Luc 23
23
Yèsu a sam Pilate
(Mt. 27,1-2, 11-14; Marc 15,1-5; Jean 18,28-38)
1A nhèyè ndo tèlèba ta slambaɗa, a ta daʼa a sam Pilate. 2A ta hüno, a ta pinèʼa, a ta gaɗa: Nga ngotso, aman a pe ta ndohi nga a wai, a ngaɗa ta: Kin pa na budu a bi ɓai. A goɗo a ri na: I Kristi, Bai. 3A Pilate a ndzhoɗo: Ka bi ndohi Juif dè? A nengaʼa a mʼmbeɗa na a ma: Ara ngèɗè ngaya.
4A Pilate a ngaɗa ta ndohi mvi skwi a Zhiklè mbibihiaʼa, a ndohi rèdèdèa: I ngatsa mali mʼmetsai a sam ndo haha ɓai. Aman tengaʼa ta gèɗè genè: 5A poko ta gèɗ auda a ndohi tèlèba, a senda ta te kokwar Judée tèlèba, a hinè te Galilée, ha mshkè haha.
Yèsu a sam Hérode
6Aman Pilate a ntsena ma Galilée, a ndzhoɗo: Kos ka ndo Galilée dè? 7Aman a ntsena, nengaʼa a shkè te kokwar bi Hérode, a nzlündo a sam Hérode. Hérode a zhè te kokwar Jérusalem a pats nasa.
8Aman Hérode a rka Yèsu, a wuffè a vata, aman nʼnzi a zhè a woya a nrkaʼa. A ntsena ma tsaɗ tsaɗ a géɗ nengaʼa; a nhur te ndav na, i da rka nrkedi ngiɗè man a giaʼa. 9A ndzhoɗo ma kumba. Aman nengaʼa a mʼmbeɗa na a ma ɓai. 10A ndohi mvi skwi a Zhiklè mbibihiaʼa, a malamhai, ta zlatsa a pa, a ta pinèʼa holholaʼa. 11Aman Hérode a sojèhi nengaʼa ta durdo, a ta ngwossaha a ta va na maslaka mbelaʼa a va, a ta zlündo a deɓa a sam Pilate. 12A Pilate a Hérode ta hüno ngi mandala a pats nasa. Pats ngiɗè ta mba a va ɓai.
Ta ngela na kita mʼmetsai a gèɗ Yèsu
(Mt. 27,15-26; Marc 15,6-15; Jean 18,39—19,16)
13Aman Pilate a mbaha ta ndohi mvi skwi a Zhiklè mbibihiaʼa, a ndohi mbibihiaʼa, a ndohi tèlèba, a ngaɗa ta: 14Kin cko ndo haha a sam ga, ara man a pe ta ndohi a wai. Na haha, i dzhoɗo, a i ngatsa mali mʼmetsi a sam ndo haha ɓai, a géɗ skwi man kin pinèʼa. 15Ko Hérode lèmèlèmè, a mʼmendkoɗa deɓa, a nʼngatsa mali mʼmetsi ɓai. 16I woya man i ndèhaʼa, te deɓaʼa i praʼa. 17Aman pèc pècèk a sam ngolala ta dzhoɗo, aman a pra ta ndo staɗ. 18A ndohi rèdèdèa tèlèba ta boho a sam staɗ, a ta gaɗa: Co a ka keɗaʼa! Pra nga Barabbas! 19Nengaʼa te dangai a géɗ man a nkeda ndo a sam rubai te kokwar mbiaʼa. 20A Pilate a mbaha ta zaʼa, ara man a woya a mpra Yèsu. 21Aman ta boho a wuɗai, a ta gaɗa: Gezlalaʼa, gezlalaʼa! 22A nengaʼa a ngaɗa ta mamakaraʼa: A ge mali mè? I ngatsa mali mʼmetsi a sam na ɓai. I woya man i ndèhèʼa, te deɓaʼa i praʼa. 23Aman ta jèjèrèʼa a nhèzlèwè mbiaʼa, a ta dzhoɗo, aman a gezlalaʼa. 24A Pilate a nʼngela kita: da gu ara man ta dzhoɗo. 25A mpra ta nengaʼa man ta feda a gi dangai a géɗ nrubai, a géɗ nkeɗe ndo, nengaʼa man ta dzhoɗo. A mva na Yèsu a ri a ndohai, a ta gi a vna, ara ndav tengaʼa man a woyaʼa.
Ta gezlala Yèsu
(Mt. 27,32-44; Marc 15,21-32; Jean 19,17-27)
26Aman ta dè, ta gso ndo ngiɗè, Simon te Cyrène, man a shkè te gi dau, a ta va na wof ngézlèl Yèsu a gèɗ, aman a nzuɓa na.
