Àwọn Ẹsẹ Bíbélì Tí Ọ̀pọ̀ Èèyàn Mọ Marcu 13

Pín

Ĩzazei'wa oto 're anomro aba mono wa, te za uburé da te 're ai'ruiwapari za'ra wa'wa. Tane nherẽ, õne haré ĩ'ãma 're anomro u'âsi aba mono wamhã, te za asõ'reptuzé hã asina 're i'uwaimrami za'ra wa'aba mo.

A norĩ wa'aba zama, bâdâ hã waihu'u za'ra wa'aba õ wa, ma'ãpé asimiza'rese, 're aihâimana za'ra wa'aba mono za.

Tawamhã dama ipire norĩ u da te 're asimroi wa'aba mono wamhã, asimirosa'rata na asisõwa asina 're aihâtâ'â za'ra wa'aba mono õ di za, niha tãma 're asiwasu'u za'ra wa'aba mono zéb da hã. Misi bâtâ na, aihâimanazém na da te 're aiwaihu'u za'ra wa'aba mono zém na, 'Re ihâimana u'âsi mono hã te za te te aima 're waihu'u za'ra wa'wa, dama ãma 're asiwaihu'u za'ra wa'aba mono zéb da hã. Asimirosa'rata na, asi'uihâ na dama 're asiwasu'u za'ra wa'aba mono da hã, mare di. 'Re ihâimana u'âsi mono pẽ'ẽzani hã te za te te 're aipawaptob za'ra wa'wa, dama 're asiwasu'u za'ra wa'aba mono zéb da hã.

Nimahã na te za hâiwa norĩ hã ai'utõrĩ zahuré, ti'ai me. Si'utõrĩ zahuré nherẽ, ĩnhimiroti hã si'utõrĩ waihu'u õ di za. Pire na te za dama 're hâimana u'âsi.

Tawamhã ãne ma duré tinhimiroti 'rãsudu hã tãma waihu'u siromo za'ra, Zezusi hã: — Ãne hã uburé za daré 're iromhâimana mono zéb da hã, ni'wa hã bâdâ te te waihu'u õ di. Hâiwa ãma romhuri'wa norĩ zama hã te te duré waihu'u za'ra õ di. Wa hã 'Re ihâimana u'âsi mono 'ra nherẽ, te duré bâdâ hã waihu'u õ di. Ĩmama ma si, waihu'u pese di, bâdâ hã.

'Re dasi'wapé za'ra mono wa, da te dasina 're iropupu'u za'ra mono zé hã, duré romhâ na 're idasi'wapé za'ra mono norĩ wasu'u zama, 're wapari za'ra wa'aba mono wamhã, tãma 're aipahi za'ra wa'aba mono õ di za. Dasi'wapé te za tô dazada 're wairébé. Tane nherẽ, da'ãma rob'rãsutu uptabi õ di za a'â.

'Ri tede'wa hã apâ za iwisizé hã, bâdâ te te waihu'u za'ra õ di, tãma iromhuri'wa norĩ hã. Apâ tinhorõwa u iwisizé hã, ãté hâiwahâ, ãté mara wa'wa, ãté si'a hârâ wi, ãté awẽ wi. Tane bâdâ hã apâ we ĩmorĩzé hã waihu'u za'ra wa'aba õ wa, te za asimiza'rese ĩzô 're asimipari za'ra wa'aba mo, a norĩ wa'aba zama, 're asõtõ za'ra wa'aba mono ne, asimiza'rese ãna 're aihâimana za'ra wa'aba mono ré, apâ we ĩmorĩ õ'umnhasite. Ãne hã aima si, te waihu'u za'ra wa'aba õ di. Uburé ĩzazei'wa norĩ udâna zama, wa aima waihu'u siromo za'ra wa'wa, asimiza'rese, ĩzô 're asimipari za'ra wa'aba mono da.

Danhipti'ai amoi u te za dasisô 're dapra, 're dasi'wapé za'ra mono da. Tawamhã daro mono bâ te za tô 're dasiwasutu za'ra. Nima niwĩmhã, te za duré ti'a hã daré 're popo'o za'ra. Duré dasa surure wa, te za da te 're robzépata za'ra, daro mono bâ. Ãne hã rowasédé, dazô 're wairébé mono wamhã, za daré irob'rãsutu na'rata zé, te wasu'u, pi'õi ãma iwasã hã 're isépu'u na'rata za'ra mono ne. Ãhã haré dazô 're wairébé mono õ di za.

Rob'rãsutu õ ré, te za ĩwasu'u wẽ na te te 're dapo're pu'u za'ra, daro mono bâ, ĩzazei'wa norĩ hã.

Tawamhã Zezusi ma tô asa tãma waihu'u za'ra, ãne: — Ni'wam norĩ hã te za sadawa nhipese na sisarina datẽme 're nomro, ahâ na. Wa hã newa, te za taré ĩnhisi na we 're siwasu'u za'ra, danho'reptui'wa na. Tawamhã da'ahâ na te za ta norĩ ãma da te 're sasõmri za'ra, tô sena newa, dama 're isiwasu'u za'ra mono zé hã. Tahawa, te za a norĩ wa'wa hã asimiza'rese tiwi 're aihâimana za'ra wa'aba mo, sadawa nhipese sina datẽme 're inomro mono norĩ ãma, 're sasõmri za'ra wa'aba mono tõ da.

— Ma'ãpé, aihâimana nhimiza'rese, 're aihâimana za'ra wa'aba mono za. Niwapsi te za a norĩ wa'wa hã da te 're aipawasisi za'ra wa'wa, roti'wa norĩ u, da te 're asimroi wa'aba mono da. Tawamhã ta norĩ zadawa para, te za rowahutuzéb ãma da te 're aihâ za'ra wa'wa, romhâ nhorõ 'manharĩ na. Ĩzazei'wa 're anomro aba mono wa, te za da te 're asimroi wa'wa, dama ipire norĩ u, duré danhib'apito norĩ u zama. Ãne wamhã, te za tãma 're irowasu'u za'ra wa'aba mo, ĩzazei'wa 're anomro aba mono na.

E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese na. Ta norĩ hã marĩ dama i'manharĩ waihu'u'õ hã te za te te dama 're 'manharĩ za'ra, 'Re ihâimana u'âsi mono zadawa para newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da.

Tawamhã Zezusi ma duré tãma waihu'u za'ra, tisiré 're inomro mono norĩ ma, ãne: — Da te robzépata za'ra pari wamhã, bâdâ hã te za titobra. A'amo zama te te oto duré rob'uiwẽ õ di za. Wasi hã te za duré hâiwa hawi rere. Uburé hâiwa na 're isimasa mono hã te za duré 're sisa're.