Matalikilo 6
6
Bantu mbobakenjila mububi
1Bantu ndibakafula akwikala mumisena ipusenepusene ya pacishi ca panshi, banakashi kabashalwa. 2Ono bana bakwe Lesa basankwa bakabona ayi banakashi abo mbabotu. Aboobo bakeeba baabo mbobakasala. 3Lyalo Mwaami Lesa wakaamba ayi, “Mushimu wangu teshi ukapikishanye abantu lyoonse ceebo balafwa. Kuswa sunu teshi bakekale myaaka iinda 120.” 4Munshiku isho akunembo, kwakalinga basankwa abanakashi bapolomene pacishi ca panshi abo bakashalwa kubanakashi bakeebwa kubana bakwe Lesa. Mbobaabo bakalinga kupukite kuciindi ca nkondo alimwi bakalinga nshenkalakata shiindaawo.#Jobo 1:6; 2:1#Shakube 13:33
5Ono Mwaami Lesa ndyaakabona mbuli womwi awomwi pacishi ca panshi mbwaakalinga mububi, akubica kwa miyeeyo yabo ciindi coonse, 6wakafwa nsoni kwaamba ayi wakalenga bantu akubabika pacishi ca panshi. Mpeeke cakamucisa abuumbi kumoyo. 7Aboobo wakaamba ayi, “Ntoonyonyoola bantu abo mbondakalenga, pantu pomwi abanyama, shilongolo shinene atuniini sheenda panshi shoonse alimwi abayuni bauluka, mukwiinga canensha nsoni kubalenga.” 8Nakubi boobo Mwaami Lesa wakalinga kukondetwe abuumbi pali Nowa.#Mate 24:37; Luka 17:26; 1 Pita 3:20
Shapali Nowa
9Ici ncikani cakwe Nowa. Nowa wakalinga muntu ululeme pabantu bamuciindi cakwe, alimwi wakalinga kweenda mubushicibusa aLesa.#2 Pita 2:5 10Nowa wakalinga kucite baana basankwa botatwe, shemu, Amu alimwi aJafeti. 11Ono bamucishi ca panshi bamwi boonse bakenjila mucibiibi pameenso akwe Lesa alimwi bakalinga kucayana abuumbi koonse koonse. 12Lesa wakabona cishi ca panshi mbocakalinga canjila mucibiibi mukwiinga bantu boonse bakalinga kucitabo shibiibi.
13Lesa wakaambila Nowa ayi, “Ndayeeya kumanisha buumi bwa bantu boonse. Ntoobanyonyoola cakubamaninisha, ceebo cishi ca panshi cesulabo buumi bwabo bwabulwani. 14Lipangile bwaato bunene kuswa kushisamu shibotu. Upange shipinda mukati akushishingula manenekela mukati apansengwe. 15Upange bulaampa mamita ali 133, mubufwaafwi mamita ali 22, akuya mwiculu mamita ali 13. 16Ubupangile ciluli akushiya musena wa masentimita ali 44 pakati ka ciluli alubasu lwa bwaato. Ubuyakile mindando yotatwe ya shipinda, umwi panshi, umwi pakati aumwi peculu, akubika mulyaango mulubasu. 17Ndaakuleta muyoba pacishi ca panshi kwaamba ayi ukanyonyoole shintu shoonse shuumi. Shintu shoonse shiyoya sha pacishi ca panshi shilaakufwa. 18Sombi ntoopanga cipangano awebo. Ukenjile mubwaato amukaako, bana bako abamakaabo, 19Ukenjishe mucende ampwishi mumushobo womwi awomwi wa banyama, kwaamba ayi batakaloobi. 20Abalo bayuni bobilo bobilo mumushobo womwi awomwi, banyama bobilo bobilo banene abaniininiini balaakwisa kuli ndiwe ayi bataloobi. 21Ukanyamune shakulya sha mushobo uli woonse shaako ashaabo.” 22Nowa wakacita shoonse Lesa nshaakamwaambila.#Ebulu 11:7
موجودہ انتخاب:
Matalikilo 6: BBBLI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Lenje Bible with Deuterocanon © Bible Society of Zambia, 2003.