ZYAŊ 2

Rìwɛy ɗi a Kana

1Ajɛ̀m ì mɛ̀ru mɛraa, kìsɛ̀nɛ̀ ki riwɛy ki ɓaghà a Kana, ɓi zi ì Galile, jɛɛ Yeesus à ɓaghà wɔɔ. 2Ɓɛ reŋìghà girig Yeesus rì ɓɛ̀yilàg ɓii a kìsɛ̀nɛ̀ kiǹ. 3Yɛ̀ɛ mɛ̀rɔ̀g mɛ lekà, nni jɛɛ Yeesus à kpaaghà nyi lɛ: Ɓɛ yiìdi ri mɛ̀rɔ̀g. 4Yeesus à ɓàg nyi lɛ: Giɓ anɛ, cɛ kɛɛ ri lɛ rì mɛ̀ rì wɔ̀? Cààmɛ̀n kɛm̀ ki ka kpaŋ ɓi. 5Jɛɛ à kpaa ɓɛ̀kìì-ɓìsay lɛ: Kìina com kìcèm ki à rì mìni ɓiì kalii. 6Bèè yi mɛnig yi yi ɓaghà yì yèŋɛn ɗi gɔ̀g, yi ɓaghà wɔɔ taàfog; bèè yiǹ yi ɓaghà foo lɛ, yɛɛ ghɛɓsi ɓisuu ɓisyɔ̀ɔ̀ ɓi ritɛn ɓi ɓi rìgherɛ̀n ɗi Ɓɛ̀yudɛ̀n; bog ì ɓaghà lɛ ì kpaŋ ɓɛ̀kpɛm#2:6 ɓɛ̀kpɛm ɓɛ̀kpɛm ɓɛ ɓɛ ɓalakà bog ɓɛ̀liìtɛ̀rɛ̀ mɛ̀tin mɛɓɛɛ̀. ɓɛɓɛɛ̀ nsoò lɛ ɓɛraa. 7Yeesus à kpaa ɓɔ lɛ: Roòziina mɛ̀nig ɓi bèè yi, fɔɔnnɛ ɓɛ roòzàkà mɛ̀nig miì, lɛ pisa. 8Yeesus à kpaa ɓɔ lɛ: Ɓɔ̀rina min mɔ, ɓi kɛǹ kì faà ǹkɛ̀ɛ̀sì-ɓìɓan ɓi kisɛ̀nɛ̀. Fɔɔnnɛ ɓɛ kɛngà nyi rì mɔ. 9Yɛ̀ɛ ǹkɛ̀ɛ̀sì-kìsɛ̀nɛ̀ à ɓoɓtìghà mɛ̀nig mɛ mɛ ɓaghà mɛǹ di maa ghay mɛrɔ̀g, kɛ̀ɛ yi jàŋ inɛ mɛ̀rɔ̀g mɛǹ mɛ ɓaa yì, kɔm̀ lɛ ɓɛ̀kìì-ɓìsay ɓɛ ɓɛ ɓwɛɗkày mɛ̀nig ɓɔɔ yighà. 10Fɔɔnnɛ à reŋìghà ŋwaànɛ à wɔlɛ̀ngà à kpaa nyi lɛ: Ɓɛ̀ro ɓɛɛ̀ loki kìfaà ɓɛ̀kèn mɛrɔ̀g mɛ syeesyee, ɓɛ siitɛ̀n ɓɔ kìfaà mɛ ɓeɓtɛn di ɓaa ŋwagì; kìɓan kifog wɔ̀ wàa ɓèŋɓeŋi mɛ̀rɔ̀g mɛ syeesyee à kpaŋ ɓigomìnɛ.

11Fɔlɔɔ nnɛ Yeesus à kìghà dàm yìì i ǹtonto a Kana, ɓi zi ì Galile, à rèsì rìgwey ɗii, ɓɛ̀yilàg ɓii ɓɛ ki gherɛn nyi.

12Ajɛ̀m ìnɛn, nnɛ à sɛngà a Kapɛrinawum ǹɗaŋ ri jɛɛ, rì ɓɛ̀geni, rì ɓɛ̀yilàg ɓii, ɓɛ ghagsì lɔŋ ɓɔɔ mɛru wɔɔ lɛsàg.

