JOŊ 2
2
Bënim di untab Kana
1tsi unu uwaajantsan, a bënim dolaa di untab Kana, di Galileeya; anin Yeesu aci rul. 2A Yeesu do ruura buts pëmaatiir bënim ni bafetsul. 3Bi pëwat ba bi, a anin Yeesu jaul: “Bu katse ka pëwat.” 4A Yeesu jaul: “Ŋaats, we ci wun tsi nji ni wi? Uwal nji netse band.” 5Din, a aninul ja baleemp: “Ko wi na ja ind wi-ba këja, nda rolan wul.” 6A u ro ka këliiki paaj ka leempëna ki ilaak, kan tsua ki tsul pa Bajudeu puu jëntsandaraan; a uja kara pëliiki, pë yëlan ilitar ngëntaaja këwas, oo ilitar useent ni ngëntaaja ngëtëb. 7A Yeesu ja bukul: “Nda cumani iliiki yi mlik.” A ba cuman yul te di iruj. 8A na ja bukul: “Nda likan, ndë rëŋan namuan.” A ba rëŋan. 9Bi namuan mel bi mlik ma witsaa mi pëwat, a meets tsi pëwat pëmënts pun pënë-ni tsi. Maa baleemp ame, par bukul lik bukun mlik. A namuan dui nanim, 10a na jaul: “Bañaan bëlieng ka cakësaan pëfa bërun pëwat pëlílal, a uwal wi bañaan daan wi a ba kësan, bu ka ruka pënani pan buërats punk pëlíl. Maa wi, m gaang pëwat pëlílal te inkri.”
11Yeesu ro ko wan di Kana Galileeya; ci wun ujuundi ngëpibanaani; apiban përëmbul, a bafetsul wak tsi nul. 12#Mat 4.13Bi ko wan par bi, a Yeesu juŋa atsëp Kafarnaum, ni aninul, ni ban tsaar biki ni nul Yeesu, ni bafetsul; a ba ro rul ngënu ngan dëmbats ngi.
Yeesu ajëntsan kato-kayëman
(Mat 21.12-17; Mar 11.15-18; Lúk 19.45-48)
13 #
Pëp 12.1-27
Bi Ufesta-pëbuer, wi Bajudeu wokani bi, a Yeesu kata atsëp Jerusalem. 14A na tsënk bawaap ngëyët-ngëkas, ni ngënkanel, ni ngëtuuba di kato-kayëman, a batsëtsëlan uncaam tsoar. 15A na leemp pëlumbaj icär, a na ruak bukul bëlieng apënan di kato-kayëman, na ruakand ngëyët-ngëkas ni ngënkanel; a na gar-garan uncaam-utsak batsëtsëlan, na kuutës ngëntabël, 16a na ja bawaap ngëtuuba: “Nda pënani ngul tsi! Ind tsë ro kato Asin nji kato pëjúla.” 17#Iya 69.10A bafetsul les u picanaa aja: “Bëŋal bi n ŋal bi katou ka fiŋin.”
18A Bajudeu yeparul aja: “Wom upibanaani ka piban wund wun m yëlan përo ngëko ngi?” 19#Mat 26.61; 27.40; Mar 14.58; 15.29A Yeesu yank bukul aja: “Nda watan kato-kayëman ki, tsi ngënu ngëwaants ka n natsan kul.” 20Din, a Bajudeu jaul: “Kato-kayëman ki, aleempa ngëwaanu ngëntaaja ngëbaakër ni paaj, a ka ru ba; a wi m ja, tsi ngënu ngëwaants kë natsan kul-a?” 21Maa kato-kayëman ki Yeesu ja kank, aci uliaful. 22A bi Yeesu natsee bi di pëcäts, a bafetsul les na ro ñakanaan bukul ko wi, a ba uwak tsi Bëpican, ni tsi përim pi na ja pi bukul.
23Bi Yeesu ci bi di Jerusalem tsi Ufesta-pëbuer, a bañaan bacumal win ngëpibanaani ngi nuu ro ngi, a ba uwak tsi katimul. 24Maa Yeesu, nul, fiaarats bukul, par ame bañaan bëlieng, 25a fierats pëleentsa ko tsi uleka ñaan-najin, par nul bërierul ame ko un ci wi tsi ñaan-najin.
موجودہ انتخاب:
JOŊ 2: KPKNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Le Nouveau Testament en langue Manjaku © Alliance Biblique du Sénégal, 2020.