Marcu 13
13
'Re ihâimana u'âsi mono nhorõwa 'ri, za isi'utõrĩzé wasu'u
Mateu 24.1-2; Luca 21.5-6
1Tawamhã Zezusi norĩ hã 'Re ihâimana u'âsi mono nhorõwa 'ri 'wawi wa'ra hawi, oto wairébé wi, misi te isiré hã 'mai'mahâ, ãne:
— Rowahutu'wa, 'ri hã 'madâ'â za'ra na. Ẽne hã e itõmo wasétére. E i'ri wasétére duré.
2Tawamhã Zezusi te asa tãma tinha, ãne:
— Ã hã 'ri i'madâ'â za'ra wa'wa hã, nimahã na si te za dasiwi pru pese ni, ẽtẽ na 'ri hã. Tawamhã misi si te za oto simi'wara, ẽne hã. Sisisiwi 'manomro waihu'u õ di za oto, ẽne hã. Tâibâ za oto.
Robzépata na rowasu'u, duré da'ruiwapari na rowasu'u
Mateu 24.3-14; Luca 21.7-19
3Tawamhã Zezusi hã te oto nhamra, Oriwera na ẽtẽ 'rãihâ nhisi ãma, tisiré 're inomro mono norĩ me. Sisõ're u, te 'ri 'madâ, 'Re ihâimana u'âsi mono nhorõwa hã. Te te 'madâ'â ré, te siwi sadanha, hâiba pisutu Pedru norĩ hã, Tiagu, Zuwã, Ãdré:
4— E niwa te za ãne hã ãma tiromhâiba, 'ri nhamrazéb da hã. E marĩ te za watobro, da te iwaihu'uzéb da hã. Ma'ãpé, wama waihu'u za'ra na, isõwa wa te ãma iwaihu'u siromo za'ra da hã.
5-6Tawamhã Zezusi ma tô asa tãma waihu'u za'ra, ãne:
— Ni'wam norĩ hã te za sadawa nhipese na sisarina datẽme 're nomro, ahâ na. Wa hã newa, te za taré ĩnhisi na we 're siwasu'u za'ra, danho'reptui'wa na. Tawamhã da'ahâ na te za ta norĩ ãma da te 're sasõmri za'ra, tô sena newa, dama 're isiwasu'u za'ra mono zé hã. Tahawa, te za a norĩ wa'wa hã asimiza'rese tiwi 're aihâimana za'ra wa'aba mo, sadawa nhipese sina datẽme 're inomro mono norĩ ãma, 're sasõmri za'ra wa'aba mono tõ da. 7'Re dasi'wapé za'ra mono wa, da te dasina 're iropupu'u za'ra mono zé hã, duré romhâ na 're idasi'wapé za'ra mono norĩ wasu'u zama, 're wapari za'ra wa'aba mono wamhã, tãma 're aipahi za'ra wa'aba mono õ di za. Dasi'wapé te za tô dazada 're wairébé. Tane nherẽ, da'ãma rob'rãsutu uptabi õ di za a'â. 8Danhipti'ai amoi u te za dasisô 're dapra, 're dasi'wapé za'ra mono da. Tawamhã daro mono bâ te za tô 're dasiwasutu za'ra. Nima niwĩmhã, te za duré ti'a hã daré 're popo'o za'ra. Duré dasa surure wa, te za da te 're robzépata za'ra, daro mono bâ. Ãne hã rowasédé, dazô 're wairébé mono wamhã, za daré irob'rãsutu na'rata zé, te wasu'u, pi'õi ãma iwasã hã 're isépu'u na'rata za'ra mono ne. Ãhã haré dazô 're wairébé mono õ di za.
9— Ma'ãpé, aihâimana nhimiza'rese, 're aihâimana za'ra wa'aba mono za. Niwapsi te za a norĩ wa'wa hã da te 're aipawasisi za'ra wa'wa, roti'wa norĩ u, da te 're asimroi wa'aba mono da. Tawamhã ta norĩ zadawa para, te za rowahutuzéb ãma da te 're aihâ za'ra wa'wa, romhâ nhorõ 'manharĩ na. Ĩzazei'wa 're anomro aba mono wa, te za da te 're asimroi wa'wa, dama ipire norĩ u, duré danhib'apito norĩ u zama. Ãne wamhã, te za tãma 're irowasu'u za'ra wa'aba mo, ĩzazei'wa 're anomro aba mono na. 10Rob'rãsutu õ ré, te za ĩwasu'u wẽ na te te 're dapo're pu'u za'ra, daro mono bâ, ĩzazei'wa norĩ hã. 11Tawamhã dama ipire norĩ u da te 're asimroi wa'aba mono wamhã, asimirosa'rata na asisõwa asina 're aihâtâ'â za'ra wa'aba mono õ di za, niha tãma 're asiwasu'u za'ra wa'aba mono zéb da hã. Misi bâtâ na, aihâimanazém na da te 're aiwaihu'u za'ra wa'aba mono zém na, 'Re ihâimana u'âsi mono hã te za te te aima 're waihu'u za'ra wa'wa, dama ãma 're asiwaihu'u za'ra wa'aba mono zéb da hã. Asimirosa'rata na, asi'uihâ na dama 're asiwasu'u za'ra wa'aba mono da hã, mare di. 'Re ihâimana u'âsi mono pẽ'ẽzani hã te za te te 're aipawaptob za'ra wa'wa, dama 're asiwasu'u za'ra wa'aba mono zéb da hã. 12Niwamhã te za dasisãnawãi uptabi nherẽ, da te dasima 're dahâiba nhomri za'ra, da te 're simroi mono da. Damama norĩ hã te za ti'ra ma, ãne te te tãma 're 'manharĩ wasété za'ra, 'râwim nherẽ. Duré da'ra norĩ hã timama uptabi da nherẽ, te za sada 're hâimana za'ra, te te dama 're hâiba nhomri za'ra mono da, da te 're simroi mono da, ina me. 13Ĩzazei'wa oto 're anomro aba mono wa, te za uburé da te 're ai'ruiwapari za'ra wa'wa. Tane nherẽ, õne haré ĩ'ãma 're anomro u'âsi aba mono wamhã, te za asõ'reptuzé hã asina 're i'uwaimrami za'ra wa'aba mo.
Robzépata za'ẽtẽ wasu'u
Mateu 24.15-28; Luca 21.20-24
14Tawamhã ma duré tãma waihu'u za'ra:
— Nimahã na te za asiwi i'madâ'â za'ra wa'wa, 'Re ihâimana u'âsi mono te te siwi iwẽ'õ pe hã, te te dawi irosawizéb ãma isa hã. (Ãhã wasu'u na rob'ui'éré hã 're sõré za'ra wa'aba mono wamhã, ma'ãpé ãma 're rosa'rata pese za'ra wa'aba mono za, waihu'u za'ra wa'aba da.) Tawamhã ãne hã za oto daré romhâimana wamhã, rowasété si te za a'â daré 're sa'wari. Tahawa, Zudéa ãma 're isi'ubumroi mono norĩ hã, wara sina te za sisa're, ẽtẽ 'rãihâ u ta norĩ hã tiwi simani za'ra da, duré sisõ'reptu za'ra da. 15Ni'wam norĩ hã 'ri nhisi hâpâ ãma si'ubumroi wamhã, tinhibrob zô sisisi õ di za a'â, 'ri para u. Õne haré te za dame sisa're, ẽtẽ 'rãihâ u, ta norĩ hã. 16Duré ni'wam norĩ hã buru ãma te te romhuri za'ra wamhã, 'ri tẽme sisa'rei mono õ di za apâ, tisi'ubuzéb zô. Mare di. Õne haré te za duré ta norĩ hã ẽtẽ 'rãihâ u dame sisa're. 17Ãne hã rowasédé hã daré hâimana wamhã, iwasã ré norĩ ma hã tãma ropipa uptabi za'ra di za, i'ra pré ré norĩ ma zama. 18Tahawa, rowa'u'u wahâ 'rowi, marĩ hã dazô watobro tõ da, te za 'Re ihâimana u'âsi mono wi, 're irowaptẽrẽ za'ra wa'aba mo. 19E marĩ wa. Rowasédé hã oto dazô 're wairébé mono wamhã, te za oto robzépata za'ẽtẽ za'ra ni. 'Re ihâimana u'âsi mono te te i'aropoto na'rata mono zém hawimhã, ãne na da te irobzépata za'ẽtẽ uptabi za'ra õ. Niwamhã ãne na hã da te 're robzépata zahu za'ra mono õ di za. 20'Re ihâimana u'âsi mono hã ma tô sima pisutu, bâdâ hã za da te 're irobzépata za'ra mono zéb da hã, te te dama wãtari da, rowasété ré da'ãma romhâimana pahâ tõ da. Ãne hã te te sima pisutu õ 'wa'âhã, te aré uburé dasi'utõrĩ pese, za da'ãma irob'rãsutuzém na hã. 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ zawi te, te za ãne hã 'manha.
21— Marĩ hã wa za duré aima waihu'u za'ra wa'wa. Ãté ni'wam norĩ hã te za taré te te aima 're rowasu'u za'ra wa'wa, ãne: “Ãhãta danho'reptui'wa da, 'Re ihâimana u'âsi mono te te ipisudu hã te nhamra. Õhõta te nhamra.” Ãne wamhã, ãma 're dazaze za'ra wa'aba mono õ di za, damreme na hã. 22E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese na. Ta norĩ hã marĩ dama i'manharĩ waihu'u'õ hã te za te te dama 're 'manharĩ za'ra, 'Re ihâimana u'âsi mono zadawa para newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da. 23Ãne hã wa aima waihu'u siromo za'ra wa'wa, romhâ ré, pibui pese sina, ãma sô 're rob'madâ'â za'ra wa'aba mono da.
