لوقا 23
23
عیسا محکومٚ بِه کی بیمیره
1بأزون شورأ آدمأن همٚتأن ویریشتٚده، عیسایَ ببردٚد «پیلاتُس»، یوهودیه رومٚ فرمأندأرٚ ورجأ 2و خوشأنی شیکأیتَ اونی ضد وأگویا بوکودٚد و بوگفتد: «اَ مردأی مردومَ اَنتیریک کونه کی رومٚ دولتَ مألیأت فأندٚد و گه کی مسیح ینی اَمی پأدیشأ ایسه.»
3پیلاتُس عیسا جَا وأوٚرسِه: «آیا تو مسیح، یوهودٚ پأدیشأ ایسی؟»
عیسا جوأب بٚدأ: «تو خودت بوگفتی.»
4پیلاتُس پیله کأهینأن و جِمئیت ور وأگردسته و بوگفته: «خُب، اَنکی جورم نییٚه!»
5اوشأن حقٚ سعیٚ اَمرأ بوگفتد: «ولی اون یوهودیه سرتأسرٚ شرأ جٚه جلیل تأ اورشلیم هر جأ کی شِه، دولت رومٚ ضد شورش برپأ کونه.»
6پیلاتُس وأوٚرسِه: «مگه اون جلیل شین ایسه؟»
7وختی اَ موضو جَا یقین بیأفته، فرمأن بٚدأ کی اونَ ببرد هیرودیسٚ ورجأ، چونکی جلیلٚ اوستأن، هیرودیس پأدیشأیی مرزٚ میأن نٚهأ بو. اَطو بو کی هیرودیس او روجأن، عَید وأسی اورشلیم ایسأبو. 8هیرودیس عیسا دِئنٚ جَا خٚیلی خوشألٚ بوسته چونکی اونی دروأره خٚیلی چیزأن بشتأوسته بو و اومیدوأر بو کی خو چومأنٚ اَمرأ ایتأ جٚه اونی موجیزه‌یأنَ بیدینه. 9اون جوروأجور سوألأن عیسا جَا وأوٚرسِه امّا هیذره جوأبی نشتأوسته.
10اَ مأبین، پیله کأهینأن و البأقی دینٚ عألیمأن بأمؤد و بینأ بوکودٚد عیسایَ بُهتأن زِئن. 11هیرودیس و اونی سروأزأنٚم اونَ رخشنٚ گیفتٚد و فأش بٚدأد و ایتأ پأدیشأیی لیوأسٚم اونی جأن دوکودٚد و پیلاتُس ورجأ وأگردأنِد. 12هو روج پیلاتُس و هیرودیس، خوشأنی دوشمنی‌یَ کنأر بٚنأده و کس‌کسٚ اَمرأ آشتی بوکودٚد.
13بأزون پیلاتُس، پیله کأهینأن و یوهود پیله کسأن و مردومَ دؤخأد 14و اوشأنَ بوگفته: «شومأن اَ مردأکٚ موتهم بوکودید کی رومٚ دولتٚ ضد شورش بوکوده و می ورجأ بأوٚردید. من شیمی ورجأ اونی جَا وأورس وُورس بوکودم و بفأمٚستٚم کی شومأن اَلکی گب زنیدی 15هیرودیسٚم هنٚ بٚفأمٚسته و هنٚ وأسی اونَ اَمی ورجأ وأگردأنِه. اَ مردأی کأری نوکوده کی اعدام بٚبه. 16اَنٚ وأسی، فقد فرمأن دٚهٚم کی اونَ شلأق بٚزنٚد و بأزون اونَ وِلَ کونٚد.» 17(عَیدٚ رسم و روسومأت وأسی ایتأ زندأنی عَیدٚ وخت آزأدٚ بوستی.)#23:17 آیه ۱۷ قدیمی بینیویشته‌یأن میأن بینیویشته نوبوسته.
18امّا مردوم همٚتأن ایجگره اَمرأ بوگفتد: «اونَ اعدام بوکون و باراباسَ اَمِرِه آزأدَ کون!» 19(باراباس قتل و شورشٚ وأسی اورشلیمٚ میأن زندأنی بوبوسته بو.) 20پیلاتُس ایوأر دِه مردومٚ اَمرأ گب بٚزِه، چونکی خأستی عیسایَ وِلَ کونه. 21امّا اوشأن بولندتر ایجگره بٚزِده: «اونَ صلیبٚ سٚر بٚکٚش! اونَ صلیبٚ سٚر بٚکٚش!»
