjîə á mbô mboŋ ŋwu məsɔŋ ghɛn ntsəm?” 14(Pɨ pə́ nə ńchîə aliʼ yi wɨ́ tə ńkoʼ tɔsə tênə) Yeso a sóŋə á mbô ngaŋə́zoŋə́ndzəm əjí ńgə́, “Ghɛd nə́ pó náanə á əsê nə́ əkwɛlə́ məghə́m mɛ́n tâ məghə́m mɛ́n tênə.” 15Pó ghabtə̂ ághɔ́b ńgɛd ŋwu ntsəmə a náanə á əsê. 16Yeso a tíʼ ńkwáalə apá zə̂ ntáʼ tâ nə́ əshû zə̂ ntáʼ pɛ̌ ńnáŋ nəpó ə́fɛ̂ ndǎ á mbô#9.16 Pə́ kə́ sháŋ lə́ tsɔʼə mbyâŋnə, lə́ pəngyě pópə pɔ̂nkə̂ pə́ kə́ ńchî ə́wɨ́ pə́ pə́ ńkě ághɔ́b sháŋ pô. Əsê ḿbagtə̂ zɨ́d ə́fɛ̂ á mbô ngaŋə́zoŋə́ndzəm əjí ńgə́ pó gheebə̂ á mbô pɨ pə̂. 17Pó jî ńdzɛ́d tə ngaŋə́zoŋə́ndzəm Yeso lag əpuʼ məjî ə́ kə pakə̂ nə́ ńgwǔ, ə́ pə́ pəkyíbə́ ntsɔb pɛ̌.
Pita a Fiʼtə̂ Ŋwu páʼ Yeso pə́ nə́ Wə́ələ́
(Mat 16.13-19; Mag 8.27-29)
18Á nə ńdáʼ ḿbə́ alě tsə́ Yeso a tə́ ńchaʼtə́sê á ngǎ yə́, ngaŋə́zoŋə́ndzəm əjí ə́ yǐ ńtégə yə́ a pítə ághɔ́b ńgə́, “Pɨ pə̈ sóŋə ńgə́ maŋ lə́ əwə?”
19Pó kwěe yí ńgə́, “Pɨ pətsə́ pə̈ sóŋə ńgə́ gho lə́ Jɔn páʼə a fɛ̂ nə́ nkǐ lə̂,” pətsə́ pə̈ sóŋə ńgə́ gho lə́ Elayija, pətsə́ pə kə̈ ə́sóŋə ńgə́ gho lə́ ntûsê ngoʼ pəchə́ páʼ a pɨ nə́ ńjúmnə á nəwûə.
20Yeso a pítə ághɔ́b ńgə́, “Nə́ pɨ lə́, nə̈ sóŋə ajɨ́ ńgə́ maŋ lə́ əwə?”
Pita a kwěe yí ńgə́, “Gho lə́ yi páʼ Əsê a Tsəʼ nə́.”
Yeso a Sóŋə Anu Ńté Ngə́ʼ əjǐ pó Nəwû Əyǐə
(Mat 16.20-28; Mag 8.30–9.1)
21Yeso a chígə́ ńkwantə̂ ághɔ́b ńgə́ kɔ pó fiʼtə̂ a ŋwu tsə̌ nə́ anu yəwə́. 22Ḿbɨ ə́sóŋ ńgə́, “Mɔ́ ŋwunə a yǐ jɨ́ ngə́ʼ yi ńtyantə̂ nə́, mətû mə́ aláʼ, ḿbá ngaŋə́pêsê yi weŋ, nə́ ngaŋə́zéʼkə pənoŋkə pə kǐəə yə́. Pə yǐ jwítə yə́, lə, əlěmbî pɛ́n teelə́ ə́ laŋə̂ a pɨ ńjúmnə á nəwûə.”
23A tíʼ ə́sóŋə á mbô pó pətsəm ńgə́, “Mbɔʼ ŋwunə a tə́ ńdoonə̂ á mə́ zoŋ nə́ mə, a shib ńtə́g məmí mənuə á ndzəm ńtwáamə atǐə apagləpaglə ají əlě ətsəm ńdzoŋə̂ mə. 24Ńté ńgə́ ŋwu ntsəm páʼə á lɔ nə́ a mə́ chwádkə nə́ nchîmbî əjǐə a yǐ péŋkə zə́ələ́, lə́ ŋwu ntsəm páʼə a péŋkə nə́ nchîmbî əjǐ ńté mə, a yǐ chwádkə zə́ələ́. 25Mbɔʼ ŋwunə a túgə apeʼə á mbî jɨ tsɔʼə atsəm, pə́ pə́ ńkwá nchîmbî əjǐ kɨ nchîmbî əjǐ ə́ péŋə yí, a pə́ ńtûə yi nə́ akə̂ lə́? 26Mbɔʼ ŋwunə a kó əshɨ́ ńté mə kɨ ńté ndzeʼkə́ mə, ḿbə́ Mɔ́ Ŋwunə a yǒ kə́ ə́ kó əshɨ́ té yí nə́ ndɛlə́ a yǒ nə́ ńtə́ ŋ́ŋwaŋkə̂ ńgyǐəə á mə́m nəpɔŋ əyǐə, ḿbɨ ḿbə́ nə́ nəgháʼ əyǐ, ḿbɨ ḿbə́ nə́ yi Tǎ, nə́ yi pətseŋpə́ndɛ́pə́sê páʼ pə́ ŋwaʼ nə́. 27Mäŋ kyaʼə̂ áwɨ́ ńgə́ pɨ pətsə́ pə́ chîə á aliʼə́ nə́ pó yǒ nə́ zə́ənə anuə nəfoonə Əsê záʼ pɔŋə̂ kwûə.”
