Ruuka 21
21
Ebhiyaanwa bhya abhaniibhi na omutumbagasi
(Maariko 12:41‑44)
1Omwanya gunu Yeesu aariga achaari mu‑rubhuga rwa Riyekaru, ˆneenamusya ameeso ˆnaarora abhaniibhi nibhatuura ebhiyaanwa mu‑chiinu chirya cha okubhiikira‑mo. 2ˆNaarora omutumbagasi umwi omutaka, wone ˆnaasoosya jiyera ebhiri era.#21:2 Jiyera ebhiri era. Jinyabhurira ejindi ejaayika ati, jichapa ebhiri. Jipirya ejo jaariga jiri na indiyo nooto era.
3Mbe, Yeesu ˆnaayika ati, “Ni chimari enibhabhwira ati, omutumbagasi omutaka oyo, aasoosya jipirya nyafu okukira bhoone bhanu bhaasoosya. 4Enaayika kutyo kwa okubha abhandi bhanu bhoone bhaasoosya bhinu bhisaagire kw‑ibhona ryebhwe ryafu. Nawe omutumbagasi omutaka unu, ku‑bhutaka bhwaye aasoosya bhyone bhinu aari ari nabhyo.”
Yeesu kaaraga inguru ya okufumurwa kwa Riyekaru rya Nyamuwanga
(Mataayo 24:1‑2; Maariko 13:1‑2)
5Abheeyigisibhwa abhandi bha Yeesu, bhaariga nibhaayikira Riyekaru rya Nyamuwanga, kutyo ryariga rinojooriibhwe na amabhuyi ga ekisi, aamwi na ebhiyaanwa bhinu abhaanu bhaasoosisyaga Nyamuwanga. Neeya Yeesu ˆnaayika ati, 6“Omwanya oguuja, gunu ebhiinu bhyone bhinu omurora woori anu, ritari‑wo ebhuyi noorwo rimwi rinu ririsigara inguru ya erindi, goone garifumibhwa!”
Yeesu kaasoosya obhuragi bhwa ebhinyaasyo bhya abheeyigisibhwa bhaaye
(Mataayo 24:3‑14; Maariko 13:3‑13)
7Mbe, abheeyigisibhwa abho nibhamubhuusya ati, “Omwiyigisya, emisango ejo jirikorekana rusuku ri? Ka wone, niki chinu chiribha echibharikisyo cha okweresya ati, ejo jiri yeeyi okukorekana?”
8Yeesu ˆnaabhasubhya ati, “Mwangarire, omuunu woonewoone aasiga okubhajiga. Abhaanu bhaafu bhariija nibhakoreraga emirimu risiina ryani, bharyayikaga ati, ‘Anye naanye Kirisito!’ Ka wone bharyayikaga ati, ‘Omwanya gwa obhuteero gwafogeeye!’ Abhaanu abho, mwasiga okubharuubha! 9Ku‑mwanya ogwo, muribhaga nimuungwa emisango ja riremo na eja injogere ya abharwani, mwasiga okuyaya, kwa okubha ejo jeenderwe jikorekane okwamba, nawe obhuteero bhutaryanguwa okuuja.”
10Yeesu ˆnaagenderera okubhabhwira ati, “Echaaro echimwi chirirwana na echaaro echindi, obhukama bhumwi bhurirwana na obhukama obhundi. 11Bhuri rubhaara riribha‑wo rinyamutikima rya echaaro, omweko omururu kabhukabhu, na amarwara amawuute amabhiibhi muno. Echibharikisyo echinene chirisookerera ku‑rutumba. Abhaanu bharirora emisango emisito jinu jiribhakanga muno.
12“Nawe, ejo joone jichaari okukorekana, bharibhagwata na okubhanyaasya, bharibhasira mu‑nju ja ameekofyanyo geebhwe na okubhabhoya mu‑mabhoyero. Bharibhasira imbere ya abhakama na abhatungi, inguru yaani. 13Kurwa ejo, muribhona omwanya gwa okubhabhwira emisango jaani.
14“Mbe, mukararire mu‑myoyo jeemwe ati, mwasiga okuyaya ati muryayika ki mu‑kwibhagira. 15Anye omwene, niribhayaana obhwengeeso, na emisango jinu muryayika, abhasoko bheemwe bhataritura okuyaajana najo, noorwo okujirema.
16“Muriromerwa iniku na abheebhusi bheemwe, abhamura bhaanyu, jingʼanda jeemwe na abhasaani bheemwe. Okuruubhana na ebhikorwa bhya abhaanu abho, abhandi mw‑imwe muriitwa. 17Abhaanu bhoone, bharibhasoka ku‑songa yaani. 18Nawe, emisango ejo jitaribhawutaasya, noorwo orufwiri rumwi ku‑mitwe jeemwe rutaribhura wuri. 19Obhurame bhwemwe bhurichungurwa, mu‑kwigumiirisya kwemwe.
