Joni 1
1
Liswi mbolyakaba muntu
1Kumatalikilo a cishi uyo wiitwa ayi Liswi wakalingaako kale. Uyu Liswi wakalinga pantu pomwi aLesa alimwi nguLesa. 2Kuswabo kumatalikilo wakalinga aLesa. 3Lesa wakalenga shintu shoonse kwiinda muli nguwe. Naatalinga nguwe naakwiinga taaku cakalengwa nabi comwi. 4Muli nguwe momwakalinga buumi alimwi buumi ubu bwakalinga mumuni wa bantu. 5Mumuni uyo ulamunika mumunshinshe, sombi munshinshe tookoonshi kuukoma.
6Lesa wakatuma muntu wakwe wiitwa ayi Joni.#Mate 3:1; Maako 1:4; Luka 3:1-2 7Uyo wakesa mukuba kamboni wa Mumuni, kwaamba ayi bantu boonse banyumfwe makani akwe akwaashoma. 8Lakwe mwiine taakalinga Mumuni, sombi wakesa mukuba kamboni wa Mumuni. 9Uyu ngoMumuni wancinencine wakesa mucishi ca panshi mukumunikila bantu boonse.
10Lakwe wakalingaamo mucishi cino alimwi cishi cakalengwa kwiinda muli nguwe. Nakubi boobo bantu ba mucishi tabakwe kumwishiba. 11Wakesa mucishi cine mishaabo, sombi bene mishaabo baanji tabakwe kumutambula. 12Sombi kubaabo boonse bakamutambula akumushoma, wakabapa nkusu shakuba bana bakwe Lesa. 13Kuba bana bakwe Lesa uku, takukwe kuswa kubashali. Nkokwaamba ayi takukwe kuswa mukuyanda kwa muntu, sombi bakashalwa munkusu shakwe Lesa.
14Mpeeke Liswi ili lyakaba muntu akwisa mukwikala pakati kesu, kaaswite luse alushinisho. Twakabona bulemu bwakwe ubo mbwaakatambula ceebo wakalinga Mwaana eenkabo wa baIshi.
15Joni wakapa bukamboni pali nguwe akoolobesha ayi, “Ngowooyu uyo ngondakalinga kwaamba ayi, ‘Utoosa pesule lyangu uleendaawo nkusu pali ndime mukwiinga wakalingaako nebo kaantana kushalwa.’ ” 16Muluse lwakwe luunji swebo twakatambula shoolwe shiinji abuumbi. 17Mukwiinga Lesa wakapa Milawo kwiinda muli Mose, sombi luse alushinisho shakesa kwiinda muli Jesu Klistu. 18Taaku muntu wakabonaawo kale Lesa, sombi Mwanaakwe wakashalwabo eenka, uyo usunikwi abuumbi abaIshi, ngowakalengesha ayi ashibikwe.
Bukamboni bwakwe Joni Mubombeki
(Mate 3:1-12; Maako 1:1-8; Luka 3:1-18)
19Ono ubu mbobukamboni bwakwe Joni baJuda ba kuJelusalemu ndibakatuma bapailishi alimwi abene Lefi bamwi kumwiipusha ayi, “Ino ndiwaani?”
20Joni taakwe kukaka kukumbula, sombi wakakumbula cakutashisa ayi, “Nebo teshi ndime Usalitwe wakwe Lesa.” 21Bakamwiipusha ayi, “Ino ndiwaani? Sa ndiwe Elija?” Lakwe wakakumbula ayi, “Sobwe, teshi ndime Elija.” Bakamwiipusha alimwi ayi, “Sa ino ndiwe mulaluki ngotutoolindila ulya?” Sombi wakaamba ayi, “Sobwe.”#Mala 4:5; Duto 18:15, 18 22Lyalo bakamwiipusha ayi, “Ino ndiwaani? Ceebo tulyeelete kuya mukulwiita baabo batutuma. Ono omwiine ulaamba ayi ndiwaani?” 23Lyalo Joni wakakumbula kwiinda mumaswi akaamba Isaya mulaluki mukulukulu ayi,
“Ndime muntu umwi utokoolobesha muluyanga ayi,
‘Amululamike nshila ya Mwaami!’ ”#Isa 40:3
24Abo bantu bakalinga kwiipusha Joni, bakabatuma mbaFalisi. 25Bakeepusha Joni ayi, “Ono na teshi ndiwe Usalitwe wakwe Lesa, Elija nabi mulaluki ngotutoolindila ulya, utoobombekelanshi?” 26Joni wakabakumbula ayi, “Nebo ntoobombekabo amaanshi, sombi pakati kanu mpwaali uyo ngomuteshi. 27Lakwe ngootoosa pesule lyangu, sombi nebo nsheelete akukotama kwaamba ayi ŋangulule nsapato shakwe.” 28Ishi shoonse shakacitikila mundabala ya Betani kulubasu lwakwicwe lya Mulonga wa Joodani, uko Joni nkwaakalinga kubombekela.
