MARKUS 11
11
Yesus coi ug ei Yerusalem bit yo di ingon llei sut Noni
(Mat. 21:1-11; Luk. 19:28-40; Yoh. 12:12-19)
1Tirigi Yesus nya yuug ndam Yerusalem lene ikwei dideu minu mien Betfage kin Betania ei Nungug Tou Zaitun nimig. Lene Noni cuk yo di igya kui Noni ibou can bidor bibie leu yok, 2bipai biyok “Jug ei minu mien di jitau eisi dima ug lene mijingat keledai nipmot di nehen pap di tungwatu nya yuu ba, hi bri bigyo. Ma jipas kuk tut bijijem kwei biDa. 3Gino ihig ser je ‘Nggon rino jipas kuk tut keledai dima i?’ Lene ma jibuhup ‘Tuhan#11:3 Nipas kep Tuhan cem kei lene nipas kep niceu cem kei. joi sut mem bri mbigom ug e. Leu api Noni mitug hanyen kwei.’ ”
4Gima rino imbut leu api ingat keledai nehen pap di tungwatu nya yuu ei dimbou heisi ei biyati dima ba, ipas kuk tut. 5Ibou poi di igya kui ig dima ihig ser yok “Nggon rino jipas kuk tut keledai nehen pap dima i?”
6Ibuhup ighyet bit leu nok Yesus nicuk yokti leu api yo dima ikes yo cin di igya kui Yesus bimbut. 7Tirigi ijem keledai kwei bak Yesus lene iba ide sinsun ndok di jei bijuk kep keledai ninghim leu api Noni bri bigwam dip. 8Tungwatu ningot ndig cem ingig ide sinsun ndok di jei kak simpak nok kwo ngig mem Yesus nimbutti lene nindigsi nya itot mpam meng kwei leu susti bingig kak simpak bu. 9#Mzm. 118:25-26 Tungwatu ningot ndig bihi ibie lene bihi igya abia kep Noni leu api ighyet kui yam bipai “Jikwei ba, inggei sut Allah o! Allah e, anjei mun di kei bak No di kwei tug hon Nonti ninyeng o! 10Allah e, ayai gi kei bak icig Daud ninyeng tak kepti di mikwei yo o! Jikwei ba, inggei sut Allah o!”
11Yesus ug krau minu ndig Yerusalem bicoi ug ei Tuhan De Ig bimian ser mun di joti nya hagom leu api ngkwei hanyen ug ei Betania bit yo di igya kui Noni ibou simnaibrimigcan lewo mpia mmun tu.
Yesus mbriom biei ara
(Mat. 21:18-19)
12Njap bigyoti di hyep bu tirigi Yesus nya ijo leu Betania bikwei hanyen lene Noni nggum. 13Noni ya minu ting bicap biei ara di nimeng nggrou buug ndam binggok ser ningat di ntun him. Noni kwei ya kui bingat lo, nimeng nggrou lewo bed dem mem gima ngat ningat bigyo. 14Gima rino Noni mbriom biei dima bipai “Hon kep ammani kui ne tungwatu nya mipuk angat bigyem bu bi sren.”
Yo di igya kui Noni imiap nimbriomti dima.
Yesus coi ug ei Tuhan De Ig
(Mat. 21:12-17; Luk. 19:45-48; Yoh. 2:13-22)
15Mpe dino Yesus nya ikwei krau Yerusalem hanyen lene Noni coi kikau ug ei Tuhan De Ig bijji yo di itri mun bibipek mun yahagom bingwig leu mpia dima. Noni njei bilen di iluei mitiei eisi binjei yo di itri hakimoi nya ide bilen hagom ug ei igjou dip. 16Noni cuon ser tungwatu nya leu binhyepo ipian mun nyeng hi ei Tuhan De Ig bu au. 17#Yes. 56:7; Yer. 7:11 Leu api Noni ngginau yo di ingat rin ei sirima bipai “Allah nihyet pai bipia Allah pai ‘Tungwatu nya mipai sut Ditde Ig bipia ig dini ne gumihyep mem mben nya yahagom ingat nadi eisi. Noro jibon ig dini nok hak mihyeti mem ninggimang kep mun cig iku yok eisi.’ ”
18Tirigi Yesus ninghapti tibim ug ei imam nindig nya kin guru Puig Yahudi nicukti nya itingou nsi lene inggok nikwesti mem ihwen Noni. Ittin tut Noni lewo tungwatu nya yahagom inggap leu tut nihyet.
19Mmun tu rino Yesus kin yo di igya kui Noni ijo leu minu ndig dima bingkwei hanyen.
Ningginausi di tug hon biei ara
(Mat. 21:20-22)
20Njap bigyoti di hyep bu tirigi Yesus nya ikak puig bikwei hanyen lene ingat lo, biei ara mui leu nitriti kikau ug bipek ninggrupti. 21Lene Petrus yok ngon kep Yesus nimbriomti di annani pima bipai biNoni “Guru e, angat i! Biei ara di ambriom pima mui su!”
22Yesus buhup “Ma jiba jingon com Allah. 23#Mat. 17:20; 1Kor. 13:2 Ma jiyok ngon kep bipia bon jicuk nungug dini bijipai ‘Akiju ba, akinyon ei muk ngeisi!’ Gino jihig jingon eisi tut bi ba, jinyohou niba ningon comti ei jingonti lene jicukti dima mipek kep. 24Gima rino ma jiyok ngon kep bipia tirigi jahara Allah tut mun nyeng hi tug hon nadi ma jinyohou niba ningon comti ei jingonti apino mijiyai mun di jahara tut dima. 25#Mat. 6:14-15 Tirigi jingat nadi lo, jingon kwes kin hiter bi lene ma jikos ser nide sisar di bon bije nipou ug e. Leu binhyepo Jicig ei gwamti cem mikos ser jide sisar. [26Ne gino jikos ser hiter nide sisar di bon bije bi lene Jicig ei gwamti cem mikos ser jide sisar bi.]”
Ihig ser Yesus tut Nide nisindemti nikwei leusi
(Mat. 21:23-27; Luk. 20:1-8)
27Yesus nya ikwei krau Yerusalem hanyen. Tirigi Noni ya-ya nyen ei Tuhan De Ig lene imam nindig nya kin guru Puig Yahudi nicukti nya kin nibou mben Yahudi nya ikwei ngat Noni, 28bihig ser Noni “Mindur di abon dima tug hon tou ninyeng i? Tou risindem tut Na i?”
29Noni buhup “Dani cem dihig ser je tut mun nyeng gom. Gino jibuhup igbit lene Dani cem midibirop bije tut no di sindem tut Da mem dibon mindur dima. 30Yohanes di tur tungwatu nya ei minyeiti nide nisindemti kwei leu tou i? Allah e, he tungwatu nya e?”
31Lene isimbot kep tut ninyen bipai biyam “Ibuhup notou? Leu gino ibuhup nihyet bipia Allah sindem tut Yohanes lene Noni mibuhup hanyen binye ‘Nggon rino jingon jo kep noni bi i?’ 32Ne gino ibuhup ‘Tungwatu nya isindem tut noni’ lene notou mem nye i?” Lewo ittin tut tungwatu nya di ikan bipia Yohanes ne nabi ri. 33Gima rino ibuhup “Nikan tut bi.”
Lene Yesus pai biyok “Gi nok lene Dani cem midipai igbit bije tut Ditde nisindemti nikwei leusi bi.”
Currently Selected:
MARKUS 11: HAD
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena