Jean 3
3
Yèsu a Nicodème
1Ndo ngiɗè a zhè, te va ndohi pharisie, nzlembaɗ na Nicodème, ndo mbiaʼa a sam ndohi Juif. 2Nengaʼa a mshkè a sam Yèsu a vaɗ, a ngaɗa na: Rabbi, nga suna, ka ndo man Bi Zhiklè a zlindka ka aman ka jèngè nga. Nrkedi man ka giaʼa, ndo ngiɗè a slaha ɓai, sèi man Zhiklè a zhè a sam na kla. 3Yèsu a mʼmbeɗa na a ma: A vava, a vava i gaɗa ka: Aman ndo a yakaɗi mɓuaʼa te Zhiklè ka ɓai, a slaha man a nrka kokwar-Bi-Zhiklè ɓai. 4A Nicodème a ngaɗa na: Ndo man nhala ma, a nyakaɗi mɓuaʼa ɗè? A slaha a mʼminè a deɓa a hwaɗ mam na, a yi macecèwaʼa za dè? 5A Yèsu a ngaɗa na: A vava, a vava i gaɗa ka: Sèi ndo a yakaɗi a iyam a Mèzhèɓ Zhiklè, man bai a slaha a ndè a kokwar-Bi-Zhiklè azɓai. 6Skwi man a yaka te va ndo, ndo. Skwi man a yaka te Mèzhèɓ Zhiklè, Mèzhèɓ. 7Gar haha ka hur gèɗ ɓai, aman i gaɗa ka, sèi kin yakaɗi mɓuaʼa te Zhiklè te géɗèʼa. 8Kozlar a gi a sam man a woyaʼa. Ka tsena kuɗ nengaʼa. Aman sam man a shkè te pa, ka sun ɓai, sam man a dè a pa, ka sun ɓai. Lèmèlèmè ndo man a ya te Mèzhèɓ Zhiklè. 9A Nicodème a mʼmbeɗa na a ma: Skwi haha a gi a nkèkèkè? 10A Yèsu a mʼmbeɗa na a ma: Ka ndo njèngè ma te kokwar Israel, a ka sun bi dè? 11A vava, a vava i gaɗa ka, nga gèdè skwi man nga suna, a nga ngréɗè skwi man nga rkaʼa, a kin cè malwuɗi nga azɓai. 12Kin cè a ndav azɓai, aman i ngreda kinè skwi nte herkeda haha, te deɓaʼa aman i senda kinè skwi nte zhiklè, kin slaha kin cè a ndav dè? 13Ndo ngiɗè a dè zhiklè azɓai, sèi ndo man a shkè te zhiklè, nengaʼa kra-ndo man a zhè te zhiklè.
14Ara Moise a nzlatseda zhüzhok tʼhèshèked, ta da zlècèdè kra-ndo. 15Ko wawa man a cè nengaʼa a ndav na, a ngè-cè nshèffè a mèdèp. 16Gar haha Zhiklè a woy herkeda a ndav na, a mva ta kra nengaʼa, kra nengaʼa staɗgenè, aman ko wawa man a nco nengaʼa a ndav na, a zi azɓai, a nʼngotso nshèffè a mèdèp. 17Zhiklè a nzlündko kra nengaʼa a herkeda, a ngi kita herkeda ka ɓai. A nzlündo, aman herkeda a mbél na a géɗ nengaʼa. 18Ko wawa man a nco a ndav na, ta ga na kita a gèɗ azɓai. Aman ko wawa man a nca a ndav ɓai, kita a zhè a gèɗ nengaʼa ma, te man a nca nzlembaɗ kra Zhiklè, kra Zhiklè staɗgenè, a ndav na ɓai. 19Na haha kita: skwi nhél, sam a mshkè a herkeda, a ndohi ta woya ruva a fena skwi nhél sam, te man skwi man ta gau, ambaɓai. 20Ndo man a gi skwi man ambaɓai, a woy skwi nhél sam ɓai, a dè a sam nhelaʼa azɓai; man bai skwi man a giaʼa a ngréɗè auda. 21Aman ndo man a gi skwi nzuraʼa, nengaʼa a dè a sam nhelaʼa, a skwi man a giaʼa, a shinè auda, te man a gau ara man Zhiklè a woyaʼa.
Nenga a mbiaʼa, iyè nkèshèʼa
22Te deɓ nasa Yèsu a golahi nengaʼa to do a kokwar Judée, a ta nza a pa, a nengaʼa a ngu baptême. 23Jean ba a ngu bap-tême te kokwar Enon, ndul ndul a kokwar Salim, aman te pa iyam kumba. A to do a pa, a Jean a nʼnga ta baptême. 24Ta gsa Jean a dangi di ɓai.
25Te va golahi Jean ngiɗè ta hüno a ta verslè a ndo Juif ngiɗè, a géɗ mpèn va. 26A to do a sam Jean, a ta gaɗa na: Rabbi, ndo man a nʼnza a sam ngaya te wud woyam Jourdain, nengaʼa man ka ngra nga, anai a gi baptême, a ndohi tèlèba ta dè a sam na. 27Jean a mʼmbeɗa ta a ma: Ndo a slaha a ngècè skwi azɓai, man Zhi-klè a nva na ɓai. 28Kinè a ri kinè ndohi malwuɗihi ga, aman i gaɗa kinè, i Kristi ka ɓai, ta zlindekayè a ma nengaʼa genè. 29Ndo man a ngots medemai, nengaʼa ntsim na. Mandal ntsima a wuffè a vata, aman a tsena daʼai ntsima. Mwuffe ga aranta a zhè ma. 30Sèi nengaʼa da gra a gi a mbiaʼa a ma ma, iyè sèi i minèhi a hai a i gi a nkèshèa.
Nengaʼa man a shkè te zhiklè
31Nengaʼa man a shkè te géɗèʼa, a fena tèlèba. Ndo man a shkè tʼherkeda, ndo herkeda, a gèɗè skwi ntʼherkeda. Nengaʼa man a shkè te zhiklè, a zhè a géɗ skwi tèlèba. 32A ngreda skwi man a rkaʼa, a tsenaʼa; aman ndohi ta cè skwi malwuɗi nengaʼa azɓai. 33Aman ndo man a nco, a gi malwuɗihi, Zhiklè nzuraʼa a vava. 34Ndo man Zhiklè a zlündo, a gèɗè ma Zhiklè. Zhiklè a vi Mèzhèɓ na a livè azɓai. 35Bab kra a woy kra na a ndav na, a mva na skwi tèlèba a ri nengaʼa. 36Ndo man a nco kra Zhiklè a ndav na, a nʼngotso nshèffè a mèdèp. Ndo man a fi gèɗ a kra Zhiklè azɓai, a rkè nshèffè a di azɓai, aman Zhiklè a gi ndav a gèɗ nengaʼa.
موجودہ انتخاب:
Jean 3: MOF89
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Alliance Biblique du Cameroun 1989