GÉNESIS 6
6
Kuimbae reta imbaeyoa
1Kuimbae reta omboɨpɨ ma oñemuña yave ɨvɨ iárambo, oa chupe reta tayɨ. 2Tumpa taɨ reta oecha kuimbae reta tayɨ maepöra yae reta yave, oiparavo reta iyeupe jembirekorä, jae reta oipota vae. 3Jare yandeYa jei: “Mbaetɨta amaeño kuimbae oikove jekuae avei, echa jae ko sooño; jáeramo jaeño oikoveta ciento veinte año.”
4Jókuae ara rupi oime kuimbae ipuku yae vae,#Nm 13.33. jare vi Tumpa taɨ reta güɨreko güive kuimbae reta tayɨ, omomembɨ reta. Kuae reta ko jae imbaepuere yae vae, jókuae ara güive kuae kuimbae reta jërakua yae mbaepuere pe.
5Jare yandeYa oecha kuimbae reta imbaeyoa jeiete yae ma ɨvɨ pe. Oecha kërai kuimbae reta ipɨa iyemongeta jekuaekuae mbaeyoa kotɨ reteiño. 6Jayave yandeYa ombopɨatɨtɨ, arakae oyapo kuimbae vae, jare jókuae jasɨ ipɨa pe. 7YandeYa jei: “Amokañɨteita kuae ɨvɨ güi kuimbae reta ayapogüe. Amokañɨteita kuimbae jare opaete mɨmba jare mɨmba ipɨtía re oguata vae, jare güɨra reta. ¡Echa chembopɨatɨtɨ arakae ayapo vae reta!”
8Ërei Noé re yandeYa ipɨakatu reve omae.#Mt 24.37; Lc 17.26; 1 P 3.20.
Noé oyapo arca
9Echa körai arakae Noé: Noé ko jae metei kuimbae jupi vae, ikavi jembiapo opaete vae reta güi jókuae ara rupi; oiko Tumpa jemimbota#2 P 2.5. rupi kavi. 10Oa Noé pe mboapɨ taɨ: Sem, Cam jare Jafet.
11Tumpa jóvai ɨvɨ ipo reta opa oikomegua. Jeta tekorai oyekuaa ɨvɨ pe. 12Tumpa omae ɨvɨ pegua reta re, jare oecha opaetei oikomegua ɨvɨ pe, echa opaete vae reta jeko kavi opa oikomegua. 13Jayave Tumpa jei Noé pe: “Ayemongeta opa amokañɨtei vaerä kuimbae reta, echa jae reta jeko pegua opa teko kavi oikomegua. Jáeramo añave opata amokañɨtei kuae ɨvɨ kuimbae reta ndive. 14Jayave eyapo ndeyeupe metei arca ɨvɨra iyaɨsɨ vae güi. Jare arca japɨpe emboyao yao. Eyapeteasɨ kavi japɨpe rupi jare ikupe rupi mbae ipomoasɨ vae pe. 15Köraita reyapo jókuae arca: Ciento treinta y cinco metro pukugüe, veintidó metro y medio ipɨgüe, jare trece metro y medio ɨvategüe. 16Mboapɨ yemboyao reyapota kuae arca: Igüɨasɨ pe, mbɨte pe jare ɨvateasɨ. Reñonota metei ventana ɨvateasɨ, jare igüɨ ete pe jöke. 17Aruta ɨporu guasu ɨvɨ re, amokañɨtei vaerä opaete oikove kuae ara igüɨ pe vae reta. Jökorai opaete vae omanota. 18Ërei ayapo morogüɨrökuavee päve nde ndive: Nde reiketa arca pe nderembireko ndive, jare nderaɨ reta jembireko reve reve. 19Jare opaete oikove vae güi remoingeta mókoi mókoi rupi arca pe; jökorai oikove reta vaerä vi nde ndive. Remoingeta mɨmba kuimbae jare mɨmba kuña. 20Güɨra reta ñavo ambuaeyee vae, jare mbaemɨmba ñavo ambuaeyee vae jare opaete ipɨtía re oguata vae, oiketa nde ndive mókoi mókoi päve, oikove reta vaerä. 21Eraja jeta oipotagüe tembíu, jare eñovatu, pepuere vaerä peu jare mɨmba reta vi.”
22Jökorai oyapo Noé. Oyapo opaete Tumpa jei chupe rami.#Heb 11.7.
موجودہ انتخاب:
GÉNESIS 6: GUABD
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Biblia DC Guaraní Bolivia © Bolivian Bible Society, 2001.