Yeso a Kwúblə Ńtíʼə Ŋ́ŋwaŋkə̂ Ŋwaŋkə̂ nə́
(Mat 17.1-8; Mag 9.2-8)
28Yeso a kə tséebə atsáb jɨ lə́, á laŋə̂ ándó əlě nəfeemə́, a lɔgə̂ Pita pó Jɔn nə Jɛmsə pó po kɔ́ʼə á ndu nkwəənə á chaʼtə́sê. 29Ndzaŋ a kə tə́ nə́ ńchaʼtə́sê lə̂, əshî əyí ə́ kwúblə, ətsəʼ əpí ə́ tíʼə ə́fógə ńtɛ̂ ándó mɔ́ sáŋə. 30Pɨ pə́ pɛ̌ pə́ ghabkə̂ ńjáʼə á mbi yə́, ḿbə́ Mosisə pó Elayija pó po tíʼ ńchúʼə á mə́ tsáb nə́. 31Pó kə jáʼ lə́ ŋ́ŋwaŋkə̂ ndzaŋ pɨ pə́ chî nə́ á nəpó ńchîə, ńtíʼə ńtséebə pópə Yeso ə́sóŋ ndzaŋə ándó a yǐ nə́ pə́ tsɔʼə ngǎ pɛ̌ Yeso a faʼə̂ anu páʼ Əsê a kə kwaŋ nə́, páʼ zə́ələ́ á pə́ nə́ mə́ kwû nə́ á Jɛlusalɛmə. 32Pita pópə ngaŋə́ko əjí ə́ kə wǔəə ntɨ pəlê, ńdê tə ńgyǐ ńjimnə̂ ńdzə́ənə ándó Yeso a tɨ́ nə́ ŋ́ŋwaŋkə̂, pɨ pə̂ pə́ pɛ̌ pə́ tə́əmə á nəpɛnə́ yə́. 33Ndzaŋ pɨ pɨ pə́ nə ńtə́ nə́ ńgɛnə̂ ághɔ́b lə́, Pita a sóŋə á mbô Yeso ńgə́, “Tǎ, á pɔŋ ndzaŋ pɛn chî nə́ aliʼə́ nə́. Tíʼ pəg kwúd məntaŋ mɛ́n teelə́, táʼə á mbô gho, táʼ á mbô Mosisə, táʼ yitsə̌ á mbô Elayija.” (A nə ńkě jîə anu páʼə a kə̈ sóŋ nə́ pô.)
34Ndzaŋ a kə tə́ nə́ ḿbɛ́lə ńtséebə lə́, alə́mə á jáʼ ńkə́bkə ághóobə́. Á kə́bkə ághɔ́b lə́, ngaŋə́zoŋə́ndzəm əjí ə́ pɔ́g lɛ tətətə. 35Ngye yitsə̌ ə́ fɛ́lə á mə́mə alə́m yə wɨ́ ə́sóŋ ńgə́, “lɛ̌ móonə mə páʼ maŋ tsɔ́ʼ nə́, zóʼ nə́ á mbô yə́.” 36Ngye jɨ ə́ kə məgtə̂ á mə́ tsáb nə́ lə́, pó tíʼ ńjɨ́ Yeso a tə́əmə pə́ á ngǎ yə́. Ngaŋə́zoŋə́ndzəm əjí ə́ lɔʼkə̂ ndɛn mənuə nə́ á ntɨ́ pó ńkě tɔ́g ə́fiʼtə̂ ŋwu tsə̌ əghâ yi wɨ́ nə́ anu páʼə á laŋ nə́ pô.
Yeso a Tsóʼə a Mɔ́ Mbyâŋnə Yitsə̌ Páʼə a Túg nə́ Ajwiə Təpɔŋə
(Mat 17.14-18; Mag 9.14-27)
37Mbî ə́ kə fóg lə́, Yeso pópə ngaŋə́zoŋə́ndzəm əjí ə́ tsóolə á nkwəənə wə̂, mboŋ ŋwu məsɔŋ a yǐ ńtégə yə́. 38Ŋwu tsə̌ á mə́m ənoonə a fóŋnə ə́sóŋ ńgə́, “Ndzéʼkə, náŋə móonə mə, Maŋ póʼ mbô, lə́ ndaʼ mɔ́ maŋ túg nə́. 39Ajwiə təpɔŋ á twáamə yə́, ńgɛlə̂ a póʼ ngoŋə; ä tsɔʼə yi ńtə́mə á əsê ńgɛlə̂ a fwɔʼkə̂ mətwê á ntso yə́. Ä nuʼə̂ yi tsɔʼə əghâ ətsəm ńkě yí mɛdtə̂ a jwitə̂ pô. 40Maŋ kə póʼ mbô nə́ ngaŋə́zoŋə́ndzəm zô ńgə́ pó fɨ́dkə ájɨ́d pó pə́ ńkě chî təmbɔʼ pó fɨ́dkə pô.”
41Yeso a sóŋ ńgə́, “Lə́ ghɛlə̂ akə̂ mbimə́ əjɨ ə́ chígə́ ńkə́g, mənu mɨ́ mə́ kə́ ə́fə́ŋkə nə́ jɨ əsê ndú leenə́? Maŋ yǐ lánə chî pɛn ə́wam ntɨ́ tə koʼ lə́ ə́lɛ́?” A sóŋ lə́ ńtíʼ ə́sɛdnə̂ ə́sóŋ nə́ ŋwu wə̂ ńgə́, “Yǐ nə́ mɔ́ əgho wə̂ á aliʼə́ nə́.” 42Ndzaŋə a tə nə́ ńgyǐəə nə́ yí lə́ pɛ̌sê yi wə́ a twáamə yí ḿmaʼə̂ á ndəsê nə́ aghɔ yə saʼ nə́. Lə́ Yeso a pə́ ə́sáʼə ajwiə təpɔŋ zə̂, ńtsóʼə mɔ́ wə̂ ńtíʼ ə́fɛ̂ yə́ á mbô tǎ əyǐə. 43Á kə kɨʼnə̂ ŋwu ntsəm ndzaŋə ándó mətɨ mə́ Əsê mə́ tyantə̂ nə́. Ndzaŋ ŋwu ntsəmə a kə tíʼ nə́ ńkwaŋ ndɛn mənu Yeso a faʼ nə́ á tsɛɛlə̂ ághɔ́b lə́, a sóŋ nə́ ngaŋə́zoŋə́ndzəm əjí ńgə́,
Yeso a kə Mbɨ Ə́sóŋə Anu ńté Nəwû Əyǐə
(Mat 17.22, 23; Mag 9.30-32)
44“tsoŋkə̂ nə́ ńjwə́ʼtə anu maŋ lɔ nə́ á mə́ sóŋ nə́ á mbô pəənə́; Maŋ loonə̂ lə́ ńgə́ nə́ jî ńgə́, pə́ yǐ fɛ̂ Mɔ́ Ŋwunə á mbô pɨ pə́ mbîə.” 45Lə́ atûə azóobə́ a pə́ ńkě tsɔ́ʼnə nə́ anuə ándó ä sóŋ nə́ pô, ńté ńgə́ pə́ kə lyáŋə ázə́ələ́ á mbô pó ńgə́ kɔ pó jîə, pó pɨ ńtə́ ḿbɔ́gə yə́ á mə́ pítə nə́.
Lə́ əwə a pə́ nə́ Ŋwu yi Ngweŋə́
(Mat 18.1-5; Mag 9.33-37)
46Azɔŋə á kə fɛ́lə á tətɨ ngaŋə́zoŋə́ndzəm əjí, pó pítə məmbɨ mɔ́b ńgə́, lə́ əwə a pə́ nə́ ŋwu yi ngweŋə́? 47Yeso a kə jîə anu pó nə ńkwaŋ nə́, ńtíʼ ńdɔgə̂ Mɔ̂nkə̂ ńtə́gə á nəpɛnə́ yə́. 48Ə́sóŋə á mbô pó ńgə́, “Ŋwu ntsəmə a pí nə́ mɔ́ ghɛn nə́ əlɛ́nə mə, a pí lə́ mə; ŋwunə ándó a kə́ nə́ ḿbímə mə, a pí lə́ ŋwu páʼə a tú nə́ mə. Ńté ńgə́ ŋwu páʼə a kə́g nə́ á mə́m pəənə́, lə́ yí ḿbə́ ŋwu yi ngweŋə́.”
Ŋwu Ntsəm Páʼə a Kě nə́ Məsɔŋə́ a Ndzəm Gho Sɔb pô, lə́ Ngaŋndzəm Əgho
(Mag 9.38-40)
49Jɔnə a sóŋ ńgə́, “Tǎ, pəg zəənə́ ŋwu tsə̌ a tə́ ńkəmə̂ pə pɛ̌sê nə́ əlɛ́n əghô, lə́ pəg pə́ ə́sóŋ nə́ yí ńgə́ kɔ a pɨ ńgɛd ə́lɨ́d ńté ńgə́ a kě lə́ táʼ ŋwu əwɛn yitsə̌ pô.” 50Yeso a sóŋ nə́ pó ńgə́, “Kɔ nə́ zɔŋ nə́ yə́, ŋwu ntsəm páʼə a kě nə́ məsɔŋə́ á ndzəm gho sɔb pó, lə́ ngaŋndzəm zô.”
Aláʼə Pəsamalitan Yətsə́ a Kǐəə á mə́ Pí nə́ Yeso
51Ndzaŋə ándó ndɛd ə́ kə páatə nə́ páʼ pə́ yǐ nə́ lɔgə̂ yí ə́ kɔ́ʼə á nəpó lə́, a tə́əmə alaŋə́ ńtə́ ńgɛnə̂ á Jɛlusalɛm nə́ ntɨ́ əyí ətsəmə. 52A tú pɨ ńgə́ pó kwá mbi ńgɛn nə́ aláʼə Pəsamalitan yətsə́ ńtsoŋkə̂ əliʼ ə́wə́ á mbô yə́. 53Lə́ pɨ pə́ aliʼ pə́ wɨ́ pə́ pə́ ńkě yí pí pô ńté ńgə́ a kə̈ laŋə̂ ńgɛnə̂ lə́ á Jɛlusalɛmə. 54Ngaŋə́zoŋə́ndzəm əjí ə́ nə ḿbə́ nə́ Jɛmsə pó Jɔn lə́, po pítə ńgə́, “Mmaʼmbî, gho loonə̂ lə́ ńgə́ pəg fóŋ mógə́ á nəpó wɨ́d ə́ tsó ńtoonə̂ ághɔ́b?” #9.54 Əŋwaʼlə pətsə́ peg ńgə́, “Ándó Elayija a nə ńgɛd nə́ lə́?” 55Yeso a pə́ ə́sɛdnə̂ ə́sáʼə ághóobə́, #9.55 Əŋwaʼlə pətsə́ ə́ peg ńgə́, A sóŋə á mbô pó ńgə́, “Nə́ kě jî ndzaŋə ajwiə a nə́ ńtúg nə́ pô. Ńté ńgə́ Mɔ́ Ŋwunə a nə ńkě yǐ lə́ á mə́ tsəŋkə̂ nə́ nchîmbî pɨ pô, ḿbə́ ńgyǐ lə́ á mə́ chwádkə nə́ ághóobə́.” 56Pó po tíʼ ńgɛn aláʼ yə ndaʼə.
