ดอ โฆว 9
9
ลอง เฌาพรา ดัว กาดีก ซัดฌา ดี อาโนว
1เฌาพรา แฮะ ฮอต คราม แคง น็อห อัน ปาย ตี อัน วี ม็องการา ดัว ดี อาโนว เฆ ฆอน อีมาย อัน. อัน ต็อห, “แตห เบ แบร, แตห เบ กืน, แตห อาโมยว เบ กอ โนะ แดง กาดาย. 2เฆ โดว ซัดดาวา อี กอย แดง กาดาย, บอ มาซีม อี กอย แคง เบลณ บอ มาฆา อี กอย แคง อึม, เฆ บอกาเฆลียด โลว โยว เบ ดูอี. โอว แฮะ แตห เบ อึบ เฆ. 3เบ ปึอน โฮม โดว ซัดดาวา อี อีม, อี ปึอน ฮาว ดอน โมยว. โอว ดัว โตต ดี เบ, แตห เบ โฮม, แตห อึณ ปี เบ ดึอม โฮม เดา อี ลัต แบน โมยว แบน โมยว.
4เซ เบ ยี โฮม ยัง เฆ โดว ซัดดาวา, เบ โลว แตห หนาม อี กอย แคง โดว อัน เลห โตต ดี อาต. หนาม อัน ตี มูห อาซาก อี กอย แคง โดว โบ็ง. โคว, เบ ตู ปึอน โฮม. 5เซ อู วี ง็อห อาซาก อี, โอว ดี ดัม หมาบ ดี อัน. เซ โดว ซัดดาวา ง็อห อาซาก ดูอี, โอว ดี วี ดึห อาซาก โดว ซัด ตี.
6อาเซ ง็อห ยัม ดูอี, โอว ดี วี แตห ปอ อู วี วี ง็อห ยัม อัน. โคว, เฌาพรา แฮะ โบง ดูอี, แตห เฆ ปี เฌาพรา. อาว ปึอน ง็อห อาซาก เฆ.
7อี มูห เบ, เบ วี โลว แบร กืน แดง กาดาย แตห เบ กอ โนะ แดง กาดาย, แตห เบ บอ อึบ กาดาย.”
8เฌาพรา แฮะ ฮอต กาลาง โฆรห ตี, อัน วี ต็อห ดี อาโนว เฆ ฆอน อีมาย อัน, 9“โอว ดี ดัว กาดีก ซัดฌา ดี เบ. บอ เบ, บอ หลูกหลาน เบ, 10บอ เฆ โดว ซัดดาวา อี กอย รึม โดบ เบ บอกาเฆลียด, บอ มาซีม อี บึณ แคง เบลณ, บอ โดว ซัดดาวา อี กอย แดง กาดาย, เฆ ดอน โดว อี แฮะ เลห แคง รึร ซังโพว, โอว ดี ดัว กาดีก ซัดฌา ดี เฆ. 11โอว อาว ฮู แตห อึม ตาง ปูน กาดาย บอ ปยาต แวน โมยว อี มึห อาซาก ดอน โมยว. โอว ฮู แตห อึม ตาง ตัห ปูน ยัม โตต. บอ กาดาย บอ โมยว อี กอย แดง กาดาย, โอว ตู แตห อึณ วี ลึร ดอ เหมา.”
