Mǒhtûlû̌hǎhtûsa 17
17
Ta̤dǔsîlǐbě mî̌ ta̤wṳ̂̌dò ta̤ma̤mǎnǎ tôcǒ
1Bǎ PhaAbra ně ô̌ lǐ̤sô̌ tôshi kû̌ lǐ̤sô̌ tôně akhanu, Cǒmara tûjû̌pwa̤ ô̌lṳ̌htò̌ bǎ lû̌û dě a hî̌ lû̌û kû̌, “He mî̌ Cǒmara dǒ apô̤aphǎ#17:1 Hebrǔ yô̤̌ mî̌ “ělashôdè̌.” tôpwa̤. Ganǎ̤de heyô̤̌ dě ô̌htûpwa̤ ma̤tôma̤bǎ hesǎphlǒ pṳ̂̌꤮ taplǎ nî̌.#Mǒhtûlû̌hǎhtûsa 5:22 2He ma̤měma̤gle he ta̤wṳ̂̌dò kû̌ nanu pě, dě he no ô̌wô̤̌ô̌dû̌ htò̌pô̤̌ nakhlinalè pě.”#Hǎplǎge 2:24, 6:5; Cubucaba 26:42
3Pô̤̌nudě PhaAbra dô̌gînî̤ û̌lò̤ dě Cǒmaradû̌ hî̌ lû̌û kû̌, 4“He ma̤ ta̤wṳ̂̌dò yô̤̌sǎ kû̌ na pô̤̌o, he olò̤ kû̌ na htû kòyò khlilèphû̌ dû̌wî̤ apha pě.#Rṳ̂̌me̤ 4:17 5Kòyò kaǎ pe nami̤ kû̌ Abra tô̤̌, kòyò gǔ kaǎ khô̌ nami̤ kû̌ Abraha pě, (yô̤̌sǎyô̤̌mû mî̌ khlilèphû̌ dû̌wî̤ pṳ̂̌cǒ apha) ma̤titèhî̌dě he nohtûhtò̌ na kû̌ khlilèphû̌ dû̌wî̤ apha hǒ.#Rṳ̂̌me̤ 4:17 6He no ô̌wô̤̌ô̌dû̌htò̌ nakhlinalè tokhlǒ pě. He no ô̌htò̌ khlilèphû̌ tokhlǒ dǒ nakhlinalè akla pě, htokhôtô̤̌ khwǐ tokhlǒ glè̌ ô̌htò̌ dǒ nakhlinalè akla pě.#Matè̌ 1:1-6 7He sǎyṳ ma̤měma̤gle heta̤wṳ̂̌dò ayô̤̌sǎnu tûjû̌pwa̤ kû̌ na kû̌mî̌ nakhlinalè lò̤tutṳ̌ dǒ nô̌kò tokhlǒ tôhtu hto tôhtu. He glè̌ htû na Cǒmaradû̌ pě htokhôtô̤̌ he htû nakhli lò̤tutṳ̌ dǒ nô̌kò tokhlǒ a Cǒmaradû̌ pěpě.#Lǔka 1:55 8Khanagǎ tôgǎ lǒ̤bò dǒ na ô̌ ǐ a sô̌sô̌kû̌ shilǎ̤gǎkhlophû̌ tôpwa̤ khònò̤̌nu, he gǔ ǐlò̤ kû̌ na kû̌ nakhlinalè lò̤tutṳ̌ dǒ nô̌kò tokhlǒ tûjû̌pwa̤ pě dě he gǔ htû asî Cǒmaradû̌ pě.”#Dǒhtû̌ǐ 1:8; Pwa̤nophû̌ 7:5