Ngə́ʼə á mə́ Zoŋ nə́ Yeso
(Mat 8.19-22)
57Ndzaŋ po kə tə́ nə́ ńnyinə̂ alaŋə́ lə́ ŋwu tsə̌ a sóŋə á mbô Yeso ńgə́, “Maŋ yǐ zoŋə̂ gho aliʼə́ atsəm páʼ gho ghɛn nə́ ə́wə́,” 58Yeso a kwěe ńgə́, “Ntsɔb ə́ túg məngɔ́d móobə́, pəsə́ŋ pə́ túg məŋka móobə́, lə́ Mɔ́ Ŋwunə a pə́ ńkě túgə aliʼ mbɔʼ a noŋkə̂ atûə ají ə́wɨ́ ńjwitə̂ pô.”
59A sóŋə á mbô yitsə̌ ŋwu ńgə́, “Zoŋə̂ mə.” Ngaŋə a kwěe yí ńgə́, “Mmaʼmbî, tíʼ maŋ ghɛn ńtwə́ŋə tǎ mə záʼə.” 60Yeso a sóŋ nə́ yí ńgə́, “Mɛdtə̂ pəkwû pə́ twə́ŋ pəkwû póobə́, lə́ gho pə́ ńgɛn ə́sóŋə Anuə Nəfoonə Əsê.” 61Yitsə̌ a pɨ ńkə́ ə́sóŋə á mbô yí ńgə́, “Maŋ yǐ zoŋə̂ gho ḿbə́ Mmaʼmbî, lə́ mɛdtə̂ maŋ pəənə̂ á nchîndɛ̂ ḿbookə̂ pəlimə́ mə záʼə.” 62Yeso a kwěe yí ńgə́, “Ŋwunə ándó a twá nə́ asóolə afaʼ ḿbɨ ńtə́ ńnáŋ ndzəm, a kě koʼnə̂ á mə́ faʼ nə́ Anuə Nəfoonə Əsê pô.”
موجودہ انتخاب:
Lukasə 9: azo
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Lukasə 9
9
Yeso a Tú Ngaŋə́zoŋə́ndzəm Əjí zə̂ Ntsɔb Pɛ̌
(Mat 10.5-15; Mag 6.7-13)
1Yeso a fóŋ ngaŋə́zoŋə́ndzəm əjí zə̂ ntsɔb pɛ̌ ə́fɛ̂ mətɨ mətsəmə á mbô pó á mə́ fɨ́dkə nə́ pəpɛ̌sê pətsəm ə́ kə́ tsóʼ məghoonə́. 2A tíʼ ńtúmə ághɔ́b ńgə́ pó ghɛn ə́sóŋə anuə nəfoonə Əsê ńkə́ ńtsóʼ pəghoonə́. 3A sóŋə á mbô pó ńgə́, “Kɔ nə́ lɔgə̂ ajûtsə́ ńgɛn nə́ zə́ələ́; kɨ mbaŋ, kəənə apa, kɨ məjî, kɨ nkáb, kɨ yətsə́ atsəʼə́. 4Ndɛ̂ ntsəm páʼ nə́ yǐ nə́ ńkwú ə́wɨ́, pə́ pímə áwɨ́, nə kə̈ ńchîə tsɔʼə ə́wɨ́ tə ńdáʼ fɛ́lə aláʼ yi wə̂. 5Aliʼə́ atsəm pə́ kě nə́ áwɨ́ ə́wɨ́ pí pô, nə́ kɔdtə̂ akəpóglə́ á məko pəənə, ə́fɛ́lə áwə́ənə́ aláʼ yi wə́, zəənə́ á yǐ chîə ándó akwantə anuə á mbô pó.”
6Pó tíʼ ə́fɛ́d ńgɛn, ńdǒo nə́ táʼə aláʼ ńkwúnə nə́ yətsə́, ńnáŋkə nkɨ yi əshîʼnə ńkə́ ńtsóʼə pəənə aliʼə́ atsəmə.
