UBWANDILO 28
28
1Popapo Isaka alinkumbilikila Yakobu alinkulagana nagwe alinkumbula alinkuti, “Komma ukwega unkikulu ukufuma muno muno nkikolo kya baKanani. 2Sumukaga ubukege ku kisu kya Padani-aramu, ku ba nnyumba ya Betuweli, ugwise gwa nyoko, ko ukege unkikulu yumo ugwa bana ba Labani ilumbu gwa nyoko. 3Kyala Umwenemaka gosa yo akusayege ise abolosyege aba nduyungu lwako nukubabasya ukuti bise bayege kilundilo kya bandu. 4#Bwa 17.4-8Yo akusayege ugwe na ba nduyungu lwako, bo mumo alinsayile Abrahamu, ko kuti gwise ukikabege ikisu kikiki, iki ulimo lilino iki alimpele Abrahamu.” 5Mo muno Isaka alintumile Yakobu ukubuka ku kisu kya Padani-aramu kwa Labani umwana gwa Betuweli, ugwa kikolo kya Aramu. Umwene Labani yo ali ilumbu gwa Rebeka, unna gwa yu Yakobu na Esau.
Esau ikwega unkikulu uyungi
6Lilino Esau alinkusyagania isya kuti Isaka ansayile Yakobu nukuntuma ku kisu kya Padani-aramu, ukwakwega unkikulu kulakula, nukuti ankomelisye ukuti angisakwegaga undindwana uyu afumile nkikolo kya ba Kanani. 7Alinkusyangania isya kuti yope Yakobu amwitike ugwise nunna abukile ku kisu kya Padani-aramu. 8Esau alinkufikapo ukuti ugwise akabagana abakikulu ba nkikolo kya Kanani. 9Popapo alinkusumuka ukubuka kwa Ishimaeli umwana gwa Abrahamu, ko alinkwakwega unkikulu uyu ali yo Mahalata ingamu, umwana gwa Ishimaeli, ilumbu gwa Nebayote, yo alinkuya yo yumo mbakikulu aba alyegile.
Injosi sya Yakobu pa Beteli
10Yakobu alinkusumuka nkaya ka Berisheba, alinkubuka ku kisu kya Harani. Alinkwakufika pa buyo bumo, alinkugona papo ikilo kila, papo ilisuba lyalingile. 11Alinkwega ilibwe limo pa buyo bulabula, lyo alinkwiyinulila kuntu, alinkulambalala pasi alinkugona utulo. 12#Yoh 1.51Bo ikugogwa injosi alinkugubona untandalilo bakitike pasi pa kisu, gwimile guyile kufika na kumwanya; alinkubabona abandumi baKyala bikufyuka nukwikilila mu ntandalilo gula. 13#Bwa 13.14-15Popapo Untwa alinkusegelela pabupipi alinkumbula alinkuti, “Une ne Ntwa Kyala gwa ba guso, Abrahamu na Isaka. Ikisu ikyo ulambalelepo, kyo nisakukupaga ugwe palikimo na ba nduyungu lwako. 14#Bwa 12.3; 22.18Abanduyungu lwako bisakutalaga fiyo, bisakuyaga bo gu mfu gwa pa kisu kangi bisakubalanila mfisu fyosa, ifikolo lyosa ifya bandu fisakulwagilaga ulusayo mmyako ugwe, pamopene na ba nduyungu lwako, 15keta une ndinanugwe kangi nisakuyaga nanugwe kosa kuno kubuka, nisakukugomokesyaga kangi nkisu kikiki. Ndisakukutaga napanandi mbuye mbombe isi ngubulile.” 16Popapo Yakobu alinkulembuka ntulo alinkuyoba alinkuti, “Naloli Untwa alipo pa buyo ubu, loli une ngasyagenie mma.” 17Popapo alinkutetema alinkuyoba alinkuti, “Bo busisya buki ubuyo ubu! Iyi, naloli yo nyumba ya Kyala, kangi kyo kifigo kya kumwanya.”
18Popapo Yakobu alinkusumuka nulubunjubunju fiyo, alinkwega ilibwe ili aliyinulile kuntu lyo alinkulikumbila ukuya kyakukumbukilamo; alinkonelelapo na mafuta pamwanya. 19Popapo alinkubupa ubuyo bububu ingamu ya Beteli;#28.19 Beteli: ko kuti “Inyumba ya Kyala”. loli pakwanda ingamu ya kaya kala ali yo Luzi. 20Yakobu alinkufinga ulufingo alinkuti, “Linga Kyala ali nanine, linga ikunyubatila une mosa muno ngwenda; 21linga ikumba une ifyakulya nifyakufwala, lelo njile kugomoka ukwisa kumyitu ndutengano, po Untwa isakuyaga yo Kyala gwangu. 22Ilibwe lilili, ili ndikumbile apa ukuya lyakukumbukilamo lyo lisakuyaga nyumba yako gwe Kyala; po lelo fyosa ifi umbele ugwe nisakukupagulilangapo ikiyabo kimo mfiyabo kalongo.”
موجودہ انتخاب:
UBWANDILO 28: NNBII
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
BAIBULO INONGWA INUNU © Bible Society of Malawi, 2017.