9Cǒmaradû̌ hî̌ PhaAbraha kû̌, “Na dě, na bǎ pṳ̂̌mě he ta̤wṳ̂̌dò ayô̤̌sǎ kû̌ na hǒo, tǒ̤ na mè̤̌tô̤̌, nakhlinalè lò̤ dǒ nô̌kò tokhlǒ bǎ pṳ̂̌mě ta̤wṳ̂̌dò yô̤̌sǎ nupěpě. 10Ta̤wṳ̂̌dò dǒ na kû̌ nakhlinalè lò̤ dǒ nô̌kò tokhlǒ tôbǎ pṳ̂̌mětegle mî̌titè hî̌dě, sîkhlisîlè akla pwa̤khû tokhlǒnu, a tôbǎ dǔsîlǐbě pṳ̂̌꤮ tôpwa̤ pě.#Pwa̤nophû̌ 7:8; Rṳ̂̌me̤ 4:11 11Sî bǎ dǔsîlǐbě, dě ta̤dǔsîlǐbě numî̌ a dǔlè̌lṳ̌ kû̌ sî kû̌ he ta̤wṳ̂̌dò ta̤ma̤mǎnǎ tôcǒ hǒ.#Pwa̤nophû̌ 7:8; Rṳ̂̌me̤ 4:11 12Lǒ̤bò pwa̤khû dǒ sîkhlisîlè akla a lò̤tutṳ̌ tôhtu hto tôhtu tokhlǒnu, a kè̌ behtò̌ ni̤lǐ̤sô̌ hî̌dě a bǎ dǔsîlǐbě. Dě kòyò dǒ a ô̌phijǎlò̤ bǎ sîhǐdǒkû nutokhlǒ bǎbǎ, sîkhlilè mè̤̌tô̤̌ nutokhlǒ bǎbǎ, shilǎ̤gǎkhlophû̌ pwǎ bǎbǎ sî pwî̤ ge asî kû̌ ru pô̤̌ jû̌ nutokhlǒ bǎbǎ, asî bǎ dǔsîlǐ bò bě pṳ̂̌꤮ tôpwa̤.#Cubucaba 12:3; Lǔka 2:21 13Jû̌pwa̤khû dǒ a ô̌phijǎlò̤ dǒ sîhǐdǒkû tokhlǒnu bǎbǎ, sî pwî̤ge asî kû̌ ru nutokhlǒ bǎbǎ, kòyò bǎ dǔsîlǐ bò bǎ asîbě. Sî kè̌ ma̤ pô̤̌nudě he ta̤wṳ̂̌dò nî̌ a ma̤mǎnǎ dǒ sîphěsîyî̤̌lô̤ hǒ, dě a dǔlṳ̌htò̌ kû̌ ta̤wṳ̂̌dò nî̌ a ô̌měô̌gle tûjû̌pwa̤ hǒ. 14Pwa̤khû tôpwa̤pwa̤ dǒ a dǔsîlǐbě tô̤̌ nutokhlǒ mî̌ a ma̤pî̌kè heta̤wṳ̂̌dò akhû̌akhî bǎ phî̌hǎhtò̌kè ami̤ dǒ akhôkòyò akla.”
15Cǒmaradû̌ hî̌ PhaAbraha kû̌, “Nama Mǒ̤sarè̌ nudě, na bǎ kaǎ pe lû̌û kû̌ Mǒ̤sarè̌ tô̤̌, bǎ kaǎ khô̌ ami̤ kû̌ Mǒ̤sara pě. 16He ǐshowî̤ a pě dě a glè̌ phû̌ô̌lò̤nṳ̌ naya phû̌pwa̤khû tôpwa̤ pě. He ǐshowî̤ a pě akhû̌akhî, a glè̌ htû khlilèphû̌ tokhlǒ amǒ̤ pě, htokhôtô̤̌ khlilèphû̌ khwǐ tokhlǒ gǔ ô̌htò̌ bǎ akhlilò̤ aklanu pě.”
17PhaAbraha dô̌gînî̤ û̌lò̤ dě asǎyî̤̌ dě a hî̌lò̤ tûû̌ dǒ asǎphlǒkû kû̌, “Kòyò dǒ aně ô̌ kèhto tôya̤ hǒ tôpwa̤pwa̤ numî̌ a phû̌ô̌jò penô̌tô̤̌ yahî̌? Mǒ̤sara dě aně ô̌ lǐ̤sô̌tishi dě a cû̌ phû̌ô̌jò hî̌tè pěya?” 18Hǒtôplǎ dě PhaAbraha hî̌ Cǒmaradû̌ kû̌, “Khòsǎdô no nǐ̤bǎdô̌ na ta̤ǐshowî̤nu kû̌ he phû̌ Khûishômelǎnu kǎlè.”
