Iivesi zeBhayibhile ezithandwayo ezisuka IMIZEKELISO 3

Share

Kholosa ngoYehova ngentliziyo yakho yonke, Ungayami okwakho ukuqonda. Uze umazi yena ezindleleni zakho zonke; Wówulungelelanisa umendo wakho.

Musa ukuba sisilumko kwawakho amehlo; Yoyika uYehova usuke entweni embi.

Mzukise uYehova ngobuncwane bakho, Nangentlahlela yongeniselo lwakho lonke: Ózala amaqonga akho bubuninzi, Nemikhombe yakho yokukhongozela iphuphume iwayini entsha.

Inceba nenyaniso mayingakushiyi; Zínxibe kuwe emqaleni; Zíbhale elucwecweni lwentliziyo yakho

Uqeqesho lukaYehova, nyana wam, musa ukulucekisa, Ungakruquki sisohlwayo sakhe; Kuba lo amthandayo uYehova uyamohlwaya, Njengoyise esohlwaya unyana akholwayo nguye.

Nyana wam, musa ukuwulibala umyalelo wam; Intliziyo yakho mayiyibambe imithetho yam; Kuba iya kukongeza imihla emide, Neminyaka yobomi, noxolo.

Hayi, uyolo lomntu ofumene ubulumko, Lomntu ozuze ingqondo! Kuba lulungile urhwebo lwabo ngaphezu korhwebo lwesilivere, Nongeniselo lwabo ngaphezu kwegolide embiweyo. Bunqabile bona ngaphezu kwekorale,• Nezinto zakho zonke ezinqwenelekayo azilingani nabo.

Musa ukwala nento elungileyo kolunge nayo, Kwakuba kusemandleni esandla sakho ukuyenza.

UYehova waliseka ihlabathi ngobulumko, Walizinzisa izulu ngengqondo.