مَتّی 6
6
صِدقَه دائِن
1«حُواستو بو گه کارَل خوتونِ وَر چیَمَل مردِم نارینونَ جا، وَه ایی نیّتَ گه هُمَه بوئینِن، اَرّ نه اَجِری اَرتَک باوَه ووژتو گه ها نوم آسمون‌اِر، نِرینو.
2«اِسَه وخدی گه صِدقَه مِینو، نیَنی اَر گالَه، هُنَ گه ریاکارَل اِنوم عَبادتگال یهود ئو کویچه‌لَ مَهَن تاگَه مردِم اَژینو تیَریف بِهَن. حخیختاً، موشِم‌ئونتو، اونَل اَجِر ووژو گِرتونَ. 3اِسَه تو وخدی صِدقَه مِین، هُنَ بِهَه گه دس چپِت اژ اَ چیئَه گه دس راستَ مِهِه، باخَوَرا ناو، 4تاگَه صِدقَه تو اِ خفا بو؛ اَسَه باوَه آسمونی تو گه خفاءَ موئینی، اَجِرتَ مِئون.
دوعا
5«وخدی دوعاءَ مِهِین، چُی ریاکارَل ناو، اَرِیَگه اُوُ دوس دیرِن بوسِن اِنوم عَبادتگال ئو سر کویچَه‌ل ئو دوعا بِهَن تاگَه مردِم بوئینِنو. حخیختاً، موشِم‌ئونتو، یوئنَ اَجِر ووژو گِرتونَ. 6مِنتائای تو، وخدی دوعاءَ مِهِین بِچُ اِنوم اتاق ووژِت، دِرَهَه بوئن ئو اَرتَک باوَه ووژِت گه ها خفااِر، دوعا بِهَه. اَسَه باوَه آسمونی تو گه خفاءَ موئینی، اَجِرتَ مِئون.
7«هَمیش، موقَع دوعا کِردِن، یِمِجو قصَه‌ل پُیچ نوشِن، هُنَ گه قومَل بِت‌پِرَسَ مَهَن، اَرِیَگه وَه لا ووژونا فگِرَ مَهَن اَرّ گُرّان بوشِن، دوعالو قبولَ ماو. 8اِسَه چُی اونَل نوئن، اَرِیَگه باوَه آسمونی هُمَه وِر اژ یَگه اژ اوتو بِ، هَوَجَه‌لتونَ مَذانی.
9«اِسَه هُمَه هُنَ دوعا بِهَن:
«اِاِ باوَه ایمَه گه هاینِ آسمون‌اِر،
نُم تو مقدّس بو.
10پاتِشائی تو بای.
خواس تو، هُنَ گه اِنوم آسمو اَنجومَ ماو،
اَررُی زمین‌یش اَنجوم بِگِری.
11ایمِرو نُو روژی ایمَه بِ‌ئونمو.
12قَرتَل ایمَه بوئَشخِن،
هُنَ گه ایمِه‌یش قَرت‌دارَل ووژمونَ
موئَشخیم.
13ئو ایمَل اِنتحو نِهَه،
بلکِم اژ اَ شریرَ آزادمو کَ.
اَرِیَگه پاتِشائی ئو قدِرت ئو جِلال،
تا ابد هِن تونَ. آمین»
14اَرِیَگه اَرّ خطائَل مردِم بوئَشخِنینو، باوَه آسمونی هُمِه‌یش، هُمَه موئَشخِنی. 15مِنتائای اَرّ خطائَل مردِم نوئَشخِنینو، باوَه هُمِه‌یش خطائَل هُمَه نِموئَشخِنی.
روژی
16«وخدی روژیَ مَگِرینو، چُی ریاکارَل پِرچَه شرتو نای، اَرِیَگه اونَل دَم ئو پِتَ مَنِن اَر یَک تاگَه اَرتَک کسَلی‌تِر، ووژونَ روژی‌دار نِشو دَن. حخیختاً، موشِم‌ئونتو، گه اونَل اَجِر ووژو گِرتونَ. 17مِنتائای تو وخدی روژیَ مَگِرین، روین بِساءِ سر ووژِت ئو نوم‌رُی ووژِت بشور 18تاگَه اَر کسَلی‌تِر دیار ناو گه هاینَ روژی، بلکِم اَر باوَه آسمونی تو گه ها خفااِر، ئو باوَه آسمونی تو گه خفاءَ موئینی، اَجِرتَ مِئون.
