Mǒhtûlû̌hǎhtûsa 12
12
Cǒmara tûjû̌pwa̤ kaǎ hǎhtò̌cû̌kè Khûabra dǒ Khanagǎ
1Cǒmara tûjû̌pwa̤ hî̌ Khûabra kû̌, “Bè̌kè nashinagǎ, nakhlinalè kû̌ napha ahǐphû̌phòphû̌ tokhlǒ dě hǎhtò̌cû̌ mò̌ dǒ shigǎ dǒ he gǔ dǔlè̌lṳ̌ bǎ na pě nutôgǎ nî̌.#Pwa̤nophû̌ 7:2-3; Hebrǔ 11:8
2He gǔ no htûhtò̌ na kû̌ khlilè dû̌ tôcǒ pě
dě he ǐshowî̤ na pě,
he no lṳ̌shilṳ̌gǎ nami̤ pě
dě na htû bǎ ta̤ǐshowî̤ tôcǒ dǒ kòyòya pě.
3He ǐshowî̤ kòyò dǒ a ǐshowî̤ na nutokhlǒ pě.
He ǐsho kòyò dǒ a ǐsho na nutokhlǒ pě.
Htodě kòyò ô̌ dǒ hǎkhû̌ nutokhlǒnu lǒ̤bò nî̌,
he ǐshowî̤ tṳtṳ̌ asî kû̌ na pě.”#Galatǐ 3:8
4Dě Khûabra hǎhtò̌cû̌ mè̤̌caca pô̤̌ Cǒmara tûjû̌pwa̤ hî̌ lû̌ûnu, dě aphû̌dû̌ Khûlòtǎ gû̌ cû̌ lû̌û. Bǎ Khûabra ô̌ dǒ Wî̤̌hara dě a hǎhtò̌cû̌ akhanu aně ô̌ susô̌tishi kû̌ yè̤̌ně hǒ. 5Khûabra kaǎnǐ̤ ama Mǒ̤sarè̌, aphû̌dû̌ Khûlòtǎ, htodě a phî̌nṳ̌bò aruyî̌htaglǒ kû̌ ata̤phû̌ta̤wè̤ kû̌ jû̌ dǒ a nǐ̤bǎ bǎ Wî̤̌harakû nutokhlǒ, dě asî hǎhtò̌cû̌ lô̌khô dǒ Khanagǎ, dě a cû̌ tǒ̤ lô̌khô bǎnu.
6Khûabra kû̌ a kòyò tokhlǒ nṳ̌cû̌tûlû̌ Khanagǎ dě a cû̌tǒ̤ lô̌khô dǒ Wî̤̌shake, sǒmṳ̌dû̌ ô̌ bǎ Mûrè̌gǎ nutômṳ̌ a ô̌. Bǎnukha Khana khlilèphû̌ tokhlǒ ô̌ lô̌khô bǎ gǎkûnu. 7Bǎnukha Cǒmara tûjû̌pwa̤ ô̌lṳ̌htò̌ bǎ Khûabra dě a hî̌ lû̌û kû̌, “Gǎ nutôgǎ nî̌, he gǔ ǐ kû̌ naphû̌nali̤ pě,” htodě Khûabra tèhtò̌ bǎ Cǒmara tûjû̌pwa̤ dǒ a ô̌lṳ̌htò̌ bǎ lû̌û nutôpwa̤ aya ta̤lṳhtò̌wǎ̤ kû̌ lǒ̤ tôwǎ̤.#Pwa̤nophû̌ 7:5; Galatǐ 3:16
8Htodě a lò̤tòlò̤ dǒ gǎcôcǐ bǎ Wî̤̌betelǎ lṳmṳ̌htò̌ nutôkhô shô̌kla nudě a cû̌ma̤htò̌ lô̌khô ahǐphû̌ bǎ Wî̤̌betelǎ kû̌ Wî̤̌aǐ aplǎkûnu. Wî̤̌betelǎ dě a ô̌ dǒ alṳmṳ̌nṳ̌, Wî̤̌aǐ dě a ô̌ dǒ lṳmṳ̌htò̌ tôkhô. Dě a tèhtò̌ bǎ Cǒmara tûjû̌pwa̤ aya ta̤lṳhtò̌wǎ̤ kû̌ lǒ̤ bǎnu tôwǎ̤ dě a cabahtò̌ ǐ Cǒmara tûjû̌pwa̤ bǎnu. 9Dǒ anô̌nu a khlè̌cû̌ tôkû hto tôkû, dě a cû̌ô̌ tǒ̤dǒ Khanagǎ cǔtûmû tôkhô.
Khûabra cû̌ô̌ dǒ Ijî̌gǎ
10Bǎnuakha něgǎko dě gǎwǐ̤gǎko ô̌htò̌ shû̌sho jî̌jî̌ dǒ Khanagǎkû akhû̌akhî, Khûabra khlè̌lò̤ cû̌ô̌ kûmṳ̂̌ bǎ Ijî̌gǎ tòshò̌phû̌. 11Bǎ asî glè̌ nṳ̌tǒ̤ phǔ dǒ Ijî̌ gǎhtukû akhanu a hî̌ ama Mǒ̤sarè̌ kû̌, “Na mî̌ pwa̤mǒ̤ dǒ a mǒ̤wî̤tè̤̌sǐ tôpwa̤. 12Htû̌ Ijî̌phû̌ tokhlǒ kè̌shǐ na akha pěnu, asî gǔ hî̌ lô̌khô kû̌, ‘na mî̌ ama hǒ.’ Dě asî ma̤sikè he pě, dě a dǐ ô̌htûpwa̤ kè na pě. 13Khòsǎdô hî̌ ǐ nanǎ̤ kû̌ na mî̌ hepṳ̌pwa̤mǒ nî̌, na kè̌ hî̌ pô̤̌nu mî̌ asî ma̤mô̤ma̤wô̌shǔ he pě, dǒ nakhû̌nakhî dě asî gǔ dǐ ô̌htûpwa̤ he pěpě.”#Mǒhtûlû̌hǎhtûsa 20:2, 26:7
14Htodě bǎ asî cû̌nṳ̌ dǒ Ijî̌gǎkû akhanu, Ijî̌phû̌ tokhlǒ kè̌shǐ Mǒ̤sarè̌ kû̌ a mǒ̤wî̤tè̤̌sǐ lî. 15Dě Ijî̌gǎkhwǐ apwa̤ma̤ta̤phû̌ tokhlǒ kè̌shǐ Mǒ̤sarè̌ dě a hè htû̌sò̌ǐ Mǒ̤sarè̌ awe̤akè kû̌ khwǐ, dě khwǐ sǎyṳ lû̌û kû̌ ama dě a nocû̌ kaǎ lû̌û dǒ ahôkû. 16Dǒ Mǒ̤sarè̌ akhû̌akhî, khwǐ kaǎmô̤shǔ wô̌ mî̌ca Khûabra, htokhôtô̤̌ a ǐ dû̌wî̤ lû̌û sû̌phû̌ kû̌ pè̤̌, pṳ̂̌panǎ̤, mǐû̌lǎmǒ̤, mǐû̌lǎpha, jû̌pwa̤khû, jû̌pwa̤mǒ̤ kû̌ tîsî̌budû̌ tokhlǒ.
17Dě khwǐ phî̌ Mǒ̤sarè̌ akhû̌akhî, Cǒmara tûjû̌pwa̤ nolò̤ ta̤shasiwě̤ dǒ atirǐsò̌ mî̌ca tokhlǒ dǒ khwǐ kû̌ ashiphû̌gǎphû̌ tokhlǒ alô̤. 18Pô̤̌nukhû̌khî khwǐ kaǎ Khûabra dě a hî̌ lû̌û kû̌, “Na cû̌ ma̤tǒ̤ he pô̤̌o mî̌ ma̤titè? A mî̌ hema, na hî̌ he pô̤̌nu tô̤̌ ma̤titè? 19Na cû̌hî̌ tǒ̤ he kû̌ ‘a mî̌ hepṳ̌pwa̤mǒ pwǎ,’ dě na cû̌ no phî̌ tǒ̤ he kû̌ a ma̤titè? Hǒo mî̌ nama, kaǎge mò̌ dě hǎhtò̌cû̌kè lô̌khô.” 20Hǒtôplǎ dě khwǐ hî̌bǎhtò̌ akhôphijǎ tokhlǒ dě asî kaǎ Khûabra kû̌ ama htodě a no tô̤̌nṳ̌bò ata̤dû̌yò̤̌htò̌sa ata̤phû̌ta̤li̤ tokhlǒ dě a sûhǎhtò̌cû̌kè asî.
موجودہ انتخاب:
Mǒhtûlû̌hǎhtûsa 12: KXF
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in