Luk, echî 24
24
Jisos a nyə́me ka ekʉ̂
(Mat 28.1-10; Mak 16.1-8; Jon 20.1-10)
1Nji á yóe biji, ndaŋa-mbá ofú ka ogəm, na ofú-ofú, ane-akáé mbá á kə̂n akʉ́ ábho mma á yáme, á jak ka oyəm í Jisos. 2Á kpó to á sí ágo, á yên ntáé nnyi á bhúi nná ka nnyo-mbá oyəm a nuŋ ka mkpe. 3Á gyê ka etím kən á ká yen ékpoê ejê. 4Á kə̂t áfo ngyím ka etím oyəm, íkíkéré í chîŋ ábho.
Ebhú jə́t á kpó to á yén ane-arûm ábháe na ábháré ḿfô kpóŋŋ, á fâp áfo chak ka mkpe biji ábho. 5Na ekpatə́m efup, ane-akáé mbá á bhî bichî ka nsi. Ane-arûm mbá á bhə̂p ábho sê “Nan kən o kí wom ên nne mbít ka etím oyəm? 6Yê kpó cháŋ mfá. Obhasi a sʉ̂k yê. Ó gyini ên nji a sə́re ên ebhú a ri ebhat í Gariri a? 7To a sə́re ên se tîk á káre yê, Mmon-i-ntem-nne, mbâ ayimá-obhí. Ayimá-obhí mbá á kí kum yê, yê a kpô, á kə̂n yê. Kən ka osúí mfín ésá, yê a kí nyəmé ka ekʉ̂?”#Mat 16.21; 17.22-23; 20.18-19; Mak 8.31; 9.31; 10.33-34; Luk 9.22; 18.31-33. 8Ane-akáé mbá á tît mân nchot i Jisos.
9Á fábha ka oyəm á jî sə́re ágbán abhê mba á kət ófó na yót, ejûm nji ábho á yéne. Á sə́re fə́ne atóbhá Jisos chénchén. 10A ri Meri nnyo a dʉ eték í Madarin na Jowana na Meri nnyo nnyen i Jems é kpê na ane-akáé mba tat fə́ne nâ á sə́re ágbán í Jisos ejûm nji ábho á yéne. 11Kən ágbán mbá á ká kam. Sê áfo a ri echâk í nchot. 12[Kən Pita a rúi ngyím a bhéne a jak ka eji oyəm mbí. A kpo to a sí ágo, a sére, a kêp ka etím. Á ka yén kpe ejûm etat é chíŋi ḿfô nnyi á bhúi nná Jisos kən á kə̂n. A chə́bhe fə́ne njəm ka eték, a kérá a jak ekpak ejûm nji é fábhe.]
Jisos ka mbá eték Emayus
(Mak 16.12-13)
13Ka ofú ábhi bhə́t, ane ábháe mba á tóbha Jisos á yə̂p Jerusarem á kí ji eték etat nji é káma sê Emayus, ejen í ntáé enígisá. 14Nji á jéna á jak, á kúbha á kpek na chénchén achot mma á fábhe. 15Jisos a fâp áfo a jî chə̂m ekam na ábho, 16kən á ká məŋé sê a ri yê áno.
17A bhə̂p mân ábho sê “Ó chorá ên bhaghé nchot o jak ên ka mbá?”
Ane mbá á kə̂t áfo ngyím amə̂t nsôn-ńsôn. 18Kən yót nnyo á kamá se Kriyopas a bhə̂p yê se “Nâ-ngá we átíŋ nâ o ri áno mfá ka eték í Jerusarem njí nnyo ó ka yúk achot mma á fábhe ka eték ka mfín nnyí a?”
19Kən Jisos a kpô bhə́p se “Bhaghé achot?”
Ane mbá á táme yê sê “Ájoé we ó ka yúk kpe nchot nnyi a fábhe na Jisos nnyo nne Nasaret, deê êt é sə́ré wâ. Jisos nnyó a ri nkara-otîp Obhasi. Ka amə̂t Obhasi na atem-ane, á chorá nchot, a yimá iyîm na ikom Obhasi. 20Kən ane-echî akará-agore Obhasi abhə́ré na ane-echî á fî yê á káre, sê á yúí. Á kûm yê ka ego. 21E kíi ḿbə́ŋé sê nne nnyó nâ a bháe oyim êt ane Isrel é sém. Na égyé nâ mfín ésá nnyi achot mmá á fábhe. 22Ńgyê fə́ne, mba ane-akáé etat ka ekam ejə́ré á bha êt na okpógha-biji nchot na ofú mbí. Sê ábho á ji ka oyəm obhê na ofú-ofú, 23á ká yen ékpoê ejê. Sê ábho á yên baénjel noŋ ndem, mba á fábhe á sə́re ábho sê Jisos a nyə́me ka ekʉ̂. 24Etʉ̂ ane abhə́ré eróŋ á jak á jî yên oyəm ka ekpak á sə́re êt, kən kpe ábho á ká yen yê.”
25Jisos a sə́re ábho se “Bhaghé énə́mé nji é rî ên ka echî? Jen kən é kí yuŋi kən ó kâm ên na achot Obhasi mma akará-otîp Obhasi á sə́re? 26To Krayis, nne nnyo Obhasi a kí tum se a bhá yim ngun á sém, a fonê ka eyéném oseŋe kən a kumí ka ekumi otúi?”
