MARKUS 12
12
Nihyet nibiti nindati tut yo di inyohou ba anggur nghousi
(Mat. 21:33-46; Luk. 20:9-19)
1 #
Yes. 5:1-2
Leu api Yesus ba nihyet nibiti nindati bingginau yok bipai “Mpe di gom ne miai ceu gom ug yai midyai ei ba anggur kioisi leu api bon ngug ser ba, heu huk nindig bibor mem gima ipot ba anggur ningei eisi. Lene hok ig jibei cem ser. Leu api noni ndo midyai dima bak yo di inyohou ba anggur nghousi kan ba, ibitug ndei imuhup leu api noni mbut ug ei minu ting leu. 2Tirigi nijam nipuk ba anggur ningatti dem lene noni cuk nide awak gom kwei ba, kwei yai miai ceu de ba anggur ningat leu yo di inyohou pima ba, ibitug ndei imuhup cem. 3Noro yo dima ikat awak dima bibui noni lene ijji noni bingkwei hanyen kin gino hei he. 4Lene ba anggur niceu cuk nide awak gom kin bu kwei lo, ibui nibou bibok lene iba nirom nihyet kuisi bijji noni bingkwei hanyen. 5Ba anggur niceu cuk nide awak gom kin bu kwei lo, ihwen noni cem. Nok gima kikau ba, igyai bram igyaisi pima tut awak nindigsi nya bu ba, ibui bihi lene ihwen bihi bu. 6Ba anggur niceu mipinak tou kwei i? Jo tungwagom ngat he ba, tungwa gom ngat dima ne ba anggur niceu nipmot di ningon ngakei nindig bibor ri. Gima rino noni cuk nipmot ei niabiati buug ngat yok lewo kan bipia yo dima mikuk yok binoni. 7Noro awak dima yok yuhum yam nsi bipai ‘No dima miba nokep mun nyeng hagom di jo bak nicig. Jikwei ba, ihwen noni leu binhyepo iba nyekep ba anggur nghousi dini.’ 8Lene ikat noni bihwen leu api injei ningut ug ei ngug sai.
9Lene Yesus hig ser yok ba anggur niceu minggon ndei yo dima i? Noni mikwei hwen yahagom leu api ndo ba anggur nghousi dima bak yo di hiter bu. 10#Mzm. 118:22-23 Jikwop Allah Nihyet di pas kep nok gini e? ‘Tig mma di tukan nya ikou sut bon ninyeng jei dor njiriek tig nindigsi nya. 11Allah bon mun dini ba, nyeni ingon llei sut nindig bibor!’ ”
12Gima rino mben Yahudi ide nibou nya ipi bikat Yesus lewo ikan tut bipia nihyet nibiti nindati dima pai singgre yoni. Noro ittin tut tungwatu ningot ndig dima ba, ikes Noni biyuug leu.
Ningginausi tut belasten di igo bak Kaisar
(Mat. 22:15-22; Luk. 20:20-26)
13Nibou nya icuk Farisi nya kin yo di inggre kin nimpung Herodes ibou pwoi biyuug ngat Yesus leu binhyepo iba nihyet bisrou Nonti. 14Ikwei pai biNoni “Guru e, nikan tut bipia angon sren ba, amig mbus tungwatu nya bi. Gima cem nikan tut bipia apai mingat tut Allah ningon kanti mem tungwatu nya lene adigit tut ibuhupti bi. Gima rino ma apai sut angon kanti binye tut belasten di igo gau nyenti bak nibou Kaisar Roma ug e. Igyaisi dima tunggwei sut Puig Yahudi nidimig sutti e? Ma igo belasten bak e, he igo bi e?”
15Noro Yesus kan tut ide nibiti nindati dima leu api buhup “Nggon rino jibingon mem gima jisrou Da tut i? Jindo igbit mitiei di jibigo belasten dima biDa.”
16Gima rino indo mitiei nitig gom bak. Leu api Yesus hig ser yok “Tou rininyeng kin ningwes jo ei mitiei diniti i?”
Ibuhup “Kaisar.”
