MATAYO 5
5
1Kugbo Yesu laga amedra mongoyo ti ŋutulu kilo‚ lepe druga kiyadru i mere ki yu‚ druga gbi’diki ka‚ ’bo lotodiniki ti lepe kilo druga pondra ku lepeni. 2Lepe druga sulukindra togo’yu na ko‚ druga kulia adi: 3“Koŋo na’buna ina i ŋutulu laga a lemerika i yukala kilo‚ igbonaga tumata na ’dikona a nasiko ina. 4“Koŋo na’buna ina i ŋutulu lo gbigbiye kilo‚ igbonaga ko iririondru suka na teiliko ina. 5“Koŋo na’buna ina i ŋutulu laga a mukulia kilo‚ igbonaga ko i’de’deba ina ka de a luma kase ina. 6“Koŋo na’buna ina i ŋutulu laga ku kure koru ku kulia ti logbiye lo’bulo kine kilo‚ igbonaga ko iyiyimo ina. 7“Koŋo na’buna ina i ŋutulu laga ku ediyo kilo‚ igbonaga ko iririondru ediyona. 8“Koŋo na’buna ina i ŋutulu laga ku teiliko a lokiye kilo‚ igbonaga ko imemedra Ŋun ina. 9“Koŋo na’buna ina i ŋutulu laga lo ruruzu teiliko kilo‚ igbonaga ko iluluŋu a ŋazi ti Ŋun ina. 10“Koŋo na’buna ina i ŋutulu laga lo riozu wowonye ku kulia ti logbiye lo’bulo kine kilo‚ igbonaga tumata na ’dikona igbo’da a nasiko ina. 11“Koŋo na’buna ina kasuni‚ kugbo ŋutu kilo ’dadru ta, kugbo wowondru ta‚ kugbo kulia ku kuliata naro giri kasu ’berini ku to’bure ku kulia kuwe kine. 12Nyolanita nyola‚ sakanita ku nyola koru, igbonaga ropeta kasu kilo a drumala i ’diko yu ina‚ ’bo ko kazu awowondru kakeyo laga kasu koŋo yu kilo de. 13“Ta a ’bala na ina ka de. ’Bo kelei ŋanilo kuwa alupodru‚ ma kelei lo lepelo ŋiyu ku inyo ya? Ani romoki yakiya ’do‚ lepe gbo’di i’bukozi kaŋo‚ iriorio ka ka mukuzi ti ŋutulu. 14“Ta a parara na ina ka de. Kezi na ’duko i mere kina ani mugo mugu tro. 15Ŋutulu kilo ani mokakindra kima i mugo na lepe ku turu’be, ’bo ko i’delakindra lepe i lororo ki‚ ma tala ŋanina ku tikindra ŋutulu giri laga kadini kilo parara. 16Kuwade parara nasuna ti kobi kobu ku ŋutulu i konyeni, ma ko bongi konesi kasu na’bu kine‚ ma purani Monye lasu laga i ’diko yulo. 17“Ku yoyota adi na apondra i tatuza na kukuzuna, kugbo kulia ti kakeyo kine. Na agbo’da pondra i tatuzani, ’bo i torumokindro na kulia. 18’Bo na takindra ta a ’diri‚ ’dikona ku kana ilelenga‚ ’bo nukuta lotri gele kugbo gbetita gele na kukuzuna aka lengani, ti kuliata giri aku torumokindro ’beri. 19Kuwade kugbo le’de ŋutu laga akokorozu kukuzu ne’de ’baziŋadroo gele lo togo’yu ŋutulu de ’do ilo‚ lepe iluluŋu a ŋutu laga iloŋadroo i tumata na ’dikona kata yu‚ ’bo kugbo ŋutu lo kondra kukuzuki kine, lo togo’yu ko itro ilo‚ lepe iluluŋu a druma i tumata na ’dikona kata yu. 20Bo na takindra ta, kugbo logbiye lasu lo’bulo laga aku langu logbiye lo’bu lo katogolo ti kukuzuna ku lo Farisayo kilolo tro‚ ta aka lubo i tumata na’dikona kata yuni. 21“Ta ayinga atayi ku ŋutulu ti ’bero kiloni adi‚ ‘Ku reremita ŋutu. Karemonilo nyelo iŋeŋeraki kulia.’ 22’Bo na takindra ta‚ kugbo ŋutulo aŋoma ku luŋase lonye‚ lepe ilo iŋeŋeraki kulia. Ŋutu lo ’dadru luŋase lonye‚ lepe ilo iŋeŋeraki kulia ku kayolo ti kuliata kilo i koŋoni. Kugbo ŋutu lo kulia adi‚ ‘Do mamali‚’ lepe iŋeŋeraki kulia i kima naga a noketa nu. 23Kuwade kugbo do autu i piri naga a ’i’ileta nu i tikindra na Ŋun ’doke lolu‚ ’bo ku do yo’yu adi luŋase lolulo gbo ku kulia konuni‚ 24koloki ’doke lolulo i piri naga a ’i’ileta nu i koŋo yu‚ uti ku leŋe ŋalapa naga i dridriŋi nasu seku luŋosuna a nze‚ mo do buloni yito ku tikindra ’doke lolulo kuru. 25Nyareta nya ’beri seku katurani lolulo inga ti ta kilo i kiko‚ kuwade katurani ŋanilo ka’bi ku tikindra do ku kaŋerani lo kulialo yu‚ kaŋeranilo ka’bi ku tikindra do ku katiyunilo i keni‚ ka’bi do ku zoŋa i kadi naga a drodrorena kata yu. 26Na takindra do a ’diri‚ do aka lupundro yu deni ti inga do aku roba limbi na sentetana. 