Tabekacane 26
26
Ku Isake yakaikai ka Gerare
1Ikai ki zidai ki Aberahame, kwi swakai kwini la kingivale tukalasilravane; kikai la ikaainga ku nisanguvalane tukalasilravane. Ku Isake la mwa ka Gerare satalu ki talialalai ki swa Pelisitine ka Abimileke. 2Ku Tamatama papia ki Isake adrelane, la iya kai iniane, “Madha mwamwa ka Izipiti, ikaaiya kwini ikaiya taiyaneli muswane; 3ikaiya kai, lri tapalraku muswane, si subulrubulru muswane. Lri baadhaku kikai kadaengane muswane si lamwabaibalrithi muswane, la pangimia ku takiketeketane ki tamasu ka Aberahame. 4Lri baadhaku muswane ku mapaangale ku lamwabaibalrithi muswane, mia ki tariau subelebelenge ku kalrane, la lri baadhaku kikai kadaengane liniane. Sanaka kuni lri ngwalai ki lamwabaibalrithi muswane si kisubulrubulru. 5Asi lwiyane ku Aberahame pasalaladha nakwane, paluludu kudra sanaka hulriceli si drekaseli, lakamani ku subulrubulruli muswane.”
6Ku Isake la ikaainga kwini Gerare. 7Ku swakai kwini lu kivaga ki lasu ku ngwakai ki taelrelreini, kwi lasu agili amia ki Rebeka, makiwcu taelrelreli iya; asi lwiyane mathariri turamuru ku tacebeane ki Rebeka, kwi lasu mwakuludru ki swakai kwini ku papacai iniane, si malra ribici ki Rebeka. 8Ku Isake sa kawlainga ku taikaiyane kwini. Yakai saka kiningivalane, ku talialalai ki swa Pelisitine ka Abimileke la pangukai ki lribange drele pulatadre, la drele ki Isake si Rebeka sa makakekekebere. 9Ku Abimileke la dawlu ki Isake, si kivaga iniane, “Anika taelrelresu ki alisu, agili asu iya?”
Kwi lasu la tubalre, “Alaiyasi taelrelreli iyaku, mwakuludraku lu ngwaladhaku iniane si kipapacai.”
10Ku Abimileke la iya kai, “Asu piya kai naiane? Alaiyasi la ikai ki mapapangaleli ku tadrusa ki taelrelresu apece, lri kamanisu ka siamece ku pasalrivane nai.” 11Ku Abimileke la drekase pelaela, pakipapawlringau ki mapapangale, “Ku aneane ku wavangavange ki lasu si taelrelreini, lrika aneane ku lri kipapacai.”
12Ku Isake la italikai kwini kaungu, kwini ki caili la ngukaalra ku taleke, asi lwiyane ku Tamatama swabulrubulru iniane. 13Ku tacekecekelaneini la arwa drimadrima sikakathane, lakamaninga kwidra maparamuru ku tacekecekelane. 14Ku swa Pelisitine sa drele ka makalra ku lalwange, lakiu si ladurini, la pathalra turamuru, 15la selrepe salraelre ku dae patuelre kwini ki dralremedremeini. Kikai ladralremedreme amani ku tamaini ka Aberahame sa panianianiakeana ka palruku ki lasasiakawlu.
16Ku Abimileke la iya kai ki Isake, “Lu katwasa naiane, kikai ngiraeradhekanengasu naiane!” 17Ku Isake la katwase kwini, mwa ka valrwalru kavai Gerare, si ikai kwini tusasuladhane, si kawlaiana ikaikai kwini. 18Ku Aberahame sa panianianiakeana, walruku ku talupiale ku dralremedreme, ai sa pacainga kai lasu, ku swa Pelisitine waselrepe ara dae kwini ki dralremedreme. Ku Isake la peelanga lruku, si tusakamia kwini nasunagane ki tamaini.