17Gima rino Noni pai biyok “Gi nok lene ma jikwas mun di Kaisar nyeng tut nya hanyen igbit bak Kaisar lene jikwas mun di Allah nyeng tut nya hanyen bak Allah.” Yoni inggap leu tut nibuhupti dima.
Ningginausi tut nikiju hanyen leu nimai eisi
(Mat. 22:23-33; Luk. 20:27-40)
18 #
Kis. 23:8
Yo di inggre kin nimpung Saduki ibou poi ikwei ngat Yesus. (Yo dini ne nimpung di ingon jo kep bipia tungwatu nya igikiju hanyen leu imai eisi bi sren ri.) 19#Ul. 25:5 Ipai singgre “Guru e, Musa pas kep niggai serti dini mem nye. Gino tungwagom di pijet mai leu nitnem ne suar nikinjoi wak nisen di pijet dima bu leu binhyepo yai nimunggwom bat nya bigya luei nijjep ndig hanyen. 20Mpe di gom ne pinai nya ibou muhwindacan di ikindig bat-ikinjoi bat yam ingat rin ba, gi hi di mighumbou wak nitnem noro mai nipilei hanyen tirigi nitnem yai imunggwom hi bigyo. 21Leu api nikinjoi wak nisen kibom hanyen noro noni cem mai nipilei hanyen tirigi nitnem yai imunggwom hi bigyo. Nok gima cem tut nikinjoi niningai di wak nisen kibom pima hanyen. 22Nok gima kikau ba, ibou muhwindacan dima yahagom imai hanyen ipilei leu tirigi kibom dima yai imunggwom hi bigyo. Ei niabiati bu lene kibom di pijet cem mai. 23Tirigi njap dem mem tungwatu nya ikiju hanyen leu imai eisi lene misop dima mijem gi tou rinok nijjep i? Lewo ibou muhwindacan iwak noni tu.”
24Yesus buhup “Jipai mun tunggwei nindig bibor lewo jingon dorti tut Allah Nihyet kin Allah de nisindemti bi. 25Tirigi tungwatu nya ikiju hanyen leu imai eisi lene pinai nya kin sop nya iwak yam bu bi. Noro yoni inok malaikati nya ei gwamti. 26#Kel. 3:6 Tut yo di imai su nya di ikiju hanyen leu imai eisi ne jikwop Musa nipas kepti tut biei mon di ninjeng di sror di cig-cai noro hum giyem bi dima bi e? Nipas kep ayatti dima tut Allah di pai binoni ‘Dani ne Abraham kin Ishak kin Yakub ide Allah ri.’ 27Noni ne Allah mem yo di imai su nya rin bi noro mem yo di igyaijo nya! Jipai mun tunggwei nindig bibor!”
Nicukti di bon ninyeng dor njiriek nicukti nindigsi nya
(Mat. 22:34-40; Luk. 10:25-28)
28 #
Luk. 10:25-28
Mpe dima lene guru Puig Yahudi nicukti gom kwei ngig nitingou mem mun di Yesus kin Saduki nya isimbot kep biyam tut lene kan tut bipia Yesus buhup ighyet nok gi kei bibor. Gima rino hig ser Yesus “Andigpoi e, nicukti gi tou ribon ninyeng dor njiriek nicukti nindigsi nya i?”
29 #
Ul. 6:4-5
Yesus buhup “Nicukti di bon ninyeng biya bibie mem nicukti nindigsi nya hagom pai nok gini. ‘Je di mben Israel jimiap e, ide Tuhan Allah ne Nongkom ngat ri Tuhan! 30Suar jiba jingonti titut yam kin jinnei titut yam kin jingon kanti titut yam kin jide nisindemti titut yam bingon ngakei jide Allah.’ 31#Im. 19:18 Nicukti gi nican di bon ninyeng noyam kin gi nigom pai ‘Suar angon ngakei hiter bit leu nok angon ngakei nanti.’ Nicukti ningat can dini bon ninyeng dor njiriek nicukti nindigsi nya hagom.”