27“Ta ayinga atayi adi, ‘Ku kokonu towute.’ 28’Bo na takindra ta‚ ŋutu lo medra noka ne’de ku konye lopi‚ ŋutu ŋanilo akondra towute ku lepe kanye teilini. 29Kugbo koyita lolu lo lutatelo tikindra do bayi‚ ku’dutu lepe‚ gupara lepe kaŋo‚ igbonaga troru teliki dridriŋi nonu na mugu ne’de gele alangu mugu nonuna giri i biriŋozi i kima naga a noketa nu. 30Kugbo keni lolu lo lutatelo tikindra do bayi‚ ’duŋoro lepe‚ gupara kaŋo‚ igbonaga troru teliki dridriŋi nonu na mugu ne’de gele alangu mugu nonuna giri i utu i kima naga a noketa nu. 31“Akulianiki ’do adi‚ ‘Kugbo ŋutu laga lo rikokindro noka nanye‚ ti lepe tiki waraga naga na rikokini lepena.’ 32’Bo na takindra ta‚ ŋutu laga lo rikokindro noka nanye‚ kugbo lepe ani gbo’da a ŋutu naga ku konye lopi ’bero‚ lepe atikindra lepe gbo a ŋutu naga na towute. ’Bo ŋutu gele gele lo ’dumadru noka naga lale lo lepelo ma rikokindrina‚ ŋutu ŋanilo akondra towute. 33“Ta ayinga atayi ku ŋutulu ti ’bero kiloni ’do adi‚ ‘Ku nyonyo milio a ’busa‚ ’bo torumoki milio nonuna ku Mataloni.’ 34’Bo na takindra ta‚ Ku nyonyota milio gele tro. Ku kokonguta ku kari ti ’diko kine‚ igbonaga ina de a si’de na Ŋun ina‚ 35kugbo ku kari ti ina ka de kine‚ igbonaga lepe a piri naga ma lepe ’delakindri mukuzi kanye kilona‚ kugbo ku kari ti Yerusalema kine‚ igbonaga ina de a kezi na Mata laga a druma ina. 36Ku nyonyo milio ku kuwe nonu‚ igbonaga do ani romoki lopugo kopure lo kuwe gele tro kuwa a lokpe‚ kuwa a loruwo. 37’bo kulianita de‚ ‘Iye, iye,’ kugbo ‘ ’Bayi‚ ’bayi‚’ igbonaga kulia ku’de kine ŋiyu ku ŋutu lorolo ina. 38“Ta ayinga atayi adi‚ ‘Koyitalo iropa ku koyita‚ keleilo iropa ku kelei.’ 39’Bo na takindra ta‚ Ku momorota ku ŋutu loro‚ ’bo kugbo ŋutu laga anangu do i ŋebi lolu lo lutatelo‚ yoŋaki lepe le’delo itro. 40Kugbo ŋutu lo nyadru zonga na do i piri na ŋerani kulia nu i ’dumadru na bongo nonu na kidona‚ tiki lepe bongo nonu naga na kaŋona itro. 41Kugbo le’de ŋutu laga ari’diyadru do i woro kilomita gele seku nye i kiko‚ utita seku lepe kilomitazi mure. 42Tiki ŋutu lo magu kapatio konunilo, ku reredra ŋutu lo magu morilo. 43“Ta ayinga atayi adi‚ ‘Nyare marate lolulo‚ ’bo ŋmone miriku lolulo.’ 44’Bo na takindra ta‚ Nyareta nya mero kasu kilo‚ maketa Ŋun ku ŋutulu lo wowondru ta kilo. 45Kuwade ta igbo’da a ŋazi ti Monye laga i ’diko yulo‚ ’bo lepe tikindra kolo nanyena i sa’yu i ŋutulu loro ki ku ŋutulu lo’bu kilo itro‚ sunyundro kudulo i ŋutulu laga mŋgba kilo ku ŋutulu laga ani gbo’da mŋgba kilo itro. 46Kugbo ta nyadru ŋutulu lo nyadru ta kilo‚ ta iriozu rope lasulo a inyo? Kawuro ti mosoro kilo ani kondra de ya? 47Ku ta romu ku luŋaseri kasu kilo ’du‚ ta alangu ku’de kilo ŋutulu ku inyo ya? Monyazi kilo ani kondra de ya? 48Kuwade gbo’dita a lo’bu beti naga ma Monye lasu lo ’dikolo gbo’dini a lo’bu ina.
موجودہ انتخاب:
MATAYO 5: KNT77
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Kakwa New Testament © Bible Society of Uganda, 1974, 1977.