UBWANDILO 15
15
Kyala ikufinga ulufingo na Abramu
1Bo sikindile sisisi po ilisyu lya Kyala lilinkumwisila Abramu nkisetuka lilinkuti, “Gwe Abramu, Ungatilaga, yo Une ngulu yako, ifi nikukupaga ugwe fikuyaga Iyingi itolo.” 2Popapo Abramu alinkuyoba alinkuti, “Gwe Ntwa Kyala, ngimba kumbaga ifiki une, buno ifyinja fikukinda itolo ne nsita kuya nu mwana nayumo, umwene ugwa pakilingo kyangu yo yu mbombi gwangu Eliyazari ugwa nkisu kya Damaska?” 3Abramu alinkongelela ukuyoba alinkuti, “Ukambapo umwana nayumo, bunobuno yu ntumwa uyu apapiligwe nnyumba yangu yo isakuyaga gwa pakilingo kyangu.” 4Popapo lelo ilisyu lya Ntwa lilinkumwisila Abramu lilinkuti, “Umundu uyu yo atisakuyaga gwa pakilingo kyako, loli yu mwanako yuyo.” 5#Rom 4.18; Hib 11.12Untwa alinkusoka panja na Abramu alinkumbula alinkuti, “Keta kumwanya, ubale indondwa, linga ubagile ukusibala.” Popapo alinkumbula alinkuti, “Mo mumo bisakuyilaga ubwingi aba nduyungu lwako.” 6#Rom 4.3; Gal 3.6; Yak 2.23Umwene Abramu alinkumwitika Untwa. Bunobuno Untwa alinkumpelela Abramu ukuyobigwa ubugolofu.
7Popapo Untwa alinkumbula Abramu alinkuti, “Yo Une ne Ntwa, uyu akutwele kuno ukufuma nkaya ka Uri nkisu kya ba Kaladeya, Yo Une nakupele ikisu iki ukuya kyako.” 8Umwene Abramu alinkuti, “Gwe Ntwa gwe Kyala, Kali ngusimanyaga bulebule ukuti nisakukikabaga ikisu iki?” 9Popapo Untwa alinkumbula alinkuti, “Ukatwale ingwata indama ya fyinja fitatu, ni mbene iya fyinja fitatu, kangi ni ng'osi inyambala, iya fyinja fitatu, ni ngunde indeta, ni ngungubiya.” 10Umwene Abramu alinkuntwalila Kyala fyosa fififi, alinkufitumulania pabili, alinkufilambalika pasi, ikipimba iki na iki kilinkuningana nikinini; loli injuni syo alinkusita nukusitumulania pabili. 11Bo amabimba gisile, gagwile pa nyama sila, Abramu alinkugakaga.
12 #
Jobu 4.13,14 Lelo bo ilisuba likuya pakuyonga, utulo utusito tulinkumwaga; popapo ulutende lulinkumwaga. 13#Kuso 1.1-14; Imbo 7.6Umwene Untwa alinkuyoba nagwe alinkuti, “Usyaganiege fiyo isya kuti abanduyungu lwako bisakuyaga baponi nkisu iki kikaya kyabo, kangi bisakuyaga batumwa mumo, bisakwangaliligwaga mumo ifyinja aba mia bana (400); 14#Kuso 12.40-41; Imbo 7.7loli nisakukilongaga ikikolo iki kibingisye mbutumwa, panyuma lelo po bisakusokangamo bo bakabile ikyuma kyingi fiyo. 15Loli ugwe gwisakubakongaga abaguso ndutengano, gwisakusiligwaga bo ukangele fiyo. 16Abene bisakugomokelaga kunokuno mu ngulilo iya buna; namanga ubutulanongwa bwa kikolo kya abAmori bukali bukafikapo.”
17Bo ilisuba lingile, ningisi yigwile, popapo Abramu alinkuyibona indeko ya moto iyi yafukaga ilyosi lya moto, kangi ni ndapi sya moto isi syamulikaga, fyo filinkukisania pakati pa nyama sila syatumuligwe pabili. 18#Imbo 7.5Mwisiku lilyo Untwa alinkufinga ulufingo na Abramu alinkuti, “Ikisu iki kyo mbapele abanduyungu lwako, ukufuma Ndusoko lwa nkisu kya Egiputi ukwakufika ndusoko ulukulumba ulwa Yufrate; 19Ikisu kya bandu ba nkikolo kya Keni nikya Kenizi, nikya Kadimoni; 20ikya baHiti, ikya baPerizi nikya baRefa: 21ikya baMori, ikya baKanani, ikya ba Girigasha nikya baYebusi.”
موجودہ انتخاب:
UBWANDILO 15: NNBII
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
BAIBULO INONGWA INUNU © Bible Society of Malawi, 2017.