Ɛlɔdə a Jwaʼlə̂
(Mat 14.1-12; Mag 6.14-29)
7Ɛlɔd páʼə a nə́ ḿbə́ nə́ nətû nə́ Galiliə a zóʼə anuə atsəm páʼə á nə́ ńdaŋ nə́ ńtíʼ ńjwaʼlə̂ yí ńté ńgə́ pɨ pətsə́ pə́ nə ńtə́ ə́sóŋə ńgə́, “Jɔn páʼə ä fɛ̂ nə́ nkǐ lə́ a júmnə á nəwûə.” 8Pətsə́ pə̈ pəənə ə́sóŋə ńgə́, “Elayija a pɨ ḿbəənə̂.” Pətsə́ pə̈ pəənə̂ ə́sóŋə ńgə́, Táʼ ńtú Əsê ngoʼ pəchə́ yitsə̌ a pɨ ńjúmnə á nəwûə. 9Lə́ Ɛlɔdə a pə́ ə́sóŋ ńgə́, “Maŋ kə ghɛd pə́ lə́gə atûə Jɔnə, pə́ pɛn ḿbɨ ńtíʼə ə́sóŋə ghɛn ndɛn mənu ńté lə́ ə́wə́?” A tíʼə ńdɔ ndú ətsəmə á mə́ jɨ́ nə́ Yeso.
Yeso a Zə́g pɨ Tɔsə Tênə
(Mat 14.13-21; Mag 6.30-44; Jɔn 6.1-14)
10Məntú mə̂ mə́ kwə̂ ə́fiʼtə̂ Yeso nə́ anuə atsəm pó ghɛd nə́, á lɔgə̂ ághɔ́b pó po ghɛn tsɔʼə ngǎ pó á aláʼ yitsə̌ pə́ fóŋə nə́ Bɛdsada. 11Lə́, mboŋ pɨ pə́ ńdzóʼ ńtíʼ ńdzoŋə̂ yə́. A lɔgə̂ ághɔ́b əshîʼnə ńtíʼ ə́sóŋə anu ńté anuə nəfoonə Əsê á mbô pó ńkə́ ńtsóʼ pəghoonə́.
12Mə́numə á kə tíʼ ḿmɛ́lə, ngaŋə́zoŋə́ndzəm əjí zə̂ ntsɔb pɛ̌ ə́ yǐ ə́sóŋ nə́ yí ńgə́, “Ghɛd ŋwu məsɔŋə́ nə́ a ghɛn ńjî ńgə́ pó ghɛnə̂ á mə́m əláʼ pópə əfɔ páʼ ə́ chî nə́ ḿbáatə ńchwaalə̂ ajú ńjî ńkə́ ńnáŋə aliʼ ńdê wɨ́ ńté ńgə́ lə́ aliʼə́ tə ŋwunə.”
13Lə́ Yeso a pə́ ńkwěe ághɔ́b ńgə́, “Fɛ̂ nə́ ajú pó jîə.” Pó sóŋ ńgə́, “Pəg túg lə́ tsɔʼə apéenə məkálə́ ntáʼ tâ nə́ əshû ńtáʼ pɛ̌. Gho loonə̂ lə́ ńgə́ pəg ghɛn ńjú məjîə á mbô mboŋ ŋwu məsɔŋ ghɛn ntsəm?” 14(Pɨ pə́ nə ńchîə aliʼ yi wɨ́ tə ńkoʼ tɔsə tênə) Yeso a sóŋə á mbô ngaŋə́zoŋə́ndzəm əjí ńgə́, “Ghɛd nə́ pó náanə á əsê nə́ əkwɛlə́ məghə́m mɛ́n tâ məghə́m mɛ́n tênə.” 15Pó ghabtə̂ ághɔ́b ńgɛd ŋwu ntsəmə a náanə á əsê. 16Yeso a tíʼ ńkwáalə apá zə̂ ntáʼ tâ nə́ əshû zə̂ ntáʼ pɛ̌ ńnáŋ nəpó ə́fɛ̂ ndǎ á mbô#9.16 Pə́ kə́ sháŋ lə́ tsɔʼə mbyâŋnə, lə́ pəngyě pópə pɔ̂nkə̂ pə́ kə́ ńchî ə́wɨ́ pə́ pə́ ńkě ághɔ́b sháŋ pô. Əsê ḿbagtə̂ zɨ́d ə́fɛ̂ á mbô ngaŋə́zoŋə́ndzəm əjí ńgə́ pó gheebə̂ á mbô pɨ pə̂. 17Pó jî ńdzɛ́d tə ngaŋə́zoŋə́ndzəm Yeso lag əpuʼ məjî ə́ kə pakə̂ nə́ ńgwǔ, ə́ pə́ pəkyíbə́ ntsɔb pɛ̌.
Pita a Fiʼtə̂ Ŋwu páʼ Yeso pə́ nə́ Wə́ələ́
(Mat 16.13-19; Mag 8.27-29)
18Á nə ńdáʼ ḿbə́ alě tsə́ Yeso a tə́ ńchaʼtə́sê á ngǎ yə́, ngaŋə́zoŋə́ndzəm əjí ə́ yǐ ńtégə yə́ a pítə ághɔ́b ńgə́, “Pɨ pə̈ sóŋə ńgə́ maŋ lə́ əwə?”
19Pó kwěe yí ńgə́, “Pɨ pətsə́ pə̈ sóŋə ńgə́ gho lə́ Jɔn páʼə a fɛ̂ nə́ nkǐ lə̂,” pətsə́ pə̈ sóŋə ńgə́ gho lə́ Elayija, pətsə́ pə kə̈ ə́sóŋə ńgə́ gho lə́ ntûsê ngoʼ pəchə́ páʼ a pɨ nə́ ńjúmnə á nəwûə.
20Yeso a pítə ághɔ́b ńgə́, “Nə́ pɨ lə́, nə̈ sóŋə ajɨ́ ńgə́ maŋ lə́ əwə?”
Pita a kwěe yí ńgə́, “Gho lə́ yi páʼ Əsê a Tsəʼ nə́.”
