Luka 23
23
Jesu mbwaakoomboloshekwa kuli Pilato
(Mate 27:1-2, 11-14; Maako 15:1-5; Joni 18:28-38)
1Bantu boonse abo bakanyamuka, akutola Jesu kuli Pilato. 2Lyalo bakatalika kumubekesha shikani ayi, “Twakacana muntu uyu kayungoola bantu ba mucishi cesu ayi babukile cishi cino. Wakalinga kubaambila ayi bacileeke kupeleka musonko kuli Sisa, muleli munene wa kuLoma. Peculu lya waawo wakalinga kwaamba ayi uyu mwiine ngoUsalitwe wakwe Lesa alimwi ayi ngumwaami.”
3Mpomunyaawo Pilato wakeepusha ayi, “Sa ndiwe Mwaami wa baJuda?” Jesu wakakumbula ayi, “Mwacaamba nobeene.”
4Mpeeke Pilato wakaambila bamatanjilili ba bapailishi abantu baanji abo ayi, “Nebo taaku mulandu ngondacana mumuntu uyu.”
5Sombi balo bakayuminina kumubekesha kabaamba ayi, “Ulayungoola akufulunganya bantu mukwiisha kwakwe mucishi coonse ca Judeya. Wakatalikila kuGalili ono ngooyu washika akokuno.”
Jesu mbobakamutola kuli Elodi
6Pilato ndyaakanyumfwa boobo wakeepusha ayi, “Sa uyu muntu ngumwine Galili?” 7Ono ndyaakeshiba kwaamba ayi Jesu ulaswa mucishi ceendeleshekwa aElodi, wakamutuma kuli Elodi uyo wakalinga muJelusalemu ciindi ico. 8Elodi ndyaakabona Jesu wakakondwa abuumbi mukwiinga lyoonse wakalinga kunoonyumfwabo. Aboobo wakalinga kuyanda kumubona. Wakalinga kulangila amoyo woonse kwaamba ayi akamuboneewo kaacita caankamiko. 9Aboobo Elodi wakamwiipusha miipusho iinji, sombi Jesu taakwe kukumbulaawo. 10Bamatanjilili ba bapailishi abafundishi ba Milawo bakasena pafwaafwi akutalika kubekesha Jesu shikani shiinji cankusu. 11Elodi abashilumamba bakwe bakaweluluka Jesu akumunyansha. Lyalo bakamufwalika cisani cibotu akumuboosha kuli Pilato. 12Kuswa bushiku ubo Elodi aPilato bakatalika kunyumfwana ceebo bakalinga kupatene.
Jesu mbwaakapingulwa kucaikwa
(Mate 27:15-26; Maako 15:6-15; Joni 18:39—19:16)
13Mpeeke Pilato wakabunganya bamatanjilili ba bapailishi, beendeleshi abantubo bamwi boonse. 14Lyalo wakabaambila ayi, “Uyu muntu mwakamuleta kuli ndime ayi ulayungoola bantu ayi babukile cishi cino. Ono nebo ndindamwiipushisha noonse kamuliiwo, ndacana kwaamba ayi taaciteewo mulandu pashikani shoonse nshemwalinga kwaamba pali nguwe. 15Elodi alakwe taakuuwo mulandu ngwaakamucanina muntu uyu mukwiinga alakwe ncamubooshesha kuli ndiswe. Amubone, uyu muntu taaku ncaakacita nceenga wafwitaawo. 16Paceebo ceeco ntoomukwipabo akumwaangulula.” [ 17Ono Pilato lyoonse wakalinga kubaangulwita kaili womwi pabushiku bwa Pasika bwakwiibaluka kusotokela.] 18Sombi boonse bakoolobesha pantu pomwi ayi, “Acaikwe muntu uyu! Amutwaangulwite Balabasi!” 19(Balabasi uyu wakaangwa ceebo wakatalika shimfulunganya mundabala inene alimwi abucayi.)
20Sombi Pilato wakalinga kusuni ayi Jesu aangululwe, aboobo wakaambaabo bantu pamakani ngomunya aya. 21Sombi balo bakoolobesha ayi, “Aapopwe pamucilingano! Aapopwe pamucilingano!”
22Pilato wakabaambila lyatatu ayi, “Ono amundwiite, ncibiibinshi ncaacita? Nebo ndacana kwaamba ayi taaku cibiibi ncaakacita nceenga wafwitaawo. Paceebo ceeco ntoomukwipabo mwaangulule.”
23Sombi boonse bakayuminina koolobesha ayi, “Ulyeelete kupopwa pamucilingano.” Mpeeke Pilato wakakomwa kumaswi abo. 24Aboobo Pilato wakapingula ayi acibe bweenka mbobasuni bantu. 25Pilato wakaangulula Balabasi uyo ngobakasenga akwaaba Jesu kuli mbabo ayi bamucite kweelana ambuli mbobakalinga kusuni. Balabasi uyo wakaangwa ceebo cakutalika shimfulunganya abucayi.
Jesu mbwaakapopwa pamucilingano
(Mate 27:32-44; Maako 15:21-32; Joni 19:17-27)
26Ndibakalinga kutola Jesu mukumupopa, bakakumanya Simoni wa kuSailini kaaswa mumishi. Bakamucata akumunyamwisha mucilingano ayi anooyawo mwisule lyakwe Jesu.
