Wikhikən 5
5
1Nit kis kisitpihak yohtəl kikwseyal wikwhəpaltineyapən Leswihso ikək, Sesohs əlitkwakwehepən Selosalemk.
2Nit Selosalemk pekotepeyakek ew kwihiw əsipikhakənehtikənək liwiswiw Leswihsowatowemək, Petesta, (Ktəmakel kewihkwam,) nanənol tohsanəl.
3Ktanakwsoponik elakwehcik ksinokewinowək yohtəl tohsanəl, nkapoltopənik, askasoltowək, tanik nepowikpənil opitinowal okatowal, otət laskowahtoniyapən, matpekehtaso samakwan.
4Ipəcəl asel pənehkwesopən kinowiw cowahpesopən pekotepeyakek matpekehtonepən samakwan. Nit tehc tan wen təmk cewpesitpən kisi matpekehtasik samakwan, nət kikəhotpən tan kekwse kesinokatpən.
5Oskitapi ewpənak nit tet tanek kesinokatpənak nsinsk kesikətən cel okəmolcin.
6Sesohs nəmiyat otləssinlin, kəcicihal otəleyilin nit kispihce, 'tiyal Kolitəhatəmən kikəhoken?
7Tan kesinokat 'tasitemal: Skaməm kətama wen ntewaw ncopehləkon pekotepeyakek tan toci samakwan matpekehtahsik kenok kweni lihayitəmk kətək nikani cowahpeso.
8Sesohs 'tiyal: Onakes, onakeht kohot, pəmohsen!
9Nəkəsayw skitap olewo, onaketon okohot pəmohseh. Nit kiskət atəlahsimowikiskwək.
10Nit tehc Leswihsək 'tiyawal: Atəlahsimowikiskwək yot: skat kocikiseltəmeyewən əlkitəmowakənək kpəmipton kohot.
11Oskitap 'tiya: Nekəm tan kihkihit nticəkw, Onakeht kohot, pəmohsen.
12Nit tehc papehcimatit: Wen iya nət oskitap tan yəhosk, Onakeht kohot pəmohsen?
13Kenok tan kikohot skat okəcicihawiyəl tan wenil: Ipəcəl Sesohs semasopən, ipəcəl kətanak wsopənik ewoltitpənik nit tet.
14Akimte Sesohs otətlimskowal kci himiyewikwamək, 'tiyal: Sakiht kikəhok; mosak milkəmiksohkəc apc: skat acimətowe yinokic ikahak khəkek.
15Oskitap macehe 'tiya Leswihs Sesohs nət tan kikəhatpən.
16Nit tehc Leswihsək otəplomawal Sesohsəl, otəkwecinepahawal, ipəcəl yohtəl elokecil atəlahsimowikiskwək.
17Kenok Sesohs otəliyasitema: Nmihtakws pemloket maləməte təkec nil ntəlok.
18Nit tehc Leswihsək piyemikwehci nepahawal, ipəcəl skat tepəkt osəkwə skehtowən atəlahsimowikiskwək, kenok mac apc itəmopən Kelowəsitəl Mihtakwsəl, lecləsopən otetpawotiniya Kelowəsitəl.
19Nit tehc otəliyasitema: Leyo, tan yəholek, Kelowəsit 'Kwəssəl skatək kekw kisi ənkotokalehtakewo; tepəkt nəmiyat Mihtakwsəl elehtakelit ipəcəl tanil Kelowəsit elehtaket, nihtəl iyaka 'Kwəssəl təhalo elilehtakelicil.
20Kelowəsit omosalal 'Kwəssəl, otəkehkimanəl msiw kekwseyal tanil elehtaket. Oməsowehtowanəlc ecinəkəmkikonol skatək yohtəl, welaman kohciyasəkitəha soltiniyac.
21Ipəcəl tahalo Mihtakwsit Kelowəsit apaciphat npowino pəmawsowetahsit, nit peskon 'Kwəssəl pəmawsowetahsicil tan eliyolitəhatək.
22'Ciw Mihtakwsit Kelowəsit skat otəplomawiyəl wenil, kenok msiw tplotəmowakən omihtan 'Kwəssəl.
23Welaman msiw wenik okici təmitəhamawal Kelowəsit 'Kwəssəl tahalo elikici təhamatit Mihtakwsitəl. Tan wət skat kicitemi təhamakw Kelowəsit 'Kwəssəl skat nekəm okici təmitəhamawiyəl Kelowəsitəl tanil petəkimitpənil.
24Leyo, yoholekw, tan wen notək nkəlosowakən, welamsətək ohəkek tan pətəkimitpən, otiyin askəmawsowakən, skatəc ikehew wənmacitplotəmowakən ikək; kenok okisiwcinotehe npowakənək akimte, pəmawsowakənək.
