Luka 23
23
1Boshi oku banali, bayimuka, bamuhêka emwa Bilato.
Yezu embere za Bilato
(Mat 27, 11-14; Mrk 5, 2-5; Ywn 18, 29-38)
2Barhondêra okumulega, mpu: «Rhwashimanyire oyu muntu adwîrhe agomêsa olubaga anahanza mpu irhondo barhacivurhiraga Sezari, n’okucîderha mpu ye Kristu Mwâmi». 3Bilato anacimudôsa, erhi: «Ka we mwâmi w’Abayahudi?» - Naye ashuza, erhi: «Nêci: wakudesire». 4Bilato anacibwîra abajinji b’abadâhwa n’olubaga, erhi: «Ntabwîni cibî cici oyu muntu ajizire». 5Bôhe basimika, mpu: «Agomêsize olubaga omu kuyigîriza omu cihugo coshi c’e Buyahudi, kurhenga e Galileya emunda arhondêreraga kuhik’eno». 6Obwo Bilato erhi ayumva akwo kanwa, adôsa mpu k’oyo muntu ali Mugalileya. 7Erhi amanya bwinjà oku ali muntu w’oburhegesi bwa Herodi, amurhuma emwa Herodi. Obwo erhi naye ali e Yeruzalemu mw’ezo nsiku.
Yezu embere za Herodi
8Herodi erhi abona Yezu asîma bwenêne; bulya kurhenga mîra erhi acîfinja okumubona, kulya akâg’iyumva emyanzi yâge, erhi analangalîre okulola oku ajira ecisômerîne. 9Amudôkereza bwenêne, ci yêhe arhamuyalulaga. 10Obwo erhi abajinji b’abadâhwa n’abashamuka b’ihano ho bali; barhàhusagya okumushobeka. 11Okubundi Herodi n’omurhwe gwâge bamugayaguza n’okumushekera. Amuyambîsa ecishûli cêru#23, 11 cishûli cêru: Mwambalo gwa baluzi, mpu lyo acinaguza Yezu. , ashub’imugalula emwa Bilato. 12Kurhenga olwo lusiku lonêne, Herodi na Bilato bakoma obwîra, n’obwo burhanzi barhabonanagakwo.
Yezu ashub’ihêkwa emwa Bilato
(Mat 27, 15-26; Mrk 15, 6-15; Ywn 18, 38—19, 16)
13Bilato anacihamagala abajinji b’abadâhwa n’abarhambo n’olubaga, abàbwîra, erhi: 14«Mwandwîrhîre oyu muntu mpu agomêsize olubaga; nâni ene mmudôsa embere zinyu, ntamubwînekwo izâbyo lici muli birya byoshi mwamushobekaga. 15Ciru na Herodi, bulya arhugalulireye, kuziga ntâco oyu muntu ajizire cikwânîne ayîrhwe. 16Nkolaga namuhana nnamulike». 17[Lyàli irhegeko okubashwêkulira muntu muguma oku lusiku]. 18Ci olubaga lwoshi lwanaciyâma, mpu: «Oyu afè, orhushwêkulire Baraba!» 19Oyo Baraba àli muntu washwêkeragwa obugoma bwabaga omu cishagala haguma n’obushungu bw’okuniga. 20Omu kulonza okulîka Yezu, Bilato ashub’ibadôsa. 21Bôhe bayâma, mpu: «Omubambe! Omubambe oku musalaba!» 22Ashub’ibabwîra obwa kasharhu, erhi: «Ewe, kubî kuci ajizire? Ntâco cikwânîne okufà namubwînekwo. Kuziga nkola namuhana ngal’imulîka». 23Ci bôhe bayâma, balushîsa, balonza mpu abambwe oku musalaba, n’okuyâma kwâbo kwajà kwayûshûka. 24Bilato obwo atwa mpu bibè nk’oku balonzize. 25Anacishwêkûla olya wali oshwêkîrwe obugoma n’obunizi, bulya ye balonzagya; naye Yezu, abahâye mpu bamujire nk’oku basîmire.
Enjira y’omusalaba
(Mat 27, 45-50; Mrk 15, 33-37; Ywn 19, 25-30)
26Erhi bakola bamudwîrhe, bagwârha Simoni, muntu w’e Kirena, erhi afuluka; bamusêza mpu abarhule omusalaba bo na Yezu. 27Ngabo nyinji y’abantu yamukulikira, n’abakazi bajaga bamulakira banabanda endûlù. 28Yezu anacibahindamukira, ababwîra, erhi: «Mwe bakazi b’e Yeruzalemu, murhandakiraga, ci mucîlakire mwenene mulakire n’abâna binyu! 29“Bulya ensiku zâciyisha, go mango bâderhe, mpu”: “Iragi ly’engumba n’enda zirhaburha n’amabêre garhonsagya!” 30“Go mango bârhondêre okubwîra entondo, mpu: Murhufûnike!” 31“Bulyâla bakajira ntya oku murhi mubishi#23, 31 Erhi Yezu ajirirwa ntyo, ye mwêru-kweru (omurhi mubishi gurhagulumira), rhwe babî kurhi rhwayish’ijirirwa (omurhi mûmu, gukajakwo omuliro, kugulumira gugulumira)., kurhi byayish’ibà oku murhi mûmu?”» 32Bahêkwa haguma naye bandi bantu babiri babî mpu baj’inigwa.
Yezu abambwa oku musalaba
(Mat 27, 35-38; Mrk 15, 24-28; Ywn 19, 17-24)
33Erhi bahika ahantu haderhwa Kalvariyo#23, 33 Kalvario, erhi Golgota: Ho hantu h’empanga. , bamubamba oku musalaba haguma na balya banyankola-maligo, muguma ekulyo, owundi ekumosho. 34Yezu anaciderha, erhi: «Larha, obafe bwonjo, bulya barhamanyiri eci badwîrhe bajira». Bagabâna emyambalo yâge, bayiyesha cigole.
Yezu agayaguzibwa anajâcirwa oku musalaba
(Mat 27, 39-43; Mrk 15, 29-32)
35Olubaga lwayimanga, lwakalolêreza. Ci abarhambo bôhe bakamushekera, mpu: «Acizize abandi, lêro naye acîfumagye yênene akabà ye Kristu, Mwîshogwa wa Nnâmahanga!» 36Abasirika nabo bamushekera: bamuyegêra, bamuhêreza enkalishi, mpu: 37«Akabà we mwâmi w’Abayahudi, cîcizagye wênene!» 38Aha irhwe Iyâge hàli bayandisirwe ezi nderho, mpu: «Oyu ye Mwâmi w’Abayahudi».
Ecishambo cicîyazize cacunguka
39Muguma muli birya bishambo byàli bibambirwe oku musalaba amujâcira, erhi: «Kali we Kristu? Cîlîkûzagye, onarhulîkûze nîrhu!» 40Ci owâbo amukankamira, erhi: «Ciru nâwe orhayôbohiri Nnâmahanga, n’obwo oli omu malibuko maguma mwe naye! 41Rhwêhe rhugakwânîne, bijiro bîrhu rhwalyûla; ci yêhe ntà cibî ciguma àjizire». 42Anacibwîra Yezu, erhi: «Yâgirwa, onkengêre hano ohika omu bwâmi bwâwe». 43Yezu anacimushuza, erhi: «Okuli, nkubwîre, ene lyonene wâbà haguma nâni omu Paradizo».
Yezu afà oku musalaba
(Mat 27, 45-50; Mrk 15, 33-37; Ywn 19, 25-30)
44Obwo zàli nka nsâ ndarhu, izûba lyàzima; n’omwizimya gwabwîka igulu lyoshi kuhika amafuluko#23, 44 Omu nsâ mwenda, go mafuluko e Bushi bulya ohinga e Bushi arhayaka midi co cirhuma afuluka ako kasanzi.. 45Omwenda gwàli mumanike aha karhî k’aka-Nyamuzinda gwasharhuka mpande ibiri. 46Okubundi Yezu anaciyâma n’izù linene, erhi: «Larha, mpizire omûka gwâni omu maboko gâwe#23, 46 Lul 30, 6.». N’erhi ayûs’iderha ntyo, arhengamwo omûka.
Erhi Yezu ayûs’ifà
(Mat 27, 51-56; Mrk 15, 38-41; Ywn 19, 31-37)
47Omukulu w’abasirika erhi abona okwo, akuza Nyamuzinda, erhi: «Nêci, kwo binali, oyu muntu ali mwimâna!» 48Nazo engabo z’abantu zoshi zàl’idesire mpu zilole, erhi zibona oku byamâbà, zashubira eka erhi zanajà zacishûrha ecifuba. 49Abîra bâge boshi n’abakazi bamukulikiraga kurhenga e Galileya, bayimanga kuli, bakalâba.
Yezu abishwa
(Mat 27, 57-61; Mrk 15, 42-47; Ywn 19, 38-42)
50Hanaciyisha muntu muguma, ye Yozefu. Ali w’omu ihano, muntu nkana na mushinganyanya. 51Yêhe arhàli ayêmîre igulu n’ebijiro byâbo. Ali w’e Arimatiya, cishagala c’omu Buyahudi, akâg’ilinda Obwâmi bwa Nyamuzinda. 52Anacijà emwa Bilato mpu amuhûne omubiri gwa Yezu. 53Erhi abà amâgumanula, àguboha omu mwenda ànagubisha omu nshinda yali mpumbe omu lwâla. Eyo nshinda erhàli esag’ibishwamwo muntu. 54Lwàli lusiku lwa Marheganyo#23, 54 Marheganyo, go na malâliro ga Basâka., n’olwa-Sabato erhi lukola luli oburhondêra. 55Nabo balya bakazi barhengaga e Galileya haguma naye, erhi bakulikira Yozefu, balola enshinda n’oku omubiri gwâge gubishirwe. 56Okubundi banacigaluka, barheganya obukù n’omugavu. N’erhi lubà lwa-Sabato, bashîba nka oku birhegesirwe.
موجودہ انتخاب:
Luka 23: MKB
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Mashi Bible © BUKAVU Archdiocese of Bukavu, 2024.