19Ku sasiakawlu ki Isake yakai ki valrwalru lruku ku taluvale ku dralremedreme, si kidringai ku acilai. 20Ku taraagwagu ki swa Gerare si taraagwagu ki Isake la karivu, tara amiya kai, “Kikai yai acilai nai.” Lakamani ku sunagane ki Isake kwini ki dralremedreme pasi Kwarele#26.20 “Kwarele” ku pacugane “madradrikisi” amia., amani sa makaririvu kwi lalasu.
21Ku sasiakawlu ki Isake la lruukunga ku taluvale ku dralremedreme, kwi lalasu la ngwaalainga kikai ki dralremedreme makaririvu, lakamani ku sunagane ki Isake pasi Sitina#26.21 “Sitina” ku pacugane “lisiane” amia.. 22Kwi lasu la katwase kwini, la lruukunga ku taluvale ku dralremedreme. Kikai la kai makaririvunga, lakamani ku pasi Rehebuthe#26.22 “Rehebuthe” ku pacugane “swaadrau” amia. kai ki dralremedreme. Kwi lasu amia kai, “Ku Tamatama tau pangilralraingi naiane ikai kai, lri ikai nai kai edhale ngiradhekane.”
23Ku Isake la katwase kikwini taluela mwa ka Bereseba. 24Kwini sakamaungu, ku Tamatama adrelane iniane, la iya kai iniane, “Amaniaku ku Twaumase ki tamasu ka Aberahame; tapalraku muswane, madha mukulukuludru. Pakai kudra tapuvaganeli ki sasiakawluli ka Aberahame, lri subulrubulrwaku muswane si lagaganesu.” 25Ku Isake la ikai kwini raedre ku tapatarumaramarane, si sukubu ki Tamatama, ala ikai kwini tusasuladhane. Ku sasiakawluini la ikaainga kwini lruku ku taluvale ku dralremedreme.
Ku Isake si Abimileke makaketekete
26Ku Abimileke mailuku ki takivaganeini ka Ahuzate si mabelenge ki kwapingi ka Pikule twalai Gerare kela kikawriva ki Isake. 27Ku Isake la iya kai liniane, “Anu keela kikawriva nakwane? Ku paswalala kai numi ka mavalracevace nakwane, si pakatwase nakwane ki kadaengane numi?”
28Kwi lalasu la tubalre, “Kikainga, pwalringaunga nai ala ka yakai ku Tamatama tapalra muswane. Lu kidremedreme nai, kai tamangangimianeta nai makaketeketeta si cegecege tukakudhane; ani puvaga amia nai muswane, 29kaisu lri tulisi naiane, mia naiane ka kaiyana twalisiana muswane. Kunadruma twathariri nai muswane, la kasulivaliivatesu katwase; kikai wathingale nai ku Tamatama ka swabulrubulru muswane.” 30Ku Isake la padulru ku angitalekane, kwi lalasu la taelre si kabalrulu. 31Sakakaiyane, sakamialrealre la sarangidrakaale, si makaketekete, cegecege tukakudhane. Ku Isake la sateatedre liniane katwase, si makathaithaariri mawvagavagai.
32Ikai kwini ki vai, ku sasiakawlu ki Isake la kela ki tawki lini pelaela ku patharukai kwini ki talrukwane ku dralremedreme, la iya kai, “Kiadringai nai ku berai ki acilai.” 33Kwi lasu la sunagane kwini ki dralremedreme pasi Seba. Lakamani kikai cekele ku kipasi Bereseba pakelanga kaikameane.
Lataelrelre ki Isau ka maelane ka lazuku
34Ku Isau sa taramasupatelenga ku caili la karudrange mwa ki tadrusa ka ababai ki swa Hite. Kikai tadrusa ka ababai amani kwini Yudithe ka lalake ki Beri si kwini Basemathe ka lalake ki Ilune. 35Kwini lamali pakwalri turamuru ku tapanianiakane ki Isake si Rebeka.
Currently Selected:
Tabekacane 26: NDV
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society in Taiwan, 2017
All rights reserved
© 臺灣聖經公會版權所有，2017