27A róghe mân ábho esə́rə́m achot fép mma á séŋe á kpê na yê ka nwet i Mosis tata a sî ka onwet fép mbi akará-otîp Obhasi á séŋe.
28Nji á kpó to á kpírí eték nji ábho á jak, Jisos a yîm bəre kpe a kí maghé ábho a ji. 29Kən á góre yê sê a kâ chîŋ, sê deê a kpéré a ká na ábho, ka atʉ́ á kə́ bha onyak. A kâm fə́ne a jak a jí ka na ábho.
30Nji ebhú édî é síi, Jisos a kô brêt a káre ekûp mbâ Obhasi, a bhêk ńnyə́ne a káre ábho se á dí. 31Nji a kpo to a yim áno, amə̂t ábho á rə́bhe á mə́ŋe mân sê a ri yê áno. Kən a tân ebhú jə́t ka eji áji. 32A kpo to a tán áno, ane mbá á róghe echoróm sê, “Kpe ebhú nji Jisos á səra ábho echî achot mma á séŋe ka nwet Obhasi, ḿbə́ŋé a yóŋe a seŋá oseŋ noŋ akâŋ.” 33Á rúi fə́ne ngyím ntə̂m yə́t á chə́bhe njəm nnyi Jerusarem.
Nji á síi ágo, á jî kpúghi ágbán í Jisos na ane mba tat mba á tóbha nná yê, 34á chorá sê “Ńtâ Jisos a nyə́me ka etʉri! A tóŋe biji ibhê mbâ Simun.” 35Atem ábho ábháe mba á bháe nná á rə́bhe fə́ne á sə́re ábho fép ekpak ejûm nji é fábhe ka mbá. Á sə́re ábho eróŋ noŋ ábho á mə́ŋe sê a ri Jisos ka ebhú a bhéghe brêt a káre ábho.
Jisos a fâp ka ochî atóbhá abhê
(Mat 28.16-20; Mak 16.14-18; Jon 20.19-23; Etûm 1.6-8)
36Atóbhá Jisos á nyə́ne ka ekubhi ejê njí, kən á kpó to á yéna, a fâp áfo ka ekam ábho. A kûp ábho se, “Deê Obhasi a joé na ên.” 37Kən á nîk, efup é súi ábho biji, ka á kéra sê a ri ńkʉ́.
38Jisos a bhə̂p ábho se “Ó fubhá ên jen? Jen kən íkíkéré ifə́né í bhó jen koŋ? 39Kép ên abhô amámé na akát. Mom ên ə̂m, tîk o mə́ŋe ên sê a ri mme ka etʉri, ńkʉ́ asík. Ó yen ên sê ḿ fon biji na ákə́p, kən ńkʉ́ á ka fon.”
40[A kpo to a chot áno, a tóŋe ábho abhô na akát.] 41Ekpatə́m ogyebhá-ḿbə́ŋé ó súi ábho, á ká kam nji á yéna. É chíŋi ábho kpá.
A bhə̂p ábho se, “Ó fon ên mkpât ejûm edíím á?” 42Á káre yê nsí nnyi á yóe oyo. 43A kô a dî ka ochî ábho.
44A sə́re mân ábho se, “Yên ên achot í nchane mma n sə́re ên nná ebhú n di na ên. Bəre chénchén nji á séŋe á kpê na mme ka ebhín í Mosis na onwet akará-otîp Obhasi na Nwet i Nkôn Obhasi, í fóne ka efábhám ka ekpak á séŋe.”
45A bhâ gyími mân ábho etʉʉ́m mbá ka achot Obhasi áma. 46Se á séŋe ka nwet Obhasi sê, “Krayis, nne nnyo Obhasi a kí tum se a bhá yim ngun á sém, a ri a yén oseŋe. Tîk á yúi yê, kən ebhú á kən yê, ka osúí mfín ésá, tîk a nyə́me ka ekʉ̂. 47Tîk á róghe mfá ka Jerusarem á səra nték i ngun chénchén se á mághe obhí ábho, Obhasi a ri nsôn a su ḿbə́ne. 48Ên nâ o ri ên atî-isê achot mmá chénchén.
49“Mme ḿfoné n kí tum ejûm nji Ńsé omé a chimî a káre ên. Ka obhô mbí, deê nne owəné kpe yót a kâ mághe eték kpá tata a fôn ikom áfi mfi Ńsé a chimî.”#Etûm 1.4.
Jisos a chə́bhe njəm mbâ Obhasi
(Mak 16.19-20; Etûm 1.9-11)
50Jisos a bhâ kô mân ágbán abhê a jak ta a kpíri eték í Betani. A yûŋ abhô amê ka ósô, a káre ábho enare.#Etûm 1.9-11. 51A kpo man, Obhasi a yûŋ yê a jak ka ósô. 52Ebhú á gyʉra áno a jak, ane abhê á róghe ekûp na ejík ekarám. Á chə́bhe mân njəm nnyi Jerusarem na ekpatə́m ogyebhá-ḿbə́ŋé. 53Á kə̂t á jená ka ókʉ́rí achot Obhasi chénchén ebhú á kará ekûp na ejík mbâ Obhasi.
موجودہ انتخاب:
Luk, echî 24: ETUNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ejagham New Testament © Bible Society of Nigeria and Bible Society of Cameroon, 1996.