Jesu Mwanaambelele wakwe Lesa
29Mpeeke bushiku bwakaboolaawo Joni wakabona Jesu keesa kuli nguwe. Lyalo wakoolobesha ayi, “Amubone Mwanaambelele wakwe Lesa uyo ukusha shibiibi sha bantu ba mucishi coonse ca panshi! 30Uyu, ngowoolya ngondakalinga kwaamba ndindakaamba ayi, ‘Utoosa pesule lyangu uleendaawo nkusu pali ndime mukwiinga lakwe wakalingaako nebo kaantana kushalwa.’ 31Nebo palwaangu nshindakalinga kumwishi, sombi ndakesa mukubombeka amaanshi kwaamba ayi bamwishibe bene Isilaeli.”
32Joni wakapa bukamboni mukwaamba ayi, “Ndakabona Mushimu Usalashi kauswa kwiculu anga nimpolobe akwikala pali nguwe. 33Nebo palwaangu nshindakalinga kumwishi, sombi Lesa uyo wakantuma mukubombeka amaanshi ngowakandwiita ayi, ‘Uyo ngweshi ukabone waselukilwa Mushimu Usalashi akwikala pali nguwe, ukeshibe ayi ngowooyo ubombeka aMushimu Usalashi.’ 34Ono nebo nemwiine ndalibonena alimwi nceceeco ncendaambila cakutatonsha ayi, ‘Uyu nguMwanaakwe Lesa!’ ”
Bashikwiiya bakwe Jesu bataanshi
35Bushiku bwakaboolaawo Joni wakalinga kwiimfwi pamusena weenka uyo alimwi abashikwiiya bakwe bobilo. 36Ndyaakabona Jesu kaainda, wakaamba ayi, “Amubone, ngulya Mwanaambelele wakwe Lesa!” 37Mpomunyaawo bashikwiiya bobilo abo, ndibakanyumfwa cakaamba Joni, bakakonkela Jesu. 38Lyalo Jesu ndyaakacebuka wakabona kabamukonkela, mpeeke wakabeepusha ayi, “Mucafweeko?” Bakakumbula ayi, “Labi, ino mulekala kuli?” (Labi cilaamba ayi mufundishi.) 39Jesu wakakumbula ayi, “Kamwisa mukaboneeko.” Aboobo bakaya akubona nkwaakalinga kwikala. Bakekalaakwe bushiku ubo ceebo lyakalinga kale macolesha.
40Pabaabo bobilo bakanyumfwa maswi akwe Joni akukonkela Jesu, umwi wakalinga Andulu mukwabo Simoni Pita. 41Cintu citaanshi ncaakacita Andulu, nkubona Simoni akumwaambila ayi, “Twamucana Klistu.” (Ili liina lilaamba ayi “Usalitwe wakwe Lesa.”) 42Kuswawaawo Andulu wakatola Simoni kuli Jesu.
Jesu wakalangilisha Simoni akumwaambila ayi, “Webo liina lyako ndiwe Simoni mwanaakwe Jona. Sombi unanookwiitwa ayi Kefasi.” (Liina ili lilasansulula ayi “Pita” nkokwaamba ayi “Mwaandami.”)
Jesu mbwaakeeta Filipo aNatanaelo
43Bushiku bwakaboolaawo Jesu wakayeeya kuya kucishi ca Galili. Mpeeke wakacana Filipo akumwaambila ayi, “Nkonkele!” 44Filipo wakalinga kwikala kundabala ya Betisaida uko kwakalinga kwikala Andulu aPita. 45Lyalo Filipo wakacana Natanaelo, mpeeke wakamwaambila ayi, “Twamucana muntu uyo Mose ngwaakalemba mumabuku a Milawo alimwi abalo balaluki bakulukulu ngobakalemba mumabuku abo, nguJesu wa kuNasaleti, mwanaakwe Josefu.” 46Natanaelo wakeepusha Filipo ayi, “Sa muNasaleti amwalo inga mwaswa cintu cibotu?” Filipo wakakumbula ayi, “Kosa, ukalibonene omwiine.”
47Ono Jesu ndyaakabona Natanaelo keesa kuli nguwe wakaamba ayi, “Anooyu mwine Isilaeli wancinencine, muli nguwe taamu kampenda.” 48Natanaelo wakamwiipusha ayi, “Ino mwaanshiba buyani?” Jesu wakakumbula ayi, “Kaatana kukwiita Filipo, ndalinga kukubwene kale kooli mucisamu ca mukuyu.” 49Natanaelo wakakumbula ayi, “NoBafundishi, ncakwiila muli Banababo baLesa! Muli Baami ba bene Isilaeli!” 50Jesu wakaamba ayi, “Sa washooma ceebo cakukwaambila ayi, ‘Ndalinga kukubwene kooli mucisamu ca mukuyu?’ Ulaakubona shintu shiinda waawa!” 51Lyalo wakabaambila ayi, “Ncakwiila, ntoomulwiita ayi mulaakubona liculu lyacaluka abaanjelo bakwe Lesa kabatanta akuseluka paMwanaaMuntu.”#Mata 28:12
موجودہ انتخاب:
Joni 1: BBBLI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Lenje Bible with Deuterocanon © Bible Society of Zambia, 2003.