Yeso a Sóŋə Anu Ńté Ngə́ʼ əjǐ pó Nəwû Əyǐə
(Mat 16.20-28; Mag 8.30–9.1)
21Yeso a chígə́ ńkwantə̂ ághɔ́b ńgə́ kɔ pó fiʼtə̂ a ŋwu tsə̌ nə́ anu yəwə́. 22Ḿbɨ ə́sóŋ ńgə́, “Mɔ́ ŋwunə a yǐ jɨ́ ngə́ʼ yi ńtyantə̂ nə́, mətû mə́ aláʼ, ḿbá ngaŋə́pêsê yi weŋ, nə́ ngaŋə́zéʼkə pənoŋkə pə kǐəə yə́. Pə yǐ jwítə yə́, lə, əlěmbî pɛ́n teelə́ ə́ laŋə̂ a pɨ ńjúmnə á nəwûə.”
23A tíʼ ə́sóŋə á mbô pó pətsəm ńgə́, “Mbɔʼ ŋwunə a tə́ ńdoonə̂ á mə́ zoŋ nə́ mə, a shib ńtə́g məmí mənuə á ndzəm ńtwáamə atǐə apagləpaglə ají əlě ətsəm ńdzoŋə̂ mə. 24Ńté ńgə́ ŋwu ntsəm páʼə á lɔ nə́ a mə́ chwádkə nə́ nchîmbî əjǐə a yǐ péŋkə zə́ələ́, lə́ ŋwu ntsəm páʼə a péŋkə nə́ nchîmbî əjǐ ńté mə, a yǐ chwádkə zə́ələ́. 25Mbɔʼ ŋwunə a túgə apeʼə á mbî jɨ tsɔʼə atsəm, pə́ pə́ ńkwá nchîmbî əjǐ kɨ nchîmbî əjǐ ə́ péŋə yí, a pə́ ńtûə yi nə́ akə̂ lə́? 26Mbɔʼ ŋwunə a kó əshɨ́ ńté mə kɨ ńté ndzeʼkə́ mə, ḿbə́ Mɔ́ Ŋwunə a yǒ kə́ ə́ kó əshɨ́ té yí nə́ ndɛlə́ a yǒ nə́ ńtə́ ŋ́ŋwaŋkə̂ ńgyǐəə á mə́m nəpɔŋ əyǐə, ḿbɨ ḿbə́ nə́ nəgháʼ əyǐ, ḿbɨ ḿbə́ nə́ yi Tǎ, nə́ yi pətseŋpə́ndɛ́pə́sê páʼ pə́ ŋwaʼ nə́. 27Mäŋ kyaʼə̂ áwɨ́ ńgə́ pɨ pətsə́ pə́ chîə á aliʼə́ nə́ pó yǒ nə́ zə́ənə anuə nəfoonə Əsê záʼ pɔŋə̂ kwûə.”
Yeso a Kwúblə Ńtíʼə Ŋ́ŋwaŋkə̂ Ŋwaŋkə̂ nə́
(Mat 17.1-8; Mag 9.2-8)
28Yeso a kə tséebə atsáb jɨ lə́, á laŋə̂ ándó əlě nəfeemə́, a lɔgə̂ Pita pó Jɔn nə Jɛmsə pó po kɔ́ʼə á ndu nkwəənə á chaʼtə́sê. 29Ndzaŋ a kə tə́ nə́ ńchaʼtə́sê lə̂, əshî əyí ə́ kwúblə, ətsəʼ əpí ə́ tíʼə ə́fógə ńtɛ̂ ándó mɔ́ sáŋə. 30Pɨ pə́ pɛ̌ pə́ ghabkə̂ ńjáʼə á mbi yə́, ḿbə́ Mosisə pó Elayija pó po tíʼ ńchúʼə á mə́ tsáb nə́. 31Pó kə jáʼ lə́ ŋ́ŋwaŋkə̂ ndzaŋ pɨ pə́ chî nə́ á nəpó ńchîə, ńtíʼə ńtséebə pópə Yeso ə́sóŋ ndzaŋə ándó a yǐ nə́ pə́ tsɔʼə ngǎ pɛ̌ Yeso a faʼə̂ anu páʼ Əsê a kə kwaŋ nə́, páʼ zə́ələ́ á pə́ nə́ mə́ kwû nə́ á Jɛlusalɛmə. 32Pita pópə ngaŋə́ko əjí ə́ kə wǔəə ntɨ pəlê, ńdê tə ńgyǐ ńjimnə̂ ńdzə́ənə ándó Yeso a tɨ́ nə́ ŋ́ŋwaŋkə̂, pɨ pə̂ pə́ pɛ̌ pə́ tə́əmə á nəpɛnə́ yə́. 33Ndzaŋ pɨ pɨ pə́ nə ńtə́ nə́ ńgɛnə̂ ághɔ́b lə́, Pita a sóŋə á mbô Yeso ńgə́, “Tǎ, á pɔŋ ndzaŋ pɛn chî nə́ aliʼə́ nə́. Tíʼ pəg kwúd məntaŋ mɛ́n teelə́, táʼə á mbô gho, táʼ á mbô Mosisə, táʼ yitsə̌ á mbô Elayija.” (A nə ńkě jîə anu páʼə a kə̈ sóŋ nə́ pô.)
34Ndzaŋ a kə tə́ nə́ ḿbɛ́lə ńtséebə lə́, alə́mə á jáʼ ńkə́bkə ághóobə́. Á kə́bkə ághɔ́b lə́, ngaŋə́zoŋə́ndzəm əjí ə́ pɔ́g lɛ tətətə. 35Ngye yitsə̌ ə́ fɛ́lə á mə́mə alə́m yə wɨ́ ə́sóŋ ńgə́, “lɛ̌ móonə mə páʼ maŋ tsɔ́ʼ nə́, zóʼ nə́ á mbô yə́.” 36Ngye jɨ ə́ kə məgtə̂ á mə́ tsáb nə́ lə́, pó tíʼ ńjɨ́ Yeso a tə́əmə pə́ á ngǎ yə́. Ngaŋə́zoŋə́ndzəm əjí ə́ lɔʼkə̂ ndɛn mənuə nə́ á ntɨ́ pó ńkě tɔ́g ə́fiʼtə̂ ŋwu tsə̌ əghâ yi wɨ́ nə́ anu páʼə á laŋ nə́ pô.
Yeso a Tsóʼə a Mɔ́ Mbyâŋnə Yitsə̌ Páʼə a Túg nə́ Ajwiə Təpɔŋə
(Mat 17.14-18; Mag 9.14-27)
37Mbî ə́ kə fóg lə́, Yeso pópə ngaŋə́zoŋə́ndzəm əjí ə́ tsóolə á nkwəənə wə̂, mboŋ ŋwu məsɔŋ a yǐ ńtégə yə́. 38Ŋwu tsə̌ á mə́m ənoonə a fóŋnə ə́sóŋ ńgə́, “Ndzéʼkə, náŋə móonə mə, Maŋ póʼ mbô, lə́ ndaʼ mɔ́ maŋ túg nə́. 39Ajwiə təpɔŋ á twáamə yə́, ńgɛlə̂ a póʼ ngoŋə; ä tsɔʼə yi ńtə́mə á əsê ńgɛlə̂ a fwɔʼkə̂ mətwê á ntso yə́. Ä nuʼə̂ yi tsɔʼə əghâ ətsəm ńkě yí mɛdtə̂ a jwitə̂ pô. 40Maŋ kə póʼ mbô nə́ ngaŋə́zoŋə́ndzəm zô ńgə́ pó fɨ́dkə ájɨ́d pó pə́ ńkě chî təmbɔʼ pó fɨ́dkə pô.”
41Yeso a sóŋ ńgə́, “Lə́ ghɛlə̂ akə̂ mbimə́ əjɨ ə́ chígə́ ńkə́g, mənu mɨ́ mə́ kə́ ə́fə́ŋkə nə́ jɨ əsê ndú leenə́? Maŋ yǐ lánə chî pɛn ə́wam ntɨ́ tə koʼ lə́ ə́lɛ́?” A sóŋ lə́ ńtíʼ ə́sɛdnə̂ ə́sóŋ nə́ ŋwu wə̂ ńgə́, “Yǐ nə́ mɔ́ əgho wə̂ á aliʼə́ nə́.” 42Ndzaŋə a tə nə́ ńgyǐəə nə́ yí lə́ pɛ̌sê yi wə́ a twáamə yí ḿmaʼə̂ á ndəsê nə́ aghɔ yə saʼ nə́. Lə́ Yeso a pə́ ə́sáʼə ajwiə təpɔŋ zə̂, ńtsóʼə mɔ́ wə̂ ńtíʼ ə́fɛ̂ yə́ á mbô tǎ əyǐə. 43Á kə kɨʼnə̂ ŋwu ntsəm ndzaŋə ándó mətɨ mə́ Əsê mə́ tyantə̂ nə́. Ndzaŋ ŋwu ntsəmə a kə tíʼ nə́ ńkwaŋ ndɛn mənu Yeso a faʼ nə́ á tsɛɛlə̂ ághɔ́b lə́, a sóŋ nə́ ngaŋə́zoŋə́ndzəm əjí ńgə́,
Yeso a kə Mbɨ Ə́sóŋə Anu ńté Nəwû Əyǐə
(Mat 17.22, 23; Mag 9.30-32)
44“tsoŋkə̂ nə́ ńjwə́ʼtə anu maŋ lɔ nə́ á mə́ sóŋ nə́ á mbô pəənə́; Maŋ loonə̂ lə́ ńgə́ nə́ jî ńgə́, pə́ yǐ fɛ̂ Mɔ́ Ŋwunə á mbô pɨ pə́ mbîə.” 45Lə́ atûə azóobə́ a pə́ ńkě tsɔ́ʼnə nə́ anuə ándó ä sóŋ nə́ pô, ńté ńgə́ pə́ kə lyáŋə ázə́ələ́ á mbô pó ńgə́ kɔ pó jîə, pó pɨ ńtə́ ḿbɔ́gə yə́ á mə́ pítə nə́.
Lə́ əwə a pə́ nə́ Ŋwu yi Ngweŋə́
(Mat 18.1-5; Mag 9.33-37)
46Azɔŋə á kə fɛ́lə á tətɨ ngaŋə́zoŋə́ndzəm əjí, pó pítə məmbɨ mɔ́b ńgə́, lə́ əwə a pə́ nə́ ŋwu yi ngweŋə́? 47Yeso a kə jîə anu pó nə ńkwaŋ nə́, ńtíʼ ńdɔgə̂ Mɔ̂nkə̂ ńtə́gə á nəpɛnə́ yə́. 48Ə́sóŋə á mbô pó ńgə́, “Ŋwu ntsəmə a pí nə́ mɔ́ ghɛn nə́ əlɛ́nə mə, a pí lə́ mə; ŋwunə ándó a kə́ nə́ ḿbímə mə, a pí lə́ ŋwu páʼə a tú nə́ mə. Ńté ńgə́ ŋwu páʼə a kə́g nə́ á mə́m pəənə́, lə́ yí ḿbə́ ŋwu yi ngweŋə́.”
