मत्ती 11
11
येसुतेङ् बप्तीस्मा पीन्बे युहन्ना
(लुका ७:१८-३५)
1येसुचे र्हङ्की चुङ्ङ्य्ही डबमात चु तम्मा लोप्जेत्प बीसेम् हुजु ग्लाकी रेइ-रेइकी ज्यीद सहर्मारी म्हीमात लोप्पतेङ् प्रचार स्य्हेङ्बरी स्येजेत्ज्यी।
2बप्तीस्मा पीन्बे युहन्नाचे थे जेल्न्हङ् मुबे बेलोरी मुक्ती न्हङ्बे ख्रीस्ट्चे स्य्हेङ्जेत्पे लक्माकी बारेरी थ्येःज्यी। होत्तज्यीम् युहन्नाचे थेइ डेत्-डेत् डबमात, 3चु तम् ङ्योत्परी येसुज पीत्ज्यी, “ब्योन्खजेत्स्येकी मुक्ती न्हङ्बे ख्रीस्ट् थेङ्नो य्हीन्ब, वुइ ङ्यीमाचे ल्हो-ल्होत ब्रेन्थोब?” 4येसुचे थेङ्यीमात सुङ्ज्यी, “एङ्यीमाचे थ्येःबतेङ् म्रङ्बे तम्मा ङ्यीज्यीम् युहन्नात स्येतो, 5कनमाचे म्रङ्ब, खोरमा ब्रब खम्ब, पुन् स्यप्पलमा फेन्बल मुब, न्हादीङ्माचे थ्येःब, स्यीबलमा सोब, ओसेम् प्रङ्नमात ज्यबे सम्तर् स्येत्टीब मुब। 6ङत बीस्वास् स्य्हेङ्ब अपीत्पलमा मोलम् यङ्बलमा य्हीन्ब।”
7युहन्नाइ डबमा य्हर्ब बीसेम् येसुचे म्हीमात युहन्नाइ बारेरी सुङ्ब तीप्ज्यी, “एङ्यीमा उजाड-ग्लारी ता च्याबरी ङ्यीज्यी? लाबचे य्होङ्टीबे म दोङ्बोत च्याबरी? 8एङ्यीमा ता च्याबरी ङ्यीज्यी? ज्यब-ज्यबे येन् येन्बे म्हीत च्याबरी य्हीन्ब? ज्यब-ज्यब येन् येन्बे म्हीम् ग्यल्बोइ दर्बार्मारी टीब। 9ङत पङो, देमेन्नो एङ्यीमा ता च्याबरी डोङ्ज्यी? ता अगम्बक्तत च्याबरी? य्हीन्ब, ङ एङ्यीमात देमेन्नो पङ्ब, ओसेम् एङ्यीमाचे अगम्बक्त बीमएनो ङ्हच्छ्यङ् गीःत म्रङ्बल मुब। 10तलेपङ्सम् धर्मइ छ्येःरी पर्मेस्वर्चे युहन्नाइ बारेरी चोले सुङ्बल मुब-
‘च्यागो, ङ एइ ङोन्-ङोन् ङइ चवत पीत्स्ये मुब,
ओसेम् थेचे एइ ग्यम् तयार स्य्हेङ्स्ये मुब।’#११:१० मलाकी ३:१
11“देमेन्नो ङ एङ्यीमात पङ्ब, बप्तीस्मा पीन्बे युहन्ना बीम ङ्हच्छ्यङ् म्ही न्हबल अरे। होलेतलेनो स्वर्गइ य्हुल्री खल जम्मा न्हङ्री ज्यीद मुब, थे युहन्ना बीमएनो ङ्हच्छ्यङ् य्हीन्ब। 12बप्तीस्मा पीन्बे युहन्नाचे प्रचार स्य्हेङ्बे बेलो य्हङ्से देरे सम्म स्वर्गइ य्हुल् झेन् य्हक्को तबोर्टीबल मुब। ओसेम् बीरोद् स्य्हेङ्बलमाम् हुजुइ बीरुद्दरी छेत्टीब। 13बप्तीस्मा पीन्बे युहन्नाइ बेलो सम्म मोसाचे ब्रीबे पर्मेस्वर्की नीयम्तेङ् जम्मा अगम्बक्तमाचे स्वर्गइ य्हुल्की बारेरी अगम्बानी पङ्बल मुबल। 14ओसेम् एङ्यीमाचे ङत बीस्वास् स्य्हेङ्बे सेम् लबनो पङ्सम्, थेङ्यीमाचे खस्ये मुब पङ्बे एलीया युहन्नानो य्हीन्ब। 15खल्ल थ्येःबे न्हबीङ् मुब हुजुचे थ्येःखइ!