22سیومی وأر پیلاتُس بوگفته: «چٚره؟ مگه اون چی گونأیی بوکوده؟ من دلیلی نیدینٚم کی اونَ مرگٚ رِه محکوم بوکونم. فرمأن دٚهٚم کی اونَ شلأق بٚزٚنٚد و بأزین وِلَ کونٚد.» 23امّا مردوم حقٚ سعی و بولند ایجگره زِئنٚ اَمرأ بٚخأستٚد کی اون صلیبٚ سٚر بشه و آخرپٚسی اونی بوبوسته کی ایجگره اَمرأ بٚخأستٚد 24و پیلاتُس اوشأنی خأسته اَمرأ عیسا اعدام بوستنَ فرمأن بٚدأ. 25بأزون، باراباسَ کی شورش و بوکوش بوکوشٚ وأسی زندأن ایسأبو، وِلَ کوده و عیسایَ اوشأنی دٚس بیسپأرده کی هر چی خأیٚد اونی اَمرأ بوکونٚد.
عیسا صلیب سٚر شِه
26رومی سروأزأن عیسایَ ببردٚد. هو زمأت کی شؤئؤندوبود ایتأ مردأی کی زیمینٚ سٚر وأگردستأندوبو و اونی ایسم شمعونٚ قیروأنی بو، بیگیفتٚده و صلیبَ اونی کؤل بٚنأده، اونَ وأدأشتٚد کی اونَ عیسا دونبألسر ببره. 27ایتأ پیله جِمئیت اونی دونبألسر رأ دکفتد و خٚیلی زنأکأنٚم اوشأنی میأن ایسأبود کی اونی رِه گریه زأری کودأندوبود و خوشأنی سینه تأنَ زِئندوبود!
28عیسا خو دیمَ او زنأکأنٚ ور وأگردأنِه و بوگفته: «اَی اورشلیمٚ دوخترأن، می وأسی گریه نوکونید؛ خودتأن و شیمی زأکأن رِه گریه بوکونید! 29چونکی او روجأن اَیِه کی مردوم گده: "خوشبحألٚ او زنأکأنی کی زأی نأرٚده و او رٚحِمأن کی هی وخت فأرق نوبوستٚد و او سینه‌یأن کی هی وخت شیر فأندأده!" 30و کوهأنَ ایلتیمأس کونٚد کی "اَمی رو بٚکفید" و تپه‌یأنَ کی "اَمٚرَه لأ بدید." 31چونکی اگه اَجور چیزأن وختی کی او دأر سبز ایسه، ایتفأق دکفه، پس او وخت کی دأر خوشک بٚبه، چی ایتفأق دکفه؟ اَ گبأنٚ قصد اَن ایسه کی «اگه من کی ایتأ زٚنده دأر ایسٚم اَ کأرأنَ می اَمرأ بوکودٚد، شیمی سٚر کی ایتأ خوشکٚ دأر ایسید چی اَیِه؟»
32دوتأ قأتیلٚم ببردٚد اونی اَمرأ اعدام بوکونٚد. 33وختی فأرٚسِده ایتأ جأ کی جومجومه نأم دأشتی اونَ اویَه او دوتأ قأتیلٚ اَمرأ صلیب جؤر مِخکوب بوکودٚد، ایتأ اونی رأستٚ ور و اویتأیَ اونی چپٚ ور. 34اَ وضعٚ میأن، عیسا بٚفرمأسته: «اَی پئر، اَشأنَ بٚبٚخش، چونکی نأنٚد چی کودأندرد.» رومی سروأزأن عیسا لیوأسأنٚ وأسی قرعه تأوٚدأد و خوشأنٚ میأن سأم بوکودٚد.
35مردوم ایسأبود و فأندرستأندوبود. قوم پیله کسأنٚم ایسأبود، اونی رِه خنده دشکنِده و رخشنٚ گیفتٚد و بوگفتد: «اَیتأ اویتأیَ نیجأت دٚئی، هسأ اگه رأس‌رأسِی مسیح و خودا اینتخأب بوبوسته ایسه خؤرَه نیجأت بٚده!»
36سروأزأنٚم اونَ رخشنٚ گیفتٚد، خوشأنی تورشٚ شرأبَ اونَ تعأروف بوکودٚد 37و بوگفتد: «اگه تو یوهود پأدیشأ ایسی، تٚرَه نیجأت بٚدٚن!» 38اونی سٚرٚ جؤر، صلیب سٚر ایتأ تخته بوکوبٚستٚد کی اونی رو بینیویشته بوبوسته بو: «اَن ایسه یوهودٚ پأدیشأ!»