27Pabantu baanji baanji bakalinga kuya cimukonkela, pakalinga abalutundu abo bakalinga kuya cilila abuumba bunene ceebo cakwe Jesu. 28Ono Jesu wakapiluluka akubaambila ayi, “Nobalutundu ba muJelusalemu mutalilili ndime, sombi mulililile nobeene alimwi abana banu. 29Mukwiinga nshiku shilaakushika bantu ndyeshi bakanokwaamba ayi, ‘Balicite coolwe banakashi batana kushalaawo akuyamwisha!’ 30Lyalo balaakutalika kwaambila tulundu tunene ayi, ‘Amutuwiite’ alimwi atulundu tuniini ayi, ‘Amutufwekelele.’#Osi 10:8; Ciyu 6:16 31Ino ono na bantu kabacita boobo kucisamu cicili citontola, ino kulaakuba buyani caakuyuma?”
32Bakatola abamwi bobilo abo bakalinga beepi ayi abalo bakapopwe pamicilingano pantu pomwi aJesu. 33Lyalo ndibakashika kumusena wiitwa ayi Cifuwa ca mutwi, bakapopa Jesu pamucilingano. Abalo beepi abo bakabapopa pamicilingano, umwi kululyo alakwe umwi kucipiko. 34Mpeeke Jesu wakaamba ayi, “Ta, amubalekelele mukwiinga tabeshi ncebatoocita.” Kuswawaawo bakooma cisolo kwaamba ayi baabane shakufwala shakwe.#Kulu 22:18 35Bantu bakalinga kwiimfwi mweela kabeebela, beendeleshi babo ndibakalinga kuweluluka Jesu kabaamba ayi, “Wakapulusha bamwi ono aalipulushe mwiine, na ngoUsalitwe uyo Lesa ngwaakasala!”#Kulu 22:7
36Bashilumamba abalo bakamuweluluka, bakesa akumupa waini ulula usashite,#Kulu 69:21 37akumwaambila ayi, “Na uli mwaami wa baJuda, lipulushe omwiine!”
38Peculu lyakwe pakalinga kulembetwe ayi, “Uyu ngoMwaami wa baJuda.” 39Mwiipi umwi wakalinga kupopetwe kulubasu lumwi lwakwe Jesu wakacobola Jesu ayi, “Sa teshi ndiwe Usalitwe wakwe Lesa? Lipulushe, aswebo utupulushe!” 40Sombi umwi wakakalalila mubye akumwaambila ayi, “Sa webo tooloondi Lesa? Twapopwa pamicilingano soonse, 41sombi swebo tulyeelete kupopwa mukwiinga tutootambula cilambu ceelete pashintu nshetwalinga kucita. Ono lakwe uyu taaku cibiibi ncaakacita.” 42Mpeeke wakaamba ayi, “BaJesu, mukanjibaluke mwaakwisa muBweene bwanu.” 43Lyalo Jesu wakamwaambila ayi, “Ncakwiila ntookulwiita ayi sunu lyeenka utooba anebo muMusena ukondelesha.”
Lufu lwakwe Jesu
(Mate 27:45-56; Maako 15:33-41; Joni 19:28-30)
44Ono lisuba ndilyakashika pakati kamutwi, kwakaba munshinshe koonse kushikila 3 koloko, malumwi. 45Lyalo cisani cakalinga kushitilisha muŊanda yakwe Lesa cakakwamuka pakati.#Kulo 26:31-33 46Lyalo Jesu wakoolobesha aliswi lya peculu ayi, “Ta, muuya wangu ndaubika mumaansaanu!” Ingayi amanebo kwaamba boobo, wakatula moyo, wafwa.#23:31-33
47Mpomunyaawo munene wa bashilumamba mwaanda ndyaakabona boobo, wakalumbaisha Lesa akwaamba ayi, “Ncakwiila uyu muntu wakalinga kululeme!” 48Abalo bantu boonse baanji abo bakalinga kubungene kabeebela, ndibakabona cakacitika, bakaboolela kumaandaabo mubuumba. 49Bantu boonse bakalinga kushibene aJesu alimwi abanakashi bakamukonkela kuswa kuGalili, bakeemikana palaale akubona isho shoonse shakacitika.#Luka 8:2-3
Jesu mbwaakabikwa
(Mate 27:57-61; Maako 15:42-47; Joni 19:38-42)
50Kwakalinga muntu wiitwa ayi Josefu wakalinga kwikala mundabala ya Alimateya mucishi ca Judeya. Wakalinga muntu uli kabotu ulemekwa, 51alimwi wakalinga kulangilabo Bweene bwakwe Lesa. Nakubi kwaamba ayi alakwe wakalinga mweendeleshi wa munkuta ya baJuda, taakalinga kusumina miyeeyo amicito imwi ya beendeleshinyina. 52Uyu muntu wakaya kuli Pilato mukusenga mutuntu wakwe Jesu. 53Lyalo wakaselusha mutuntu pamucilingano akuupombela acisani. Mpeeke wakaubika mucuumbwe cakakabwa mulibwe umo mutana kubikwaawo kale muntu. 54Bwakalinga bushiku bwakulibambila bwa Cisanu. Ceebo bushiku bwakookesha bwa Cibelu bwaalinga pafwaafwi kutalika.
55Banakashi abo bakakonkela Jesu kuswa kuGalili bakaya aJosefu akubona cuumbwe alimwi amutuntu wakwe Jesu mbowakabikwa. 56Kuswawaawo bakaboolela kuŋanda akuya mukubamba mafuta atununkila kabotu tumwi twakunanika mutuntu wakwe Jesu. Pabushiku bwakookesha bwa Cibelu, bakookesha kweelana aMilawo.#Kulo 20:10; Duto 5:14
موجودہ انتخاب:
Luka 23: BBBLI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Lenje Bible with Deuterocanon © Bible Society of Zambia, 2003.