12แฮะ ฮอต เฌาพรา วี ต็อห, “โอว ดี วี ดัว ลักซานา ดี เบ, แตห เบ โหลห ลอง กาดีก ซัดฌา แปะ แฮะ ดัว โอว ดี เบ. บอ อี มึห พึอม ดอน โมยว, บอ เบ บอ หลูกหลาน เบ ดอน ฌึร ดอน ครึร, แตห เบ นับ ลอง กาดีก ซัดฌา ปี ดัว โอว ตี. 13โอว ดี เบลห คูนมาแยง แคง เบลณ. คูนมาแยง ตี แฮะ แบน ลักซานา ปี ดัว โอว ดี เบ. 14เซ โอว ดี แตห อึณอูะ กอย แคง เบลณ, วาย อัน ตี, เซ เบ วี ยึร คูนมาแยง กอย แคง เบลณ, 15โอว ดี โหลห กาดีก ซัดฌา ปี ดัว โอว ดี เบ, บอ ดี โมยว อี มึห พึอม ดอน โมยว. โอว แฮะ ดึอม ต็อห, ฆลาย ตู วี แบน อึม ตาง อี ดี ปูน ยัม โตต ดอน โมยว. 16เซ เบ ยึร คูนมาแยง แคง เบลณ, โอว ดี ยอด อัน. โอว ดี โหลห ปี ต็อห โอว ดี เบ ดอ ตี นี บอ ปี ดัว โอว กาดีก ซัดฌา ดี เฆ หลูกหลาน เบ, อี ดี กอย แดง กาดาย นี. โอว ดี โหลห ลอง อัน ตี เซเซ.”
17เฌาพรา ต็อห ดี อาโนว, “คูนมาแยง ตี มูห ลักซานา ปี ดัว โอว ดี เบ. บอ เบ บอ เฆ อี มึห อาซาก ดอน โมยว, แตห เบ โหลห เซเซ.”
ลอง เฆ ฆอน อาโนว
18เฆ ฆอน อีมาย อาโนว ตึอน, เฆ อี เลห แคง รึร ซังโพว ตาง ตึอน, เฆ จืร อาเซม, อาฮาม บอ อายาเพด. อาฮาม ยี มูห ฆูณ อากานัณ. 19ดูอี ดอน อี อี กอย แดง กาดาย นี, เฆ ดอน อี มูห หลูกหลาน อี ตัห ดี โอย วี ตี.
20อาโนว ตึอน ยี โบง นา, โบง มาน. วาย แฮะ เลห แคง รึร ตึอน, อัน วี ซัม เฮ มางูน ดี มาน อัน. 21อัน บอ เดียง อึม มางูน, แตห อัน กอ ยึต. อัน วี ฮาว อีด แคง ทึบ บีก อัน, ตู ชึบ ครึง อัน. 22อึณ ยี มูห อาฮาม, ฆูณ อากานัณ, อัน บอ ยึร ฆูณ อัน อีด ปาย ตี. อัน วี ฮาว กาลาง ดี อีกัด อัน. 23อาเซม ฆาย อายาเพด วี ดึห ครึง ฆูณ ฆาย, เบลห ดี ยัะ ฆาย, วี ทืด วีว นา ปัน ดอ ลึบ ฆาย แคง ทึบ บีก, แกวะ แตห ฆาย ยึร ฆูณ ฆาย แฮะ ฆลัะ, แตห ฆาย กาบีด โดว อัน.
24วาย อัน ตี ดา อาโนว วี อึณซึห อาว ฮู ยึต. อัน บอ นับ มาเซ ปี โบง ฆอน วี เตียะ ดี อัน. 25อัน มืร ต็อห,
“โอว ดืง อากานัณ ตึอน อี มูห ฆอน อาฮาม. อีกัด อัน ดี วี จัร อัน, แตห อัน แบน หมาย เฆ.”
26แฮะ ฮอต อาโนว วี ต็อห, “โอว อืบ เฌาพรา อี มูห เฌาพรา ปี กรึบ อาเซม. อากานัณ ยี แบน หมาย อัน.
27เฌาพรา มืร แตห อายาเพด มึห มาน มืง กืน, แตห อัน บอ กอย แคง ทึบ บีก อีกัด อัน อี จืร อาเซม. แตห อากานัณ ยี แบน หมาย อัน.”
28วาย อึม ตาง ตึอน แฮะ ฮอต ปูน กาดาย, อาโนว ตึอน วี กอย ปอ โอย มาย็อห ดี พัน ฆึร ซีนัม.
29อาซาก อาโนว ตึอน ยี โนะ ดีม มาย็อห ดี พัน ฆึร ซีนัม. แฮะ ฮอต อัน บอ ยัม.
موجودہ انتخاب:
ดอ โฆว 9: pce
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2021, Wycliffe Bible Translator, Inc. All rights reserved.