32 #
Ul. 4:35
Lene guru Puig Yahudi nicukti buhup “Guru e, igbit rin ba, abuhupti dima ne nijit-jau ri! Tuhan Nongkom ngat rino Allah ba, Allah hiter nya ingat rin bi. 33#Hos. 6:6 Suar tungwatu nya iba ingonti titut yam kin ingon kanti titut yam kin ide nisindemti titut yam ba, ibingon ngakei Allah. Suar ingon ngakei hiter bit leu nok ingon ngakei yonti. Ba, nicukti ninyeng can dima bon ninyeng dor njiriek midut nibui mindhe-ndhe nya bindig ei nimbar hum dokti kin mun nindigsi di ikwas tut Allah cem.”
34Tirigi Yesus miap lo, no dima ba ningon di ki bibuhup igbit tu lene pai binoni “Angat rin ei minu ting leu Allah Ninyeng Tak Kepti bi.”
Hon kep njap dima kui lene hi brim ningkek kep Yesus bihig ser Noni bu bi.
Ihig yam tut Nibou Ndig di teu tungwatu nya biyai niyaijo nijep biyok
(Mat. 22:41-46; Luk. 20:41-44)
35Tirigi Yesus ngginau tungwatu nya ei Tuhan De Ig lene Noni hig singgre yok “Notou sut gi guru Puig Yahudi nicukti nya ipai sut bipia Nibou Ndig di teu tungwatu nya biyai niyaijo nijep biyok ntun Daud him i? 36#Mzm. 110:1 Lewo Daud pai tug hon Ninnei Gi Kwes di bie tut noni,
‘Allah pai bak ditde Tuhan bipia ma agwam kui dinda com#12:36: Nipas kep agwam kui dinda com: Bit leu mben Yahudi ingginausi lene no di gwam kui nibou hi ninda com mitug ndei ninyeng jei kin nisindemti. bibou doom Ade siceu nya ei amig him ug e.’
37Gino Daud jem Nibou Ndig di teu tungwatu nya biyai niyaijo nijep biyok ninyeng Tuhan lene notou Nibou Ndig di teu tungwatu nya biyai niyaijo nijep biyok ntun Daud him i?”
Yesus nisok kep yokti tut guru Puig Yahudi nicukti nya
(Mat. 23:1-36; Luk. 20:45-47)
Mpe dima lene tungwatu ningot ndig di idem yam ei Tuhan De Ig ijoi sut Yesus ningginausi nya. 38Yesus pai biyok “Jingon sok kep jenti tut guru Puig Yahudi nicukti nya lewo ijuk ide sinsun di jei bibor cem ijoi sut tungwatu nya ipigo yok ei biyati cem, 39igwam bilen dip kui nimbar ei jide ig mbusyameisi cem igwam bibie mem pesta di tungwatu nya ibon cem, 40iris sop kibom nya bipos ide ig bitut mun di joti nya hagom leu yok cem yuhuk nadi kikau cem ba, yahagom mitug ndei hukum nindig bibor dor njiriek tungwatu nindigsi nya!”
Kibom di kwas mitiei tut Allah
(Luk. 21:1-4)
41Mpe dima lene Yesus gwam biba noho rok brua mitiei ei Tuhan De Ig bitou kep tungwatu nya nggilun tirigi icom mitiei eisi. Lene yo di inyeng nya imang bibor icom ide mitiei nindig bibor eisi. 42Lene kibom di nuhui mbum gom kwei kes sen mmun can he ei brua nsi dima ba, nimangti dem pipi nimeng ngwoi gom ngat he. 43Gima rino Yesus hig yo di igya kui Noni kwei bingwig ttai Noni lene pai biyok “Dipai dihyet di nijit bije bipia kibom di nuhui mbum dima com mitiei nindig dor njiriek nindigsi yahagom ei brua nsi. 44Lewo nindigsi icom ide mitiei niken he noro kibom dima com nide mitiei hagom hak ba, njita cem ngwig leu noni tu.”
Currently Selected:
MARKUS 12: HAD
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena