Jénésis 6
6
Byibî ḿbyí Banet-Ejíí
1Ké nkéré mú banet baa/jê ké ejíí, ba-fwon bwǎn-banyinyi, 2kyicê-[barím-Osówo] ba/cá bwǎn-banyinyi ḿbé banong banong, ḿbé banet ba/fwon, ba-bé kámbé. 3Ne Óburúkpâbí o-raa kâng o/fu, mm*ba/chi m-bángê banet ba-kpen ne banyá*. Ba-man ba-kpú. Kyi-fím kántîk kyi-ca kashú, baa*ba/chi ba-chîrí ba-shwôm bajam-aje nyâchât*. 4Ké nkéré ámu, nang ńdyí ka/chîrí, biǐnât-banet byi/mû ké ejíí ḿbyí banyinyi ba/fwon cibicibi ne barím-Osówo. Mbé nké ba/mû biǐtí-banet ne bakân-banet ḿbé nkéré mú kpákpá.
5Ké nkéré mú Óburúkpâbí o/ri byibî ḿbyí kángkáng banet ḿbé ké ejíí mbe ba-chi i, ne eringe nyí atyém ebe a/bên, 6byiko byi/kpú ǎ ké ochi mú nyǐ o/chi kámbé, o-yip kámbé o-tî ké ejíí. O/chi ájângmé kanong kanong 7o/fu, n/chi n-ju kángkáng banet ḿbén ḿbé n/chi, cibicibi ne enyam ne bunurung, ké nǎ, byiko mbyi byi-kpú u mě ḿbyí n/chi kámbé. 8Nké kyi/mû kyi-nyîn n Óburúkpâbí dyityém ne Núwa.
Núwa
9-10Nyín kiǐshwô kyi-kim ne Núwa. Núwa o/mû kanong mú o/mû o*fí ne ébîn ké burwám-banet ḿbé nkéré ámu*. Nyǐ o/mû o-chi i édúú nyí e/kim ne Osówo, ne o/mû ne bwǎn-banyinchéng ashí achât, Shêm ne Hâm ne Jáfet. 11Byibî byi/mû bii/sú ké ejíí ne e/mû ee/bên ké bushú ḿbú Osówo. 12Osówo o/ri ejíí o-nyît o/fu, ee/bên, ké nǎ, kángkáng banet baa/bên akpen ebe.
13Osówo o/sét Núwa o/fu, n-kú m-bâ eju kángkáng banet ḿbé ké ejíí. N-ju ng kámbé kángkáng, ké nǎ, ejíí ee/sú ne byibî ebe ḿbyí mbe ba-chi i. 14Kúng byichí ḿbyí byinong a-bi ńsukyíkang mú a/chi a-nung ké mǔ. Chi banfût ké mǔ, a-sabe kámú kotá kafâ ne esim. 15Chi kámú o-kyú bajam-bamyíta nyâchât esim diǐkpú ne bachât ké butang. Baryên emen ba-kyú bamyíta bujam ne bafee, bunyâam emen bu-kyú bamyíta diǐkpú ne bachât. 16Cít [bubóng] emen wǎ kyise, a-chi bajep ba-rêe ké bajam-basentyímyíta bafee esim banyii, kyi-fím ké bukô-ńsukyíkang a-ribi ké mbé. Bi kámú byikim byichât wǎ enyóng, a-fé dyifyi ké bukô emen. 17N/chi n-twóm omu mú o/chi o-na buce bu-sú bu-ju kángkáng byěm ḿbyí mbyi byi-kpen n ké ejíí. Kángkáng byěm ḿbyí mbyi ké ejíí byi/chi byi-kpú, 18nké me n/chi n-ryí ocím ne wo. Nung ké ńsukyíkang ne onyi eyên ne bwǎn eyên ne banyi ebe. 19-20Enyam nang erá ne kanurung to nang kará, kúng otyép ne buma a-fé ké kafâ-ńsukyíkang ámu eringe nyí byi/chi byi-waa byikpó. 21Kúng kángkáng azong-byiryíng nyí ba/chi ba-kûryí ne enyam ányi ne bunurung ámbu. 22Núwa o/chi kángkáng byěm ḿbyí Osówo o/sét ǎ.
موجودہ انتخاب:
Jénésis 6: BKY
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the Bible Society of Nigeria @ 1985