Nyamuwanga ariramura abhaanu bha echaaro cha Yisirayeeri
(Mataayo 24:15‑21; Maariko 13:14‑19)
20“Nawe, aribha mwarora ati, omusi gwa Yerusareemu gusingiywe na ebhise bhya abhasirikare, niwo murimenya ati, omwanya gwa okugusimagisya gwakingire. 21Niwo, abhaanu bhoone bhanu bheekaaye mu‑mukoowa gwa Yuudeya, bhabhirimire mu‑bhiima. Abhaanu bhanu bhari mu‑musi gwa Yerusareemu, bhaguwuruke‑mo bhwangu, na bhanu bhari mu‑masambu, bhasige okusubha mu‑musi omwo. 22Jiribha kutyo, kwa okubha, jisiku ejo nijo jisiku ja Nyamuwanga ja okusubhya orusiima, korereki emisango joone jinu ꞉jaakaamirwe na abharagi bha kara jikuumire.#21:22 Ringira Woseya 9:7. 23Jiribhabhona abhagasi bhanu bharibhaga bhafugaaye, na bhanu bharibhaga nibhaneenʼya, mu‑siku ejo! Okubha mu‑chaaro chinu, jiribha‑wo jinyaako nduru muno na risungu rya Nyamuwanga ririija ku‑bhaanu bhoone. 24Abhaanu abhandi bhariitwa kwa jimbanda. Abhandi bharigwatwa na okusirwa mu‑bhyaro ebhindi bhyone. Omusi gwa Yerusareemu guritungwa kwa amanaga na abhaanu abhandi bhanu bhatari Bhayawudi okusooka mu‑bhyaro ebhindi. Ejo jirikorekana, okukingira anu omwanya gwebhwe gwa okutunga gurikuumira.
Okuuja kwa Omwana wa Omuunu
(Mataayo 24:29‑31; Maariko 13:24‑27)
25“Chiribha‑ko ebhibharikisyo kw‑isuubha, ku‑kwesi, na ku‑njota. Ku‑chaaro anu, jinyanja jiribha na echiwurumo chaafu na amakonjo nigarundumaga. Abhaanu bhanu bhatari Bhayawudi bharinyaaka na okuyaya.#21:25 Ringira Iisaya 13:13; Ejekyeri 32:7; Yoweeri 2:31. 26Mbe, ejo joone aribha jaakorekana ku‑chaaro anu, abhaanu bharyubhaya muno. Bhariyuutuka ku‑songa ya okukangwa, nibharindiriraga okubhonwa na emisango emibhiibhi jinu jirikorekana ku‑chaaro kunu. Amanaga ago goone ga mu‑rutumba garisingisibhwa.
27“Awo niwo murindora anye Omwana wa Omuunu, niniija mu‑riire, niri na amanaga na rikusyo ryafu.#21:27 Ringira Danyeeri 7:13. 28Mbe, emisango ejo, aribha jaamba okukorekana, murumatane, kwa okubha omwanya gwa okwerurwa kwemwe, ogubha guri yeeyi!”
Echijekekanyo cha riiti rinu eribhirikirwa ritiini
(Mataayo 24:32‑35; Maariko 13:28‑31)
29Yeesu ejire aamara, ˆnaabhwira abheeyigisibhwa bhaaye echijekekanyo ati, “Muringire ritiini na amati agandi goone. 30Omwanya gunu omurora ati, amasya ga riiti gaamba okusebhuka, awoawo omumenya ati omwanya gwa ingʼubha ya okwamba gwafogeeye.
31“Nyabhuriko, emwe wone aribha mwarora emisango ejo nijikorekana, mumenye ati, obhukama bhwa Nyamuwanga bhuri yeeyi. 32Ni chimari enibhabhwira ati, riyimbo rinu ritariwaa‑wo ejo joone jichaari okukuumira. 33Orutumba na echaaro bhiritura, nawe emisango jaani jitaritura wuri!
Orusuku rwa obhuteero ruriija kwa okutakya
34“Mwikenge! Emyoyo jeemwe jaasiga okwisigomba kukora jitungwa jimbiibhi, obhunanamba, obhukorwa, na echibhabhuko cha obhurame. Mukarema okutengeeja, orusuku rwa okusubha anye Omwana wa Omuunu ruribhatakya! 35Orusuku orwo, ruritakya abhaanu bhoone ku‑chaaro choone. 36Kurwa ejo, mubhega mutengeejere omwanya gwone! Mugenderere okusabhwa Nyamuwanga, korereki abhayaane obhuturo bhwa okwiruka joone jinu jirikorekana, na mwimereeguru imbere yaani, anye Omwana wa Omuunu.”
37Mbe, mu‑siku ejo, mu‑mwisi, Yeesu aariga ˆneeyigisya abhaanu mw‑Iyekaru rya Nyamuwanga. Mu‑ngeta, aariga ˆnaagenda okumaama ku‑chiima chinu chaariga nichitogwa ati cha Emijeyituuni. 38Abhaanu bhoone bhaamwejaga katondo mw‑Iyekaru rya Nyamuwanga, korereki bhategeresye Yeesu.
Currently Selected:
Ruuka 21: jit
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023, Wycliffe Bible Translators, Inc. All rights reserved.