Luka 23
23
A mbo ne Jeso Pilatus ndwara se ya
(Mat 27:1-2,11-14, Mar 15:1-5, Yoh 18:28-38)
1A ɗage digi wak dagre ɗu, a gene na Pilatus ndwara se ya. 2A ɗage é fare na pal go: «I ɓo ndu mbe no, ne wat fare naa zi i suwal diŋ, ne tele naa go nama sya kaŋ hon Kaysar to, tol tene go na Kris ne, na gan ne me.» 3Pilatus ele na go: «Mo gan ge Yuda ma ne ne’a?» Na sḛ gwan ne na janna go: «Mo jya̰ ne.» 4Pilatus jan naa ge ke tuwaleya ma ga̰l ma ne ɓase ma go: «Mbi be ɓol fare a̰me ge sone ne ndu mbe ta to.» 5Amma a ka gwan dwage janna go: «Hateya ge na ne zi, par fare ɓase ma zi. E pe da ne Galile ya, á suwal Yahudiya na pul zi no mwaɗak, ndi ne se no, det ja ɗiŋ go go.» 6Swaga ge Pilatus ne za̰ fare mbe, ele go ndu mbe Galile ne de. 7Swaga ge ne kwa go na mbo da ne suwal ge Herodus ne ya ɗe, teme na mbo hon Herodus, ne da pe dam mbe pul zi, Herodus ka Ursalima diŋ.
8Swaga ge Herodus ne kwa Jeso, ke tuli ge be to, ago ka ɓyare kwa na, ne da pe za̰ na fare ma, ka jobre go na ma̰ kwa na ke kaŋ ŋgayya a̰me. 9Ele na fare ma gḛ, amma gwan ne na fare janna to. 10Naa ge ke tuwaleya ma ga̰l ma, ne naa ge njaŋgeya ma ká swaga mbe go, a ka á ta e fare na pal. 11Herodus ma ne na naa ge koyya ma a ka ke na kalam. Go̰r ge a ne có ta ne na, a kan na ba̰r ge siŋli na ta, a teme na mbo hon Pilatus. 12Dam mbe go, Herodus ma ne Pilatus saŋge kondore, nama ge a dḛ ne ka ho̰l ne ta zaŋgal ma.
A kun sarya ge siya Jeso pal
(Mat 27:15-26, Mar 15:6-15, Yoh 18:39—19:16)
13Swaga ge Pilatus ne tó naa ge ke tuwaleya ma ga̰l ma, ne naa ga̰l ma, ne ɓase ma ya ɗe, 14jan nama go: «Aŋ gene ndu mbe no ya go na pá fare ya ɓase ma zi. Swaga ge mbi ne ele na fare aŋ ndwara go, mbi be ɓol fare a̰me ge sone ge aŋ ne e na pal ge ne mbya a kun sarya ge siya na pal to. 15ko Herodus puy be ɓol fare a̰me ge sone na pal to, da ne pe teme nee na ya no. Ne pe no, be ke fare a̰me ge sone ge mbya gene na mbo siya zi to. 16Mbi mḛre na mḛre, ne go̰r go mbi ba kan na digi.»
[17Ge vḛso Paska go ɗaɗak, Pilatus dol nama ndu ne daŋgay zi digi.]#23:17 Swaga mbe no ne maktub ge zaŋgal a̰me ma zi to, a he na ma̰ da ne Mat 27:15, Mar 15:6. 18Amma a oy digi wak dagre go: «Hṵ ndu mbe, dó i digi Barabas!» 19A dó ndu mbe daŋgay zi, da ne na ne ɗage ne fare digi suwal diŋ pe, na ne hṵ ndu pe me. 20Pilatus gwan dwage nama fare mbe, ne dwatɗa go na dol Jeso digi. 21Amma a ka gwan oy digi go: «Pe na kaŋgre pal! Pe na kaŋgre pal!» 22Pilatus gwan jan nama ge ndwara ataa go: «Ndu mbe ke ma sone pe ɗaa? Mbi be ɓol fare a̰me ge ne mbya e na mbo siya zi to. Mbi mḛre na mḛre, mbi ya̰ na digi.» 23Amma a ka gwan oyya digi ne ka̰l ndaar go, na pe na uwara kaŋgre pal. Nama ka̰l ka gwan ndé digi waɗeya. 24Pilatus vin tene go na ke laar ɓyareya ge nama ne pal. 25Na sḛ dol ndu ge a ne dó na daŋgay zi ne na ne ɗage ne fare digi suwal diŋ pe, ne na ne hṵ siya pe me, na ge a ne ɓyare na mbe digi, amma ɓyan Jeso nama tok go laar ɓyareya ge nama ne pal.