گنج اِنوم آسمو
19«اَررُی زَمی گنج جیَم نیَن، جای گه پید ئو ژَنگ، ضِرَدَ مَرَسِنِتی‌ئون ئو دُزِلَ مان اِنوم ئو مُئزِنی. 20بلکِم گنج ووژتون اِنوم آسمو جیَم دَن، اَر اورَه گه پید ئو ژَنگ ضِرَدئون نِمَرَسِنتی ئو دُزَل نِمان اِنوم ئو نِمُئزِنی. 21اَرِیَگه هر جا گنج تو هَس، دل تونیش هار اورَه.
22«چیَم، چراخ لارَ. اَرّ چیَمِت آزا بو، کُل لاریشِت روشتاآ ماو. 23مِنتائای اَرّ چیَمِت گَن بو، تیَریکی کُل لارت اِرامَگِری. اِسَه اَرّ نُیری گه ها نوم تون‌اِر تیَریکیَ، چه تیَریکی کَلِنگی کَ!
24«هُیچ کس نِمَتونی خِلمت اژ دو اَرباو بِهِه، اَرِیَگه یاگَه اژ یَکی بیزارَ ماو ئو اَ یَکَ دوس دیری، ئو یاگَه گیو ووژَ مِهِئَه خِر یَکی ئو اَ یَکَ خوارَ مِهِه. نِمَتونینو هم خِلمت اژ خدا بِهِینو، هم خِلمت اژ پیل.
دلتونِ هول ناو
25«اِسَه موشِم‌ئونتو، دلتونِ هول زِنِه‌ی ووژتو ناو گه چَه بیرینو، یاگَه چَه خُرّ دِینو، ئو نه دلِ‌هول لار ووژتو گه چَه بِهِینونِ وَر. مَر زِنِه‌ی اژ خوراک ئو لار اژ جِنِک مِهمتِر نیَ؟ 26سِیل بِهَن اَر مَلَل آسمو گه نه مَکارِن ئو نه دروءَ مَهَن ئو نه اِنوم اَمار جیَمَ میَن، وَه ایی حالا باوَه آسمونی هُمَه روژی اونِلَ مِ. مَر هُمَه فِرَه اَرزشددارتِر اژ اونَل نیئینو؟ 27کُماین اژ هُمِه‌ءَ گه بتونی وَه دلِ‌هولی، ساتی باوژی اَرسر عمِر ووژ؟»
28«ئو اَرّا هاینونِ هول جِنِک‌اِر؟ سِیل کَن اَر گُلَل بیاوو گه چطور رشدَ مَهَن؛ نه زیَمَتَ مَکیشِن ئو نه مَرِسِن. 29وَه ایی حالا موشِم‌ئونتو گه جُ‌جُ سلیمان پاتِشایش وَه کُل جِلالیا چُی یَکی اژ اونَل هُنَ اِرنَرازیا. 30اِسَه اَرّ خدا سُزَه بیاوو گه ایمِرو هَسی ئو صوءَ مَکُوء اِنوم گُئَر، هُنَ مَپوشِنی، مَر هُمَل، اِاِ سُس‌ایمونَل، بیتِر اژ یَه نِمَپوشِنی؟
31«اِسَه دلتونِ هول ناو ئو نوشِن چَه بیریم یاگَه چَه خُرّ دِیم ئو یاگَه چَه بِهِیمونِ وَر. 32اَرِیَگه قومَل بِت‌پِرَس هانَ دُم هُنَ چیئَلیکا، مِنتائای باوَه آسمونی هُمَه مَذانی گه کُل یوئنَ هانِ کَلتو. 33بلکِم اول‌بار وَه مِنِی پاتِشائی خدا ئو عدالت اوآ بوئن، اَسَه کُل ایی چیئِل‌یشَ بَشخیا ماوئونتو. 34اِسَه هول صوتون اِرانَگِری، اَرِیَگه صو دلِ‌هولی ووژ دیری. سخدیَل ایمِرو اَرِه ایمِرو بسَ!
موجودہ انتخاب:
مَتّی 6: LBT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
@ 2024 Korpu Company