25Leyo, yoholekw, tepənaskowihak kəti ikehe, tan toci, npowinowək onotəmotiniyac Kelowəsit 'Kwəssəl okəlosowakən; tanik onotəmotiniyac pəmawsoltowəkc.
26Ipəcəl tahalo Mihtakwsit Kelowəsit eyit pəmawsowakən ohəkek, nit elimilat 'Kwəssəl otipilin pəmawsowakən ohəkek.
27Omilanepən peltəmowakən otəplotəməlin, ipəcəl nekəm pəmawsowin 'Kwəssəl.
28Mosahk asəksətəmokekw yohtəl. Ipəcəl tepənaskowihak ikehe tan toci msiw wenik tanik ewolticik poskənikən alkw ikək onotəmotiniyac okəlosowakən;
29Oci moskapasowəkc, tanik kisi wəlehtakhətitpənik, pəmawsowakən apicipemkewe ikək; tanik patawek asoltitpənik, wənmacitplotəmowakəne apicipemkewe ikək.
30Skat kekw nkisinkwotokətomo. Tan elinotəm nit elitpəlotəm; ntəplotəmowakən kiyakwihe. Ipəcəl skat nkwilowahtowan nil nolitəhatəmowakən; kenok nkwilowahtowan Mihtakwsit Kelowəsit olitahatəmowakən tan petəkimitpən.
31Nspiwolamewsiyan nəspiw wəlamewakən skat əwihew.
32Kətək iyo tan nespiwəlamewit, naka nkəcicihton onəspiw wəlamewakən əlihe, tan elinspiwolamewit.
33Kilowaw ktəlkikesiniyahpən Sapatisk, nekəm linspiwolameyapən olamewakənək.
34Kenok nil skat nociwikwehtowən nspiwolamawakən pəmawsowinow ikək. Kenok yohtəl kekwseyal itəmanil welaman kohci kikatcəniyap.
35Nekəm (Sapatis) pəsakwhepən təlamkəlepən ksahtowepən, kilowaw kolitəhatəm əniyapən mahkiyew kolitəhasoltiniya opəshakwhekəm ikək.
36Kenok piyemi nəkəmkikwon nspiwolamewakə ntin skatək Sapatis onəspiw olamewakən; ipəcəl lohkewakənəl tanil Nmihtakws militpənil nkisehton, yohtəl lohkewakənəl tanil elokiyanil, nəspiw wəlamewokonəl, Nmihtakws npetəkimkon.
37Nmihtakws tan petəkimitpən nkispiwolamewokopən. Kilowaw skat knotəmowəniyawihpən eltakwsit, kesəna skat knəmiyawiwahpən tan elikit.
38Okəlosowakənəl skat əktimowawoniya mecimtewi khəkewikowak. Ipəcəl tanil petəkimatpənil, skat kolamsətowawiwa.
39Wəlipapehkisakitək Kelowəsiteweyal Awikhasikil, ipəcil ktəlitəhasoltipa nit tet ktihiniya askəmawsowakən, yohtəl nihtəl wecinspiwəlamewikil nil.
40Skat kolitəhatəmoniyawihpən kockowihihiniya nil, ktihiniyap pəmawsowakən.
41Skat nocimsənəmowən kicitəmitəham kosowakən pəmawsowinow ikək.
42Kenok kəciciholpa skat ktiyoltiyoniya Kelowəsit okəseləmoksowakən khəkewikowak.
43Npəkəci Nmihtakws wisowənək, skat kwikwehlipahkwopən. Apc kətək pəkəciyat nekəm ta wisowənək, kowikwehlawac nekəm.
44Tan ktili kisi olamsətəmotiniya? Kilowaw kəməsənəmawtoltiniya kci təmitəham kosowakən, skat kilowahtoniya nit, kci təmitəhamkosowakən tan wecihat tepəkt Kelowəsitow ikək.
45Mosahk litəhasoltikekw kməsimləpac Nmihtakwsək. Ew tan wen mesiməlakw nət Mowis, tan ohəkek. Elitəhasoltiyekw.
46Ipəcəl olamsətowekw Mowis, kolamsətowipahpənp nil. Ipəcəl Mowis ociwikhikepən oci nil nhək.
47Kenok skat wəlamsətəmowekw elowikhiketpən nekəm, tanəc ktəliyolamsətəməniya nil nkəlosowakənəl?
موجودہ انتخاب:
Wikhikən 5: PQM2014
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Maliseet Gospel of John © Canadian Bible Society, 2014