Yowane 4
4
Omuciza w’igulu acîmanyisa emw’Abasamâriya
1Erhi Yezu amanya oku Abafarizeyi bayumvîrhe oku akola agwêrhe baganda banji kulusha Yowane n’oku adwîrhe abatiza bantu banji kumulusha, 2n’obwo arhali Yezu yêne wakâg’ibatiza, ci baganda bâge, 3arhenga e Yudeya, acîshubirira e Galileya. 4Kwàli kukwânîne atwikanye omu Samâriya. 5Anacihika omu cishagala ciguma c’e Samâriya, ciderhwa Sikara, hôfi h’ishwa Yakôbo ahâga omugala Yozefu. 6Ho iriba lya Yakôbo#4, 6 Galya mango izûba liyimanga. libà aho. Yezu ali amârhama n’enjira; anacitamala oku cikunguzo c’iriba. Zàli nka nsâ ndarhu. 7Mukazi muguma w’Omusamâriya ayish’idôma. Yezu anacimubwîra, erhi: «Mpà nâni mîshi nnywe». 8Abaganda bâge bâli bajir’igula ebiryo omu lugo. 9Olya mukazi w’Omusamâriya amubwîra, erhi: «Kurhi we Muyahudi wankampûna amîshi, nie Musamâriya?» Bulya Abayahudi n’Abasamâriya barhabonanagakwo. 10Yezu amushuza, erhi: «Ocimanyaga enshôkano ya Nnâmahanga okanamanya ndi okubwîzire, erhi: “Mpà nâni nnywe”, wakabire we muhûna, naye anakakuhîre amîshi g’obuzîne#4, 10 Omu Mandiko matagatîfu, amîshi lyo inêma lya Nnâmahanga.». 11Olya mukazi amubwîra, erhi: «Yâgirwa, ci orhagwêrhi eci wankadômeramwo, n’iriba lirî lirî. Ngahi wankacibona amîshi g’obuzîne? 12K’olushirage larha Yakôbo warhuhâga eri iriba, anyweramwo bo n’abâna n’ebintu byâge?» 13Yezu amushubiza, erhi: «Ngasi yêshi onywakwo aga mîshi ashub’iyumva enyôrha; 14Ci owanywe oku mîshi namuhà, arhakayumva nyôrha ciru n’eliguma; bulya amîshi namuhà gamuhindukamwo iriba lyakahululamwo amîshi g’obuzîne bw’ensiku n’amango». 15Nyamukazi, erhi: «Waliha, mpà nâni kwo ago mîshi, lyo irhondo ntaciyumva nyôrha, lyo ntanakaciyish’idôma bano». 16Yezu amubwîra, erhi: «Kanya, ohamagale balo, ogal’igaluka». 17Olya mukazi amushuza, erhi: «Ntajira mulume». Yezu amushubiza, erhi: «Nêci, kwo binali, orhajira mulume. 18Bulya wamaja omu mwa balume barhanu, n’oyu oli omu mwâge arhali balo. Nêci, orhanywesiri». 19Nyamukazi, erhi: «Yâgirwa, namâbona oku oli mulêbi. 20Balarha bakâg’iharâmya kw’eyi ntondo#4, 20 Ntondo ya Garizimi eyo., ninyu mpu Yeruzalemu ho hantu h’okuharâmya». 21Yezu amubwîra, erhi: «We mukazi, nyêmêra, amango gahisire, arhananciri kuli eyi ntondo erhi e Yeruzalemu mwacikaharâmya Larha. 22Mw’oyo munakaharâmya eci murhishi, rhwêhe rhuharâmya eci rhuyishi; bulya obucire omu Buyahudi burhenga. 23Câba amango gayiruka -ganakola go gano- abaharâmya okunali bakola bakâharâmya Larha omu murhima gwâbo n’okunali; bulya abo bo Larha alonza mpu bamuharâmye. 24Nyamuzinda abà mûka, n’abamuharâmya kukwânîne bamuharâmye omu murhima n’okunali». 25Olya mukazi anacimubwîra, erhi: «Nyîshi oku Masiha, olya baderha Kristu, ayisha. Amango ayisha, ye warhuyigîriza byoshi». 26Yezu amushuza, erhi: «Nie ono ndwîrhe nakudesa». 27Ho n’aho abaganda bâge bayisha, basômerwa erhi babona adwîrhe aganîza omukazi. Ci ntâye washagîre mpu amudôsa, erhi: «Ci wamudôsa», erhi: «Carhuma wamuganîza?» 28Nyamukazi anacisiga akabindi kâge, alibirhira eka, aj’ibwîra abantu, erhi: 29«Yishi mubone omulume wamambwîra ebi najizire byoshi. K’arhankabà ye Kristu?» 30Banacirhenga omu lugo, bajà emunda àli. 31Ago mango abaganda bâge bakâg’imuyinginga banamubwîra, mpu: «Waliha Mwigiriza, ebiryo bino». 32Naye abashuza, erhi: «Ngwêrhe ebiryo murhishi». 33Abaganda bâge bakadôsanya, mpu: «Nkaba hali owamudwîrhîre eby’alya#4, 33 eby’alya: biri binwa bibirhi: «ebi» na «alya». Omu mashi mubà enshishula binwa amango herufi z’izù zibirhi zirhimânana. a abugâne a, ahinduke â kwo kuderha a mulîri: mpâga agâni mamvu: mpâgâgani mamvu. a abugâne e, a anarhoge omu kuhubula, bihinduke byombi e mulirî: narhenga e Bukafu: narhegêBukafu i abugâne a, ahinduke y: ebi alya: eby’alya. i arhimâne o, ahinduke iyu: omukazi oduga budufu: omukazyuduga budufu. a arhimâna o, a ye mwofi kuli o anarhoge hasigale o: omwâna oderha bwenêne: omwanoderha bwenêne.o arhimâne e, ahinduke we: engoko ekaliza bânagoko: engokwekaliza bânagoko.n’ebindi n’ebindi…?» 34Yezu ababwîra, erhi: «Ebiryo byâni kuli kujira obulonza bw’owantumaga n’okuyûkiriza omukolo gwâge. 35“Ka murhaderha, mpu”: “Hasigire myêzi ini emyâka eyêre?” “Nâni mmubwîzire”: “Yinamuli amasù, mubone oku amashwa gakola gayâkirize n’emyâka”. 36“Omusârûzi akola ahâbwa oluhembo lwâge; akola adwîrhe alunda emburho oku buzîne bw’ensiku n’amango, na ntyo owarhwêraga naye akola asîma bo n’omusârûzi”. 37“Nêci aka kanwa kanali k’okuli: orhwêra ali wago, n’osârûla ali wago”. 38“Nammurhumire okuj’isârûla#4, 38 Abasârûzi zo Ntumwa, n’abarhwêraga bo balya balêbi bashokoleraga Entumwa, na kulusha boshi, Mwâmi Yezu yêne. ebi murhalibukiraga; bandi balibusire ninyu mwalya emyâka y’amalibuko gâbo”».
39Basamâriya banji b’eco cishagala bamuyêmêra erhi kalya kanwa k’olya mukazi karhuma, erhi: «Anambwîzire ebi najizire byoshi». 40Erhi Abasamâriya bamuhikaho, bamuyinginga mpu acumbike. Ajirayo nsiku ibiri zône. 41Bandi banji bamuyêmêra erhi nyigîrizo zirhuma. 42Bakâbwîra olya mukazi, mpu: «Arhaciri binwa byâwe birhumire rhuyêmêra; nîrhu rhwêne rhwamuyumvîrhe, rhunakola rhumanyire bwinjà oku kwo binali, oyu ye Muciza w’igulu».
Yezu afumya mugala wa murhambo muguma
(Mat 8, 5-13; Luk 7, 1-11)
43Erhi zirya nsiku ibiri zigera, anacilîkûla, ajà e Galileya. 44Yezu yêne àli erhi adesire mpu ntà mulêbi okengwa omu cihugo câbo. 45Erhi ahika e Galileya, abanya-Galileya bamuyankirira, bulya bâli erhi babwîne ebi ajiraga e Yeruzalemu byoshi oku lusiku lukulu; bulya nabo bâli oku lusiku lukulu. 46Ashub’ijà e Kana y’e Galileya, erya ahindulaga amîshi okubà divayi. Yali murhambo muguma walwazagya omugala e Kafarnaumu. 47Oyo mulume erhi ayumva oku Yezu ahika e Galileya kurhenga e Yudeya, amuguma omu cirali, anamushenga mpu ayandagalîre emwâge, aj’ifumya omugala wali hôfi h’okufà. 48Yezu amubwîra, erhi: «Ka mukabà murhabwîni ebisômerîne n’ebirhangâzo murhâyêmêre?» 49Naye nyamurhwâli, erhi: «Muhânyi, yandagala embere omwâna anfîre». 50Yezu amubwîra, erhi: «Gendaga, mugala wâwe ali mutaraga». Nyamulume anaciyêmêra ako kanwa ka Yezu, alîkûla. 51Oku aciri omu njira y’okuyandagalira emwâge, abambali bayisha, bamubwîra mpu omugala afumire. 52Abadôsa ensà yonêne arhondêraga okuyumva amagala. Bamushuza, mpu: «Nnjo aha nsâ nda ishushira lyamurhengagamwo». 53Îshe abona oku yo na nsâ Yezu amubwîraga, erhi: «Mugala wâwe ali mutaraga». Anaciyêmêra ye n’ab’omu mwâge boshi. 54Eco co cisômerîne ca kabiri Yezu àjizire erhi ashubira e Galileya kurhenga e Yudeya.
موجودہ انتخاب:
Yowane 4: MKB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Mashi Bible © BUKAVU Archdiocese of Bukavu, 2024.