युहन्ना 2
2
काना सहरवामा बियाह
1तिसरि दिन गालिल छेतरक काना सहरवाक एगुडा घरमा बियाह रहलइ। येसुजिक दाओ फेनि वहवाँ रहलिय। 2येसुजि हसे हुनेक चेलवाह फेनि उअ बियहवामा नेउता पउले रहलइ। 3जब बियहवामा देना अंङगुरवाक मोदवा वरलेइ तब येसुजिक दाओ हुनेके कहलिय, “अंङगुरवाक मोदवा त वरेलइ!”
4इअ बतवा सुनके येसुजि कहलसि, “दाओ, मोरके इअ केहके कहइ बडहि। मोर काम करेके जुन यखनिलइ हइने याइल बडइ।” 5वकरपाछा येसुजिक दाओ बहरियावानिके कहलिय, “उअ जथि करे कहबिय तोहरा उहे करिह।”
6वहवाँ पत्थरासे बनल छ गो कुडासभ रहलइ। वकरमा लगभग एकहक सय लिटर पानि यटाइ। यहुदियाह उअ कुडवाक पनिया यपनहिँके सुद्ध पारना चलनमा काम लगोइ। 7येसुजि बहरियावानिके कहलसि, “इअ जम्मे कुडवाहमा पानि भरह।” तब हुनुका उअ जम्मे कुडवानिक मुहवालइ पानि भरदेलइ।
8तब येसुजि हुनुकाके कहलसि, “याबे इचिका निकडाके भोजवाक मुखियावाक लघिना लिगह।” हुनेक कहलि नहिँया हुनुका करलइ। 9बियहवाक भोजवाक मुखियावा पनिया चिखइकि उअ त अंङगुरक मोद भेसकल रहलइ। बाकि उअ मोदवा कहवाँसे याइल हखइ कहके वकर थाह हइने रहलइ। उअ त पनिया भरलहरा बहरियावानिक मतरे थाह रहलइ। तब भोजवाक मुखियावा दुलहवाके बलाके कहलिय, 10“जम्मे जन पहिला डउल अंङगुरक मोद पिएके देसइ हसे मन्सावाह बहुत पियलेपर मतरे हइने डउल मोद देसइ। बाकि यपनहुँ त यखनिलइ फेनि डउल मोद धरले बडहुँ।”
11येसुजि गालिल छेतरक काना सहरवामा यापन इअ यचम्मक पहिला चिन्हा देखाके यापन महिमा परकट करलसि हसे हुनेक चेलवाह हुनेमा विस्वास करलइ।
येसुजि मन्दिरवा सुद्ध पारलसि
(मति २१:१२-१३; मरकुस ११:१५-१७; लुका १९:४५-४६)
12वकरपाछा येसुजि यापन दाओ, भयवाह हसे चेलवानिसाङे कफरनहुम सहरवामा गेलसि। हुनुका किहो दिनलइ वहवाँहिँ रहलइ।#मति ४:१३; मरकुस ३:३१
13यहुदियानि निस्तार-पाबनि लजिके याइल रहलइ हसे येसुजि यरुसलेममा गेलसि।#प्रस्थान १२:१-२७ 14हुने मन्दिरवाक यङनवामा गोरुसभ, भेडा, घुटुरि बेचइकि हसे पइसावा सटलाहरानिके पइसावा सटनवा ठउरियामा बइठल देखलसि। 15तब येसुजि डोरहियाक एगुडा कोडा बनाके जम्मे मन्सावानिके, हुनुकर भेडवा हसे गोरुवानिके फेनि मन्दिरवासे खेदलसि। हुने पइसावा सटलाहरानिक पइसावा छिटदेलसि हसे हुनुकर टेबुलवा फेनि उल्टादेलसि। 16हुने घुटुरिया बेचलाहरानिके कहलसि, “इअ जम्मे चिजुवा यहवाँसे लिगह! मोर पिताक घरवाके तोहरा व्यपार करना घर झिन बनोह!”#लुका २:४९
17तब हुनेक चेलवाह धरमसास्तरवामा लिखइलि इअ बतवा सम्झलइ, “हे परमेस्वर, यपनहुँक घरवाक तहिँया मोर जोस मोर मनवा भितरा यागि नहिँया बरइ बडइ।”#भजन ६९:९ 18तब यहुदि यगुवासभ हुनेके कहलइ, “यगर यपनहुँक इअ काम करेके अधिकार बडइ जउँ, यकर परमान देवेके तहिँया हमराके कथि यचम्मक चिन्हा देखोबहुँ?”#मति २१:२३; मरकुस ११:२८; लुका २०:२ 19येसुजि हुनुकाके जवाफ देते कहलसि, “इअ मन्दिरवाके भस्का देह हसे मुइ यकरेके तिन दिनमा फेरि बनादेबहिँ।”#मरकुस १४:५८; प्रेरित ६:१४ 20तब हुनुका कहलइ, “इअ मन्दिरवाके बनावेके छयालिस बरस लागल रहलइ, कथि यपनहुँ तिन दिनमा यकरेके बनावे सकबहुँ?” 21बाकि येसुजिक कहलि मन्दिरवा त हुनेक यपने देहि रहलइ। 22जब येसुजि मरलिसे फेरि जिउते भेलसि, तब हुनेक कहलि इअ बतवा चेलवाह सम्झलइ। हुनुका धरमसास्तरवा हसे येसुजिक कहलि बतवामा विस्वास करलइ।
23जब हुने निस्तार-पबनियाक भोजवाक जुनवामा यरुसलेममा रहलसि, तब हुनेक करलि यचम्मक चिन्हासभ देखके बहुत जन हुनेमा विस्वास करलइ। 24बाकि येसुजि यपनहिँ हुनुकर भर हइने परलसि, केहकेकि हुने जम्मे मन्सावाह कस्नुक बडइ कहके जनससि। 25हुनेके मन्सेक बारेमा कुनहुँ फेनि सिखावेके आवस्यक हइने रहलइ, केहकेकि मन्सेक हृदयमा कथि रहसइ कहके हुने यपनहिँ जनसि।
موجودہ انتخاب:
युहन्ना 2: CTHR
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023, Wycliffe Bible Translators, Inc. and Nepal Bible Society