Ŋwu Ntsəm Páʼə a Kě nə́ Məsɔŋə́ a Ndzəm Gho Sɔb pô, lə́ Ngaŋndzəm Əgho
(Mag 9.38-40)
49Jɔnə a sóŋ ńgə́, “Tǎ, pəg zəənə́ ŋwu tsə̌ a tə́ ńkəmə̂ pə pɛ̌sê nə́ əlɛ́n əghô, lə́ pəg pə́ ə́sóŋ nə́ yí ńgə́ kɔ a pɨ ńgɛd ə́lɨ́d ńté ńgə́ a kě lə́ táʼ ŋwu əwɛn yitsə̌ pô.” 50Yeso a sóŋ nə́ pó ńgə́, “Kɔ nə́ zɔŋ nə́ yə́, ŋwu ntsəm páʼə a kě nə́ məsɔŋə́ á ndzəm gho sɔb pó, lə́ ngaŋndzəm zô.”
Aláʼə Pəsamalitan Yətsə́ a Kǐəə á mə́ Pí nə́ Yeso
51Ndzaŋə ándó ndɛd ə́ kə páatə nə́ páʼ pə́ yǐ nə́ lɔgə̂ yí ə́ kɔ́ʼə á nəpó lə́, a tə́əmə alaŋə́ ńtə́ ńgɛnə̂ á Jɛlusalɛm nə́ ntɨ́ əyí ətsəmə. 52A tú pɨ ńgə́ pó kwá mbi ńgɛn nə́ aláʼə Pəsamalitan yətsə́ ńtsoŋkə̂ əliʼ ə́wə́ á mbô yə́. 53Lə́ pɨ pə́ aliʼ pə́ wɨ́ pə́ pə́ ńkě yí pí pô ńté ńgə́ a kə̈ laŋə̂ ńgɛnə̂ lə́ á Jɛlusalɛmə. 54Ngaŋə́zoŋə́ndzəm əjí ə́ nə ḿbə́ nə́ Jɛmsə pó Jɔn lə́, po pítə ńgə́, “Mmaʼmbî, gho loonə̂ lə́ ńgə́ pəg fóŋ mógə́ á nəpó wɨ́d ə́ tsó ńtoonə̂ ághɔ́b?” #9.54 Əŋwaʼlə pətsə́ peg ńgə́, “Ándó Elayija a nə ńgɛd nə́ lə́?” 55Yeso a pə́ ə́sɛdnə̂ ə́sáʼə ághóobə́, #9.55 Əŋwaʼlə pətsə́ ə́ peg ńgə́, A sóŋə á mbô pó ńgə́, “Nə́ kě jî ndzaŋə ajwiə a nə́ ńtúg nə́ pô. Ńté ńgə́ Mɔ́ Ŋwunə a nə ńkě yǐ lə́ á mə́ tsəŋkə̂ nə́ nchîmbî pɨ pô, ḿbə́ ńgyǐ lə́ á mə́ chwádkə nə́ ághóobə́.” 56Pó po tíʼ ńgɛn aláʼ yə ndaʼə.
Ngə́ʼə á mə́ Zoŋ nə́ Yeso
(Mat 8.19-22)
57Ndzaŋ po kə tə́ nə́ ńnyinə̂ alaŋə́ lə́ ŋwu tsə̌ a sóŋə á mbô Yeso ńgə́, “Maŋ yǐ zoŋə̂ gho aliʼə́ atsəm páʼ gho ghɛn nə́ ə́wə́,” 58Yeso a kwěe ńgə́, “Ntsɔb ə́ túg məngɔ́d móobə́, pəsə́ŋ pə́ túg məŋka móobə́, lə́ Mɔ́ Ŋwunə a pə́ ńkě túgə aliʼ mbɔʼ a noŋkə̂ atûə ají ə́wɨ́ ńjwitə̂ pô.”
59A sóŋə á mbô yitsə̌ ŋwu ńgə́, “Zoŋə̂ mə.” Ngaŋə a kwěe yí ńgə́, “Mmaʼmbî, tíʼ maŋ ghɛn ńtwə́ŋə tǎ mə záʼə.” 60Yeso a sóŋ nə́ yí ńgə́, “Mɛdtə̂ pəkwû pə́ twə́ŋ pəkwû póobə́, lə́ gho pə́ ńgɛn ə́sóŋə Anuə Nəfoonə Əsê.” 61Yitsə̌ a pɨ ńkə́ ə́sóŋə á mbô yí ńgə́, “Maŋ yǐ zoŋə̂ gho ḿbə́ Mmaʼmbî, lə́ mɛdtə̂ maŋ pəənə̂ á nchîndɛ̂ ḿbookə̂ pəlimə́ mə záʼə.” 62Yeso a kwěe yí ńgə́, “Ŋwunə ándó a twá nə́ asóolə afaʼ ḿbɨ ńtə́ ńnáŋ ndzəm, a kě koʼnə̂ á mə́ faʼ nə́ Anuə Nəfoonə Əsê pô.”
موجودہ انتخاب:
:
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in