Pe eya 4
4
Kaynu ma ne Abel
1Adam ɓan ne na gwale Hawa, eme, tol Kaynu. Hawa jan go: «Mbi ɓo vya son da ne Bage ɗiŋnedin ta.» 2Na sḛ gwan tol Kaynu ná vya na pal, ndwara go Abel.
Abel ka bage wal gii ma, Kaynu kat bage gar kaŋ me. 3Dam ma kwaɗa lwak, Kaynu tyare na kaŋ wak ma hon Bage ɗiŋnedin. 4Abel me ɗe, tyare na gii vya ge pul soy ma ne nama num fegem ma hon Bage ɗiŋnedin me. Bage ɗiŋnedin ame Abel ma ne na bobo ne sḛ tuli. 5Amma be ame Kaynu ma ne na bobo to. Kaynu laar vḛne ge be to, na ndwara su leɗet. 6Bage ɗiŋnedin jan Kaynu go: «Kyaɗa mo ba vḛne mo laar, mo ba sú mo ndwara se go leɗet ɗaa? 7Kadɗa mo ke kaŋ ge ne na viya̰ go, mo mbo hal na, kadɗa go to, sone fí huliya ya mo viya̰ wak pal, ɓyare waɗe mo pal, amma mo ɗe, há na.»
8Swaga mbe go no, Kaynu jan na ná vya Abel go: «Mbo nee ful zi.» Swaga ge a ne yá̰ ful zi ya, Kaynu det na ná vya Abel, hun na.
9Bage ɗiŋnedin ele Kaynu go: «Mo ná vya Abel ya da ya ɗaa?» Kaynu gwan ne na janna go: «Mbi be kwa to. Mbi na ndu ge koyya ne’a?» 10Dok jan na go: «Mo te ke da go ɗaa! Ne suwar se ya, swama ge mo ná vya ne kaŋge mo ya mbi ta. 11Se no ɗe, wak vḛneya ya mo pal, mo mbo gá talaleya suwar pal, ne na ne hage na wak ame swama ge mo ná vya, ge mo ne hṵ na pe. 12Swaga ge mo ne mbo gar suwar ya, kaŋ mbo gwan don mo to bat. Mo mbo gá anna talaleya digi baŋ suwar pal.»
13Kaynu jan Bage ɗiŋnedin go: «Ya̰l ge mbi ne waɗe dṵṵl gḛ ge be inna. 14Ma̰ no, mo yan mbi ya uzi ya ne swaga don kaŋ go, mbi mbo woy tene uzi ya kaal ne mo ndwara se. Mbi mbo gá anna talaleya digi baŋ suwar pal, ndu ge daage pet ge ne mbo ɓol mbi ya, mbo hun mbi.» 15Bage ɗiŋnedin gwan ne na janna go: «Kadɗa ndu a̰me hun mo ya, a mbo gele mo diŋ ndwara ɓyalar.» Bage ɗiŋnedin e pyalaŋ Kaynu ta, ndwara tele ndu ge daage pet ge ne set na ya, na hṵ na to. 16Go no, Kaynu abe tene uzi ya kaal ne Bage ɗiŋnedin ta, mbo kat suwal Nod ya, Eden le ge ham ge go.
Pehir ge Kaynu ne ma
17Kaynu ɓan ne na gwale, eme, tol vya, na sḛ hon na dḭl Henok. Kaynu sin suwal a̰me ɗu, hon na dḭl Henok, na vya Henok ta. 18Henok tol Irad, Irad tol Mehuyayel, Mehuyayel tol Metuchayel, Metuchayel tol Lemek.
19Lemek san gwale ma azi, ge ɗu dḭl Ada, ge may dḭl Sila. 20Ada tol Yabal, na sḛ a naa ge ne wal kavaar ma, naa ge ne kat ne gur zi ma bá ne. 21Na ná vya dḭl Yubal, na sḛ a naa ge hale biliŋ ma, ne naa ge sun gal ma bá ne. 22Sila me, tol Tubal-Kaynu, na sḛ a naa ge suwa ma, nama ge a ne ɗeere fool ŋgirma ma, ne sol kaŋ ma bá ne. Tubal-Kaynu ná vya ge gwale dḭl Naama.
23Lemek jan na gwale ma go:
«Ada ma ne Sila, za̰ me mbi,
aŋ ge Lemek gwale ma,
so me aŋ togor za̰ mbi fare janna.
Kadɗa ndu iyal mbi ya, mbi hun ndu pool,
kadɗa ndu sal mbi ya, mbi hun vya jyale.
24Kadɗa a gele Kaynu ndwara ɓyalar ɗe,
a mbo gele mbi ge Lemek ndwara wara ɓyalar para ɓyalar.»
25Adam gwan ɓan ne na gwale, tol vya son, hon na dḭl Set. Hawa ka jan go, Dok ho̰ mbi hir ge ɗogle Abel byalam, na ge Kaynu ne hṵ na.
26Set me tol vya son, tol na dḭl Enos. A swaga mbe go no, naa ɗage e pe kaɗe Bage ɗiŋnedin ne na dḭl no.
موجودہ انتخاب:
Pe eya 4: FGN2013
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
La Bible en langue Kim © Alliance Biblique du Tchad, 2013.