Sealm 3
3
Sealm III
Ðysne þriddan sealm Dauid sang þa he fleah Absalon his sunu, and seofode þa yrmðe to Drihtne; swa deþ ælc þæra manna þe þisne sealm singð, his sylfes earfoðu, ægðer ge modes ge lichaman, he seofað to Drihtne; swa dyde Crist þonne he þysne sealm sang: be Iudeum he hine sang and be Iudan Scarioth þe hine læwde. He seofode to Drihtne:
1Eala, Drihten, hwi synt swa manige minra feonda,
þara þe me swencað;
for hwi arisað swa mænige wið me?
2Monige cweðað to minum mode
þæt hit næbbe nane hæle æt his Gode.
3Ac hit nis na swa hy cweðað, ac þu eart butan ælcum tweon,
min fultum and min wuldor, and þu ahefst upp min heafod.
4Mid minre stemne ic cleopode to Drihtne
and he me gehyrde of his þam halgan munte.
5Þa ongan ic slapan, and slep, and eft aras,
for ðam þe Drihten me awehte and me upparærde.
6For ðam ic me nu na ondræde þusendu folces,
þeah hi me utan ymbþringen.
7Ac ðu, Drihten, aris and gedo me halne,
for þam þu eart min God.
8For ðam þu ofsloge ealle þa ðe me wiðerwearde wæron butan gewyrhton,
and þara synfulra mægen þu gebryttest,
for ðam on ðe ys eall ure hæl and ure tohopa;
and ofer þin folc sy þin bletsuncg.
موجودہ انتخاب:
Sealm 3: ASPsa
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.