Luka 21
21
Entûlo y’omukana
(Mat 12, 41-44)
1Erhi alambûla amasù, abona abahirhi badwîrhe baheba entûlo zâbo omu mucîmba gw’ecibîkiro, 2Abona na mukana muguma wa buligo ahebamwo nkonola ibiri za bujuma. 3Anaciderha erhi: «Mmubwîre okuli, oyu mukana mukenyi ahânyire kulusha boshi. 4Bulya abà boshi bahânyire entûlo oku bisigala omu bunguke bw’ebirugu byâbo, ci yêhe omu bukenyi bwâge ahânyire ebyankamubîsire byoshi anali agwêrhe».
Enyigîrizo z’okuyûrha kw’igulu - Enshokolezi
(Mat 24, 1-3; Mrk 13, 1-4)
5Erhi baguma babà badwîrhe baderha mpu aka-Nyamuzinda kayûbasirwe n’amabuye minjinjà kanabambirwe n’ebindi by’entûlo bya ngulo ndârhi, ababwîra, erhi: 6«Ebyo byoshi mudwîrhe mwasinza, ensiku zâciyisha, harhakasigala ibuye oku lindi lirhashâbirwi», 7Bamudôsa, mpu: «Yâgirwa Mwigîriza, mangaci okwo kwâbè na cimanyîso cici camanyîse oku ebyo biri hôfi?»
Ebimanyîso birhanzi n’omurhondêro gw’amalibuko
(Mat 24, 4-14; Mat 10, 17-22; Mrk 13, 5-15)
8Naye, erhi: «Mumanye murhârhebwa, bulya banji banayishe oku izîno lyâni, bâderhe, mpu: “Nie (Kristu)”, “mpu na amango gahisire!” “Mumanye murhabakulikiraga”. 9“Amango mwayumve baderha ebîrha n’obugoma, murhayôbohaga; bulya kukwânîne ebyo birhang’iyisha, ci obuzinda erhi burhac’ibà”» 10Okubundi ababwîra, erhi: «Ishanja lyârhêre erindi ishanja, n’obwâmi obundi bwâmi. 11“Hâbè omusisi munene gw’idaho, n’ecizombo n’ecâhirà byâbè hanji; hayish’ibà n’eby’okuyôbohya, n’emalunga yârhenge ebimanyîso binene”. 12“Ci embere y’okwo kwoshi, barhang’immugwârha, bammulibuze, bammuhâne omu masinagogi n’omu mpamikwa, banammuheke embêre z’abâmi n’abarhegesi izîno lyâni lirhumire”. 13“N’okwo kwayish’ibà buhamîrizi bwinyu”. 14“Mumanye bwinjà oku kurhakwânîni mulonze emurhima ebi mwayish’iderha”: 15“bulya niene nâmmuhe akanwa n’obumanye abashombanyi binyu barhankahash’ilahira erhi okuhima”. 16“Mwâhânwe ciru n’ababusi binyu, na bene winyu, na baci binyu n’abîra binyu; bayish’iyîrha banji muli mwe”; 17“mwânashombwe na boshi izîno lyâni lirhuma”. 18“Ci kwônene ntà luviri luguma lw’oku irhwe linyu lwâhere”. 19“Bulêmbêzi bwinyu mwâcizemwo obuzîne bwinyu!”»
Amalibuko ga Yeruzalemu
(Mat 24, 15-20; Mrk 13, 14-18)
20«Ci amango mukabona Yeruzalemu azungulusirwe n’engabo, munanye oku okushâbwa kwâge kukola kuli hôfi. 21“Obwo abâli e Yudeya bâyakire oku ntondo; nabo abâli omu lugo bâhuluke; n’abâli omu mahirinji barhaderhaga mpu bacishubira omu lugo”. 22“Bulya ezo nsiku zâbe nsiku za buhane, lyo ngasi kwoshi kwayandikagwa kuyunjula.” 23“Abakazi bâbè bali nda erhi abâbe badwîrhe bayonsa ezo nsiku, bâsômerwa!”»
Amalibuko gâlerhwe n’abapagani n’obujà
(Mat 24, 21; Mrk 13, 19)
Bulya hâbè malibuko manji omu cihugo n’obukunizi kuli eri ishanja. 24Bayish’igera oku bwôji gw’engôrho, bayish’ihêkwa bujà omu mashanja gwoshi, na Yeruzalemu ayish’ilabarhwa n’abapagani, kuhika amango g’abapagani gahike#21, 24 Amango g’abapagani, go mango abapagani babà bîshogwa ahâli h’Abayahudi, n’ago mango gayunjula olusiku Abayahudi bâje omu Ekleziya ya Mwâmi Yezu. Lolà Rom 11, 11-32..
Okugeramwo omusisi kw’igulu n’okuyisha kwa Mwene-omuntu (Mat 24. 29-30; Mrk 13. 24-26)
25«Hayish’ibà ebimanyîso omu izûba n’omu mwêzi n’omu nyenyêzi; n’omu igulu amashanja gayish’ibà burhè ganayish’irhanya bayumva enyanja ekungula. 26Abantu bafè n’obwôba omu kulinda ebyayish’ibà omu igulu; bulya eby’oku nkuba byâgeremwo omusisi. 27Go mango babone Mwene-omuntu ayish’alembêra omu citù n’obuhashe n’irenge linji. 28Amango okwo kwârhondêre okubà, muyinamule amalanga, mugalamire enyanya, kulya kubà obuyôkoke bwinyu buli hôfi».
Amango Mwene-omuntu ayisha
(Mat 24, 32-35; Mrk 13, 28-31)
29Anacibabwîra olwiganyo, erhi: «Mulole olwinganyo oku mulehe n’oku yindi mirhi yoshi. 30Ekarhondêra okuyâna, mwânamanya oku ecanda ciyiruka. 31Ninyu kwo na kuguma: amango mwabona okwo kubà, munamanye oku Obwâmi bwa Nyamuzinda buli hôfi. 32Mmubwîre okuli, eri iburha lirhagere n’okwo kurhabà kwoshi. 33Irunga n’igulu byâgere, ci ebinwa byâni birhakagera.»
Okubà masù
34«Mumanye emirhima erhazidoheragwa n’amasîma g’omubiri, endalwè n’okucirhanya oku by’en’igulu, ly’olwo lusiku lurhammuyishira cifudukwè. 35Bulya abantu boshi b’igulu lyoshi kwo lwayish’ibayishira nka murhego. 36Kuziga mubè masù, munashenge ngasi mango, lyo mukwânana okuyish’ifuma ebyo byâyishe byoshi n’okuyish’iyimanga embere za Mwene-omuntu buzira bwôba».
Ensiku nzinda za Yezu en’igulu
(Mat 21, 17; Mrk 11, 11.19; Ywn 8, 2)
37Mûshi, akâg’iyigîriza omu ka-Nyamuzinda; ci erhi kwabaga bijingo, akagend’iyiza obudufu bwoshi oku ntondo ederhwa ntondo y’Emizêti. 38N’erhi kwabaga sêzi mucêracêra, olubaga lwoshi lwakamushimba omu ka-Nyamuzinda mpu bayumve enyigîrizo zâge.
موجودہ انتخاب:
Luka 21: MKB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Mashi Bible © BUKAVU Archdiocese of Bukavu, 2024.