39ایتأ جٚه او آدم کوشأن کی عیسا اَمرأ صلیبٚ سٚر فأکشِه بوبوسته بو، متلکٚ اَمرأ اونَ بوگفته: «اگه تو مسیح ایسی، چٚره تٚرَه و اَمٚرَه نیجأت نٚدی؟»
40امّا اویتأ گونأکأر اونَ شمأتٚت بوکوده و بوگفته: «حتّا هسأیٚم کی مٚردنٚ محکومٚ بوستی خودا جَا نٚتٚرسی؟ 41اَن اَمی حقٚ کی بیمیریم، چونکی گونأ بوکودیم. امّا اَ مردأی ایتأ گونأیٚم نوکوده.» 42بأزون خو دیمَ عیسا ور وأگردأنِه و بوگفته: «اَی عیسا، وختی تی پأدیشأیی‌یَ سٚر بیگیفتی مٚرَه‌یٚم خأطر بأوٚر!»
43عیسا جوأب بٚدأ: «خأطر جم بوبو کی تو هه ایمرو می اَمرأ بهشتٚ دورون اَیی!»
عیسا مٚردن
44ظهرٚ وخت، تومأمٚ او مملکتَ ظولومأت پورَ کوده 45و خورشیدٚ سو جٚه دٚتأوٚستن بٚکفته هو وخت معبدٚ قورصٚ پرده کی موقدسٚ جأجیگأ میأن وأرگأده بو جٚه وٚسٚط دو تیکه بوبوسته.
46بأزون عیسا ایجگره اَمرأ بوگفته: «اَی پئر، می روحَ تی دٚس ایسپأرم.» اَنَ بوگفته و بٚمٚرده.
47او رومی افسر کی مأموریت دأشتی کی حوکمَ ایجرأ بوکونه، وختی اَنَ بیدِه خودایَ عیبأدت بوکوده و بوگفته: «رأس‌رأسِی اَ مردأی بی‌گونأ بو!»
48اوشأنی کی تمأشأ کودنٚ وأسی جمَ بوسته بود، وختی اَ مأجرأیأنَ بیدِده، غورصه‌دأرَ بوستٚد و خوشأنی سٚر و سینه زِئن اَمرأ، خوشأنی خأنه‌یأنٚ ور وأگردٚستٚد. 49اَ مأبین، عیسا ریفِقأن و او زنأکأنی کی جلیل جَا اونی دونبألسر بأمؤ بود، دورتری بئیسأد و فأندرستأندوبود.
عیسا جنأزه‌یَ بیگیلَ کودن
50اَ میأن ایتأ خوروم و دین و ایمأندأرٚ مردأی ایسأبو یوسف نأم کی جٚه یوهودٚ شورأ پیله کسأن بو، 51امّا اوشأنی تصمیم و کأرٚ اَمرأ موأفقت نوکوده بو. اون رأمه شهرٚ شین بو کی یوهودیه میأن نٚهأ بو، خٚیلی شوق و ذوق دأشتی کی خودا پأدیشأیی فأرٚسِه. 52اون پیلاتُس ورجأ بوشؤ و عیسا جنأزه‌یَ بٚخأسته. 53وختی ایجأزه فأگیفته عیسا جنأزه‌یَ جٚه صلیبٚ جؤر، بیجیر بأوٚرده و ایتأ کفنٚ دورون وأپِخته و ایتأ قبرٚ دورونی کی ایتأ بتأشته کوه میأن نٚهأ بو و تأ هسأ هیکسَ اونی دورونی نٚنأبود، بٚنأ. 54تومأمٚ کفن کودن و بیگیلَ کودن مرأسیم او جومأ بعدظُهر انجأم بوبوسته. یوهودیأن تومأمٚ کأرأنی کی شَبّأتٚ تعطیلٚ روج، وأستی انجأم بٚدأبید جومأ بعدظُهر روج آمأده کودأندوبود.
55او زنأکأنی کی جٚه جلیل عیسا دونبألسر بأمؤده، یوسفٚ اَمرأ بوشؤ بود و قبرٚ جأیَ بیدِ‌بود و فأندرستٚد کی عیسا جنأزه‌یَ چوطو اونی دورونی بٚنأده. 56بأزین وأگردٚستٚد بٚخأنه و زومأت و خوشبو عطرأنَ حأضیرَ کودٚد کی او زمأت رسم اَمرأ جنأزه‌یَ وأسینٚد کی زود فأسیدَ نٚبه و بو دنکفه. امّا وختی زومأت حأضیرَ بوسته دِه شبّأت روج فأرٚسِه بو. پس یوهودٚ دینٚ قأنونٚ وأسی،او روج ایسترأحت بوکودٚد.
موجودہ انتخاب:
لوقا 23: GLK_NT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2024 Transform Iran