27A ndohi rèdèdèʼa kumba ta dzodzora, a ngwozai, man ta gu wobau, a ta kuɗau. 28A Yèsu a nʼngwoda ta rpa, a ngaɗa ta: Dalahi Jérusalem, kin kuɗau a géɗ ga ɓai, aman va-kudau a géɗ kinè, a géɗ wudahi kinè! 29Na haha, pats a di a shkè, aman ta gaɗa: Mwuffè a sam deli ngwozai, a sam ngwoz man kra az a ri ɓai, a sam ngwoz man ta tseda wa ɓai. 30Te deɓaʼa ta da gaɗa ta zahai: Va-wurzlka nga a gèɗ! A ta da gaɗa ta ngè-gèdhai: Va-mbeɗka nga a gèɗ! 31Aman ta gi skwi haha a sam wof mɓayaʼa, ta da gi a sam wof ngworaʼa mè?
32A ta da ndohi cèw ngiɗè a nda nengaʼa, ndohi nkèd ndo. Ta woy a ta bazl ta a nda nengaʼa.
33Aman ta shkè a sam man ta baha na ‘sam vatasl gèɗ’ ta gezlala a pa. A ndohi nkèd ndo, staɗ te ri mandai, ngiɗè te ri gula nengaʼa. 34A Yèsu a ngaɗa: Bab ga, pra ta mali ta, amari ta sun skwi man ta gia ɓai. A tengaʼa ta kezla maslaka nengaʼa, a ta gu jimèr a géɗèʼá.
35A ndohi ta zlatsa a pa a ta rkaʼa. A ndohi mbibihiaʼa ta ngwossaha, a ta gaɗa: A mʼmbel ta ndohi ngiɗè. Aman nengaʼa Kristi, ndo man Zhiklè a ngo-tskoɗauda da mbela va na a ri na! 36A sojèhi ba ta ngwossaha, a ta shke, a ta cko iyam mbertéktékaʼa, a ta gaɗa: 37Aman ka bi ndohi Juif, mbela va ngaya a ri ngaya!
38A ta Windo ma a géɗ nengaʼa: Nengaʼa bi ndohi Juif.
39Staɗ te va ndohi nked ndo, man ta gezlal ta, a dérɗèʼa, a ngaɗa: Ka Kristi ka bi dè? Mbela va ngaya a ri ngaya, a ka mbel nga ba! 40A ngiɗè a nʼnga na ndzoan, a mʼmbeɗa na a ma: Ka ba, ka gi zlau Zhiklè azbi dè? Ka ngots kita lèmèlèmè. 41Nga, ta ga nga kita zuraʼa a géɗ skwi man nga gau. Aman nengaʼa a nʼnga mali bai. 42A ngaɗa na Yèsu: Heryè, Bai, aman ka dè a kokwar Bi ngaya! 43A Yèsu a ngaɗa na: A vava, i gaɗa ka, a patsna ka da zhè a sam mbelaʼa a nda iyè.
Mʼmetsi Yèsu
(Mt. 27,45-56; Marc 15,33-41; Jean 19,28-30)
44A géɗ pats, ruva a gai a géɗ herkeda tè-lèba, ha pats tsaf kata. 45A pats a nde na a zhiklè, a maslaka te gi Zhiklè a nkurats na te va.
46A Yèsu a mboho a wuɗai: Bab ga, i vi mèzhèɓ ga a ri ngaya! Aman a ngoɗ arsa, a mʼmets na.
47Aman bi sojè a rka skwi man a ga, a nslubordo Zhiklè, a ngaɗa: A vava, ndo haha ndo nzuraʼa.
48A ndohi rèdèdèʼa tèlèba man ta shkè a samaʼa, a mpi diaʼa, ta pi ri a gèɗ, a ta men ta a deɓa a ngwai. 49A mandalahi Yèsu, a ngwozi man ta dzodzora te Galilée, ta zlatsa dra, a ta pu dai.
Ta ra Yèsu
(Mt. 27,57-61; Marc 15,42-47; Jean 19,38-42)
50Na haha, ndo ngiɗè, nzlembaɗ na Joseph, ndo ncemma, ndo man amba a nzuraʼa, a zhè a sam ncèmma tengaʼa; a skwi man ta gau, ambaha nengaʼa ɓai. 51Nengaʼa te Arimathée, kokwar ndohi Juif ngiɗè. Nengaʼa ba a zhèr kokwar Bi Zhiklè. 52A ndo a sam Pilate, aman a njhèdè va Yèsu. 53Aman a ckoɗahai ma, a mpaɗaʼa, a bata mbelaʼa, a mfeda a gi dzavi te za, a sam man ta fa ndo a pa di bai. 54A pats ntil Pâques, nciɗ samaʼa pats nshèk va.
55A ngwozi ngiɗè, man ta shkè te kokwar Galilée a nda Yèsu, ta dzodzor Joseph, a ta rka gi dzavai, man ta feda va Yèsu a pa. 56Aman ta shkè a deɓa, ta tül ɓurdi a mbar; a pats nshèk va ta sok va, ara man ma nkwèr Zhiklè a gaɗa.
موجودہ انتخاب:
Luc 23: MOF89
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Alliance Biblique du Cameroun 1989