16“चु पुस्ताइ म्हीमात ङ तातेङ् व्हब? थेङ्यीमा बजार्री क्लङ्ज्यीम् टीबे कोलमा र्हङ्ब य्हीन्ब, ओसेम् ल्हो-ल्हो र्होमात ङ्होत्ज्यीम् पङ्ब-
17‘ङ्यीमाचे एङ्यीमाकी लागीरी पुली र्हब्ज्यी,
तर एङ्यीमा अस्य,
ओसेम् ङ्यीमाचे एङ्यीमाकी लागीरी दुखइ व्हइ कोज्यी, तर एङ्यीमा अक्रा।’
18“तलेपङ्सम् युहन्ना चब थुङ्ब लज्यीम् अख, ओसेम् एङ्यीमाचे पङ्ब, ‘थेत म्हङ् स्यप्पल मुब।’ 19ओसेम् म्हीइ ज चब थुङ्ब लज्यीम् खज्यी, ओसेम् एङ्यीमाचे पङ्ब, ‘च्यागो चु म्हीत! थेचे य्हक्को चब थुङ्ब स्य्हेङ्ब, ओसेम् तीरो दुत्पे म्हीमातेङ् पापीमाकी र्हो’ बी पङ्ब। तर बुद्दीत थेइ लक्मा ग्यम्सेनो ठीक् ङोन्ब।”
बीस्वास् अस्य्हेङ्बे सहर्मा
(लुका १०:१३-१५)
20हुजु लीप्चे येसुचे खजु-खजु ज्यीद सहर्मारी य्हक्को तेङेन्की लक्मा स्य्हेङ्जेत्ज्यी, हुजु सहर्माकी म्हीमात धीक्कर्तीजेत्ज्यी। तलेपङ्सम् थेङ्यीमाचे र्हङ्-र्हङ्की पापमा ग्यम्स्ये पस्चताप अस्य्हेङ्। 21थेङ्चे सुङ्ज्यी, “खोराजीनतेङ् बेथसेदाकी म्हीमा, एङ्यीमात धीक्कार! एङ्यीमाकी गुङ्री स्य्हेङ्बे तेङेन्की लक्मा टुरोसतेङ् सीदोन सहर्री स्य्हेङ्बल य्हीन्सम् हुजु ग्लाकी म्हीमाचे थेङ्यीमाकी पापमा ग्यम्से य्हक्को ङोन्नो गल्द य्हुर्ज्यीम् ओसेम् मेफ्र स्य्हल्ज्यीम् पस्चताप स्य्हेङ्स्ये मुबल। 22तर ङ एङ्यीमात पङ्ब, न्यायकी दीन्री एङ्यीमाल बीमम् टुरोसतेङ् सीदोन्की म्हीमाकी सजाय नाब खम्बल तस्ये मुब।
23“ओसेम् कफर्नहुम्की म्हीमा, एङ्यीमा स्वर्गरी दोःब बी म्हेन्ब? एङ्यीमा नर्करी ख्लास्ये मुब। तलेपङ्सम् एङ्यीमात ङोन्ब र्हङ्बे तेङेन्की लक्मा सदोमरीएनो ङोन्बल पङ्सम् सदोम सहर् तीङ्यी सम्मनो टीस्येल। 24तर ङ एङ्यीमात पङ्ब, न्यायकी दीन्री एङ्यीमाल बीमम् सदोम सहर्की म्हीमाकी सजाय नाब खम्बल तस्ये मुब।”
दुःबलमाचे येसुरी दुःब न्हम्यङ्ब
(लुका १०:२१-२२)
25हुजु बेलोरी येसुचे चोले प्रार्थना स्य्हेङ्ज्यी, “अप, स्वर्गतेङ् जम्बुलीङ्की प्रभु, ङ थेङ्त व्होर्छ्ये पीन्ब, तलेपङ्सम् बुद्दी मुबे म्हीमातेङ् स्येःब खेःबे म्हीमा ग्यम्से छुम्ज्यीम् थेन्जेत्पे तम् ज्यीद कोलमा र्हङ्बे ङ्यीमात गोनलजेत्ज्यी। 26अप, थेङ्त चोलेनो स्य्हेङ्बे थुः तज्यी।
27“ङइ अपचे जम्मा स्हेमा ङत सोप्तीजेत्पल मुब। अपचे बीम खल्चेएनो जत अस्ये, ओसेम् जचे बीम खल्चेएनो अपत अस्ये, तर जचे अपत स्येनलपीन्बे म्हीमाचे अपत स्येःब।
28“ल्हीबे दोत्चे प्लेबलमातेङ् दुःबलमा जम्मनो ङइज खोउ, ङ एङ्यीमात दुःब न्हपुङ्स्ये मुब। 29ङइ कुम् नागो, ओसेम् ङ ग्यम्से लोपो, तलेपङ्सम् ङइ सेम् नम्रतेङ् दयचे प्लीङ्बल मुब। ओसेम् एङ्यीमाचे र्हङ्की आत्मारी दुःब न्हम्यङ्स्ये मुब। 30ङइ कुम् देबल मुब, ओसेम् ङइ दोत् यङ्ज मुब।”
موجودہ انتخاب:
मत्ती 11: WTDG
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2024 (Active), Wycliffe Bible Translators, Inc. All rights reserved.