Tabekacane 27
27
Ku Isake swabulrubulru ki Yakubu
1Kikai ku Isake pasuludrunga, la kamukicinga. La dawlu ki takataka ka Isau, si iya kai iniane, “Lalakeli!”
La tubalre ku Isau, “Kawvadhaku!”
2Ku Isake la iya kai, “Drela, kai pasuludrunga naku, ka kai lri tarathainunga si pacai. 3Lu iluka kwi lraili muubulane alupu, 4la pangimia kudra pakalimemeli tuakaneane, la malra si pakane nakwane, la nau subulrubulrwana muswane sa kainaku pacaiyana.”
5Ku Rebeka la kilalra kwini takawrivane ki Isake papia ki lalakeini ka Isau, sa katwase muubulane alupu ku Isau, 6la iya kai ki Yakubu, “Kwini kialalralalraku ki tamasu sa iya kai ki taka ka Isau, 7‘Lu alupa la pangimia kudra pakalimemeli tuakaneane si pakane nakwane, sa kainaku pacaiyana, la nau subulrubulrwana muswane ikai cucubungu ki Tamatama.’ 8Lalakeli! Kilalra, lu pangimia kai vagali. 9Lu mwa takivane pilri ku drusa ku maricuru ku tikiyane ka kiu, nau tuakaneane ku pakalimeme ki tamasu. 10Lasu mwa baai pakane iniane; sa kaina pacai lri subulrubulru muswane.”
11Ai ku Yakubu amia kai ki tinaini, “Wathingalesu ki kaka ka Isau ubawbalane ku kinawmasaneini, la kasasulape kai kinawmasaneli. 12Alaiyasi ku ama la kirimu sulrape nakwane, la thingale ka walrilrilrigilaku iniane; kainaku lri kisubulrubulru iniane, lri ngipapusulringa naku kamani.”
13Ku tinaini la tubalre, “Lalakeli! Nau kamaaninga ka siamece ku akipuswane, pangimia kai taiyaneli! Lu mwa! Malra ku kiu!” 14Ku Yakubu la mwa malra ku kiu, la baai ki tinaini, kwini tiatina la tuakaneane ku pakalimeme ki tatama. 15Ku Rebeka la malra kwidra suru ki takataka ka lalakeini ka Isau pitavanane ku mathaithariringa ku laimai pasilaimai ki agiagi ka lalakeini ka Yakubu, 16la arakai ku ubale ki kiu lrepelrepe paecebe ki takasasulapane ki alrima si lre, 17la malra ku nituakaneanane ku beate si niakamane ku pange si baai iniane.
18Ku Yakubu la mwa ki tamaini, si akuvaale, “Ama” iya!
Ku tatama la tubalre, “Lalake, aneanesu?”
19La tubalre ku Yakubu, “Eapesu ka Isau. Ku cunusu nakwane, makapaiyangaku. Ala nenea, la kane kikai panali kai bulabulai, lasu subulrubulru nakwane.”
20Ku Isake la iya kai, “Lalake, asu padawdaalru si pana?”
La tubalre ku Yakubu, “Amani ku Tamatama ka Twaumasesu ka pasasipiane nakwane!”
21Ku Isake la iya kai ki Yakubu, “Lalake, kela kai, nau swasulrape; tenganesu ka lalakeli ka Isau?” 22Ku Yakubu la mwa adeethe, ku Isake la swasulrape iniane, la iya kai, “Kai lingau mia ki lingau ki Yakubu; ai kai alrima laka alrima ki Isau.” 23Kai maka wathingale ala ka Yakubu, asi lwiyane kwini alrima ki Yakubu mia ki Isau ka ubawbalane. Salri subulrubulru ki Yakubu yai, 24la peelana kivaga, “Patenganesu ka lalakeli ka Isau?”
La tubalre ku Yakubu, “Unu!”
25Ku Isake la iya kai, “Taa pwa kai kwini bulabulai! Lu maka kanengaku la nau subulrubulru muswane.” Ku Yakubu la baai kwini bulabulai, la baai ku bava paungulu iniane. 26La iya kai ku Isake, “Lalake, bwala kela kai si uma nakwane!” 27Ku Yakubu la mwa uma iniane, kwi lasu sa sabalri kwini laimai ki Yakubu, la subulrubulru iniane, iya kai, “Ku sangulremane ki lalakeli mararaamau kudra nisubulrubulrwane ki Tamatama ka kadaengane ku sangulremane. 28Ku Twaumase ani patwalai subelebelenge patarumara muswane ku udale ki kalarigarigane, lani pakalrange akarawmane ki kadaenganesu. Ani baai muswane ku ngiaesaadhane ku lataleke, mathariri ka bava! 29Sanaka kuni ani marasikai muswane; kai sanaka umawmase ani sukubu muswane. Asu rathudu ki laretesanesu; ku lalalake ki tinasu ani makitu pidruru sukubu muswane. Ku wapusu muswane ku umawmase lri kipusu; ku swabulrubulru muswane ku umawmase lri kipakaesai.”
Ku Isau kiatubi ku akisubulrubulrwane ki Isake
30Ku Isake sa maka subulrubulru ki Yakubu; mwa latalatadre ku Yakubu, ku takaini ka Isau wakelakeela singitalupane. 31Ku Isau mialri makatwakaneanenga, la malra pucucubungu ki tamaini, iya kai, “Ama, nenea, la kane kikai pasikaili muswane alupu, ala subulrubulru nakwane.”
32Ku tamaini ka Isake la kivaga, “Aneanesu?”
Kwi lasu la tubalre, “Eapesu ka Isau!”
33Ku Isake la manugeregere ku kinawmasaneini, la kivaga iniane, “Kuasane kudra wamalra ku bulabulai si pakane nakwane laka aneane, sa kaisu mudaaneana maka wakanenganaaku. La maka subulrubulrunga naku iniane; kikai nisubulrubulrwane lrika inianenga apalralrawthu.”
34Ku Isau sa kilalra ku vaga ki tamaini, la kiangeange ku kidremedremeini, si karaleale tubi iya kai, “Ama, ala mialria subulrubulru nakwane!”
35Ku Isake la tubalre, “Ku agi mwadaane si lrilrigili nakwane ribici kwini akaesadhanesu.”
36Ku Isau la iya kai, “Kikai yai saka kingipusale lrilrigili nakwane, tharepanenga si Yakubu#27.36 “Yakubu” ku pacugane “watavuvulrucu” amia., kwi lasu waribici ku puku ki takaeapaneli, kikai la maalranga ribici ku akaesadhaneli. Kadrua ku pasurusu ku drumane ku akaesadhane si baai nakwane?”
37Ku Isake la tubalre, “Wacegecegenga naku iniane ka lri atawki muswane, sanaka laretesaneini lri pasikaikai iniane makanaelre. La mialriaku subulrubulru iniane, baai iniane ku lataleke, mathariri ka bava. Lalakeli! Kikainga manemaneana ku abadhaneli muswane?”
38Ku Isau la pacungulu takutubitubi kitubi ki tamaini, “Ama, kathane kwini vaeva ku sasubulrubulrwanesu? Ama, kiatubiaku muswane mialria subulrubulru nakwane!” Sa maka kawrivanga la akwadrau tungawngau tubi.
39Ku tamaini ka Isake la tubalre iya kai:
Kai lri baai ku udale ki kalarigarigane muswane;
kadrwa ku drulrusu ku malrange ku kadaengane.
40Lri satalusu ki dramu panianiake,
lri pasikaikaisu ki agi;
ai lu kiecebesu#27.40 “kiecebe” ku wahunyake madu iya kai “wabaebalre”. iniane,
lri duulrusu kalrabuthu ki sakatemaneini.
41Ku Isau laka takalisiiane ki Yakubu, asi lwiyane ku tamaini swabulrubulru ki Yakubu. Lu kidremedreme kwi lasu, “Ka ama lri padaalrunga si pacai, sana ngulremeane nai, lri tara papaacadhaku ki agili ka Yakubu.”
42Yakai ku umawmase ku wamalra kikwini apangimiane ki takataka ka lalakeini ka Isau pelaela ki Rebeka, kwi alisu la dawlu ki agiagi ka lalakeini ka Yakubu, si iya kai, “Kilalra kai vagali! Ka taka ka Isau lri bilri muswane, si papacai muswane. 43Lalakeli! Singikaiya kai vagali katwase pangimia. La makakaai katwase mwa ka Harange, si mubere mwa ki kaka ka Labange, 44la ikai kwini taelre iniane padawdaalru, lu kabaasaunga ka kalisilisi ki taka ka Isau, 45si karimurunga ku natapianesu iniane, lri pakatwasenga naku ku lri malramalra muswane pasiwlri. Bekacaku ivaivaai sakawlrau kai ki tadrusa ka sawvalai ka lalakeli?”
Ku Yakubu mwabere mwa ki Labange
46Ku Rebeka la iya kai ki Isake, “Malraasaku kavai tadrusa ka maelane ka zuku ka taelrelre ki Isau. Alaiyasi ku Yakubu la mialri mwa ki swa Hite ka ababai, maesaesadhaku pacainga kamani.”
Currently Selected:
Tabekacane 27: NDV
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society in Taiwan, 2017
All rights reserved
© 臺灣聖經公會版權所有，2017