19Dě Cǒmaradû̌ hî̌ lû̌û kû̌, “Tô̤̌, a bǎ mè̤̌ Khûishômelǎ tô̤̌. Nama Mǒ̤sara nî̌ a gǔ phû̌ô̌ bǎ na phû̌pwa̤khû tôpwa̤ pě, dě na bǎ kaǎ ami̤ kû̌ KhûIsè̌ pě. He ma̤měma̤gle he ta̤wṳ̂̌dò kû̌ a pě, dě ta̤wṳ̂̌dò nî̌ a mè̤̌ ta̤wṳ̂̌dò tûjû̌pwa̤ talakhǎ dǒ aya kû̌ aphû̌li̤ lò̤tutṳ̌ dǒ nô̌kò tôhtu hto tôhtu pě. (Isè̌ yô̤̌sǎyô̤̌mû mî̌ a sǎyî̤̌, ma̤titèhî̌dě bǎ a ganǎ̤de kû̌ a gǔ nǐ̤bǎ phû̌pwa̤khû akhanu a sǎyî̤̌.)#Mǒhtûlû̌hǎhtûsa 21:3 20Khûishômelǎ ayadě, he ganǎ̤de na kwi he nuhǒ. He ǐshowî̤ tû̌ a pě. He no phû̌ô̌wô̤̌ li̤ô̌plṳ̂ lû̌û pě dě akhlialè lò̤tutṳ̌ ô̌wô̤̌ô̌dû̌ mî̌ca pě. A htû tûû̌ khwǐphû̌ shǐsò̌ginǐ̤ apha pě, dě he nohtûhtò̌ a kû̌ khlilèphû̌ dû̌꤮ tocǒ pě. 21Bǎbǎkǎlè he ta̤wṳ̂̌dò nunî̌, he ma̤měma̤gle kû̌ KhûIsè̌ dǒ Mǒ̤sara glè̌ phû̌ô̌ lû̌û htû̌ něbǎpě pô̤̌ khònò̤̌khanu pě.” 22Bǎ Cǒmaradû̌ hî̌bǎ hto kû̌ PhaAbraha akhanu, a gehtò̌kè lû̌ lǎ̤.
23Bǎnu tôni̤ pwǎ, PhaAbraha kaǎ aphû̌khû Khûishômelǎ kû̌ lǒ̤bò pwa̤khû dǒ a ô̌phijǎlò̤ bǎ ahǐkû nutokhlǒ kû̌ jû̌ dǒ a pwî̤ kû̌ ru sîtokhlǒ kû̌ lǒ̤bò pwa̤khûdû̌ ô̌ bǎ ahǐkû nutokhlǒ dě a no dǔsîlǐbò asîbě pô̤̌ Cǒmaradû̌ mǎkè lû̌û ayô̤̌sǎnu. 24Bǎ kòyò dǔsîlǐ bǎ PhaAbraha bě akhanu, aně ô̌ lǐ̤sô̌tishi kû̌ lǐ̤sô̌tôně hǒ. 25Aphû̌ Khûishômelǎ dě aně ô̌ shǐsuně hǒ. 26PhaAbraha kû̌ aphû̌ Khûishômelǎ sò̌ginǐ̤ a dǔsîlǐ plǒbò lû̌û bě tôni̤ akûnô̤̌. 27Lǒ̤bò pwa̤khû ô̌ bǎ PhaAbraha hǐkû nutokhlǒ kû̌ lǒ̤bò kòyò dǒ a ô̌phijǎlò̤ bǎ ahǐkû nutokhlǒ kû̌ shilǎ̤gǎkhlophû̌ dǒ a pwî̤ge lû̌û tokhlǒnu, asî dǔsîlǐ plǒbò lû̌û bě kû̌ PhaAbraha tôni̤ akûnô̤̌ pwǎ.
موجودہ انتخاب:
Mǒhtûlû̌hǎhtûsa 17: KXF
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in