Pella ge Jeso ne kaŋgre pal
(Mat 27:32-44, Mar 15:20-32, Yoh 19:17-27)
26Swaga mborra ne na go, a wan ndu a̰me ge suwal Siren ne, na dḭl Siman, ne gwanna ne ful zi ya, a e na in uwara kaŋgre Jeso pe go. 27Naa ɓase gḛ ge be to ka kare na pe, naa zaab ma ka njet bama ko̰l ne fyaso na pe go. 28Jeso saŋge tene nama ta, jan nama go: «Vya gwale ge suwal Ursalima ne ma, fya me mbi to, amma fya me ta, ne aŋ vya ma. 29Ago dam mbo ya go, ge naa mbo jan go: ‹Naa zaab ge ne ba̰ gisil ma, ne nama ge ne tó vya to ma, ne nama ge ne hon vya pam to ma da ne laar saal.› 30Go no naa mbo ɗage jan njal ma go: ‹Gu me ya i pal!› Ne njal ge sore busur ma go: ‹Kulbi me i se#Hos 10:8.!› 31Kadɗa a ke go uwara twagal ɗe, mbo kat dḛ gyana ne uwara fiya̰l ɗaa?»
32A gene naa ge a ne ke fare ge sone ma azi me ndwara mbo hun nama poseya ne na. 33Swaga ge a ne dé ya swaga ge a ne tol na «Pala kal» go, a pel na uwara kaŋgre pala digi poseya ne naa ge sone mbe ma jwak, ɗu na tok matoson pal, ge may na tok magul pal me. 34Jeso jan go: «Báá, pore nama, ago a kwa kaŋ ge bama ne ke to.» A var ta na ba̰r ma ne uusi baare ta. 35Ɓase ma mḛ swaga mbe go, a ka ndil swaga. Ga̰l ma ka cot ta ne na, a ka jan go: «Má naa, na má tene me, kadɗa na Kris ge Dok ne ne, bage talla ne!» 36Asagar ma mbo ya na ta zi, a ka ke na kalam me, a tyare na oyo̰r jiya̰l ge ka̰mul, 37a ka jan go: «Kadɗa mo Gan ge Yuda ma ne ne, má tene.» 38A pel kaŋ njaŋgeya a̰me na pala digi go: «Ndu mbe no, a Gan ge Yuda ma ne ne.»
39Ne naa ge a ne ke sone, ge a ne pe nama uwara kaŋgre pala digi ma buwal zi, ge ɗu ka sal na go: «Mo te be Kris ne to’a? Má tene, má i me.» 40Ge may mḛre na kon, jan go: «Mo sya Dok vo to’a, mo ge ne ɓó potɗa dimma ca ne na go, 41nee ɗe, da ne na viya̰ go, nee mbya ɓol potɗa mbe no, amma na sḛ ɗe, be ke fare a̰me ge sone to.» 42Gwan jan go: «Jeso, dwat ne mbi, swaga ge mo ne mbo mbo ja ne muluk ge mo ne!» 43Jeso jan na go: «Fareba mbi jan mo, ma̰ no, mo ma̰ kat poseya ne mbi Paradis zi ya.»
Siya ge Jeso ne
(Mat 27:45-56, Mar 15:33-41, Yoh 19:28-30)
44Ne le gyala pala go tek ɗiŋ mbo gyala tok gasamal, tṵ dibi suwar pet. 45Swaga sebe se, ba̰r zok pul ge zok ge mbegeya ne taabe se ne tuŋsi go. 46Jeso oy ne ka̰l ndaar, jan go: «Báá, mbi ya̰ mbi o̰yom mo tok go.» Swaga ge ne jya̰ fare mbe no, su. 47Swaga ge asagar ma ga̰l ne kwa kaŋ mbe no ka uware Dok, jan go: «Fareba ndu mbe dosol!»
48Ɓase ge a ne kote ya ndil swaga ma, swaga ge a ne kwa kaŋ mbe, a gwan, ne njet bama ko̰l. 49Jeso naa ge kwarra ma pet, ne naa zaab ge a ne ɗame na ne Galile ya ma, a mḛ uzi ya kaal ndil kaŋ ge ne ke.
Eya ge Jeso ne táál siya se
(Mat 27:57-61, Mar 15:42-47, Yoh 19:38-42)
50Ndi, ndu a̰me ne naa ga̰l ge kun sarya ma buwal zi, na dḭl Yusuf, a ndu ge kwaɗa ne, a dosol me. 51Na sḛ be vin nama sarya kunna ma ne nama kaŋ kerra ma to. Ka ndu ge suwal Arimate ne, suwal ge Yuda ma ne a̰me, ka da̰re muluk ge Dok ne. 52Na sḛ mbo ɓol Pilatus, kaɗe na, na ho̰ na Jeso duur. 53Fage na ya se, worge na ba̰r zi, mbo é na táál ge ne a ne cé na njal zi, na ge a gale ne dó ndu ne na zi to zi. 54Ka dam ge a ne nṵsi dam ɗigliya go#23:54 A nṵsi dam ɗigliya dam ge anuwa̰y go, ne jo̰ dam ge myanaŋgal go, ndwara go dam samedi, a dam ɗigliya mbe ne., ne jo̰ ga ya gwa. 55Naa zaab ge a ne kare na pe ne Galile ya ma, a kare Yusuf pe, a kwa táál siya mbe, ne swaga ge a ne e na duur go. 56A gwan di, a nṵsi dukan ma ne idir ma. Dam ɗigliya go, a gá ɗigli ta wak honna pal#Wat 20:10, Dwa 5:14..
موجودہ انتخاب:
Luka 23: FGN2013
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
La Bible en langue Kim © Alliance Biblique du Tchad, 2013.