Yeesus à nàɓi ɓum ɓɛ ɓɛ kikìghà fyèè ɓi naà-Bɛ̀ll

(Mt. 21:12-13; Mk. 11:15-17; Lk. 19:45-46)

13Yɛ̀ɛ tìcàɓ ti Ɓɛ̀yudɛ̀n ti lɛ Paskà ti kɛɛkɛ̀ɛ̀ghày, nni Yeesus à ɓɔkà a Yorisalɛm. 14À tanɛ̀n di ɓɛ ri ɓi naà-Bɛ̀ll lɛ rì ɓɛ̀kàɓì sanìnya, rì ɓɛ̀kàɓì bwiy, rì ɓɛ̀kàɓì ɓɛ̀kuùkuù, rì ɓumɓɛ ceeceǹɗìyɛ̀n ɓum mɔ̀ɔ̀ni. 15Yɛ̀ɛ à kìlɛ̀ngà ǹkpas rì ɓìsɔŋ, nni à nàɓkà ɓɔ ɓɛ̀sɛ̀ɛ̀ ɓɛ̀cèm ɓi naà-Bɛ̀ll, à nàɓkì girig lɛ rì bwiy yaa, rì ɓɛ̀sanìnya ɓaa; à tyàŋzì mɔ̀ɔ̀ni mɛ ɓumɓɛ ɓɛ ceècèǹɗìghà ɓum mɔ̀ɔ̀ni, à tyɔkì ɓɛ̀teɓèrè ɓaa; 16à ki kpaa ɓɛ̀kàɓì ɓɛ̀kuùkuù lɛ: Pisiina ɓyom ɓi fɛ! Kɛ̀ ɓi ghaasi naa ì Seŋi wɛ̀m mɛɛ mɛ fyèè. 17Nni Ɓɛ̀yilàg ɓii ɓɛ yitìghà lɛ ki ri kì kànɛn lɛ: Ǹkɔ̀nɛ̀n à naa yɔ̀ɔ̀ à ɓuni mɛ̀ ǹɗem.

18Ɓɛ̀yudɛ̀n ɓɛ tekà jɛ̀ɛ̀ ɓɛ tɔg nyi lɛ: Dàm ì be yɛɛ̀nɛ ù rì lɛ ù kì, lɛ u resi ɓìsi lɛ, ù rì rì ìtèɗ wulɛ u ki yɛ̀ɛ ù kìi yì lɔɔ? 19Yeesus à ɓàg ɓɔ lɛ: Wààghiina na-Bɛ̀ll ìnɛ mpɛɛ̀zi yɔ̀ ki toŋì ɓi mɛ̀ru mɛraa. 20Ɓɛ̀yudɛ̀n ɓɛ pɛɛ̀zì nyi lɛ: Naà-Bɛ̀ll ìnɛ ɓɛ togà bèg mɛ̀tin mɛɓɛɛ̀ rì bèg taàfog, yɛɛ̀nɛ wɔ̀ɔ̀ rì ɓiì pɛ̀ɛ̀zii kitoŋì ɓi mɛ̀ru mɛraa? 21Wɔ̀lɛ naà-Bɛ̀ll ìnɛ Yeesus à kalìghà, ì ɓaghà nyoo yìì. 22Yɛ̀ɛ à ghèmɓɛ̀ngày a nyɔ̀ɛ̀y, ɓɛ̀yilàg ɓii ɓɛ yitì lɛ à kpaaghà fɔlɔɔ, fɔɔnnɛ ɓɛ gherɛ̀ngà ɓìɓan ɓi ɓi ri ɓì kànɛn, ɓɛ ki gherɛn ti kìɓan ki Yeesus à kpaaghà kiǹ.

23Cààmɛ̀n ki Yeesus à ɓaghà a tìcàɓ ti a Paskà Yorisalɛm, ɓum lɛɛ̀gwey ɓɛ gherɛ̀ngà nyi, yɛ̀ɛ ɓɛ ghɛngà dàm yi ɓiɓan yi à kìkìghà. 24Wɔ̀lɛ Yeesus à tyweeyàkà ɓi ɓɔ ɓisuulɛ, à yighà ɓɔ ɓɛ̀sɛ̀ɛ̀ ɓɛ̀cèm, 25rì tì lɛ, ki ghɛɓsìghà ɓi nyi com lɛ ɓɛɛ ka rèsi nyi rìɓa ɗi mum, lɛ nyimiɗ a yighà com ki mum a fèfeg ɓi ǹɗem ɓi ɗùm.

موجودہ انتخاب:

ZYAŊ 2: BAFNT

سرخی

شئیر

کاپی

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

Bafia Nouveau Testament کے بارے میں مزید معلومات حاصل کریں

ZYAŊ 2

ZYAŊ 2
سے مشہور بائبلی آیات

سنیں ZYAŊ 2

بائبل:

Bafia

ترجمہ: Bafia Nouveau Testament - BAFNT

ZYAŊ 2

ZYAŊ 2

ZYAŊ 2 سے مشہور بائبلی آیات

سنیں ZYAŊ 2

بائبل:

Bafia

ترجمہ: Bafia Nouveau Testament - BAFNT

ZYAŊ 2

ZYAŊ 2
سے مشہور بائبلی آیات