Luke 24
24
CHAPTIR TWENTY‐FOUR.
The tomb coud‐na haud him! The forgatherin on the road to Emmaus. His coonsel, and his waʼ gaun.
1Noo, on the first oʼ the week, at the dawin, they cam to the tomb, feshin the spices they had gotten ready.
2And they faund the stane to be rowʼt awaʼ frae the tomb.
3And gaun in, they found‐na the body oʼ the Lord Jesus!
4And it was, as they war unco putten aboot at it, lo! twa men stood nar‐by them, cleedit in glintin robes!
5And, as they war fleyʼt, and loutit doon their faces to the yird, they said to them, “Why sud ye seek the leevin amang the deid?
6“He isna here! he raise! Mind‐ye‐na hoo ho spak to ye, whan he was still in Galilea?
7“Sayin, ‘The Son oʼ Man bude be deliverʼt intil the hands oʼ sinfuʼ men; and be crucifyʼt, and the third day rise again!’ ”
8And they caʼd to mind his words.
9And cam back frae the tomb, and reportit aʼ thir things to the Eleeven, and till aʼ the lave.
10Noo, it was Mary oʼ Magdala, and Joanna, and Mary oʼ James, and the lave wiʼ them, that war tellin thir things to the Apostles.
11And their reports war to them like idle clashes, and they didna lippen them.
12But Peter raise, and ran to the tomb; and loutin doon, he saw but the linen claes; and gaed awa, debatin in himsel as to what had come to pass!
13And mark! twa frae ʼmang them war gaun on their journey, that vera day, till a village seeven or aucht mile frae Jerusalem, caʼd Emmaus.
14And they spak thegither oʼ aʼ thae things that had happened.
15And it cam aboot, as they war speakin and reasonin thegither, Jesus his sel cam nar, and gaed wiʼ them.
16But their sicht was hauden, that they soudna ken him.
17And he says to them, “Whatna words are thae that ye hae ane to anither, as ye gang on?” And they #24:17 Sae Tregelles. The Sinai MS. has, “cam till a staun.”stude still, wiʼ a sorrowfuʼ look.
18But ane, by name Cleopas, answerʼt, “Div ye bide by yere lane in Jerusalem, and hae‐na kent aʼ the things that hae cam aboot iʼ thir days?”
19And he said, “Whatna things?” And they said to him, “Anent Jesus oʼ Nazareth, that was a prophet, a man michty in deed and word, in Godʼs sicht, and oʼ aʼ the folk.
20“And in whatna way oor Heid‐priests and Rulers deliverʼt him up to deid, and hae crucifyʼt him.
21“But we lippened it wad hae been he that was to deliver Israʼl; and forby aʼ this, the day is the third day sinʼ thae things war dune.
22“Aye! and a wheen weemen oʼ oor ain garʼt us be astonishʼt — gaun earʼ to the tomb,
23“And no findin his corp, they cam sayin they had seen a vision oʼ angels, that said he was leevin!
24“And some that war oʼ us gaed to the tomb; and faund it eʼen as the weemen had said; but they saw‐na him.”
25And he says to them, “Oh, glaikit anes! and dour in yere hearts to lippen to the things the Prophets hae said.
26“Wasʼt no for the Christ to suffer thae vera things? and to enter intil his glorie?”
27And, beginnin frae Moses, and frae aʼ the Prophets, he made plain to them in aʼ the Scripturs the things anent himsel.
28And they cam nar to the village they war gaun till; and he lookit as gin he was gaun on.
29But they pressed him, sayin, “Bide ye wiʼ us! the day is far gane, and the nicht is comin!” And he gaed in to stop wiʼ them.
30And it cam aboot, whan he was sutten doon wiʼ them to meat, he took the laif, and blessʼd; and breikin it, gied till them.
31And their eʼen war unsteekit; and they kent him! and he disappearʼt frae them.
32And they said ane to the ither, “Did oor heart no lowe within us, while he was speakin to us on the way, and exponin to us the word!”
33And they raise up that vera oor, and gaed back till Jerusalem, and faund foregatherʼt the Eleeven, and thae wiʼ them, sayin,
34“The Lord did rise! and appearʼt to Simon!”
35And they war tellin the things by the road; and hoo he was made kent to them iʼ the breikin oʼ breid.
36And as they war thus tellin, he his sel stude iʼ the mids, and says, “Peace be till ye!”
37But they war sair putten‐aboot, and fleyʼt, thinkin they saw an apparition.
38And he said to them, “What for are ye putten‐aboot? and why soud doots be in yere hearts?
39“See ye my hauns and my feet, that it is I mysel! Touch me, and see; for a spirit hasna flesh and banes as ye see me hae!”
40And whan he had sae said, he airtit them till his hauns and his feet.
41And while they coudna yet believe for joy, and ferlied, he said to them, “Hae ye here onything to eat?”
42And they gied him a piece oʼ a branderʼt #24:42 Thir to kitchen the breid; for thar wad be breid; thoʼ its no said; unless the breid itsel was caʼd “hinny‐kaim;” bein bannocks stampʼd wiʼ a hinny‐kaim paittern — as is aften, eʼen at this day, seen (and sae caʼd) in Syria.speldrin, and oʼ a hinny‐kaim.
43And, raxin oot afore them, he did eat.
44And he said to them, “Thir are the words I spak tʼye, bein yet wiʼ ye; that they maun needs be fulfilled — aʼ things putten‐doon iʼ the law oʼ Moses, and the Prophets, and Psalms, anent me.”
45Than garʼt he their minds open, that they soud comprehend the Scripturs:
46And said to them, “Sae is it putten doon, and sae it behovʼd the Messiah to dee, and to rise frae the deid on the third day.
47“And that repentance and the pittin awa oʼ sins soud be proclaimed in his name till aʼ nations; beginnin at Jerusalem.
48“Ye are witnesses oʼ thir things.
49“And lo! I send oot the promise oʼ my Faither upon ye; but bide ye iʼ the citie, till ye be cleedit wiʼ pooer frae Aboon!”
50And he led them oot, the lenth oʼ Bethanie; and, haudin up his hauns, he blessʼd them.
51And it cam aboot, that eʼen while he was blessin them, he pairtit frae them, and was taʼen up to Heeven.
52And they paid worship to him; and gaed back till Jerusalem, wiʼ mickle joy;
53And war aye iʼ the Temple, laudin and blessin God.
موجودہ انتخاب:
Luke 24: SCO1904
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Translated by Rev William Wye Smith. Published in Paisley, Scotland in 1904.