Ti'ai ãma dasiré ipodo hã, za we apâ imorĩzé wasu'u
Mateu 24.29-31; Luca 21.25-28
24Tawamhã Zezusi ma duré tãma waihu'u za'ra, tisiré 're inomro mono norĩ ma, ãne:
— Da te robzépata za'ra pari wamhã, bâdâ hã te za titobra. A'amo zama te te oto duré rob'uiwẽ õ di za. 25Wasi hã te za duré hâiwa hawi rere. Uburé hâiwa na 're isimasa mono hã te za duré 're sisa're. 26Tawamhã ti'ai ãma Dasiré Ipodo hã, hâiwa'a na te za wei mo apâ, danho'a. Tiwaihu'u pese uptabi na, te za wei mo apâ, duré ihâiba na rowa'a za'ẽtẽ uptabi ré. 27Tawamhã hâiwa ãma tãma romhuri'wa norĩ hã te za we dazô satõrĩ za'ra, Ropoto'wa te te sima 're i'apisutu mono norĩ zô, te te itẽme da'ubumro za'ra mono da, daro mono bâ.
Figuera wede wasu'u
Mateu 24.32-35; Luca 21.29-33
28Tawamhã Zezusi hã ma duré ãne tãma waihu'u za'ra:
— Figuera wede na wa za oto aima ãma romnhimiré'é za'ra wa'wa, waihu'u za'ra wa'aba da. Figuera wede panhipti hã wapti'i wamhã, duré isu té 're wairébé mono wamhã, tawapsi te za oto ãma iwaihu'u za'ra wa'wa, tã 're ita'a mono zéb u 're iro'rutu mono zém na hã oto. 29Tane duré, marĩ hã 're iromhâimana mono zéb da, te aima iwasu'u za'ra wa'aba zéb zarina, 'madâ'â za'ra wa'aba wamhã, te za ãma iwaihu'u za'ra wa'wa, rob'rãsudu hã za oto iwatobro na hã. 30Tô sena wa ãne hã aima waihu'u siromo za'ra wa'wa. Ã hã uburé rowasédé hã dazô 're wairébé mono ré, ti'ai ãma 're idasi'ubumroi mono norĩ hã 're dâ'â za'ra mono õ ré, te za isõ'a za'ra ti'rãsutu, rowasédé hã. 31Nimahã na te za hâiwa norĩ hã ai'utõrĩ zahuré, ti'ai me. Si'utõrĩ zahuré nherẽ, ĩnhimiroti hã si'utõrĩ waihu'u õ di za. Pire na te za dama 're hâimana u'âsi.
Zezusi hã, za we apâ timorĩzém na te te iromnhimiré'ézé wasu'u
Mateu 24.36-44
32Tawamhã ãne ma duré tinhimiroti 'rãsudu hã tãma waihu'u siromo za'ra, Zezusi hã:
— Ãne hã uburé za daré 're iromhâimana mono zéb da hã, ni'wa hã bâdâ te te waihu'u õ di. Hâiwa ãma romhuri'wa norĩ zama hã te te duré waihu'u za'ra õ di. Wa hã 'Re ihâimana u'âsi mono 'ra nherẽ, te duré bâdâ hã waihu'u õ di. Ĩmama ma si, waihu'u pese di, bâdâ hã. 33A norĩ wa'aba zama, bâdâ hã waihu'u za'ra wa'aba õ wa, ma'ãpé asimiza'rese, 're aihâimana za'ra wa'aba mono za. 34Romnhimiré'é na, wa za marĩ hã aima waihu'u siromo za'ra wa'wa. Ãté aibâ hã te za tinhorõwa hawi watobro, romhâ na 're morĩ da. Tawamhã sisõ'a ré, tãma iromhuri'wa norĩ ma, te za romhuri hã te te tãma pisutu. Duré 'ridawa 'madâ'â'wai ma zama te za roti, te te sô 're rob'madâ'â pese mono da. 35-36'Ri tede'wa hã apâ za iwisizé hã, bâdâ te te waihu'u za'ra õ di, tãma iromhuri'wa norĩ hã. Apâ tinhorõwa u iwisizé hã, ãté hâiwahâ, ãté mara wa'wa, ãté si'a hârâ wi, ãté awẽ wi. Tane bâdâ hã apâ we ĩmorĩzé hã waihu'u za'ra wa'aba õ wa, te za asimiza'rese ĩzô 're asimipari za'ra wa'aba mo, a norĩ wa'aba zama, 're asõtõ za'ra wa'aba mono ne, asimiza'rese ãna 're aihâimana za'ra wa'aba mono ré, apâ we ĩmorĩ õ'umnhasite. 37Ãne hã aima si, te waihu'u za'ra wa'aba õ di. Uburé ĩzazei'wa norĩ udâna zama, wa aima waihu'u siromo za'ra wa'wa, asimiza'rese, ĩzô 're asimipari za'ra wa'aba mono da.
Àwon tá yàn lọ́wọ́lọ́wọ́ báyìí:
Marcu 13: xavBP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011, Wycliffe Bible Translators, Inc.All rights reserved.